Fa’aho’i-fa’ahou-ra’a mai, nā Liz Lemon Swindle

26 nō Tiurai–1 nō ’Ātete

Te Parau Ha’api’ira’a ’e te mau Parau Fafau 84

« Te mana nō te huru Atua »

’A tai’o ai ’oe i Te Parau Ha’api’ira’a ’e te mau Parau Fafau 84, e aha te mau parau mau tā ’oe e mana’o ra e ha’apāpū i te mau tamari’i tā ’oe e ha’api’i nei ? Pāpa’i i te mau mana’o e tae mai nā roto mai i te Vārua Maita’i.

Pāpa’i i te mau mana’o e tae mai

Tītau i te mana’o

’A ani i te mau tamari’i ’ia fa’a’ite mai i te mau mea tā rātou i ’ite nō ni’a i te autahu’ara’a. E nehenehe ’oe e pia i te hōho’a o te hō’ē ta’ata tei ha’amaita’ihia nā roto i te mana o te autahu’ara’a, mai te buka hōho’a nō te ’evanelia, te mau nūmera 103–10, ’e ’a ani i te mau tamari’i e mea nāhea te autahu’ara’a i te ha’amaita’i i te mau ’utuāfare.

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 84:19–22, 26–27

Te autahu’ara’a ’o te mana ïa ’o te Atua.

’Ua ’ite ānei te mau tamari’i tā ’oe e ha’api’i nei i te mau tumu o te autahu’ara’a ? I roto i Te Parau Ha’api’ira’a ’e te mau Parau Fafau 84, ’ua heheu mai te Fatu i te hō’ē tumu : nō te tauturu ia tātou ’ia ho’i i te Metua i te ao ra ra. (Nō te ha’api’i rahi mai, ’a hi’o i te mau tumu parau o te ’evanelia, « autahu’ara’a », topics.ChurchofJesusChrist.org.)

Te mau ’ohipa ri’i e nehenehe e rave

• ’A tai’o i Te Parau Ha’api’ira’a ’e te mau Parau Fafau 84:20, ’e ’a ani i te mau tamari’i ’ia ti’a ’ia fa’aro’o ana’e rātou i te ta’o ra « ’ōro’a » Nō te tauturu ia rātou ’ia māramarama e aha te hō’ē ’ōro’a, ’a pia i te mau hōho’a o te mau ’ōro’a autahu’ara’a e rave rahi, mai te Buka hōho’a nō te ’evanelia, mau nūmera 103–8, ’e ’a ani i te mau tamari’i ’ia fa’ata’a mai e aha te ’ohipa e tupu ra i roto i te hōho’a tāta’itahi (hi’o ato’a, Arata’i nō te mau pāpa’ira’a mo’a, « Te mau ’ōro’a », scriptures.ChurchofJesusChrist.org). ’A fa’ata’a atu ē, ’ua hōro’a mai te Metua i te ao ra ia tātou i teie mau ’ōro’a nō te tauturu ia tātou ’ia ora i pīha’i iho iāna.

• ’A vaiiho i te mau tamari’i ’ia pēni i te ’api ’ohipara’a. ’A rave ai rātou i te reira, ’a fa’ata’a i te mau ’ōro’a autahu’ara’a rau tei fa’a’itehia i ni’a i te ’api ’e nō te aha ’oe i māuruuru ai i taua mau ’ōro’a ra.

Te Parau Ha’api’ira’a ’e te mau Parau Fafau 84:77

E hoa vau nō Iesu ’ia pe’e ana’e au iāna.

Nāhea e nehenehe ai ia ’oe ’ia tauturu i te mau tamari’i ’ia ’ite ē, tē here nei te Fa’aora ia tātou hau atu i te hō’ē hoa rahi tō tātou ?

