Iesu ’e te mau māmoe

Herehia e te tīa’i māmoe, nā Simon Dewey

28 nō Tiunu–4 nō Tiurai

Te Parau Ha’api’ira’a ’e te mau Parau Fafau 71–75

«’Aore hō’ē mauha’a ’o tē tu’uhia mai ’ei pāto’ira’a ia ’ōrua i te manuia »

’Ua ha’api’i Elder Quentin L. Cook ē, « I te rahira’a o te taime e ’āpiti mai te fa’aurura’a a te Vārua Maita’i i te tuatāpapara’a pāpa’ira’a mo’a ’e te pure a te ta’ata hō’ē i roto i te ’utuāfare » (« Fa’afāriura’a hōhonu ’e tē vai māite i te Metua i te ao ra ’e ia Iesu Mesia », Ensign ’aore rā, Liahona, Novema 2018, 10).

E pāpa’i i tō ʼoutou mau mana’o

Mai tōna tamari’i-ri’i-ra’a, ’ua fa’aruru Iosepha Semita i te mau fa’a’inora’a—tae noa atu i te mau ’enemi—’a tāmata ai ’oia i te rave i te ’ohipa a te Atua. Terā rā, e mea ’ino roa atu i te pae hope’a o te matahiti 1831, ’a ha’amata ai ’o Ezra Booth i te fa’ahapa i te ’Ēkālesia i mua i te ta’ata, nō te mea, i teie taime, nō roto mai te fa’a’ino i te hō’ē ta’ata fa’aro’o tahito. ’Ua ’ite o Ezra ia Iosepha i te fa’a’ohipara’a i te mana o te Atua nō te fa’aora i te hō’ē vahine. ’Ua anihia ’oia ’ia ’āpe’e ia Iosepha i roto i te tere mātāmua nō te hi’o i te fenua o Ziona i Missouri. Terā rā, mai taua taime ra, ’ua mou tōna fa’aro’o, ’e nō te tāmata i te ha’afaufa’a ’ore i te Peropheta, ’ua nene’i ’oia e rave rahi mau rata i roto i te ve’a parau ’āpī nō Ohio. E au ra ē, tē manuia ra tāna mau tauto’ora’a : « ’ua tupu te mau mana’o au ’ore i ni’a i te ’Ēkalesia » i taua vāhi ra (Te Parau Ha’api’ira’a ʼe te mau Parau Fafau 71, tuha’a upo’o parau). E aha tā te feiā ti’aturi e rave i roto i taua huru ra ? Noa atu ē, ’aita e pāhonora’a ti’a nō te huru tāta’itahi, mai te huru ra ē, e mea pinepine—tae noa atu i roto i teie hi’ora’a i te matahiti 1831—te hō’ē tuha’a o te pāhonora’a a te Fatu, ’o te pārurura’a ïa i te parau mau ’e te fa’atītī’aifarora’a i te mau parau ha’avare nā roto i « te porora’a i te ’evanelia » (’īrava 1). Oia mau, e fa’a’ino-tāmau-hia te ’ohipa a te Fatu, terā rā, i te pae hope’a, « ’aore hō’ē mauha’a ’o tē tu’uhia mai ’ei pāto’ira’a i [te reira] i te manuia » (’īrava 9).

Hi’o « Ezra Booth and Isaac Morley », Te mau heheura’a i roto i taua taime ra,134.

’ītona tuatāpapara’a a te ta’ata hō’ē

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau 71

E nā te Fatu e fa’aha’amā i te mau fa’a’ino i tāna ’ohipa i roto i tōna iho ra taime.

E nehenehe tātou e ha’ape’ape’a ’ia fa’aro’o ana’e tātou i te ta’ata ’ia fa’a’ino ’aore rā, ’ia fa’ao’o’o i te ’Ēkālesia ’aore rā, i tōna feiā fa’atere, i te taime iho ā rā e mata’u tātou nō te mau ta’ata tā tātou i mātau ’e i here ’o tei fati i raro a’e i te reira fa’a’inora’a. I te tupura’a te hō’ē ’ohipa mai te reira te huru i Ohio i te matahiti 1831, (hi’o i te upo’o parau o te tuha’a nō te Parau Ha’api’ira’a ʼe te mau Parau Fafau 71), te parau poro’i a te Fatu ia Iosepha Semita rāua o Sidney Rigdon, nō ni’a ïa i te fa’aro’o, ’eiaha nō te mata’u. ’A tuatāpapa ai ’outou i Te Parau Ha’api’ira’a ʼe te mau Parau Fafau 71, e aha tā ’outou i ’ite mai ’o tē patu i tō ’outou fa’aro’o i te Fatu ’e i tāna ’ohipa ? E aha tei ha’aputapū ia ’outou nō ni’a i te arata’ira’a tā te Fatu i hōro’a i tāna mau tāvini i roto i teie ’ohipa ?

