2–8 nō ’Ātete

Te Parau Ha’api’ira’a ’e te mau Parau Fafau 85–87

« ’A ti’a na ’outou i roto i te mau vāhi mo’a ra »

Nō te iti o tō ’oe taime i pīha’i iho i te mau tamari’i, ’a ’imi i te arata’ira’a a te vārua nō te ’ite ē, e aha te mau parau tumu i roto i te mau pāpa’ira’a mo’a e ti’a ia ’oe ’ia ha’apāpū. ’A ti’aturi i te mau muhumuhu tā ’oe e fāri’i.

Pāpa’i i te mau mana’o e tae mai

Tītau i te mana’o

’A fa’a’ite i te mau tamari’i i te tahi mau hōho’a ’aore rā i te tahi mau ’api ’ohipara’a tā ’oe i fa’a’ohipa i roto i te mau ha’api’ira’a i ma’iri a’enei, ’e ’a ani i te mau tamari’i ’ia fa’a’ite ē, e aha tā rātou e ha’amana’o ra i te ha’api’ira’a mai nō ni’a ia rātou, i roto i te piha ha’api’ira’a ’aore rā i te fare.

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 85:6

E paraparau mai te Vārua nā roto i te hō’ē « reo iti ha’iha’i. »

’Ua parau ’o Elder Richard G. Scott ē : « Mai te mea ē, ’aita atu ’ohipa tā ’outou e rave i rotopū i tā ’outou mau pīahi maori rā te tauturura’a ia rātou ’ia ’ite ’e ’ia pe’e i te mau muhumuhu a te Vārua, e ha’amaita’ira’a hope’a ’ore ïa ’e te mure ’ore tā ’outou i hōro’a ia rātou » (« To Learn and to Teach More Effectively » [Brigham Young University Education Week devotional, 21 nō ’Ātete 2007], 5, speeches.byu.edu).

Te mau ’ohipa ri’i e nehenehe e rave

• ’A tai’o i te mau tamari’i e mea nāhea tō Iosepha Semita fa’ata’ara’a i te Vārua : « ’Oia ïa, tē nā ’ō mai ra te reo iti marū [ha’iha’i] ra » (Te Parau Ha’api’ira’a ’e te mau Parau Fafau 85:6). ’A ani i te mau tamari’i ’ia fa’a’ite i te tahi mau mea ha’iha’i (e fa’a’ite i te mau hōho’a mai te mea e hina’aro rātou i te tauturu). ’A ani ia rātou ’ia tūturi i raro ma te fa’ana’ina’i roa ia rātou. ’A tauturu ia rātou ’ia feruri nāhea hō’ē reo e nehenehe ai e na’ina’i, ’e ’a vaiiho ia rātou ’ia ha’api’i i te fa’aro’o ’e i te paraparau ma te reo ha’iha’i. ’A fa’ati’a i te mau taime ’a paraparau ai te Vārua ia ’oe ma te reo marū ’e te ha’iha’i.

• ’A ha’api’i i te mau tamari’i i te hō’ē hīmene nō ni’a i te Vārua, mai te « Le Saint-Esprit  » (Chants pour les enfants, 56). ’A ani ia rātou ’ia hīmene i te reira ’e ’o ’oe ma te muhumuhu. E aha tā teie hīmene e ha’api’i nei nō ni’a i te Vārua Maita’i ? ’A tauturu i te mau tamari’i ’ia ’ite i te taime e nehenehe rātou e fāri’i i tāna fa’aurura’a (mai te taime ’a pure ai, ’a hīmene ai, ’aore rā ’a tauturu ai ia vetahi ’ē).

