Te Parau Ha’api’ira’a ’e te mau Parau Fafau 2021
28 nō Tiunu–4 nō Tiurai. Te Parau Ha’api’ira’a ’e te mau Parau Fafau 71–75 : « ’Aore hō’ē mauha’a ’o tē tu’uhia mai ’ei pāto’ira’a ia ’ōrua ’o tē manuia »

« 28 nō Tiunu–4 nō Tiurai. Te Parau Ha’api’ira’a ’e te mau Parau Fafau 71–75: ‘’Aore hō’ē mauha’a ’o tē tu’uhia mai ’ei pāto’ira’a ia ’ōrua ’o tē manuia’ », Mai, pe’e mai—nō te Paraimere: Te Parau Ha’api’ira’a ’e te mau Parau Fafau 2021 (2020)

« 28 nō Tiunu–4 nō Tiurai. Te Parau Ha’api’ira’a ’e te mau Parau Fafau 71–75 », Mai, pe’e mai—nō te Paraimere : 2021

Hōho’a
Iesu ’e te mau māmoe

Herehia e te māfatu o te tīa’i māmoe, nā Simon Dewey

28 nō Tiunu–4 nō Tiurai

Te Parau Ha’api’ira’a ’e te mau Parau Fafau 71–75

« ’Aore hō’ē mauha’a ’o tē tu’uhia mai ’ei pāto’ira’a ia ’ōrua ’o tē manuia »

E nehenehe te mau tamari’i tā ’oe e ha’api’i nei e ha’api’i rahi mai i roto i te piha ha’api’ira’a, terā rā, e rahi atu ā tā rātou e ’apo mai, mai te mea ē, e ha’amau rātou i te hō’ē peu tuatāpapara’a pāpa’ira’a mo’a i te fare. E feruri nāhea ’oe i te fa’aitoito ’e i te turu i te ha’api’ira’a i te ’evanelia i te fare.

Pāpa’i i te mau mana’o e tae mai

Hōho’a
ītona fa’a’itera’a

Tītau i te mana’o

’A ani i te mau tamari’i ’ia pārahi i ni’a i te tahua ma te ha’amenemene, ’e ’a fa’atere atu i te hō’ē pōpō i te hō’ē o rātou. Ani i te reira tamari’i i te hō’ē mea tāna i ha’api’i mai nō ni’a i te ’evanelia ’aita i maoro a’enei, i te fare ānei ’aore rā i te Paraimere. I muri iho ’a ani i te reira tamari’i ’ia fa’atere i te pōpō i ni’a i te tahi atu tamari’i. ’A nā reira noa ē tae roa ’ua nehenehe te mau tamari’i ato’a ’ia fa’a’ite mai i te hō’ē mana’o.

Hōho’a
ītona ha’api’ira’a

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 72:2, 10

’Ua pi’i te Fatu i te hō’ē ’episekōpo nō te tauturu iā’u.

E’ita paha te mau tamari’i na’ina’i e ’ite rahi roa i te mau mea tā tō rātou ’episekōpo e rave nō te tāvini ia rātou ’e i te tahi atu mau melo o te pāroita. E nehenehe ’oe e tauturu ia rātou ’ia māuruuru i te ’ohipa a tō rātou ’episekōpo.

Te mau ’ohipa ri’i e nehenehe e rave

  • ’A ’āfa’i mai i roto i te piha ha’api’ira’a i te mau mea nō te fa’ahōho’a i te mau hōpoi’a a te ’episekōpo, mai te hō’ē ’api parau tuha’a ’ahuru, te mau pāpa’ira’a mo’a, ’aore rā hō’ē hōho’a o te ’episekōpo e hōro’a ra i te a’ora’a (’a hi’o i te hōho’a i te pae hope’a o te arata’i ha’api’ira’a o teie hepetoma i roto i te Mai, pe’e mai—nō te ta’ata hō’ē ’e te ’utuāfare). ’A tai’o i Te Parau Ha’api’ira’a ’e te mau Parau Fafau 72:2, ’e ’a fa’ata’a ē, ’ua pi’i te Fatu i te hō’ē ’episekōpo nō te tauturu ia tātou. ’A fa’a’ohipa i te mau mea tā ’oe i ’āfa’i mai nō te tauturu i te mau tamari’i ’ia hāro’aro’a i te tahi mau mea tā te ’episekōpo e rave nō te tāvini i te pāroita.

  • ’A arata’i i te mau tamari’i i te piha tōro’a o te ’episekōpo (e nehenehe ’oe e fa’aau i te reira ’e te tahi atu mau ’orometua). ’A fa’ata’a ia rātou i te tahi mau ’ohipa e fārerei ai rātou i te ’episekōpo i roto i tōna piha tōro’a (mai te hō’ē uiuira’a bāpetizora’a ’aore rā te fa’a’āfarora’a tuha’a ahuru). ’A parau i te mau tamari’i mea nāhea ’oe i te ha’amaita’ira’ahia nā roto i te ’ohipa a te ’episekōpo.

