9–15 nō ’Ātete

Te Parau Ha’api’ira’a ’e te mau Parau Fafau 88

« ’A ha’amau na… ’ei fare nō te Atua »

Tē a’o nei Te Parau Ha’api’ira’a ’e te mau Parau Fafau 88:118, « Ha’api’i i te tahi ’e te tahi i te mau parau nō te pa’ari ». E aha « te mau parau nō te pa’ari » i roto i Te Parau Ha’api’ira’a ’e te mau Parau Fafau 88 e tano maita’i roa nō te mau tamari’i tā ’oe e ha’api’i nei ?

Pāpa’i i te mau mana’o e tae mai

Tītau i te mana’o

’A parau i te mau tamari’i ē, tē hina’aro nei te Metua i te ao ra ’e ’o Iesu Mesia ’ia tāmau noa tātou i te ha’api’i mai i te roara’a o tō tātou orara’a. I muri iho ’a ani ia rātou ’ia fa’a’ite mai i te hō’ē mea tā rātou i ha’api’i mai i te fare, i te fare ha’api’ira’a, ’aore rā i te fare pure.

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 88:63

Tē hina’aro nei te Atua ’ia ha’afātata atu vau i pīha’i iho iāna.

E aha tā ’oe e nehenehe e rave nō te tauturu i te mau tamari’i tā ’oe e ha’api’i ra, ’ia ’ite i te fa’aurura’a a te Atua i roto i tō rātou orara’a ?

Te mau ’ohipa ri’i e nehenehe e rave

• ’Ia tai’o ’oe i Te Parau Ha’api’ira’a ’e te mau Parau Fafau 88:63, ’a ani i te mau tamari’i ’ia ha’uti mai i te tahi mau ta’o tā rātou e fa’aro’o. ’Ei hi’ora’a, e fa’ahua rātou i te ’imi i te hō’ē mea ’aore rā e pātōtō.

• ’A ani i te hō’ē tamari’i ’ia tāpe’a i te hō’ē hōho’a nō Iesu i mua i te piha, ’a ti’a ai te tahi atu mau tamari’i i muri i te piha. ’A ani i te mau tamari’i ’ia ta’ahi i mua i te mau taime ato’a e parau ’oe i te hō’ē mea e nehenehe e rave nō te ha’afātata atu ā i te Fa’aora, ’e ’ia ta’ahi i muri i te mau taime ato’a e parau ’oe i te hō’ē mea e fa’aātea ia tātou i te Fa’aora. ’A fa’a’ite i tō ’oe ’itera’a pāpū ē, ’ia tāmata ana’e tātou i te ha’afātata atu i te Fatu, e ha’afātata mai ’oia ia tātou.

Te Parau Ha’api’ira’a ’e te mau Parau Fafau 88:118

Tē hinaʼaro nei te Metua i te Ao ra ’ia ha’api’i mai au.

« ’Ua riro te ha’api’ira’a ’ei tuha’a faufa’a nō te fa’anahora’a a te Metua i te ao ra nō te tauturu ia ’outou ’ia riro rahi atu ā mai iāna… E riro te ha’api’ira’a tā ’outou e fāri’i ’ei mea faufa’a nō ’outou i te tāhuti nei ’e i roto i te orara’a a muri atu » (Nō te Pūai o te Feiā ’Āpī, 9).

Te mau ’ohipa ri’i e nehenehe e rave

• ’A pia i te hō’ē hōho’a nō te hō’ē fare ha’api’ira’a, ’aore rā ’a pāpa’i i te hōho’a o te hō’ē fare ha’api’ira’a i ni’a i te tāpura ’ere’ere, ’e ’a ani i te mau tamari’i ’ia fa’ata’a e aha te hō’ē fare ha’api’ira’a, ’e e aha te ’ohipa e tupu i reira. ’A paraparau nō ni’a i te fare ha’api’ira’a tā Iosepha Semita i ha’amata (hi’o « Pene 31: Te parau pa’ari », Te mau ’ā’amu nō te Parau Ha’api’ira’a ’e te mau Parau Fafau, 119–22). ’A fa’a’ite i te mau tamari’i i te mau hōho’a o te hō’ē fare, te hō’ē fare purera’a, ’e te hō’ē hiero, ’e ’a ani ia rātou nāhea teie mau vāhi i te riro ato’a mai te mau fare ha’api’ira’a.