Te Parau Ha’api’ira’a ’e te mau Parau Fafau 86:11

E nehenehe au e riro ’ei māramarama nō vetahi ’ē

Tē fa’ata’a nei te tuha’a 86 i te ’ohipa faufa’a tā te Fatu e hina’aro i tōna mau tāvini ’ia rave i te mau mahana hope’a nei. Hō’ē rāve’a e nehenehe te mau tamari’i e tauturu i teie ’ohipa, ’oia ho’i, nā roto i te rirora’a ’ei māramarama nō te mau ta’ata ’ati a’e ia rātou.

Te mau ’ohipa ri’i e nehenehe e rave

• ’A tai’o i te mau tamari’i i teie parau i muri nei nō roto mai i Te Parau Ha’api’ira’a ’e te mau Parau Fafau 86:11 : « E ao tō ’outou mai te mea e vai noa ’outou i roto i tō’u maita’i, ’ei māramarama i te feiā etene, (’aore rā te mau ta’ata ’aita i fāri’i i te ’evanelia]. » Nāhea te māramarama i te ha’amaita’i ia tātou ? E aha te huru ’aita ana’e e māramarama ? Nāhea e nehenehe ai ia tātou ’ia riro ’ei māramarama nō te tahi atu mau ta’ata tei ’ore i ’ite nō ni’a i te ’evanelia ? ’A tauturu i te mau tamari’i ’ia feruri i te mau rāve’a e nehenehe ai tātou e fa’a’ite i te maita’i ’o Iesu ia vetahi ’ē.

• ’A ani i te mau tamari’i ’ia feruri ē, tē tāmata nei te hō’ē hoa i te haere nā roto i te pōiri (tūpohe i te mau mōrī mai te mea ē, e tauturu te reira). Nō te aha e mea fifi ’ia haere nā roto i te pōiri ? E aha tā tātou e nehenehe e rave nō te tauturu i tō tātou hoa ? ’A fa’ata’a ē, ’ia pe’e ana’e tātou i te Fa’aora, e au ïa mai te fa’a’amara’a i te hō’ē mōrī nō te fa’a’ite ia vetahi ’ē i te ’ē’a e haere.

• E ’ite-pinepine-hia te mau ’ā’amu i roto i te Liahona ’e te Hoa nō ni’a i te mau tamari’i hi’ora’a maita’i. ’A ’imi i te hō’ē o te reira nō te fa’a’ite i te mau tamari’i, ’ia fa’auru te reira ia rātou ’ia riro ato’a ’ei hi’ora’a maita’i.

Te Parau Ha’api’ira’a ’e te mau Parau Fafau 87

E nehenehe tō tātou nohora’a e riro ’ei « vāhi mo’a ».

’Aita e ’utuāfare maita’i hope roa, tē vai ra rā te mau mea e nehenehe tātou pā’āto’a e rave nō te fa’ariro i tō tātou fare ’ei vāhi mo’a nō te hau.

Te mau ’ohipa ri’i e nehenehe e rave

• ’A fa’ata’a i te mau tamari’i ē, ’ua ha’ape’ape’a ’o Iosepha Semita nō ni’a i te mau mea e tupu ra i roto i te ao. ’A ha’apoto i te upo’o parau nō te tuha’a 87, ’aore rā, ’a tai’o i te « Pene 30 : E heheura’a nō ni’a i te tāma’i » (Te mau ’ā’amu nō Te Parau Ha’api’ira’a ’e te mau Parau Fafau, 117–18 ; hi’o ato’a te video i ni’a i te ChurchofJesusChrist.org). ’A ani i te mau tamari’i ’ia fa’aro’o i te mau mea tei riro ’ei fa’aha’ape’ape’ara’a ia Iosepha. Nō te ha’api’i i te mea tā te Fatu i parau o te ti’a ia tātou ’ia rave nō ni’a i taua mau fifi ra, ’a tai’o i Te Parau Ha’api’ira’a ’e te mau Parau Fafau 87:8.