  • ’A tauturu i te mau tamari’i ’ia hāmani i te mau tāreta nō te hōro’a i te ’episekōpo ra, ma te ha’amāuruuru iāna nō te ’ohipa tāna e rave nei nō te tauturu i te ’ohipa a te Fatu.

Te Parau Ha’api’ira’a ’e te mau Parau Fafau 75:3

E nehenehe tā’u e hōro’a i tā’u tūtavara’a maita’i roa a’e i te Fatu.

I te ’āpī-roa-ra’a, e nehenehe te mau tamari’i e fāri’i i te ’oa’oa nā roto i te fa’aitoitora’a i te ha’apa’o i te mau fa’auera’a a te Fatu.

Te mau ’ohipa ri’i e nehenehe e rave

  • ’A ani i te mau tamari’i tāta’itahi, te tahi i muri i te tahi, ’ia ha’uti mai, nāhea rātou ’ia tāvini, mai te tāmāra’a i te hō’ē piha i te fare purera’a ’aore rā te tāmāra’a i te ’āu’a i te fare. ’A tai’o i Te Parau Ha’api’ira’a ’e te mau Parau Fafau 75:3, ’e ’a ani i te mau tamari’i ’ia fa’a’ite nāhea ’ia rave hupehupe i te ’ohipa ’ia parau ana’e ’oe ē, « ’eiaha ato’a e fa’aea noa » ’e ’ia fa’a’ite nāhea ’ia rave itoito i te ’ohipa, ’ia parau ana’e ’oe ē, « ’a rave rā i te ’ohipa ma tō ’outou pūai ra. » Nō te aha e mea faufa’a ’ia fa’aitoito roa ’ia tāvini ana’e tātou i te Fatu ?

  • ’A fa’a’ite i te mau tamari’i i te mau ’ā’amu a te peresideni Dieter F. Uchtdorf nō ni’a i te ’ohipa i roto i « Nā parau tumu e piti nō te terera’a faufa’a » (Ensign ’aore rā Liahona, Novema 2009, 55–58). E aha tō tātou huru ’ia ’ite ana’e tātou ē, ’ua rave maita’i roa tātou ?

  • ’A hīmene i te hō’ē hīmene nō ni’a i te rave-’amui-ra’a i te ’ohipa, mai te « Nous aidons tous avec joie » (Chants pour les enfants, 108). ’A tauturu i te mau tamari’i ’ia rave i te mau ’ohipa e tū’ati i ni’a i terā mau parau.

    Hōho’a
    Te mau paero ’e te mau pūtē mā’a

    ’Ua hōro’a te mau melo o te ’Ēkālesia i te mātāmua ra i te mā’a i te ’Ēkālesia nō te tauturu ia vetahi ’ē.

Hōho’a
ītona ha’api’ira’a

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 71

E nehenehe au e pāruru i te parau mau nā roto i te fa’a’itera’a i tō’u ’itera’a pāpū.

’Aita te Fatu e tīa’i nei ’ia pāhono te mau tamari’i i te mau tāhitohitora’a i ni’a i te ’Ēkālesia mai tāna i pi’i ia Iosepha Semita ’e ia Sidney Rigdon ’ia rave. E nehenehe rā ’oe e tauturu i te mau tamari’i ’ia māramarama ē, e nehenehe tō rātou ’itera’a pāpū ’ōhie roa nō te parau mau e fa’atupu i te hō’ē ’ohipa pūai i ni’a ia vetahi ’ē.

Te mau ’ohipa ri’i e nehenehe e rave

Te Parau Ha’api’ira’a ’e te mau Parau Fafau 72:8

E pi’i te Fatu i te mau ’episekōpo nō te tauturu iāna ’ia rave i tāna ’ohipa.

E nehenehe te hō’ē ’episekōpo e fa’atupu i te hō’ē fa’aurura’a pūai ’e te maita’i i roto i te orara’a o te hō’ē ta’ata ’āpī. E aha tā ’oe e nehenehe e rave nō te tauturu i te mau tamari’i ’ia hi’o i te ’episekōpo ’ei ti’a nō te Fatu ’o Iesu Mesia ?

Te mau ’ohipa ri’i e nehenehe e rave

  • ’A fa’ata’a ē, i te matahiti 1831 ’ua pi’i te Fatu i te ’episekōpo o te ’Ēkālesia, ’o Edward Partridge, ’ia fa’aru’e i Kirtland, Ohio, ’ia riro ’ei ’episekōpo i Independence, Missouri (hi’o « Pene 17: Te mau ’episekōpo mātāmua o te ’Ēkalesia, » Te mau ’ā’amu nō Te Parau Ha’api’ira’a ’e te mau Parau Fafau, 64–66). ’A tai’o ’e te mau tamari’i i Te Parau Ha’api’ira’a ’e te mau Parau Fafau 72:8 ’e ’a ani ia rātou ’ia fa’aro’o ’o vai tā te Fatu i pi’i ’ei ’episekōpo ’āpī i Kirtland. Nō te aha te Fatu e pi’i ai i te mau ’episekōpo ? ’A fa’a’ite i te mau tamari’i i te hō’ē ’ohipa i tupu ’a ha’amaita’ihia ai ’oe maoti te tāvinira’a a te ’episekōpo.

