« 23–29 nō ’Ātete. Te Parau Ha’api’ira’a ’e te mau Parau Fafau 93 : ‘’A fāri’i i tōna ’īra’a’», Mai, pe’e mai—nō te Paraimere : Te Parau Ha’api’ira’a ’e te mau Parau Fafau 2021 (2020)
« 23–29 nō ’Ātete. Te Parau Ha’api’ira’a ʼe te mau Parau Fafau 93 », Mai, pe’e mai—nō te Paraimere
’Ua ’ite ihora vau i te Tamaiti a te Ta’ata nei i te ti’ara’a i te Rima ’Atau o te Atua, nā Walter Rane
23–29 nō ’Ātete
Te Parau Ha’api’ira’a ’e te mau Parau Fafau 93
« ’A fāri’i i tōna ’īra’a »
Te mau tamari’i ’o tā ’outou e ha’api’i nei e mau tamaiti ’e e mau tamahine vārua faufa’a rahi ïa nā te mau Metua i te ao ra ’e tei ora na i pīha’i iho ia rāua hou ’a haere mai ai i te fenua nei. I muri a’e i te tuatāpapara’a i Te Parau Ha’api’ira’a ’e te mau Parau Fafau 93, e aha tei fa’auruhia ia ’outou ’ia rave nō te tauturu i teie mau tamari’i ’ia tupu i te rahi « i roto i te māramarama ’e te parau mau ? » (’īrava 40).
Pāpa’i i te mau mana’o e tae mai
Tītau i te mana’o
Fa’a’ite i te hōho’a o te Fa’aora (mai tera i roto i te Buka hōho’a nō te ’evanelia ’aore rā, a te ’Ēkalesia), ’e ’a ani i te mau tamari’i ’ia fa’a’ite mai i te mea tā rātou i ’ite nō ni’a iāna. E nehenehe te mau tamari’i pa’ari e fa’a’ite mai i te hō’ē pāpa’ira’a mo’a nō roto mai i Te Parau Ha’api’ira’a ’e te mau Parau Fafau 93 ’o tei tauturu ia rātou ’ia ha’api’i mai nō ni’a ia Iesu Mesia.
Ha’api’i i te ha’api’ira’a tumu : Te mau tamari’i ’āpī a’e
Te Parau Ha’api’ira’a ’e te mau Parau Fafau 93:2–21
E Tamaiti ’o Iesu Mesia nā te Atua.
E mea faufa’a nō te mau tamari’i tā ’outou e ha’api’i ra ’ia ha’api’i mai o vai ’o Iesu Mesia ’e nō te aha e ti’a ia rātou ’ia pe’e ’iāna. E nehenehe te mau parau mau nō ni’a ia Iesu Mesia o te ’itehia i roto i te tuha’a 93 e tauturu.
E fāri’i tātou i te māramarama o Iesu Mesia ’ia ha’apa’o tātou i tāna mau fa’auera’a.
Mau ’ohipara’a e nehenehe e rave
-
’A mā’iti e rave rahi mau parau mau tā ’outou i ha’api’i mai nō ni’a i te Fa’aora i roto i te tuha’a 93 ’o tei fa’auru ia ’outou. Nō te parau mau tāta’itahi tā ’outou i mā’iti, ’a tai’o i te mau tamari’i te ’īrava i reira e ’itehia ai te reira, ’e ’a hōro’a ia rātou i te hō’ē parau faufa’a ’ia fa’aro’o ’a tai’o ai ’outou. ’A fa’a’ite i te hō’ē ’itera’a pāpū poto nō te Fa’aora, ’e ’a vaiiho i te mau tamari’i ’ia fa’a’ite mai i tō rātou iho. E nehenehe te tāpura nō te mau parau mau i muri nei e hōro’a te mau mana’o ia ’outou :
’Ua rave Iesu Mesia i te mau ’ohipa a te Metua (’īrava 5).
’O Iesu Mesia te Māramarama o te ao nei (’īrave 9).
’O Iesu Mesia te Hāmani o te ao nei (’īrava 10).
’Ua fāri’i o Iesu Mesia i te mana ato’a i te ao ra ’e i ni’a i te fenua nei (’īrava 17).
Tei pīha’i iho ’o Iesu Mesia i te Atua i te ha’amatara’a (’īrava 21).
-
’A ani i te mau tamari’i ’ia fa’aro’o i te mea tā rātou e ha’api’i mai nō ni’a i te Fa’aora, ’a ha’apoto ai ’outou i roto i tā ’outou iho mau parau i te tahi o te mau parau mau i ha’api’ihia i roto i te tuha’a 93. (E nehenehe ato’a ’outou e fa’a’ohipa i te « Pene 33 : Hō’ē heheura’a nō ni’a ia Iesu Mesia » [Te mau ’ā’amu o te Parau Ha’api’ira’a ’e te mau Parau Fafau, 126–27].)