• ’A fa’a’ite i te hōho’a o te hō’ē hiero, ’e ’a fa’a’ite ē, nō te aha te hiero i riro ai ’ei vāhi mo’a. ’A fa’a’ite i te hōho’a o te hō’ē fare, ’e ’a tauturu i te mau tamari’i ’ia feruri i te mau rāve’a e nehenehe ai ia rātou ’ia fa’ariro i tō rātou fare ’ei mea mo’a mai te hiero (hi’o te ’api ’ohipara’a nō teie hepetoma). Nō te aha tātou e hina’aro ai ’ia vai i roto i te mau vāhi mo’a ?

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 85:6

E paraparau mai te Vārua nā roto i te hō’ē « reo iti ha’iha’i ».

’Ua rau te mau fa’a’āreareara’a i roto i te ao nei ’o tē ha’afifi ’ia fa’aro’o i te Vārua. Nāhea ’oe i te tauturu i te mau tamari’i ’ia fa’aro’o i te reo o te Vārua ?

Te mau ’ohipa ri’i e nehenehe e rave

• ’A ani i te mau tamari’i e aha tā rātou e parau mai te mea ē, e ui mai te hō’ē ta’ata ia rātou ē, nāhea rātou e ’ite ai ’ia paraparau ana’e mai te Vārua Maita’i ia rātou. ’A ani ia rātou ’ia tai’o nō ni’a i te hō’ē rāve’a tā Iosepha Semita i fa’ata’a mai ’ei reo o te Vārua i roto i Te Parau Ha’api’ira’a ’e te mau Parau Fafau 85:6.

• ’A ha’uti marū noa i te hō’ē hīmene, ’e ’a ani i te hō’ē o te mau tamari’i ’ia ’imi e aha te reira hīmene, ’a ha’amāniania ai vetahi atu mau tamari’i, nā roto i te tūpa’ira’a i te rima ’aore rā te ta’ata’ahira’a i ni’a i te tahua. I muri iho, ’a ani i te tahi atu mau tamari’i ’ia fa’aea te ha’amānianiara’a, ’e ’a ’āparau ē, e aha te fa’aaura’a o teie ’ohipa, i te fa’aro’ora’a i te Vārua Maita’i ’e te fa’a’orera’a i te mau fa’anevanevara’a i roto i tō tātou orara’a. ’A tauturu i te mau tamari’i ’ia feruri i te mau fa’anevanevara’a tā rātou e nehenehe e fa’a’ore, ’ia ti’a ia rātou ’ia fa’aro’o pinepine atu ā i te Vārua.

Te Parau Ha’api’ira’a ’e te mau Parau Fafau 86

E nehenehe au e tauturu ’ia ha’aputuputu i te mau ta’ata o te Atua.

Te parabole nō te sītona ’e te zīzānia, nō ni’a ïa i « te mau mahana hope’a ra, ’oia i teienei » (Te Parau Ha’api’ira’a ’e te mau Parau Fafau 86:4). ’A fa’a’ohipa i teie parabole nō te tauturu i te mau tamari’i ’ia fāri’i i te fa’aurura’a nō te ha’a i roto i te « ha’aputuputura’a o te sītona » (’īrava 7).

Te mau ’ohipa ri’i e nehenehe e rave

• ’A fa’ati’a i te mau tamari’i i te parabole nō te sītona ’e te zīzānia, ’aore rā, ’a ani i te hō’ē tamari’i ’ia fa’ati’a mai i te reira (hi’o Mataio 13:24–30). ’A ani i te mau tamari’i ’ia pāpa’i i te hōho’a nō te hō’ē mea i roto i te parabole. I muri iho, ’a tai’o ’āmui i Te Parau Ha’api’ira’a ’e te mau Parau Fafau 86:1–7, ’e ’a ani i te mau tamari’i ’ia pāpa’i i ni’a i tā rātou hōho’a pāpa’i e aha tā te reira e fa’ahōho’a nei.

