Haerera’a i te fare, nā Yongsung Kim

12–18 nō Tiurai

Te Parau Ha’api’ira’a ’e te mau Parau Fafau 77–80

« E arata’i atu nā vau ia ’outou »

’Ia tuatāpapa ana’e ’oe i Te Parau Ha’api’ira’a ’e te mau Parau Fafau 77–80, ’a ’imi i te mau fa’ahitira’a parau ’aore rā i te mau ’īrava ’o tē nehenehe e tauturu i te mau tamari’i ’ia māramarama maita’i a’e i te mau parau tumu o te ’evanelia. ’Aita e ’ōpanihia ’ia fa’a’ite i te mau ’īrava tei ’itehia ia ’oe, noa atu ē, ’aita te reira e vai ra i roto i te mau ’ohipa ri’i i raro nei.

Pāpa’i i te mau mana’o e tae mai

Tītau i te mana’o

’A ani i te mau tamari’i ’ia fa’a’ite mai i te mau mea tā rātou e māuruuru nei. E aha tā rātou ’e tō rātou ’utuāfare e rave nei nō te fa’a’ite i te Metua i te ao ra ē, tē māuruuru nei rātou nō tāna mau ha’amaita’ira’a ?

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 77:2

Nā te Atua i hāmani i te mau mea ato’a i ni’a i te fenua nei.

E nehenehe te ha’api’ira’a i te mau mea tā te Atua i hāmani, e tauturu i te mau tamari’i ’ia ’ite i tōna here nō rātou.

Te mau ’ohipa ri’i e nehenehe e rave

• ’A fa’a’ite i te mau tamari’i i te mau hōho’a o te mau ’ānimara, ’e tae noa atu i te mau manumanu ’e te mau manu. ’Ia tai’o ana’e ’oe i te mau ta’o « pua’a », « te mau mea e ne’e haere », ’e « te mau manu o te reva » i roto i Te Parau Ha’api’ira’a ’e te mau Parau Fafau 77:2, ’a ani i te mau tamari’i ’ia fa’atoro i ni’a i te mau hōho’a e tū’ati i te reira. ’A fa’a’ite pāpū ē, ’ua hāmani te Atua i teie mau mea ato’a nō te mea ’ua here ’oia ia tātou ’e tē hina’aro nei ’oia ’ia ’oa’oa tātou (hi’o ato’a i Te Parau Ha’api’ira’a ’e te mau Parau Fafau 59:16–20).

• ’A hīmene ’e te mau tamari’i i te hō’ē hīmene nō ni’a i te mau mea i hāmanihia e te Atua, mai te « Mon Père Celeste m’aime » (Chants pour les enfants, 16–17). ’A ani i te mau tamari’i nāhea te mau mea tā rātou e hīmene nei i te tauturu ia rātou ’ia ’ite i te here ’o te Atua.

  

  ’Ua hāmani te Atua i te fenua ’e te mau mea ato’a i ni’a iho ra.

Te Parau Ha’api’ira’a ’e te mau Parau Fafau 78:6

E nehenehe au e hōro’a i tā’u nā vetahi ’ē.

Tē hina’aro nei te Metua i te ao ra ’ia hōro’a hua tātou i tō tātou mau ha’amaita’ira’a i te tahi ’e te tahi, ’ia nehenehe ho’i tātou « ’ia ’aifāito i roto i te mau mea nō te fenua nei » ’e i roto « i te mau mea nō te ao ra » (’īrava 6).