Te mau ’ohipa ri’i e nehenehe e rave

• ’A pia i te hō’ē hōho’a ’o te Fa’aora ’a tai’o ai ’oe i Te Parau Ha’api’ira’a ’e te mau Parau Fafau 84:77. ’A ani i te mau tamari’i ’ia fa’atoro i ni’a i te hōho’a ’o te Fa’aora i te mau taime ato’a e fa’aro’o rātou i te ta’o ra « hoa ». ’A fa’ata’a ē, ’ia tāmata ana’e tātou e ha’apa’o i te mau fa’auera’a, tē fa’a’ite ra ïa tātou ia Iesu ē, ’ua here tātou iāna. ’A fa’a’ite e aha te aura’a nō ’oe ’ia fa’ariro ia Iesu ’ei hoa nō ’oe.

• ’A tauturu i te mau tamari’i ’ia tāpura i te tahi mau mea e nehenehe tā rātou e rave nō te fa’a’ite i tō rātou mau hoa ē, ’ua here rātou ia rātou. E aha tā Iesu i rave nō te fa’a’ite ia tātou ē, e hoa ’oia nō tātou ? E aha tā tātou e nehenehe e rave nō te fa’a’ite i te Fa’aora ē, e hoa tātou nōna ? Hīmene ’āmui i te hō’ē hīmene nō ni’a ia Iesu, mai te « Jésus est notre ami » (Chants pour les enfants, 37).

Te Parau Ha’api’ira’a ’e te mau Parau Fafau 84:88

E tauturu te Metua i te ao ra i Tāna mau misiōnare.

E nehenehe te mana’o e riro ’ei misiōnare i te hō’ē mahana e riro ’ei mana’o ’oa’oa, terā rā, e nehenehe ato’a te reira e fa’ari’ari’a i te tahi mau tamari’i. E nehenehe Te Parau Ha’api’ira’a ’e te mau Parau Fafau 84:88 e ha’api’i ia rātou e mea nāhea te Metua i te ao ra ’ia tauturu i te feiā tāna e tono nō te ha’api’i i tāna ’evanelia.

Te mau ’ohipa ri’i e nehenehe e rave

• ’A tauturu i te mau tamari’i ’ia feruri i te mau misiōnare tā rātou i mātau. ’A parau ia rātou ē, ’ua rave te Metua i te ao ra i te hō’ē parau fafau ta’a ’ē i te mau misiōnare. ’A tai’o i Te Parau Ha’api’ira’a ’e te mau Parau Fafau 84:88, ’e ’a tauturu i te mau tamari’i ’ia feruri i te mau ’ohipa e tano i ni’a i te mau parau fafau i roto i teie ’īrava. ’A parau nō ni’a i te hō’ē taime ’ua tāvini ’oe i te Fatu ’e ’ua ’ite ’oe ē, tei pīha’i iho ’oia ia ’oe, mai tei fa’ata’ahia i roto i te ’īrava 88.

• ’A fa’a’ite i te ’ā’amu nō te tamaiti e maha matahiti i roto i te a’ora’a a Elder Takashi Wada « ’Ia ’oa’oa i te mau parau a te Mesia » (Ensign ’aore rā Liahona, Mē 2019, 38–40). ’A tauturu i te tamari’i tāta’itahi ’ia feruri i te hō’ē mea e nehenehe tā rātou e parau nō te fa’a’ite i tō rātou ’itera’a pāpū i te hō’ē ta’ata—mai te fa’a’itera’a i te hō’ē hīro’a fa’aro’o. ’A ani i te tamari’i tāta’itahi ’ia fa’ahua fa’a’ite i te ’evanelia i te hō’ē hoa. ’A fa’a’ite pāpū ē, e tauturu te Metua i te ao ra ia tātou ’ia ’ite e aha te parau ’ia paraparau ana’e tātou ’ia vetahi ’ē nō ni’a i te ’evanelia.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 84:4–5, 18–28, 30

E tauturu te mau ’ōro’a o te autahu’ara’a iā’u ’ia fa’aineine nō te ora fa’ahou i pīha’i iho i te Metua i te ao ra.

