Te Mesia ’e te ha’apa’o ture tao’a rahi

Te Mesia ’e te ha’apa’o ture tao’a rahi,, nā Heinrich Hofmann

19–25 nō Tiurai

Te Parau Ha’api’ira’a ’e te mau Parau Fafau 81–83

’O tei « tu’uhia atu te mea rahi ra, e mea rahi ato’a ïa tē tītauhia atu »

Nāhea te mau heheura’a i roto i Te Parau Ha’api’ira’a ’e te mau Parau Fafau 81–83 i te tauturu i te mau tamari’i tā ’oe e ha’api’i ra ’ia rave i te maita’i i roto i tō rātou ’utuāfare ’e i rotopū i te mau hoa ?

Pāpa’i i te mau mana’o e tae mai

ītona fa’a’itera’a

Tītau i te mana’o

’A ani i te mau tamari’i ’ia fa’a’ite mai i te tahi mea tā rātou i rave nō te tauturu i te hō’ē ta’ata i teie hepetoma. Nāhea te tauturura’a ia vetahi ’ē i te tauturu ia tātou ’ia riro mai tō tātou Fa’aora te huru ?

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 81:3

E ti’a iā’u ’ia pure i te mau taime ato’a

I te pi’ira’a te Fatu ia Frederick G. Williams ’ia riro ’ei tauturu nō te peropheta Iosepha Semita, ’ua a’o ’oia ia Frederick « e ha’apa’o maita’i… i te pure noa i te mau taime ato’a ».

Te mau ’ohipa ri’i e nehenehe e rave

• ’A tai’o i te mau tamari’i i te parau a’o a te Fatu « e ha’apa’o maita’i… i te pure noa i te mau taime ato’a, nā roto i te parau vaha ’e i roto i te ’ā’au ato’a, i te vāhi ta’ata ’e i te vāhi ta’ata ’ore ho’i » (Te Parau Ha’api’ira’a ’e te mau Parau Fafau 81:3). ’A fa’ata’a e aha te aura’a e pure i roto i tō tātou ’ā’au, ’e ’a fa’a’ite i tō ’oe iho hi’ora’a. ’A tauturu i te mau tamari’i ’ia feruri i te mau taime e nehenehe ai rātou e pure « i te vāhi ta’ata ’e i te vāhi ta’ata ’ore. »

• ’A ha’api’i i te mau tamari’i nāhea ’ia pure. ’A ha’apāpū ē, e nehenehe rātou e ha’amāuruuru i te Metua i te ao ra nō tō rātou mau ha’amaita’ira’a ’e e ani iāna nō te mau mea tā rātou e hina’aro. E nehenehe te hō’ē hīmene nō ni’a i te pure, mai « Merci, ô mon Pere divin » (Chants pour les enfants, 9), e tauturu i te mau tamari’i ’ia ’ite e aha tē fa’ahiti i roto i tā rātou mau pure. ’A hōro’a i te tamari’i tāta’itahi i te hō’ē taime nō te parau i te hō’ē pure poto noa.

• ’A ani i te mau tamari’i ’ia feruri i te mau mea tā rātou e ha’amāuruuru i te Metua i te ao ra ’aore rā e ani iāna. ’A vaiiho ia rātou ’ia pāpa’i i te mau hōho’a nō teie mau mea ’e ’a fa’a’ite i te reira i te piha ha’api’ira’a.

Te Parau Ha’api’ira’a ’e te mau Parau Fafau 81:5 ; 82:19

E nehenehe au e tāvini i te feiā e hā’ati ra iā’u.

’Ua ’ite te Metua i te ao ra i te mau hina’aro o tāna mau tamari’i tāta’itahi, ’e e mea pinepine ’oia i te fa’a’ohipa i te tahi atu mau ta’ata—mai te mau tamari’i tā ’oe e ha’api’i ra—nō te tauturu i te pāhonora’a i te reira mau hina’aro. Nāhea e nehenehe ai ia ’oe ’ia tauturu i te mau tamari’i ’ia ’ite i te mau hina’aro o vetahi ’ē, ’e ’ia tāvini ia rātou ?