Hi’o ato’a Robert D. Hales, « Te itoito o te keretetiano : Te ho’o o te aupipira’a », Ensign ’aore rā Liahona, Novema 2008, 72–75; Jörg Klebingat, « Defending the faith », Ensign, setepa 2017, 49–53

Te Parau Ha’api’ira’a ’e te mau Parau Fafau 72

E mau ta’ata ti’a’au te mau ’episekōpo i te mau ’ohipa pae vārua ’e te pae tino o te bāsileia o te Fatu.

’A pi’ihia ai ’o Newel K. Whitney ’ei ’episekōpo piti nō te ’Ēkālesia, e mea ta’a ’ē ri’i tāna mau ’ohipa i tā te mau ’episekōpo nō teie tau. ’Ei hi’ora’a, nā te ’episekōpo Whitney i fa’atere i te ha’amo’ara’a o te fenua ’e te parau fa’ati’a nō te fa’aea i Missouri, i roto i te fenua nō Ziona. Terā rā, ’ia tai’o ana’e ’outou i tōna pi’ira’a ’e tāna mau ’ohipa i roto i Te Parau Ha’api’ira’a ʼe te mau Parau Fafau 72, e ’ite paha ’outou i te tahi mau tū’atira’a i te mau mea tā te mau ’episekōpo e rave i teie mahana—i te pae vārua iho ā rā, ’aita ana’e i roto i te mau ha’apāpūra’a o tā rātou mau ’ohipa. ’Ei hi’ora’a, e mea nāhea ’outou i te « tu’u i te pāpā’a parau » i tō ’outou ’episekōpo ? (’īrava 5). Nāhea te ’episekōpo i te « ha’apa’o i tō te Fatu fare vaira’a faufa’a » ’e ’ia fa’atere i te mau hōro’ara’a a te mau melo o te pāroita ? (hi’o te mau ’īrava 10, 12). Nāhea te ’episekōpo i te tauturura’a ia ’outou ?

Hi’o ato’a Gospel Topics, « Bishop », topics.ChurchofJesusChrist.org.

te mau tura ’e te mau pūtē mā’a

Nā Newel K. Whitney i fa’atere i te fare vaira’a faufa’a a te mau ’episekōpo.

Te Parau Ha’api’ira’a ’e te mau Parau Fafau 73

E nehenehe au e ’imi i te mau rāve’a nō tē fa’a’ite i te ’evanelia.

I te ho’ira’a mai o Iosepha Semita ’e o Sidney Rigdon i muri a’e i tā rāua misiōni poto nō te fa’atītī’aifaro i te tahi mau fifi i ravehia e Ezra Booth (hi’o Te Parau Ha’api’ira’a ʼe te mau Parau Fafau 71), ’ua parau te Fatu ia rāua ’ia ho’i fa’ahou i ni’a i te ’ohipa ’īritira’a i te Bibilia (hi’o Buka Fa’atoro parau o te Bibilia, « ’Īritira’a a Iosepha Semita »). Terā rā, ’ua hina’aro ato’a ’oia ’ia tāmau noa rāua i te poro i te ’evanelia. ’Ia tai’o ’outou i Te Parau Ha’api’ira’a ʼe te mau Parau Fafau 73, ’a feruri nāhea ’outou i te fa’ariro i te porora’a i te ’evanelia ’ei « ’ohipa » tāmau (’īrava 4)—’aore rā, ’ei ’ohipa mau—’ei tuha’a nō tō ’outou orara’a i roto i te tahi atu mau hōpoi’a tā ’outou.

Te Parau Ha’api’ira’a ’e te mau Parau Fafau 75:1–12

E ha’amaita’i te Fatu i te feiā e poro i tāna ’evanelia ma te ha’apa’o maita’i.

Nō te pāhono i te fa’auera’a ’ia « haere atu ’outou i roto i te ao pā’āto’a nei » nō te poro i te ’evanelia (Te Parau Ha’api’ira’a ʼe te mau Parau Fafau 68:8), e rave rahi mau peresibutero ha’apa’o maita’i tei ’imi i te tahi atu mau ha’amāramaramara’a nō ni’a i te huru tā te Fatu i hina’aro ’ia ha’apa’o rātou i teie fa’auera’a. E aha te mau ta’o ’e te mau pereota tā ’outou i ’ite mai i roto i Te Parau Ha’api’ira’a ʼe te mau Parau Fafau 75:1–12 ’o te tauturu ia ’outou ’ia hāro’aro’a nāhea ’ia poro i te ’evanelia ma te maita’i ? E aha te mau ha’amaita’ira’a tā te Fatu i fafau mai i te mau misiōnare ha’apa’o maita’i ? ’A feruri nāhea teie mau arata’ira’a ’e mau ha’amaita’ira’a e tano ai i ni’a ia ’outou ’a fa’a’ite ai ’outou i te ’evanelia.

’ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Te Parau Ha’api’ira’a ’e te mau Parau Fafau 71.E aha tei anihia ia Iosepha Semita ’e o Sidney Rigdon ’ia rave, ’a fa’a’ino noa ai vetahi ’ē i te ’Ēkālesia ’e i tōna feiā fa’atere ? Nāhea tātou ’ia « fa’aineine i te ’ē’a » ’ia fāri’i te ta’ata i te mau heheura’a a te Atua  ? (Te Parau Ha’api’ira’a ’e te mau Parau Fafau 71:4).

Te Parau Ha’api’ira’a ’e te mau Parau Fafau 72:2.Mea nāhea tō te mau ’episekōpo ha’amaita’ira’a i tō tātou ’utuāfare ? E aha tā tō tātou ’episekōpo i ani ia tātou ’ia rave, ’e nāhea e ti’a ai ia tātou ’ia pāturu iāna ? E nehenehe paha tō ’outou ’utuāfare e hāmani i te hō’ē tāreta nō te ha’amāuruuru i tō ’outou ’episekōpo nō tāna tāvinira’a.

Te Parau Ha’api’ira’a ’e te mau Parau Fafau73:3–4.E faufa’ahia ānei tō ’outou ’utuāfare i te ha’api’ira’a mai nō ni’a i te ’īritira’a a Iosepha Semita i te Bibilia ? (hi’o te Buka Fa’atoro o te Bibilia, « ’Īritira’a a Iosepha Semita »). E nehenehe ’outou e tuatāpapa i te tahi o te mau pāpa’ira’a tei fa’a’āpīhia i roto i te ’īritira’a a Iosepha Semita, ’e ’ia ’āparau i ni’a i te mau parau mau faufa’a rahi tā te Fatu i heheu mai nā roto mai i te peropheta. Nō te tahi mau hi’ora’a, ’a hi’o i te ’īritira’a a Iosepha Semita i te Genese 14:25–40 ’e Genese 50:24–38 i roto i te fa’ahorora’a Bibilia; rave rahi mau fa’ahorora’a i roto i te Mataio 4:1–11; ’e Luka 2:46, nota raro c.

Te Parau Ha’api’ira’a ’e te mau Parau Fafau 74:7.E aha tā teie mau ’īrava e ha’api’i nei ia tātou nō ni’a ia Iesu Mesia ’e te mau tamari’i ri’i ?

Te Parau Ha’api’ira’a ’e te mau Parau Fafau 75:3–5, 13, 16.E nehenehe ’outou e tauturu i tō ’outou ’utuāfare ’ia māramarama e mea nāhea tā te Fatu e hina’aro nei ’ia tāvini tātou iāna nā roto i te paraura’a i te ta’a-’ē-ra’a i rotopū i te « fa’aea noa » ’e te « [ravera’a] i te ’ohipa ma tō [tātou] pūai ra ». E nehenehe paha ’outou e mā’iti i te tahi mau ’ohipa i te fare ’e e ani i te mau melo o te ’utuāfare ’ia fa’a’ite’ite mai i te huru ravera’a i te reira mau ’ohipa ma te fa’aea noa, ’e i muri iho, ma tō rātou pūai ato’a. Nāhea e nehenehe ai ia tātou ’ia tāvini i te Fatu ma tō tātou pūai ato’a ? ’Ia au i Te Parau Ha’api’ira’a ʼe te mau Parau Fafau 75:3–5, 13, 16, e aha tāna e fafau mai nei i tāna mau tāvini ha’apa’o maita’i ?

Nō te tahi atu mau mana’o nō te ha’api’ira’a i te mau tamari’i, hi’o te arata’i o teie hepetoma i roto Mai, pe’e mai—nō te Paraimere.

Hīmene tei mana’ohia : « Ara mai tātou », Te mau Hīmene, no. 148

Ha’amaita’ira’a i te tuatāpapara’a a te ta’ata iho

’Imi i te mau ta’o ’e te mau pereoda fa’auru. ’A tai’o ai ’outou, e nehenehe te Vārua e hōro’a mai i te tahi mau ta’o ’aore rā, te tahi mau pereota i tō ’outou ferurira’a. ’A feruri i te tāpa’o i te mau ta’o ’aore rā, te mau pereota nō roto mai i Te Parau Ha’api’ira’a ʼe te mau Parau Fafau 71–75 ’o tē fa’auru ia ’outou.

Hō’ē feiā ’āpī tamāroa ’e te feiā fa’atere nō te autahu’ara’a

Fa’ahōho’ara’a nō te feiā ’āpī tamāroa ’e te hō’ē fa’atere ’autahu’ara’a nā D. Keith Larson