’A pa’ari ai rātou, e nehenehe i te mau tamari’i tā ’oe e ha’api’i nei ’ia ’āmui i roto i te mau ’ōro’a autahu’ara’a, ’e tae noa atu i te mau bāpetizora’a ’e te mau ha’amaura’a nō te feiā pohe i roto i te hiero. Nāhea e ti’a ai ia ’oe ’ia tauturu ia rātou ’ia māramarama i te mau ’ōpuara’a ’e te mana o te mau ’ōro’a o te autahu’ara’a ?

Te mau ’ohipa ri’i e nehenehe e rave

• ’A pāpa’i Autahu’ara’a a Aarona ’e Autahu’ara’a a Melehizedeka i ni’a i te tāpura ’ere’ere. ’A tai’o ’āmui i Te Parau Ha’api’ira’a ’e te mau Parau Fafau 84:18, 26-28, 30, ’e ’a tauturu i te mau tamari’i ’ia hāmani i te hō’ē tāpura nō te mau parau mau tā rātou i ha’api’i mai nō ni’a i te autahu’ara’a a Aarona i roto i teie mau ’īrava. I muri iho ’a tai’o ’āmui i Te Parau Ha’api’ira’a ’e te mau Parau Fafau 84:18–25, ’e ’a tāpura i te mau parau mau nō ni’a i te autahu’ara’a a Melehizedeka.

• ’A ani i te mau tamari’i ’ia tāpura i te mau ’ōro’a o te autahu’ara’a tā rātou i ’āmui atu ’aore rā i ’ite, mai te bāpetizora’a, te ha’amaura’a, te mau ha’amaita’ira’a autahu’ara’a, ’aore rā te ’ōro’a mo’a. ’A ani ia rātou ’ia fa’a’ite i te mau mea i tupu nō rātou i roto i teie mau ’ōro’a. ’A tai’o ’āmui i Te Parau Ha’api’ira’a ’e te mau Parau Fafau 84:20 (tauturu ia rātou ’ia ta’a i te mau ta’o mātaro-’ore-hia). Nō te aha te Fatu e ani ai ia tātou ’ia ’āmui i roto i te mau ’ōro’a ? Nāhea te autahu’ara’a i te tauturu ia tātou ’ia ho’i i te Metua i te ao ra ra ?

  

  E tauturu te mau ’ōro’a ia tātou ’ia ha’amana’o i tā tātou i parau fafau i te Atua.

• ’A hāmani i te hō’ē piriapu i ni’a i te hō’ē hōho’a o te hō’ē hiero. ’A tai’o ’e te mau tamari’i i Te Parau Ha’api’ira’a ’e te mau Parau Fafau 84:5, ’e ’a ani ia rātou ’ia fa’aro’o e aha tā te Fatu i fa’aue i te feiā mo’a ’ia patu. ’A hōro’a i te tamari’i tāta’itahi i te hō’ē tuha’a o te piriapu, ’e ’a ani ia rātou ’ia fa’a’ite mai i te hō’ē mea tā rātou e nehenehe e rave nō te fa’aineine nō te tomo i roto i te hiero.

Te Parau Ha’api’ira’a ’e te mau Parau Fafau 84:64–72, 81–88

E pāruru ’e e ha’apūai te Fatu i te mau misiōnare.

Tē vai ra i roto i teie mau ’īrava te mau parau fafau tā te Fatu i rave i te feiā tāna i pi’i nō te poro i te ’evanelia. E nehenehe ato’a teie mau parau fafau e fa’auru i te mau tamari’i ’a fa’a’ite ai rātou i te ’evanelia a Iesu Mesia ia vetahi ’ē.