Te mau ’ohipa ri’i e nehenehe e rave

• ’A tai’o i Te Parau Ha’api’ira’a ’e te mau Parau Fafau 81:5 i te mau tamari’i, ’e ’a tauturu ia rātou ’ia māramarama i te mau parau mai te « aupuru i te feiā paruparu » ’e « fa’ateitei mai i te rima tautau ra i ni’a. » ’A vaiiho ia rātou ’ia ha’uti mai i te mau rāve’a e nehenehe tā tātou e rave i te mea tā te Fatu e ani mai nei i roto i teie ’īrava. Fa’a’ohipa i te mau hōho’a ’aore rā te mau video nō te fa’ati’a i te mau ’ā’amu ’ōhie nō Iesu Mesia i te tāvinira’a ia vetahi ’ē (hi’o te Buka hōho’a nō te ’evanelia, te mau nūmera 41, 42, 46, 47,55 ; biblevideos.ChurchofJesusChrist.org). Nāhea tātou i te pe’e i te hi’ora’a maita’i ’o te Fa’aora, i te tauturura’a ia vetahi ’ē ?

• ’A hīmene i te ’īrava maha o te « Je ressens son amour » (Chants pour les enfants, 42–43) ’aore rā, te tahi hīmene nō ni’a i te tāvinira’a. ’A fa’ati’a nō ni’a i te hō’ē taime ’ua tauturu te hō’ē ta’ata ia ’oe ’ia ’ite i te here ’o te Fa’aora maoti tāna tāvinira’a ia ’oe.

• ’A tai’o i Te Parau Ha’api’ira’a ’e te mau Parau Fafau 82:19 i te mau tamari’i, ma te ha’apāpū i te parau ē, « te ’imira’a i te maita’i nō tōna ra ta’ata tupu. » ’A fa’ata’a ē, te aura’a o teie parau, ’oia ho’i, te ravera’a i te mau mea ’o tē tauturu i tō tātou ta’ata tupu—’e tae noa atu i tō tātou ’utuāfare. ’A tauturu i te mau tamari’i ’ia feruri i te mau rāve’a e nehenehe ia rātou ’ia tāvini i te hō’ē ta’ata i teie hepetoma.

  te mau tamāroa e ’ō nei i te ’āpo’o

  Tē ani mai nei te Atua ia tātou ’ia tāvini i te mau ta’ata nō te fa’a’ite i tō tātou here iāna.

Te Parau Ha’api’ira’a ’e te mau Parau Fafau 82:10

E fafau mai te Atua i te mau ha’amaita’ira’a ’ia ha’apa’o ana’e au i tāna parau.

’A pa’ari ai rātou, e uiui paha te mana’o o te mau tamari’i ē, nō te aha te Atua e hōro’a mai ai e rave rahi mau fa’auera’a. E nehenehe ’oe e tauturu i te mau tamari’i ’ia māramarama ē, tē hōro’a mai nei ’oia ia tātou i te mau fa’auera’a nō te ha’amaita’i ia tātou.

Te mau ’ohipa ri’i e nehenehe e rave

• ’A tauturu i te mau tamari’i ’ia feruri i te mau fa’auera’a tā te Atua i hōro’a mai ia tātou (’a hi’o, ’ei hi’ora’a, Exodo 20:4–17 ; Mataio 22:37–39 ; Te Parau Ha’api’ira’a ’e te mau Parau Fafau 89:5–17). ’A pāpa’i i te hōho’a i ni’a i te tāpura nō te tauturu i te mau tamari’i ’ia māramarama ’e ’ia ha’amana’o i teie mau fa’auera’a. ’A hōro’a i te mau hi’ora’a nō ni’a i te huru e nehenehe ai i te Atua e ha’amaita’i ’e e pāruru ia tātou.

• ’A tai’o i te mau tamari’i, « ’Ua ru’uru’uhia vau, ’o te Fatu, ’ia rave ’outou i te mea tā’u i parau ra » (Te Parau Ha’api’ira’a ’e te mau Parau Fafau 82:10). ’A ani i te mau tamari’i ’ia fa’ahiti fa’ahou i teie pereota e rave rahi taime nā muri ia ’oe, ’e ’a feruri i te mau rāve’a nō te tauturu ia rātou ’ia ha’amana’o i te reira, mai te anira’a ia rātou ’ia tūpa’i i te rima nō te fa’anota i te pereota. ’A fa’a’ite pāpū ē, mai te mea ē, e ha’apa’o tātou i te mau fa’auera’a a te Atua, e tāpe’a ’oia i tāna i parau ia tātou.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 81:3

E nehenehe au e pure « nā roto i te parau vaha ’e i roto i [tō’u] ’ā’au. »

Nāhea e nehenehe ai ia ’oe ’ia fa’auru i te mau tamari’i ’ia fāriu atu i te Fatu ra « i roto i te pure tāmau » ’ia hina’aro ana’e rātou i te tahi mea ?