• ’A hīmene i te hō’ē hīmene nō ni’a i te ha’api’ira’a mai, mai te « Quand je lis l’Ecriture sainte » (Chants pour les enfants, 66). ’A ani i te mau tamari’i e aha tā rātou mea e ’oa’oa ’ia ha’api’i mai.

• ’A tai’o i Te Parau Ha’api’ira’a ’e te mau Parau Fafau 88:118, ’e ’a ha’apāpū i te parau « ha’api’i i te tahi ’e te tahi. » ’A fa’a’ite i te tahi parau pa’ari tā ’oe i ha’api’i mai nā roto mai i te mau tamari’i tāta’itahi o tā ’oe piha ha’api’ira’a, ’e ’a ani ia rātou ’ia fa’a’ite mai i te parau pa’ari tā rātou i ha’api’i mai.

  

  E ’imi tātou i te pa’ari ’e ’ia ha’api’i mai.

Te Parau Ha’api’ira’a ’e te mau Parau Fafau 88:119

Te hiero ’o te fare ïa o te Atua.

’A feruri nāhea ’oe i te tauturu i te mau tamari’i ’ia fa’atupu i te here nō te hiero ’e te hina’aro e ha’amori i te Fatu i reira, ’ia ineine ana’e rātou.

Te mau ’ohipa ri’i e nehenehe e rave

• ’A fa’a’ite i te mau tamari’i nāhea ’ia hāmani i te hō’ē « ’oe’oera’a » hiero nā roto i te ’āfa’ira’a i tō rātou rima i ni’a, ’a fa’atū’ati ai i te mau manimani rima. ’A tai’o i Te Parau Ha’api’ira’a ’e te mau Parau Fafau 88:119, ’e ’a ani ia rātou ’ia hāmani i te hō’ē ’oe’oera’a i te mau taime ato’a e parau ’oe i te ta’o « fare ». ’A fa’ata’a ē, ’ua hina’aro te Metua i te ao ra ’ia patu ’o Iosepha Semita ’e te feiā mo’a i te hō’ē hiero, ’aore rā i te hō’ē « fare nō te Atua ». ’A pia i te hōho’a nō te hō’ē hiero fātata ’a paraparau ai ’oe nō ni’a i te mau ta’a-’ē-ra’a i rotopū i te hō’ē hiero ’e te hō’ē fare purera’a.

• ’A fa’a’ite i tō ’oe ’itera’a pāpū nō ni’a i te hiero, ’e ’a hīmene ’āmui i te hō’ē hīmene nō ni’a i te hiero, mai te « Oh, J’aime voir le temple » (Chants pour les enfants, 99). Ani i te mau tamariʼi ’ia pāpa’i i te hōhoʼa nō rātou iho tē haere ra i te hiero.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 88:68, 74

E nehenehe Iesu Mesia e tāmā iā’u i te hara.

Te aura’a nō te parau ra ’ia ha’amo’ahia, ’oia ho’i, ’ia fa’arirohia ’ei mea mā ’e te vi’ivi’i ’ore. Nāhea e ti’a ai ia ’oe ’ia tauturu i te mau tamari’i tā ’oe e ha’api’i ra, ’ia māramarama ē, e nehenehe rātou e ha’amo’ahia ’ia pe’e ana’e rātou ia Iesu Mesia ?