Te mau ’ohipa ri’i e nehenehe e rave

• ’A tuha piti piti i te mau tamari’i, ’e ’a hōro’a i te pupu tāta’itahi i te tahi mau ’īrava e tai’o i roto i Te Parau Ha’api’ira’a ’e te mau Parau Fafau 84: 64–72, 81–88. ’A ani ia rātou ’ia ’imi i te mau parau fafau tā te Fatu i hōro’a i te feiā e fa’a’ite i te ’evanelia. ’A ani ia rātou ’ia fa’a’ite mai i te mau mea tā rātou i ’apo mai i roto i te piha ha’api’ira’a. ’A tauturu i te mau tamari’i ’ia feruri i te mau ta’ata tā rātou i mātau, ’aore rā i te mau ta’ata i roto i te mau pāpa’ira’a mo’a, tei fāri’i i te tauturu a te Fatu ’a poro ai rātou i te ’evanelia (mai ia Samuela te ’āti Lamana [hi’o Helamana 13:2–4 ; 16:6–7] ’aore rā, ’o Amona [hi’o Alama 17:32–38]). ’A fa’a’ite nō ni’a i te hō’ē taime ’ua ’ite ’oe i te pāturura’a a te Fatu ’a tāvini ai ’oe iāna.

• ’A hōpoi mai i te mau hāpaina ’aore rā, i te tahi atu mau fāri’i mai te reira te huru i roto i te piha ha’api’ira’a. ’A pāpa’i i ni’a i te mau ’api parau i te mau rāve’a e nehenehe ai i te mau tamari’i ’ia riro ’ei mau misiōnare i teienei, ’e ’a tu’u i te mau ’api parau i roto i te hō’ē hāpaina. ’A tāpiripiri i te mau hāpaina, te ’auvaha i ni’a, i ni’a i te tahua. ’A ani i te mau tamari’i, te tahi i muri i te tahi, ’ia rave i te hō’ē tao’a na’ina’i i roto i te hō’ē o te mau hāpaina ’e ’ia ha’uti mai i te mea i fa’a’itehia i ni’a i te ’api parau. Nāhea e nehenehe ai i te Metua i te ao ra ’ia tauturu ia tātou ’a fa’a’ite ai tātou i te ’evanelia ia vetahi ’ē, noa atu ē, e mea fifi ’aore rā, ’e mata’u ri’i tātou ?

• ’A tauturu i te mau tamari’i ’ia hi’o ē, e mau melo tātou pā’āto’a nō te ’Ēkālesia a Iesu Mesia i te Feiā Mo’a i te mau Mahana Hope’a nei, maoti te ’ohipa misiōnare—’ua ha’api’i te mau misiōnare ia tātou, i tō tātou mau metua ’aore rā, i tō tātou huitupuna. ’A parau i te mau tamari’i nō ni’a i te tauturura’a te mau misiōnare ia ’oe ’aore rā, i tō ’oe huitupuna ’ia fāri’i i te ’evanelia. ’A vaiiho i te mau tamari’i ’ia fa’a’ite mai i te mau ’itera’a mai te reira te huru. ’A fa’aitoito ia rātou ’ia ani i tō rātou mau metua e mea nāhea te mau melo mātāmua o te ’Ēkālesia i roto i tō rātou ’utuāfare i te ha’api’ira’a mai i te ’evanelia.

Fa’aitoito i te ha’api’ira’a mai i te fare

’A ani i te mau tamari’i ’ia rave i te hō’ē mea i teie hepetoma nō te fa’a’ite i te ’evanelia i te hō’ē ta’ata i tō rātou fare ’aore rā, i te hō’ē hoa. ’A fa’aitoito ia rātou ’ia ani i te tauturu a te Metua i te ao ra ’e ’ia hi’o ē, e aha tāna e rave nō te tauturu ia rātou.

Haʼamaitaʼiraʼa i tā tātou haʼapiʼiraʼa

Faʼaʼohipa i te mau ʼitetino. « E ha’api’i maita’i a’e te rahira’a o te mau tamari’i (’e te feiā pa’ari ) ’ia fa’a’ohipa-ana’e-hia te mau ’itetino rau. E ’imi i te mau rāve’a nō te tauturu i te mau tamari’i ’ia fa’a’ohipa i tō rātou ’itetino nō te hi’o, te fa’aro’o, ’e te fāfāra’a, ’a ’apo mai ai rātou » (Te ha’api’ira’a mai tā te Fa’aora, 25).