Te mau ’ohipa ri’i e nehenehe e rave

• ’A ani i te hō’ē ta’ata ’ia tai’o i Te Parau Ha’api’ira’a ’e te mau Parau Fafau 81:3, ’e ’a ani i te mau tamari’i e aha te aura’a e pure « i roto i [tō ’outou] ’ā’au. » ’A fa’a’ite nō ni’a i te hō’ē taime ’ua pure ’oe ma te reo pūai ’aore rā i roto i tō ’oe ’ā’au ’e ’ua tauturu mai te Fatu ia ’oe. ’A ani ato’a i te mau tamari’i ’ia fa’a’ite mai i te ’ohipa i tupu nō rātou. Nāhea te pure i te ha’afātata atu ā ia tātou i te Metua i te ao ra ?

• ’A tai’o ’aore rā ’a hīmene ’e te mau tamari’i i te hō’ē hīmene nō ni’a i te pure, mai te « ’Ua feruri ānei ’outou ’ia pure? » ’aore rā, « I terā hora ma te hau » (Te mau hīmene, nūmera 72, 76). ’A ani i te mau tamari’i ’ia fa’a’ite mai i te hō’ē pereota nō roto i te hīmene ’o tē tauturu ia rātou ’ia māramarama i te tahi mea nō ni’a i te pure. ’A hōro’a ia rātou i te taime nō te feruri hōhonu e aha tē nehenehe ia rātou ’ia rave nō te ha’amaita’i i tā rātou mau pure ’e i muri iho, ’ia pāpa’i i tō rātou mau mana’o.

Te Parau Ha’api’ira’a ’e te mau Parau Fafau 81:5

Tē hina’aro nei te Atua ’ia tāvini au ’e ’ia ha’apūai i te feiā nava’i ’ore.

’A tauturu i te mau tamari’i ’ia māramarama ē, e rave rahi rāve’a e nehenehe rātou e tāvini i tō rātou ’utuāfare, te mau hoa, ’e te mau ta’ata tāpiri mai, i te mau mahana ato’a.

Te mau ’ohipa ri’i e nehenehe e rave

• ’A pāpa’i i te hōho’a nō te rima ’e te turi i ni’a i te tāpura ’ere’ere. ’A ani i te mau tamari’i ’ia tai’o i Te Parau Ha’api’ira’a ’e te mau Parau Fafau 81:5 nō te ha’api’i mai i te parau a te Fatu nō ni’a i teie mau melo o te tino. ’A māta’ita’i i te video « Pass It On » (ChurchofJesusChrist.org), ’aore rā ’a fa’a’ite e mea nāhea ’outou te mau tamari’i i te ’itera’a i te mau ta’ata i te tāvinira’a te tahi ’e te tahi. Nāhea tātou i te ’ite atu ā i te mau ta’ata nava’i ’ore ’ati a’e ia tātou ? ’A ani i te mau tamari’i ’ia tāvini hō’ē a’e ta’ata i teie hepetoma. Nō te mau mana’o nō ni’a i te mau rāve’a nō te tāvini ia vetahi ’ē, ’a hīmene i te hō’ē hīmene nō ni’a i te tāvinira’a, mai te « Ara mai tātou »(Te mau hīmene, n° 148).

• ’A ani i te mau tamari’i te tahi i muri i te tahi ’ia fa’anaho i te mau tōmino (’aore rā te mau tauiha’a mai te reira te huru) ’a fa’ahiti ai ’oia i te mau rāve’a e nehenehe rātou e tāvini ’ia vetahi ’ē. ’A ani i te hō’ē tamari’i ’ia fa’atopa i te hō’ē tōmino ’e ’ia hi’o i te ’ohipa e tupu nō te tahi atu mau tōmino. Nāhea tā tātou tāvinira’a e nehenehe ai e fa’atupu ato’a i te reira huru i ni’a i te mau ta’ata ’ati a’e ia tātou ? (Hi’o ato’a i te video « Dominoes », ChurchofJesusChrist.org.) ’A parau e mea nāhea te tāvinira’a here a te hō’ē ta’ata i te fa’aitoitora’a ia ’oe ’ia tāvini i te tahi atu ta’ata.