Te Parau Ha’api’ira’a ’e te mau Parau Fafau 93:23, 29
’Ua ora na vau i pīha’i iho i te Metua i te Ao ra hou vau ’a haere mai ai i te fenua nei.
Nō te aha e mea faufa’a te reira nō te tauturu i te mau tamari’i ’o tā ’outou e ha’api’i ra ’ia māramarama ē, ’ua ora na rātou ’e te Metua i te Ao ra hou rātou ’a fānauhia mai ai ? Nāhea te ’itera’a i teie parau mau i te ha’amaita’i ia ’outou ?
Mau ’ohipara’a e nehenehe e rave
-
’A parau ’āmui fa’ahou ’e te mau tamari’i i te mau parau « Tei pīha’i iho ato’a ’outou i te Metua i te ha’amatara’a » (Te Parau Ha’api’ira’a ’e te mau Parau Fafau 93:23). ’A fa’ata’a ē, hou tātou ’a fānauhia mai ai i te fenua nei, i ora na tātou ’e te Metua i te Ao ra i roto i te ao. E hīmene ’āmui « Je suis enfant de Dieu » ’aore rā, « I lived in Heaven » (Chants pour les enfants, Children’s Songbook, 2–3, 4).
-
’A ani i te mau tamari’i ’ia fa’a’ū i te ’api ’ohipara’a ’e ’ia pāpa’i hōho’a ia rātou iho ’e te Metua i te ao ra ’e Iesu Mesia i roto i te orara’a hou te tāhuti nei. ’A fa’a’ite i tō ’outou ’itera’a pāpū ē, ’ua here te Atua ia tātou pā’āto’a ’e e mau tamari’i tātou pā’āto’a nāna.
Ha’api’i i te ha’api’ira’a tumu : Te mau tamari’i pa’ari
Te Parau Ha’api’ira’a ’e te mau Parau Fafau 93:2–21
E Tamaiti ’o Iesu Mesia nā te Atua.
Rahi noa atu tō tātou māramarama nō ni’a ia Iesu Mesia, rahi noa ato’a atu tō tātou hina’aro hōhonu ’e te hina’aro mau e ha’amori iāna ’e ’ia haere i te Metua ra nā roto iāna (hi’o Te Parau Ha’api’ira’a ’e te mau Parau Fafau 93:19).
Mau ’ohipara’a e nehenehe e rave
-
Fa’a’ite i te hō’ē hōho’a nō te Fa’aora, ’e ’a ani i te mau tamari’i nō te aha e mea faufa’a roa ’ia ’ite tātou nō ni’a ia Iesu Mesia. ’A ani ia rātou ’ia ’imi i te tahi atu mau pahonora’a i roto i Te Parau Ha’api’ira’a ’e te mau Parau Fafau 93:19. E ani ia rātou ’ia feruri i te hō’ē rāve’a tā rātou e nehenehe e ha’api’i rahi mai nō ni’a ia Iesu i roto i te hepetoma e haere mai nei, ’e e hōro’a ia rātou i te hō’ē taime nō te fa’a’ite mai i tō rātou mau mana’o.
-
’A feruri i te hō’ē rāve’a ’ana’anatae nō te fa’aitoito i te mau tamari’i ’ia tai’o nō ni’a i te Fa’aora i roto i te tuha’a 93. E nehenehe ’outou e pāpa’i i ni’a i te mau ’api parau e rave rahi mau fa’ahorora’a ’īrava nō te tuha’a 93 ’o tē ha’api’i nei i te mau parau mau nō ni’a ia Iesu Mesia (’ei hi’ora’a, hi’o i te mau ’īrava 5, 9–10, 17, 21). ’A tu’u i te mau ’api parau i roto i te hō’ē fa’ari’i, ’e e ani i te mau tamari’i ’ia mā’iti te tahi i muri mai i te tahi ’e ’ia tai’o i te ’īrava pāpa’ira’a mo’a i te piha. E aha tā tātou i ha’api’i mai nō ni’a ia Iesu Mesia nā roto mai i teie mau ʼīrava ?
Te Parau Ha’api’ira’a ’e te mau Parau Fafau 93:23, 29, 38
’Ua ora nā vau i pīha’i iho i te Metua i te Ao ra hou vau ’a haere mai ai i te fenua nei.
’Ua ha’apāpū mai te Fa’aora e toru taime i roto i te tuha’a 93 ē, i ora nā tātou ’e te Atua « i te ha’amatara’a » (mau ’īrava 23, 29, 38). Nō te aha ’ua hina’aro ’oia ia tātou ’ia ’ite i te reira ? Nāhea teie ’itera’a nō teie parau mau i te ha’amaita’i i te mau tamari’i tā ’outou e ha’api’i ra ?
