Haere i te fare, nā Yongsung Kim

12–18 nō Tiurai

Te Parau Ha’api’ira’a ’e te mau Parau Fafau 77–80

« E arata’i atu na vau ia ’outou »

’Ua parau te Fatu ia Iosepha Semita ē, e parau atu ’oia « i roto i [tōna] tari’a i te mau parau pa’ari » (Te Parau Ha’api’ira’a ʼe te mau Parau Fafau 78:2). E aha te mau parau pa’ari tā ’outou e fāri’i ’ia tuatāpapa ana’e ’outou i Te Parau Ha’api’ira’a ʼe te mau Parau Fafau 77–80 ?

E pāpa’i i tō ʼoutou mau mana’o

’Aita i piti matahiti i muri a’e i te fa’aho’ira’ahia mai te ’Ēkālesia a Iesu Mesia, ’ua hau atu i te 2 000 melo ’e ’ua parare ’oi’oi. I te ’āva’e nō Māti 1832, ’ua fārerei o Iosepha Semita i te tahi atu mau ti’a fa’atere o te ’Ēkālesia « nō te paraparau i te mau ’ohipa o te ’Ēkālesia » : te tītaura’a ’ia nene’i i te mau heheura’a, ’ia ho’o mai i te fenua nō te ha’aputuputu, ’e te ha’apa’ora’a i te feiā veve (hi’o Te Parau Ha’api’ira’a ʼe te mau Parau Fafau 78, upo’o parau nō te tuha’a). Nō te pāhono i teie mau tītaura’a, ’ua pi’i te Fatu i te tahi feiā fa’atere ’ia ha’amau i te United Firm [Taiete ’Āmui], e pupu ta’ata ’o tei tāhō’ē i tā rātou mau tauto’ora’a « nō te fa’ahaere i te ’ohipa, [a te Fatu] i mua » (’īrava 4) i roto i teie mau fenua. Terā rā, i roto ato’a i terā mau ’ohipa fa’aterera’a, ’ua fa’atumu te Fatu i ni’a i te mau mea nō te tau a muri atu. I te pae hope’a, te ’ōpuara’a nō te hō’ē mātini nene’i parau ’aore rā, hō’ē fare vaira’a tauha’a—mai te tahi atu mau mea i roto i te bāsileia o te Atua—nō te fa’aineine ïa i tāna mau tamari’i ’ia fāri’i «i te hō’ē vāhi i roto i te ao tīrētiēra » ’e «te mau faufa’a mure ’ore ra » (mau ’īrava 7, 18). E mai te mea ē, e mea fifi ’ia hāro’aro’a i te reira mau ha’amaita’ira’a i teienei, i roto i te rahira’a ’ohipa o te orara’a o te mau mahana ato’a, ’ua ha’apāpū mai ’oia ia tātou ē, « ’a ’oa’oa maita’i na, nō te mea e arata’i atu na vau ia ’outou » (’īrava 18).

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau 77

E heheu te Atua i tāna mau parau ’aro i te feiā e ’imi ’ia ’ite iāna.

’Ahuru mā piti matahiti i muri a’e i te ’ōrama mātāmua, ’ua tāmau noa te anira’a i roto i te Iakobo 1:5 « e ani i te Atua » i te arata’i ia Iosepha Semita ’ia ’ere ’oia i te pa’ari. ’A uiui ai ’oia ’e ’o Sidney Rigdon nō ni’a i te buka nō Apokalupo, ’a ha’a ai rāua i ni’a i te ’īritira’a fa’auruhia o te Bibilia, mai tei mātarohia, ’ua ’imi ’o Iosepha i te pa’ari nō ’ō mai i te Atua ra. ’Ia tai’o ’outou i Te Parau Ha’api’ira’a ʼe te mau Parau Fafau 77, ’a feruri ’ia pāpa’i i tō ’outou mau mana’o i roto i te mau pene faufa’a i roto i te buka nō Apokalupo.

Ta’a ’ē atu i te reira, ’a feruri nāhea e ti’a ai ia ’outou ’ia pe’e i te hi’ora’a o te peropheta Iosepha ’a tuatāpapa ai ’outou i te mau pāpa’ira’a mo’a. E nehenehe ’outou e ani i te Metua i te ao ra, « e aha te ti’a iā’u ’ia hāro’aro’a ? »

’Īritira’a o te Bibilia, nā Liz Lemon Swindle

Te Parau Ha’api’ira’a ’e te mau Parau Fafau 78

E aha te ‘United Firm’ [Taiete ’Āmui] ?