Te mau ’ohipa ri’i e nehenehe e rave

• ’A ani i te hō’ē tamari’i ’ia tai’o ha’apūai i Te Parau Ha’api’ira’a ’e te mau Parau Fafau 88:68 ’e te tahi ’ia tai’o i te ’īrava 74. ’A ani i te mau tamari’i ’ia fa’aro’o i te hō’ē pereota e ’itehia i roto i teie nā ’īrava e piti. Nāhea tātou i te « ha’amo’a » ia tātou iho ? (Mai te mea e hina’arohia, ’a tauturu i te mau tamari’i ’ia hi’o i « te ha’amo’ara’a » i roto i te Buka fa’atorora’a pāpa’ira’a mo’a.) ’A pāpa’i i te hōho’a o te hō’ē māfatu, te hō’ē rima, ’e te hō’ē ’āvae i ni’a i te tāpura ’ere’ere. ’A tauturu i te mau tamari’i ’ia feruri e aha te aura’a « e ha’amo’a » ’e « e tāmā » i tō tātou māfatu, te rima ’e te ’āvae. Nāhea te Fa’aora ’ia tauturu ia tātou ’ia rave i te reira ? Nāhea e nehenehe ai ia tātou ’ia fa’a’ohipa i tō tātou māfatu, te rima ’e te ’āvae nō te riro rahi atu ā mai ia Iesu ?

• ’A fa’ata’a ē, ’ua hina’aro te Fatu i tōna mau ta’ata ’ia ha’amo’ahia hou ’a ti’a ai ia rātou ’ia haere i roto i te hiero. ’A feruri e ani i te hō’ē taure’are’a tamāroa ’aore rā hō’ē taure’are’a tamāhine e parau fa’ati’a tāna nō te hiero, ’ia haere mai i roto i te piha ha’api’ira’a. ’A ani iāna ’ia fa’a’ite i te mau tamari’i mai te aha te hō’ē parau fa’ati’a, ’a ’āparau e aha tā rātou e rave nō te vai-ti’amā-ra’a nō te fāri’i i te reira, ’e ’ia fa’a’ite nō te aha e mea faufa’a ’ia fāri’i i te hō’ē parau fa’ati’a nō te hiero, noa atu ē, ’aita te ta’ata e fa’aea ra i pīha’i iho i te hiero.

Te Parau Ha’api’ira’a ’e te mau Parau Fafau 88:77–80, 118

Tē hinaʼaro nei te Metua i te ao ra ’ia ha’api’i mai au.

E nehenehe ’oe e tauturu i te mau tamari’i ’ia māramarama ē, te ha’api’ira’a i te mau mea nō te pae vārua ’e nō te pae tino, e nehenehe te reira e fa’aineine ia rātou ’ia tāvini i te Fatu.

Te mau ’ohipa ri’i e nehenehe e rave

• ’A pāpa’i i ni’a i te tāpura ’ere’ere E aha, Nō te aha,ʼe Nāhea. ’A ani i te mau tamari’i ’ia tai’o piti piti i Te Parau Ha’api’ira’a ’e te mau Parau Fafau 88:77–79 ’e ’ia hāmani i te hō’ē tāpura nō te ’ite E aha te mau mea tā te Fatu e hina’aro nei ’ia ha’api’i mai tātou. I muri iho ’a ani ia rātou ’ia hi’o i te ’īrava 80 nō te ’imi mai nō te aha ’oia e hina’aro ai ia tātou ’ia ha’api’i mai. ’Ei reira rātou e nehenehe ai e ’imi i te ’īrava 118 nō te ’ite mai nāhea tātou e ha’api’i mai. E aha tā tātou e ha’api’i mai i roto i teie mau ’īrava nō ni’a i te hi’ora’a a te Fatu i te parau nō te fāito ha’api’ira’a ’e te ’apora’a mai i te ha’api’ira’a ?

