Te ha’apūra’a, nā Shaelynn Abel

5–11 nō Tiurai

Te Parau Ha’api’ira’a ’e te mau Parau Fafau 76

« E rahi roa tō rātou utu’a, ’e tō rātou hanahana, e vai ā te reira ē a muri noa atu. »

’Ia tuatāpapa ’oe i te Parau Ha’api’ira’a ’e te mau Parau Fafau 76, ’a feruri i te mea tā te Metua i te ao ra e hina’aro i te mau tamari’i tā ’oe e ha’api’i nei i roto i tā ’oe piha, ’ia ’ite nō ni’a iāna, nō ni’a i te Fa’aora, nō ni’a ia rātou iho, ’e nō ni’a i tō rātou hope’ara’a mure ’ore.

Pāpa’i i te mau mana’o e tae mai

Tītau i te mana’o

’A fa’a’ite i te mau tamari’i i te mau hōho’a ’aore rā i te mau ’api ’ohipara’a i roto i te arata’i ha’api’ira’a nō teie hepetoma ’aore rā, i roto i te mau arata’i ha’api’ira’a nā mua atu. ’A vaiiho ia rātou ’ia parau mai ia ’oe i te mea tā rātou e ’ite ra i roto i teie mau hōho’a, ’e e aha tā rātou e ha’amana’o ra i tā rātou i ’apo mai nā roto mai i te reira.

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 76:24

E mau tamari’i pā’āto’a tātou nā te Atua

’Ua parau te Peresideni Dallin H. Oaks ē, mai te mea e ha’api’i tātou i « te hō’ē ta’ata ’āpī i te mana’o pūai ē, e tamari’i ’oia nā te Atua », e nehenehe tā tātou e hōro’a iāna i te « fa’atura iāna iho ’e i te hina’aro pūai ’ia fa’aruru i te mau fifi o te orara’a nei » (« Powerful Ideas », Ensign, Novema 1995 25).

Te mau ’ohipa ri’i e nehenehe e rave

• Nō te tauturu i te mau tamari’i ’ia māramarama i tō rātou fāito pūai ’ia riro mai te Atua te huru, ’a ’imi i te mau rāve’a nō te fa’a’ite ia rātou ē, e pa’ari te mau fanau’a ’ānimara ’ia riro mai rātou mai tō rātou nau metua—e nehenehe paha te mau tamari’i e fa’atū’ati i te mau hōho’a o te mau ’ānimara i ni’a i te mau hōho’a o te mau fanau’a ’ānimara. ’A ’īriti i te mau pāpa’ira’a mo’a i Te Parau Ha’api’ira’a ’e te mau Parau Fafau 76:24, ’e ’a parau i te mau tamari’i ē, e « mau tamaiti ’e e mau tamāhine pā’āto’a tātou nā te Atua ra ». ’A fa’a’ite i tō ’oe ’itera’a pāpū ē, ’o te Atua tō tātou Metua ’e e nehenehe tātou e tupu i te pa’ari nō te riro mai mai tō tātou nā Metua i te ao ra.

• ’A hīmene ’āmui « E tamari’i au nā te Atua » (Chants pour les enfants, 2–3), ’e ’a ani i te mau tamari’i ’ia fa’atoro i ni’a ia rātou iho ’ia hīmene ana’e rātou « au ». ’A ani ia rātou ’ia hīmene fa’ahou i te hīmene, ma te mono i te « e tamari’i au » i te « e tamari’i ’oe » ma te fa’atoro i ni’a i te tahi atu tamari’i i roto i te piha.

Te Parau Ha’api’ira’a ’e te mau Parau Fafau 76:40–42

’O Iesu Mesia te Fa’aora o te ao nei.

Te aura’a nō te ta’o ’evanelia ’oia ho’i, parau ’āpī maita’i. Te parau ’āpī maita’i tā te ’evanelia e hōpoi mai nei ’oia ho’i, « ’ua haere mai [’o Iesu Mesia] i te ao nei… nō te tāmā atu i te reira i te parau-ti’a ’ore ato’a » (’īrava 41).