’Ua ha’amauhia te United Firm nō te fa’atere i te mau nene’ira’a ’e i te mau ’ohipa putu faufa’a a te ’Ēkālesia i Ohio Missouri. Tei roto ’o Iosepha Semita, ’o Newel K. Whitney, ’e te tahi atu feiā fa’atere tei ’āmui i tā rātou mau rāve’a tauturu nō te pāhono i te mau hina’aro o te ’Ēkālesia e tupu mai ra i te rahi. Tē fifi rā, ’ua topa te United Firm i roto i te tārahu ’e ’ua fa’a’orehia i te matahiti 1834 nō te rahi o te tārahu e’ita e roa’a fa’ahou ’ia arai.

Hi’o ato’a « Newel K. Whitney and the United Firm », Te mau heheura’a i roto i taua taime ra, 142–47; « United Firm », Mau parau tumu o te ’ā’amu o te ’Ēkālesia, ChurchofJesusChrist.org/study/church-history.

Te Parau Ha’api’ira’a ’e te mau Parau Fafau 78:1–7

E nehenehe tā’u e tauturu « nō te fa’ahaere i te ’ohipa i mua » a te ’Ēkālesia.

’Ua parau te Fatu ia Iosepha Semita ’e i te tahi atu feiā fa’atere o te ’Ēkālesia ē, e riro te fa’aterera’a i te hō’ē fare vaira’a faufa’a ’e te hō’ē mātini nene’i parau ’ei tauturu « nō te fa’atere atu i te ’ohipa, tā ’outou i fāri’i i mua ra », (Te Parau Ha’api’ira’a ʼe te mau Parau Fafau 78:4). I tō ’outou mana’o, e aha te « ’ohipa » a te ’Ēkālesia ? ’A feruri i te reira ’a tai’o ai ’outou i Te Parau Ha’api’ira’a ʼe te mau Parau Fafau 78:1–7. Penei a’e nā roto i te ferurira’a i teie mau ’īrava, e nehenehe te reira e fa’auru ia ’outou nāhea ’ia rave i tō ’outou pi’ira’a i roto i te ’Ēkālesia ’aore rā, nāhea ’ia tāvini i tō ’outou ’utuāfare. Nāhea tā ’outou tāvinira’a i te « fa’ahaere i mua i te ’ohipa » a te Fatu ? Nāhea te reira i te fa’aineine « i te hō’ē vāhi nō ’outou i roto i te ao tīrētiēra » ? (’īrava 7).

Te Parau Ha’api’ira’a ’e te mau Parau Fafau 78:17–22

E arata’i te Fatu iā’u.

Tē feruri ra ānei ’outou i te tahi taime mai te hō’ē tamari’i ri’i, nō te hō’ē paha mea « ’aita ā ’outou i māramarama atu ra » ’aore rā, « ’aita e nehenehe e fa’a’oroma’i » ? Te Parau Ha’api’ira’a ʼe te mau Parau Fafau 78:17–18. ’A ’imi i te parau a’o i roto i teie mau ’īrava ’o tē nehenehe e tauturu ia ’outou ’ia « ’oa’oa maita’i » (’īrava 18) i roto i taua mau taime ra. I tō ’outou mana’o, nō te aha te Fatu i pi’i ai i te tahi taime i tāna mau pipi, « e mau tamari’i ri’i » ? (’īrava 17). E nehenehe ato’a ’outou e feruri e nāhea te Fatu i te « arata’i ia ’outou » (’īrava 18).

Te Parau Ha’api’ira’a ’e te mau Parau Fafau 79–80

E mea faufa’a a’e te pi’ira’a ’ia tāvini i te Atua i te vāhi e tāvini ai au.

Nō ni’a i Te Parau Ha’api’ira’a ʼe te mau Parau Fafau 80, ’ua ha’api’i mai o Elder David A. Bednar, « Penei a’e te hō’ē ha’api’ira’a tā te Fa’aora e ha’api’i mai nei ia tātou i roto i teie heheura’a maori rā, e mea faufa’a te pi’ira’a ’ia ’ohipa i roto i te hō’ē vāhi ta’a maita’i, terā rā, ’ua iti a’e ïa i te pi’ira’a ’ia rave i te ’ohipa » (« Pi’ihia i roto i te ’ohipa », Ensign ’aore rā Liahona, Mē 2017, 68). ’A feruri i tō ’outou pi’ira’a i roto i te ’Ēkālesia i teienei ’aore rā, i tahito ra. E aha te mau ’itera’a tei tauturu ia ’outou ’ia ha’api’i mai ē, e parau mau te mau parau a Elder Bednar ? E aha te tahi atu mau ha’api’ira’a tā ’outou e nehenehe e ’ite i roto i Te Parau Ha’api’ira’a ʼe te mau Parau Fafau 79–80 ’o tē nehenehe e tauturu i te hō’ē ta’ata tei fāri’i noa iho nei i te hō’ē pi’ira’a ’āpī ?