Mau ’ohipara’a e nehenehe e rave
-
E tai’o ’āmui i Te Parau Ha’api’ira’a ’e te mau Parau Fafau 93:23, 29, 38, ’e ’a ani i te mau tamari’i ’ia ’imi mai i te hō’ē parau mau nō ni’a ia rātou iho tei fa’ahiti-pinepine-hia i roto i teie mau ’īrava. E ani i te mau tamari’i ’ia fa’a’ite mai i te mau mea ato’a tā rātou i ’ite nō ni’a i tō tātou orara’a ’e te Metua i te Ao ra hou tātou ’a fānauhia mai ai. ’A hōro’a i te tamari’i tāta’itahi hō’ē o te mau pāpa’ira’a mo’a i muri nei, ’e ’a tauturu ia rātou ’ia ’ite mai i te tahi mea ’o tā teie mau pāpa’ira’a mo’a e ha’api’i nei nō ni’a i te orara’a hou tō tātou haerera’a mai i te fenua nei : Ieremia 1:5 ; Te Parau Ha’api’ira’a ’e te mau Parau Fafau 138:53–56 ; Mose 3:5 ; Aberahama 3:22–26.
-
E hīmene ’āmui « Je suis enfant de Dieu » ’aore rā, « I lived in Heaven » (Chants pour les enfants, Children’s Songbook, 2– 3, 4). E aha te mau parau mau tā tātou i ha’api’i mai nā roto mai i teie hīmene nō ni’a i tā tātou ’ōpuara’a nō te haere mai i te fenua nei ?
Te Parau Ha’api’ira’a ’e te mau Parau Fafau 93:24
Te parau mau ’o te ’itera’a ïa i te mau mea i ma’iri, i teienei ’e a muri a’e.
E rave rahi mau hi’ora’a ta’a ’ē tā tō te ao ato’a nei nō ni’a e aha te parau mau, ’e nāhea ’ia ’ite mai i te reira. Nāhea ’outou i te tauturu i te mau tamari’i tā ’outou e ha’api’i ra ’ia māramarama ē, e mea mau te parau mau, noa atu te huru o te mea tā vetahi ’ē e nehenehe e parau mai, ’e ’ua ’ite te Metua i te Ao ra te mau parau mau ato’a ?
Mau ’ohipara’a e nehenehe e rave
-
Pāpa’i i te ta’o parau mau i ni’a i te tāpura ’ere’ere, ’e e ani i te mau tamari’i ’ia pāpa’i i te hō’ē tātarara’a i pīha’i iho i te reira. E tai’o ’āmui e nāhea te Fatu i te tātarara’a i te parau mau i roto i Te Parau Ha’api’ira’a ’e te mau Parau Fafau 93:24. E hīmene i te hō’ē hīmene nō ni’a i te parau mau, mai teie « E aha te parau mau ? » (Te mau Hīmene, no. 166), ’e e ani i te mau tamari’i ’ia ’ite mai i roto i te hīmene i te tahi atu mau rāve’a nō te tātara i te parau mau.
-
Nō te tauturu i te mau tamari’i ’ia fa’a’ohipa i te mau parau mau i roto i Te Parau Ha’api’ira’a ’e te mau Parau Fafau 93, e pāpa’i i te tahi mau fa’ahorora’a pāpa’ira’a mo’a nō roto mai i teie tuha’a i ni’a i te mau ’api parau. I ni’a i te tahi atu mau ’api parau, e pāpa’i i te mau parau mau tā teie mau ’īrava tata’itahi e ha’api’i nei. E ani i te mau tamari’i ’ia ’ohipa ’āmui nō te tai’o i te mau ’īrava ’e ’ia tū’ati i te mau parau mau i te mau ’īrava tā rātou i tai’o. Nō te aha tātou i ’oa’oa ai ’ia fāri’i i te hō’ē ’itera’a nō te parau mau ?
Fa’aitoito i te ’apora’a mai i te fare
E ani i te mau tamari’i ’ia pāpa’i ’aore rā ’ia pāpa’i hōho’a i te hō’ē mea tā rātou i ’apo mai i roto i te piha ha’api’ira’a ’e ’ia fa’a’ite i te reira i tō rātou ’utuāfare ’ia ho’i rātou i te fare.
Ha’amaita’ira’a i tā tātou ha’api’ira’a
Tauturu i te mau tamari’i ’ia ’ite i te Vārua. Mai te mea e mau ’itera’a pae vārua tō ’outou ’e te mau tamari’i (’ei hi’ora’a, te tai’ora’a i te mau pāpa’ira’a mo’a ’e ’o rātou, te fa’aro’ora’a i tō rātou mau ’itera’a pāpu ’aore rā te hīmene-’āmui-ra’a), e tauturu ia rātou ’ia ’ite i te fa’aurura’a a te Vārua Maita’i.