• ’A pia i te hō’ē hōho’a fenua nō te ao nei, ’e ’a tai’o ’āmui i Te Parau Ha’api’ira’a ’e te mau Parau Fafau 88:79. Nō te aha e mea faufa’a nō tātou ’ia ha’api’i mai nō ni’a i te tahi atu mau fenua ’e mau hīro’a tumu ? Mai te mea ē, ’ua rātere ’oe ’aore rā ’ua ora ’oe ’aore rā ’ua ora te mau tamari’i i roto i te tahi atu fenua, ’a fa’a’ite i te mau mea nō ni’a i te reira peu tumu, ’e ’a fa’a’ite i te mau mea tā ’oe i ha’api’i mai.

Te Parau Ha’api’ira’a ’e te mau Parau Fafau 88:119–26

« ’A ha’amau na—’ei fare nō te Atua »

E nehenehe te mau arata’ira’a a te Fatu nō ni’a i « te fare ’o te Atua » e riro ’ei arata’i faufa’a rahi nō tātou ’a patu ai tātou i tō tātou orara’a ’e i tō tātou fare.

Te mau ’ohipa ri’i e nehenehe e rave

• ’A ani i te mau tamari’i ’ia mā’iti e hitu ta’o ’o tē fa’ata’a ra i te huru o tō rātou fare ’aore rā te tahi atu fare tā rātou i māta’ita’i. I muri iho, ’a ani ia rātou ’ia tai’o i Te Parau Ha’api’ira’a ’e te mau Parau Fafau 88:119 ’e ’ia ’imi mai i terā e hitu ta’o tā te Fatu i fa’a’ohipa nō te fa’ata’a i te huru o tōna fare. ’A tauturu i te mau tamari’i ’ia feruri i te mau rāve’a e nehenehe ai rātou e fa’ariro i tō rātou fare ’ei « fare nō te Atua. »

• ’A hōro’a i te mau tamari’i i te hō’ē pereota nō roto mai i Te Parau Ha’api’ira’a ’e te mau Parau Fafau 88:119–26 nō te pāpa’i hōho’a. ’A fa’a’ite ai rātou i tā rātou mau hōho’a i te tahi ’e te tahi, ’ia vaiiho i te mau tamari’i ’ia hi’o i roto i te mau ’īrava e aha te pereota e tū’ati ra i ni’a i te hōho’a tāta’itahi.

• ’A pāpa’i i ni’a i te tāpura ’ere’ere e rave ’e ’eiaha e rave. ’A ani i te mau tamari’i ’ia tai’o i Te Parau Ha’api’ira’a ’e te mau Parau Fafau 88:119–26 ’e ’a tāpura i te mau mea tā te Fatu e hina’aro ’ia rave te feiā mo’a ’aore rā, ’eiaha e rave, nō te fa’aineine i te ha’api’i mai i roto i te hiero. E nehenehe rātou e hi’o i te mau ta’o pāpū ’ore i roto i te buka fa’atoro parau. ’A ani i te mau tamari’i ’ia mā’iti i te tahi mea tā rātou e ha’amata i te rave ’aore rā, te tahi mea tā rātou e fa’aea i te rave.

Fa’aitoito i te ha’api’ira’a i te fare

’A ani i te mau tamari’i ’ia pāpa’i ’aore rā, ’ia pāpa’i hōho’a hō’ē mea tā rātou i ha’api’i mai ’o tā rātou e hina’aro e fa’a’ite i tō rātou ’utuāfare.

Ha’amaita’ira’a i tā tātou ha’api’ira’a

’A tauturu i te mau tamari’i āpī ’ia ’āmui mai i roto i te mau ’āparaura’a ’evanelia. E tītauhia paha ia ’oe ’ia feruri i te tahi mau rāve’a nō te fa’atupu i te ’āparaura’a ’evanelia ’e te mau tamari’i ’āpī a’e. ’Ei hi’ora’a, e nehenehe ’oe e hōpoi mai i roto i te piha ha’api’ira’a i te hō’ē mea e nehenehe tā te mau tamari’i e tāpe’a, i te taime nā rātou te paraparaura’a.