Te Parau Ha’api’ira’a ’e te mau Parau Fafau 82:8–10

’Ua fafau mai te Atua i te mau ha’amaita’ira’a ’ia ha’apa’o ana’e au i tāna parau.

’Ia fa’ahotu ana’e te mau tamari’i i te ti’aturi i roto i te mau parau fafau a te Atua, e tupu i te rahi tō rātou hina’aro e ha’apa’o i tāna mau fa’auera’a.

Te mau ’ohipa ri’i e nehenehe e rave

• ’A ani i te mau tamari’i ’ia faruri ē, e hoa tō rātou ’o tē feruri ra ē, ’ua rahi roa te mau fa’auera’a tā te Atua i hōro’a mai. ’A ani ia rātou ’ia ’imi i Te Parau Ha’api’ira’a ’e te mau Parau Fafau 82:8–10 nō te hō’ē mea ’o tē tauturu i tō rātou hoa ’ia māramarama ē, nō te aha te Atua i hōro’a mai ai i te mau fa’auera’a. ’A fa’a’ite e mea nāhea te mau fa’auera’a a te Atua i te ha’amaita’ira’a ia ’oe, ’e ’a ani i te mau tamari’i ’ia fa’a’ite ato’a i tō rātou mau mana’o.

• Nō te tauturu i te mau tamari’i ’ia māramarama i te mau fafaura’a a te Metua i te ao ra ia tātou, ’a vāhi i te piha ha’api’ira’a i roto e toru pupu, ’e ’a hōro’a i te pupu tāta’itahi i te hō’ē o teie mau ’īrava i muri nei nō te tai’o : Te Parau Ha’api’ira’a ’e te mau Parau Fafau 1:37–38 ; 82:10 ; 130:20–21. ’A ani ia rātou ’ia fa’a’ite i te mea tā rātou i ha’api’i mai nō ni’a i te mau fafaura’a a te Metua i te ao ra. E aha te ’ohipa tā tō tātou ha’apa’o e fa’atupu i ni’a i te mau ha’amaita’ira’a tā tātou e nehenehe e fāri’i ? ’A tauturu i te mau tamari’i ’ia feruri i te mau hi’ora’a nō roto mai i tō rātou orara’a ’aore rā, nō roto mai i te mau pāpa’ira’a mo’a, i te fa’ataera’a mai te ha’apa’o i te mau ha’amaita’ira’a nō ’ō mai i te Atua ra.

• ’A fa’a’ite i te hō’ē ’ohipa i tupu nō ’oe ’o tē fa’a’ite pāpū nei i te mau parau tumu i ha’api’ihia i roto i Te Parau Ha’api’ira’a ’e te mau Parau Fafau 82:8–10. Nāhea te tupura’a tō ’oe ti’aturi i te Fatu ’e i tāna mau fafaura’a ?

ītona ’apora’a ha’api’ira’a

Fa’aitoito i te ha’api’ira’a mai i te fare

’A ani i te mau tamari’i ’ia feruri nāhea rātou i te tāvini i te hō’ē ta’ata i roto i tō rātou ’utuāfare i teie hepetoma. I roto i te ha’api’ira’a nō te hepetoma i muri nei, ’a fa’aue ia rātou ’ia fa’a’ite mai i te ’ohipa tā rātou i rave.

Haʼamaitaʼiraʼa i tā tātou haʼapiʼiraʼa

E tauturu i te mau tamari’i ’ia riro ’ei mau pīahi maita’i a’e. Te ha’api’ira’a ’ua hau atu ïa i te hōro’a-noa-ra’a i te parau mau. Te aura’a ra, ’o te tauturura’a ïa ia vetahi ’ē ’ia fa’ananea i te fa’arava’ira’a iāna iho i te pae vārua. ’Eiaha rā te parau-noa-ra’a i te mau tamari’i nāhea e nehenehe ai ia rātou ’ia tāvini ia vetahi ’ē, ’ei hi’ora’a, ’a fa’aitoito ia rātou ’ia feruri i tō rātou iho mau mana’o.

’api ’ohipara’a : E nehenehe au e tāvini ia vetahi ’ē