• ’A fa’aineine e rave rahi mau hōho’a na’ina’i ’aore rā mau hōho’a pāpa’i o te sītona, ’e ’a huna i te reira nā roto i te piha. ’A ani i te tamari’i tāta’itahi ’ia tauturu i te ha’aputura’a i te sītona ’e ’ia pāpa’i ni’a iho i te i’oa o te hō’ē ta’ata tā rātou e nehenehe e « ha’aputuputu » ia Iesu Mesia ra. E aha te aura’a nō te parau ra, ha’aputuputu i te ta’ata ia Iesu Mesia ra ? E aha te tahi mau rāve’a e nehenehe ai tātou e rave i te reira ? E aha te aura’a nō te parau ra « e vai noa i roto i te maita’i [’o te Fa’aora] », ’e e nāhea te reira i te tauturu ia tātou ’ia ha’aputuputu i te ta’ata iāna ra? (TeParau Ha’api’ira’a ’e te mau Parau Fafau 86:11).

Te Parau Ha’api’ira’a ’e te mau Parau Fafau 87

E nehenehe au e « ti’a i roto i te mau vāhi mo’a ra. »

E fa’aruru te mau tamari’i tā ’oe e ha’api’i nei i te mau ’ati pae vārua ’e pae tino i roto i tō rātou orara’a. E nehenehe ’oe e tauturu ia rātou ’ia fa’aineine nō te ’aro i taua mau ’ati ra nā roto i te ha’api’ira’a ia rātou ’ia ’imi ’e ’ia ti’a i roto i te mau vāhi mo’a.

Te tāvinira’a i roto i te hiero ’o te hō’ē ïa rāve’a e nehenehe ai tātou e tauturu i te ha’aputuputura’a i te ta’ata o te Atua.

Te mau ’ohipa ri’i e nehenehe e rave

• ’A tai’o ’āmui i Te Parau Ha’api’ira’a ’e te mau Parau Fafau 87:6 nō te ha’api’i mai nō ni’a i te mau mea tā te Fatu i parau e tupu i te mau mahana hope’a nei. ’A ani i te mau tamari’i ’ia paraparau nō ni’a i te mau fifi tā te mau tamari’i o tō rātou fāito matahiti e fa’aruru nei i te tahi mau taime. ’A ani ia rātou ’ia ’imi i roto i te ’īrava 8 e aha tā te Fatu i parau e rave i roto i te mau taime fifi. ’A parau i te mau tamari’i nō ni’a i te mau vāhi mo’a i roto i tō ’oe orara’a.

• ’A tauturu i te mau tamari’i ia hāmani i te hō’ē tāpura nō te mau vāhi mo’a, te mau mana’o mo’a, ’e te mau ’ohipa mo’a ’o tē nehenehe e tauturu ia rātou ’ia fa’aruru i te ’ati pae vārua (nō te mau mana’o, ’a māta’ita’i i te video « Standing in Holy Places » ’e « Stand Ye in Holy Places—Bloom Where You’re Planted », ChurchofJesusChrist.org). ’A ani ia rātou ’ia tāpe’a noa i tā rātou tāpura nō te taime e hina’arohia te reira.

Fa’aitoito i te ha’api’ira’a mai i te fare

’A ani i te mau tamari’i ’ia mā’iti i te hō’ē ’ohipa tā rātou e rave nō te fa’ariro i tō rātou fare ’aore rā tō rātou orara’a ’ei « vāhi mo’a ».

Ha’amaita’ira’a i tā tātou ha’api’ira’a

’A fa’a’ohipa i tō ’oe mana rohi (créativité). ’Eiaha e ha’apa’o noa i te mau ’ohipa ri’i tei hōro’ahia atu i roto i teie arata’i ha’api’ira’a. ’Ia fa’ahotu teie mau mana’o i tō ’oe iho mana rohi. ’A feruri nō ni’a i te mea tā te mau tamari’i i roto i tā ’oe piha ha’api’ira’a e ’oa’oa ’e e aha te tauturu ia rātou ’ia ’apo mai i te ha’api’ira’a.