Te mau ’ohipa ri’i e nehenehe e rave

• Nō te ha’api’i e aha te aura’a « ’ia ’aifāito i roto i te mau mea nō te fenua nei » (’īrava 6), ’a hōro’a i te mau tamari’i i te mau hōho’a nō te mau ta’ata nava’i ’ore (mai te mau ta’ata tei po’ia, tei pēpē, ’aore rā tei to’eto’e). I muri iho ’a hōro’a i te tahi atu mau tamari’i i te mau tauiha’a ’o tē tauturu (mai te mā’a, te hō’ē tā’amu ma’i, ’aore rā hō’ē ’ahu ta’oto). ’A ani i teie mau tamari’i ’ia hōro’a i tā rātou nō te tauturu i te ta’ata i roto i te mau hōho’a. ’A vaiiho i te tahi atu mau tamari’i, te tahi i muri i te tahi, ’ia hōro’a ato’a. ’A tauturu i te mau tamari’i ’ia māramarama ē, tē hina’aro nei te Metua i te ao ra i tāna mau tamari’i pā’āto’a ’ia fāri’i i te mea tā rātou e hina’aro, ’e nō te rave i te reira, pinepine ’oia i te ani mai ia tātou ’ia hōro’a i tā tātou nā vetahi ’ē.

• ’A tai’o i te mau tamari’i i te mau parau i raro a’e i nā hōho’a mātāmua o te « Pene 28: Tē haere fa’ahou nei te peropheta Iosepha i Missouri » (Te mau ’ā’amu nō te Parau Ha’api’ira’a ’e te mau Parau Fafau, 108). ’A ani i te mau tamari’i ’ia fa’ahua tauturu i te hō’ē ta’ata ’ia patu i te hō’ē fare, ’ia fa’ahua hōro’a i te mā’a, ’aore rā ’ia fa’ahua tāvini nā roto i te tahi atu rāve’a. E aha tō tātou huru ’ia tauturu ana’e tātou ’e ’ia hōro’a ana’e ? ’A tauturu i te mau tamari’i ’ia feruri i te mau mea tā Iesu Mesia e hōro’a mai nei nā tātou.

Te Parau Ha’api’ira’a ’e te mau Parau Fafau 78:18

E arata’i Iesu Mesia iā’u.

Mai te mea ē, e hina’aro tātou e vaiiho i te Fatu « ’ia arata’i ia tātou », e nehenehe tātou « e ’oa’oa maita’i », noa atu ē, tē vai ra te mau mea ’aita e ti’a ia tātou « ’ia fa’a’oroma’i i teienei »(’īrava 18).

Te mau ’ohipa ri’i e nehenehe e rave

• ’A ani i te mau tamari’i ’ia fa’a’ite i te mau taime ’a riro ai rātou ’ei arata’i, mai te ti’ara’a i mua i te hō’ē ’āna’ira’a, ’aore rā te arata’ira’a i te hīmene. E aha tā te hō’ē arata’i e rave ? ’A fa’a’ite i te hōho’a ’o te Fa’aora ’ia tai’o ana’e ’oe i teie fa’ahitira’a parau i muri nei i roto i Te Parau Ha’api’ira’a ’e te mau Parau Fafau 78:18 : « A ’oa’oa maita’i nā nō te mea e arata’i atu nā vau ia ’outou ». ’A fa’a’ohipa i te ’api ’ohipara’a nō teie hepetoma nō te tauturu i te mau tamari’i ’ia feruri i te mau rāve’a e nehenehe ai ia tātou ’ia pe’e i te Fa’aora.

• ’A ani i te mau tamari’i ’ia pe’e ia Iesu, ’e ’a arata’i ia rātou nā roto i te piha ’a tāpe’a noa ai ’oe i tōna hōho’a. ’A nā reira ai ’outou, ’a hīmene ’āmui i te hō’ē hīmene nō ni’a i te pe’era’a ia Iesu Mesia, mai te « Jésus-Christ est mon modèle » ’aore rā « Choisir le bien » (Chants pour les enfants, 40–41, 82–83). ’A fa’aue i te mau tamari’i, te tahi i muri i te tahi, ’ia tāpe’a i te hōho’a ’e ’ia arata’i i te tahi atu mau tamari’i.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 77

E roa’a iā’u te pāhonora’a i tā’u mau uira’a nō ni’a i te mau pāpa’ira’a mo’a.