Te mau ’ohipa ri’i e nehenehe e rave

• ’A parau i te mau tamari’i nō ni’a i te tahi mau parau ’āpī maita’i tā ’oe i fa’aro’o ’aita i maoro a’enei. ’A ani ia rātou ’ia fa’a’ite mai i te mau parau ’āpī maita’i tā rātou i fa’aro’o. I muri iho, ’a fa’a’ite ia rātou i te mau parau ’āpī maita’i o te ’evanelia nā roto i te tai’ora’a i Te Parau Ha’api’ira’a ’e te mau Parau Fafau 76:41–42. ’A ani i te mau tamari’i e aha tō rātou mana’o i teie mau parau ’āpī maita’i. ’A fa’a’ite ia rātou i te ’oa’oa tā teie mau parau ’āpī maita’i e hōro’a mai nei ia ’oe.

• Fa’a’ite i te hō’ē hōho’a nō Iesu Mesia. ’A ani i te mau tamari’i ē, ’ua ’ite ānei rātou e aha tā Iesu Mesia i rave nō tātou. ’A fa’a’ite i te mau tamari’i i te tahi mea repo ’e te tahi mea mā (mai te hō’ē horoi ’uo’uo ’aore rā hō’ē ’api parau), ’e ’a fa’ata’a ē, e au te hara mai te repo i ni’a i tō tātou vārua, terā rā, ’ua haere mai Iesu Mesia nō te tauturu ia tātou ’ia mā fa’ahou tātou.

  

  Vaiiho noa i te tamari’i ri’i, nā J Kirk Richards

Te Parau Ha’api’ira’a ’e te mau Parau Fafau 76:62

Tē hina’aro nei te Metua i te ao ra ’ia ho’i au e ora i pīha’i iho iāna ē a muri noa atu.

Tē fa’a’ite mai nei te ’ōrama a Iosepha Semita ’e a Sidney Rigdon nō ni’a i te bāsileia tīrētiēra, i te mau ha’amaita’ira’a rarahi tā te Atua i fa’aineine nō tāna mau tamari’i, ’e tae noa atu i te mau mea tei tītauhia ia tātou ’ia rave nō te fāri’i i te reira mau ha’amaita’ira’a.

Te mau ’ohipa ri’i e nehenehe e rave

• ’A parau i te mau tamari’i nō ni’a i nā bāsileia hanahana e toru tā Iosepha ’e tā Sidney i ’ite i roto i tā rāua ’ōrama. (E nehenehe ’oe e tai’o i te mau tamari’i i te tahi tuha’a ’aore rā i te tā’āto’ara’a o te « Pene 26 : Nā bāsileia o te ao e toru » [Te mau ’ā’amu nō te Parau Ha’api’ira’a ’e te mau Parau Fafau, 97–103] ’aore rā, ’a fa’a’ite i te video nō te reira, i ni’a i te ChurchofJesusChrist.org.) ’A ani i te mau tamari’i e aha tā rātou i au nō ni’a i te ’ōrama. ’A rōtahi ta’a ’ē i ni’a i te fa’ata’ara’a i te bāsileia tīrētiēra, ’e ’a fa’a’ite pāpū ē, terā te vāhi tā te Metua i te ao ra e hina’aro ’ia pārahi tātou tāta’itahi.

• ’A tai’o i te mau tamari’i i Te Parau Ha’api’ira’a ’e te mau Parau Fafau 76:62, ’e ’a ani i te mau tamari’i ’ia pāpa’i i tō rātou iho hōho’a i pīha’i iho i te Metua i te ao ra ’e ia Iesu Mesia i roto i te bāsileia tīrētiēra.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 76:5, 41–42, 69

’O Iesu Mesia tō’u Fa’aora.

’A tauturu i te mau tamari’i ’ia māramarama ē, te mau ha’amaita’ira’a hanahana tā te Atua i fafau mai i te feiā ha’apa’o i roto i te orara’a a muri a’e, e noa’a te reira nā roto noa i te Fa’aora ia Iesu Mesia.