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Te Parau Ha’api’ira’a ’e te mau Parau Fafau 77:2.I muri a’e i te tai’ora’a i teie ’īrava, e nehenehe te mau melo o te ’utuāfare e pāpa’i i te mau hōho’a nō « te mau pua’a , te mau mea e ne’e haere… [’aore rā] te mau manu o te reva » tei hāmanihia e te Atua. E aha tā tātou i ha’api’i mai i roto i teie ’īrava nō ni’a i te mau mea i hāmanihia e te Atua ? (hi’o ato’a Te Parau Ha’api’ira’a ʼe te mau Parau Fafau 59:16–20). E nehenehe ato’a ’outou e hīmene i te hō’ē hīmene nō ni’a i te mau mea i hāmanihia e te Atua, mai te « Mon Père Céleste m’aime » (Chants pour les enfants,16–17), ’e ’a fa’a’ite i te hōho’a pēni i roto i teie arata’ira’a.

Te Parau Ha’api’ira’a ’e te mau Parau Fafau 77:14.Tē fa’ata’a mai nei teie ’īrava ē, ’ua ’amu ’o Ioane i te hō’ē buka ’ei fa’ahōho’ara’a i tāna misiōni ’ia ha’aputuputu ia ’Īsera’ela. E aha tā te tāpa’o nō te ’amura’a e fa’ahōho’a nei nō ni’a i te huru tātou e tītauhia ai ’ia feruri i tō tātou ti’ara’a nō te ha’aputuputura’a ia ’Īsera’ela ’aore rā, te ravera’a i te tahi atu mau ’ohipa tā te Fatu e hina’aro nei ’ia rave tātou ? Teie te tahi atu mau pāpa’ira’a mo’a e fa’a’ohipa ato’a nei i te parau ’amura’a nō te ha’api’i i te hō’ē parau mau pae vārua : Ioane 6:48–51; 2 Nephi 32:3; Moroni 4. E nehenehe paha ’outou e hāmani i te hō’ē mā’a auroahia e te ’utuāfare nō te ’amu ’āmui i te taime nō teie ’āparaura’a.

Te Parau Ha’api’ira’a ’e te mau Parau Fafau 78:17–19.E nehenehe te mau melo o te ’utuāfare e pāpa’i i te mau hōho’a o te mau ha’amaita’ira’a nō ’ō mai i te Atua ra tā rātou e māuruuru nei. E aha tā tātou e rave nei nō te fa’a’ite i tō tātou māuruuru nō teie mau ha’amaita’ira’a ? E nehenehe ato’a ’outou e ’āparau, te nāhea nei ’outou nō te pe’e i te a’ora’a nō « te fāri’i mai i te mau mea ato’a mai te māuruuru » (’īrava 19). E aha tā te Fatu e fafau mai nei i te feiā e rave i te reira ?

Te Parau Ha’api’ira’a ’e te mau Parau Fafau 79:1.’A fa’a’ite i tō ’outou ’itera’a pāpū nō ni’a i « te mana » tā ’outou i fāri’i i te taime ’a fa’atōro’ahia ai ’outou ’aore rā, ’a fa’ata’ahia ai nō te mau pi’ira’a i roto i te ’Ēkālesia. E aha te mau hōro’a ’e te fa’aurura’a ta’a ’ē tā te Fatu i ha’amaita’i ia ’outou ’a tāvini ai ’outou ?

Nō te tahi atu mau mana’o nō te ha’api’ira’a i te mau tamari’i, hi’o te arata’ira’a o teie hepetoma i roto Mai, pe’e mai—nō te Paraimere.

Hīmene tei mana’ohia : «  Tai’o mai nā i tō mau Maita’i  », Te mau hīmene, no. 147.

Haʼamaitaʼiraʼa i tā tātou haʼapiʼiraʼa

Pāpa’i i te hō’ē hōho’a. ’Ei ’utuāfare, e nehenehe ’outou e tai’o i te tahi tau ’īrava ’e i muri iho, ’a hōro’a i te taime i te mau melo o te ’utuāfare ’ia pāpa’i hōho’a i te hō’ē mea e tū’ati i ni’a i te mea tā rātou i tai’o. ’A pia i te mau hōho’a nā roto i te fare nō te fa’aha’amana’o i tō ’outou ’utuāfare i te mau parau tumu tā ’outou i ha’api’i mai.

Te ’āua a te Atua, nā Sam Lawlor