E nehenehe te ha’api’ira’a i te mau tamari’i e nāhea tō Iosepha Semita ’imira’a i te mau pāhonora’a i tāna mau uira’a, e tauturu ia rātou ’ia ’ite ē, e pāhono mai te Metua i te ao ra ia rātou ’ia ’imi ana’e rātou i tāna arata’ira’a. E nehenehe e fa’a’ite i te mau ’ohipa i tupu ’a fāri’i ai ’oe i te mau pāhonora’a nō ’ō mai iāna ra.

Te mau ’ohipa ri’i e nehenehe e rave

• ’A tai’o i te mau tamari’i i te mau parau i raro a’e i nā hōho’a mātāmua e toru o te « Pene 27 : ’Ua tāmau noa te peropheta i tāna ’ohipa noa atu te hāmani-’ino-ra’a » (Te mau ’ā’amu nō te Parau Ha’api’ira’a ’e te mau Parau Fafau, 104). ’A ani i te mau tamari’i ē, ’ua tupu a’ena ānei tō rātou mana’o, mai tō Iosepha ē, ’aita rātou i māramarama i te hō’ē mea i roto i te mau pāpa’ira’a mo’a. ’A vaiiho ia rātou ’ia fa’a’ite mai i te mau ’ohipa i tupu nō rātou. E aha tā Iosepha i rave nō te ’ite i te mau pāhonora’a ? ’A fa’ati’a i te mau tamari’i nō ni’a i te hō’ē taime ’a tauturu ai te Metua i te ao ra ia ’oe ’ia māramarama i te hō’ē mea i roto i te mau pāpa’ira’a mo’a.

• Penei a’e e ’ana’anatae te mau tamarii tā ’oe e ha’api’i nei ’ia tai’o i te tahi mau ’īrava i roto i te buka a te Apokalupo tā Iosepha Semita i feruri. I reira e nehenehe tā rātou e hi’o i roto i Te Parau Ha’api’ira’a ’e te mau Parau Fafau 77, i te mea tā te Fatu i hina’aro ’ia māramarama ’oia. ’A mā’iti i te tahi mau ’īrava tā ’oe e mana’o ra ē, e mea faufa’a.

Te Parau Ha’api’ira’a ’e te mau Parau Fafau 78:3–7

E nehenehe au e tauturu « nō te fa’ahaere i te ’ohipa » a Iesu Mesia i mua.

I roto i te tuha’a 78, ’ua hōro’a mai te Fatu i te mau arata’ira’a pāpū i te feiā fa’atere e rave rahi o te ’Ēkālesia, tei tauturu ia rātou nō te « fa’ahaere i te ’ohipa » a te Fatu i mua (’īrava 4). ’A tauturu i te mau tamari’i ’ia feruri e aha ra tā rātou ’ohipa nō te fa’ahaere i te ’ohipa a te Fatu i mua.

Te mau ’ohipa ri’i e nehenehe e rave

• ’A ani i te mau tamari’i ’ia tai’o i Te Parau Ha’api’ira’a ’e te mau Parau Fafau 78:4. E aha te « ’ohipa » tā tātou e « fāri’i nei » (e fāri’i ’aore rā, e pāturu) ’a bāpetizohia ai tātou ? ’A fa’aitoito ia rātou ’ia ’imi i roto i te mau ’īrava mai teie i muri nei, i te mau pāhonora’a : Mosia 18:8–10 ; Te Parau Ha’api’ira’a ’e te mau Parau Fafau 20:37 ; Mose 1:39.