Te mau ’ohipa ri’i e nehenehe e rave

• ’A pāpa’i i ni’a i te tāpura ’ere’ere E aha tā Iesu Mesia i rave nō’u ? ’A ani i te tamari’i tāta’itahi ’ia tai’o ma te māniania ’ore i te ’īrava 5, te mau ’īrava 41–42, ’aore rā te ’īrava 69 i roto i te tuha’a 76, ma te ’imi i te mau pāhonora’a i te uira’a i ni’a i te tāpura ’ere’ere. ’A vaiiho ’ia rātou ’ia fa’a’ite mai i tā rātou mau pāhonora’a (hi’o ato’a « Il envoya Son fils », Chants pour les enfants, 34–35). Nāhea e ti’a ai ia tātou ’ia fa’a’ite i tō tātou māuruuru nō te ’ohipa tā te Fa’aora i rave nō tātou ?

• ’A pāpa’i i te Hīro’a Fa’aro’o toru i ni’a i te tāpura, ma te vaiiho vata noa i te mau vāhi o te mau ta’o faufa’a. ’A hōro’a i te mau tamari’i i teie mau ta’o e mo’e ra i ni’a i te mau ’api parau, ’e ’a ani ia rātou ’ia tu’u i tā rātou ta’o i te vāhi tano i ni’a i te tāpura ’ere’ere. E aha tā teie hīro’a fa’aro’o e ha’api’i mai nei ia tātou nō ni’a i te tumu e tītau ai tātou ia Iesu Mesia ? (hi’o ato’a i te video « Why We Need a Savior, » ChurchofJesusChrist.org).

Te Parau Ha’api’ira’a ’e te mau Parau Fafau 76:12, 15–19, 114–16

E nehenehe te tuatāpapara’a i te mau pāpa’ira’a mo’a e tauturu iā’u « ’ia māramarama i te mau mea a te Atua. »

’Ua fāri’i Iosepha Semita ’e ’o Sidney Rigdon i Te Parau Ha’api’ira’a ’e te mau Parau Fafau 76 i te taime ’a feruri ai rāua i ni’a i te mau pāpa’ira’a mo’a. ’A tauturu i te mau tamari’i ’ia hi’o ē, nāhea te tuatāpapara’a i te mau pāpa’ira’a mo’a e nehenehe ai e ani i te heheura’a nā roto mai i te Vārua Maita’i.

Te mau ’ohipa ri’i e nehenehe e rave

• ’A ani i te mau tamari’i ē, ’ua ’ite ānei rātou ē, e aha te ’ohipa tā Iosepha Semita ’e tā Sidney Rigdon e rave ra i tō rāua ’itera’a i te ’ōrama i roto i Te Parau Ha’api’ira’a ’e te mau Parau Fafau 76. ’A ani ia rātou ’ia tai’o i te mau ’īrava 15–19 nō te ’ite i te reira. ’A fa’a’ite i te hō’ē taime ’a fāri’i ai ’oe i te fa’aurura’a ’a tai’o ai ’oe i te mau pāpa’ira’a mo’a, ’e ’a ani i te mau tamari’i ’ia ’āparau nō ni’a i te mau mana’o pae vārua e roa’a ia rātou ’a tai’o ai rātou i te mau pāpa’ira’a mo’a.

• ’A ani i te mau tamari’i ’ia tāpiri i tō rātou mata ’e ’ia tāmata i te rave i te hō’ē ’ohipa, mai te pēnira’a i te hō’ē hōho’a ’aore rā, te ’īritira’a i te mau pāpa’ira’a mo’a i te hō’ē ’īrava pāpū maita’i. E aha te tahi mau mea e mea fifi roa ’ia rave mai te mea ē, ’ua piri tō tātou mata i te pae vārua ? ’A tai’o ’āmui i Te Parau Ha’api’ira’a ’e te mau Parau Fafau 76:12, 15–19, 114–16 nō te ’ite ē, e aha tē tītauhia ia tātou ’ia rave nō te ’īriti i tō tātou mata i te pae vārua.