  • ’A ani i te mau tamari’i ’ia hāmani i te hō’ē tāpura nō te tahi mau mea tā rātou i ’ite i te ’episekōpo i te ravera’a nō te tauturu i te ta’ata i roto i te pāroita. ’A ani i te mau tamari’i ’ia pāpa’i i te mau hōho’a o te ’episekōpo e rave ra i te hō’ē ’ohipa tā rātou i fa’ahiti. ’A fa’a’ite i tō ’oe ’itera’a pāpū ē, ’ua pi’ihia tō ’oe ’episekōpo nā te Fatu ’ia riro ’ei tāvini nōna. Nō te aha tātou e māuruuru ai i te pi’ira’a te Fatu i te hō’ē ’episekōpo i roto i tā tātou pāroita ?

Te Parau Ha’api’ira’a ’e te mau Parau Fafau 73:3

’Ua fa’aue te Fatu ia Iosepha Semita ’ia fa’aho’i fa’ahou mai i te mau parau mau faufa’a rahi tei mo’e mai roto atu i te Bibilia.

’Ei tuha’a nō teie pi’ira’a peropheta, ’ua fa’auehia Iosepha Semita e te Fatu ’ia rave i te mau fa’atanora’a fa’auru i ni’a i te Bibilia. Nā roto i teie mau fa’atanora’a, tā te Fatu i parau ē, e « hurira’a parau » (Te Parau Ha’api’ira’a ’e te mau Parau Fafau 90:13) ’ua fa’aho’ihia mai te mau parau mau faufa’a tei mo’e ’aore rā, tei fa’a’orehia nā roto mai i te Bibilia nō te roara’a o te mau tenetere.

Te mau ’ohipa ri’i e nehenehe e rave

  • ’A fa’ata’a ē, i te ho’ira’a mai ’o Iosepha Semita ’e ’o Sidney Rigdon nā te hō’ē misiōni poto i pīha’i iho ia Kirtland, Ohio, ’ua hina’aro te Fatu ’ia rave fa’ahou rāua i te ’ohipa i ni’a i te hō’ē ’ōpuara’a faufa’a roa. ’A ani i te mau tamari’i ’ia tai’o i Te Parau Ha’api’ira’a ’e te mau Parau Fafau 73:3 nō te ’imi e aha taua ’ōpuara’a ’ohipa ra. Nō te tauturu i te mau tamari’i ’ia hāro’aro’a e aha tā te Fatu i hina’aro ’ia ’īriti ’o Iosepha ’e ’o Sidney, ’a tai’o ’e ’o rātou i te tahi mau tuha’a i roto i te Bible Dictionary nō « ’Īritira’a a Iosepha Semita (IIS) ».

  • ’A hōro’a i te hō’ē Bibilia, i te tahi ’e te tahi, ’e ’a fa’ati’a i te mau tamari’i ’ia ’īriti i te reira ’e ’ia hi’o e hia rahira’a ’api i roto. ’A ani i te mau tamari’i ’ia feruri ē, ’ua anihia ia rātou ’ia ’īriti i te Bibilia i roto i te tahi atu reo. Pāpū roa ē, e rave rātou i te tahi mau hape. ’A fa’ata’a ē, ’a ’īriti ai ’aore rā ’a pāpa’i ai te ta’ata i te Bibilia nā mua atu i te ’anotau ’o Iosepha Semita, ’ua rave rātou i te tahi mau hape, ’e i te tahi taime ’ua fa’a’ore rātou i te tahi mau parau mau faufa’a. ’Ua fa’aue te Fatu i te peropheta Iosepha Semita ’ia rave i te mau fa’atītī’aifarora’a fa’auruhia. Nō te aha te ’ohipa a Iosepha Semita i riro ai ’ei mea faufa’a nō tātou ?

Hōho’a
ītona ’apora’a ha’api’ira’a

Fa’aitoito i te ha’api’ira’a mai i te fare

’A ani i te mau tamari’i ’ia mā’iti i te hō’ē mea tā rātou e rave i muri a’e i te mau mea tā rātou i ha’api’i mai i teie mahana, mai te ha’amāuruurura’a i te ’episekōpo nō tāna tāvinira’a ’aore rā te fa’aineinera’a nō te pāruru i tō rātou mau ti’aturira’a nā roto i te ha’api’ira’a i te mau Hīro’a Fa’aro’o.

Haʼamaitaʼiraʼa i tā tātou haʼapiʼiraʼa

Faʼaʼohipa i te mau ʼitetino (sens). « E ha’api’i maita’i a’e te rahira’a o te mau tamari’i (’e te feiā pa’ari ) ’ia fa’a’ohipa-ana’e-hia te mau ’itetino rau. ’A ’imi i te mau rāve’a nō te tauturu i te mau tamari’i ’ia fa’a’ohipa i tō rātou ’itetino nō te hi’o, nō te fa’aro’o, ’e nō te fāfāra’a, ’a ha’api’i ai rātou » (Te ha’api’ira’a mai tā te Fa’aora, 25).

Hōho’a
’api ’ohipara’a : e tāvini te ’episekōpo i te mau melo o te pāroita

Nene’i