• ’A fa’ata’a atu i te mau tamari’i ē, tē fatu ra ’o Newel K. Whitney i te hō’ē fare toa, ’e ’ua ani te Fatu iāna ’e i te tahi atu mau ta’ata ’ia fa’a’ohipa i te tahi mau moni tā rātou nō te tauturu i te ’aufaura’a i te ’ohipa a te Fatu (hi’o Te Parau Ha’api’ira’a ’e te mau Parau Fafau 63:42–43). ’A ani ia rātou ’ia tai’o i Te Parau Ha’api’ira’a ’e te mau Parau Fafau 78:3–7 ’e ’ia ’imi i te mau tumu i anihia ai i teie mau ta’ata ’ia nā reira. E aha tō tātou mana’o ’āhiri ē, ’ua anihia mai ia tātou ’ia hōro’a mai ia Newel te huru ? ’A tauturu ia rātou ’ia feruri i te mau rāve’a e tauturu ai te ta’ata i te ’ohipa a te Fatu i tō tātou nei ’anotau, mai te ’aufaura’a i te tuha’a ’ahuru ’e te mau ō ha’apaera’a mā’a, te tāvinira’a i roto i te mau pi’ira’a, ’e tē vai atu ra.

Te Parau Ha’api’ira’a ’e te mau Parau Fafau 78:19

E ti’a iā’u ’ia fāri’i i « te mau mea ato’a mai te māuruuru. »

E mea pinepine te Fatu i te ha’amaita’i atu ā ia tātou mai te mea ē, e māuruuru tātou nō te mau mea tāna i hōro’a a’ena mai ia tātou. Nāhea e nehenehe ai ia ’oe ’ia tauturu i te mau tamari’i tā ’oe e ha’api’i ra ’ia māuruuru nō tō rātou mau ha’amaita’ira’a ?

Te mau ’ohipa ri’i e nehenehe e rave

• ’A ani i te mau tamari’i ’ia tai’o i Te Parau Ha’api’ira’a ’e te mau Parau Fafau 78:19 ’e ’ia ’imi e aha te parau fafau a te Fatu, i te feiā tei fa’a’ite i te māuruuru. ’A tauturu i te mau tamari’i ’ia māramarama e aha te aura’a, « ’e ’ia hānere a’e te tufa’a ’āpī », nā roto paha i te fa’a’itera’a i te hō’ē tauiha’a ha’iha’i, ’e i muri iho, fa’a’ite 100 rahira’a o te reira noa ā tauiha’a.

• ’A hīmene i te hō’ē hīmene nō ni’a i te māuruuru, mai te « I Am Glad for Many Things » (Children’s Songbook, 151), ’aore rā, ’a māta’ita’i i te video « Think to Thank » (ChurchofJesusChrist.org). Vaiiho i te taime i te mau tamari’i nō te hāmani i te hō’ē tāpura nō te mau mea tā rātou e māuruuru nei. ’A fa’aitoito ia rātou ’ia tāpura e rave rahi mau mea i roto i te taime tā ’oe e hōro’a ia rātou.

Fa’aitoito i te ha’api’ira’a mai i te fare

E nehenehe e fārerei i te mau metua o te mau tamari’i tā ’oe e ha’api’i ra, ’e ’ia hōro’a atu i te hō’ē uira’a tā rātou e nehenehe e ui i tā rātou mau tamari’i nō ni’a i te hō’ē mea tā rātou i ’apo mai i roto i te piha ha’api’ira’a.

Haʼamaitaʼiraʼa i tā tātou haʼapiʼiraʼa

E fa’a’ite pāpū i te mau ha’amaita’ira’a i fafauhia mai. ’Ia ani ana’e ’oe i te mau tamari’i nō te Paraimere ’ia ora i te hōʼē ture, ’a faʼaʼite i tā te Atua i parau nā roto i te mau peropheta, i te mau taʼata ’o tē haʼapaʼo i taua ture ra. E ’itehia te hō’ē hi’ora’a nō te hō’ē parau fafau ’o tā ’oe e nehenehe e fa’a’ite i roto i Te Parau Ha’api’ira’a ’e te mau Parau Fafau 78:19. (Hi’o ato’a Ha’api’ira’a mai tā te Fa’aora, 35.)