Te Parau Ha’api’ira’a ’e te mau Parau Fafau 76:50–70

’Ua fa’aineine te Metua i te ao ra i te hō’ē bāsileia nō te hanahana tīrētiēra nō’u.

E nehenehe te ’itera’a nō ni’a i te hanahana tīrētiēra tā te Atua i fa’aineine, e fa’auru i te mau tamari’i ’ia « upo’oti’a nā roto i te fa’aro’o » (’īrava 53) i te mau tāmatara’a ’e te mau fa’ahemara’a tā rātou e fa’aruru.

Te mau ’ohipa ri’i e nehenehe e rave

• Mai te mea ē, e ui mai te hō’ē ta’ata ia tātou, « nō te aha vau e pe’e ai ia Iesu Mesia ’e e ha’apa’o ai i tāna mau fa’auera’a ? » e aha tā tātou e parau ? ’A ani i te mau tamari’i ’ia ’imi i te mau pāhonora’a i roto i te Te Parau Ha’api’ira’a ’e te mau Parau Fafau 76:50–70, ’o tē fa’ata’a nei i te feiā ’o tē fāri’i i te ora mure ’ore i roto i te bāsileia tīrētiēra. ’A vaiiho i te mau tamari’i ’ia ha’uti ta’ata ora i te pāhonora’a i te uira’a. ’A fa’a’ite i tō ’oe ’itera’a pāpū nō ni’a i te mau ha’amaita’ira’a rarahi tā te Metua i te ao ra i fa’aineine nō tātou mai te mea ē, e pe’e tātou ia Iesu Mesia.

• ’A pāpa’i i te hō’ē hōho’a rahi o te mahana i ni’a i te hō’ē ’api parau, ’e ’a tāpūpū i te reira e rave rahi tuha’a piriapu. ’A hōro’a i te tamari’i tāta’itahi i te hō’ē tuha’a ’api parau, ’e te hō’ē o teie mau ’īrava i muri nei nō te tai’o : Te Parau Ha’api’ira’a ’e te mau Parau Fafau 76:51; 76:52; 76:53; 131:1–2. ’A ani i te mau tamari’i ’ia ’imi i roto i tā rātou mau ’īrava i te hō’ē mea ’o tē ti’a ia tātou ’ia rave nō te fāri’i i te ora mure ’ore i roto i te bāsileia tīrētiēra (i roto i te tahi mau ’īrava, ’ua hau atu i te hō’ē pāhonora’a), ’e ’a pāpa’i i te reira i ni’a i tā rātou tuha’a ’api parau o te mahana. ’A ’ohipa ’āmui ai rātou nō te hāmani i te piriapu, ’a fa’a’ite i tō ’oe ti’aturi ia rātou ē, nā roto i te tauturu a te Fa’aora, e nehenehe rātou e fāri’ihia i te bāsileia tīrētiēra ra.

Fa’aitoito i te ha’api’ira’a mai i te fare

’A ani i te mau tamari’i ’ia fa’a’ohipa i te ’api ’ohipara’a nō te ha’api’i i tō rātou ’utuāfare i te mea tā rātou i ha’api’i mai nō ni’a i te ’ōrama tā Iosepha Semita ’e tā Sidney Rigdon i fāri’i.

Ha’amaita’ira’a i tā tātou ha’api’ira’a

Fa’a’ohipa i te mau pāpa’ira’a mo’a. Noa atu ē, ’aita ā e nehenehe i te mau tamari’i tā ’oe e ha’api’i nei e tai’o, ’a fa’a’ohipa pinepine i te mau pāpa’ira’a mo’a ’a ha’api’i ai ’oe ia rātou. ’A fa’a’ite ia rātou ē, te mau parau mau tā ’oe e fa’a’ite nei, nō roto mai ïa i te mau pāpa’ira’a mo’a.