Hiero nō Kirtland, nā Al Rounds

30 nō ’Ātete–5 nō Tetepa

Te Parau Ha’api’ira’a ʼe te mau Parau Fafau 94–97

« Nō te fa’aorara’a o Ziona »

’A ’imi i te fa’aurura’a nō te ’ite e aha tā te mau parau tumu nō roto mai i te mau tuha’a 94–97 e ha’apāpū nei ’a ha’api’i ai ’outou. E nehenehe ’outou e fa’atano i te mau mana’o nō te ’ohipara’a nō te mau tamari’i ’āpī a’e ’a ha’api’i ai ’outou i te mau tamari’i pa’ari, ’e te tahi i te tahi.

Pāpa’i i te mau mana’o e tae mai

Tītau i te mana’o

E fa’a’ite i te mau tamari’i i te hō’ē hōho’a nō te hō’ē hiero, ’e e ani ia rātou ’ia fa’a’ite mai i te mea tā rātou i ’ite nō ni’a i te mau hiero. E nehenehe ato’a rātou e paraparau nō ni’a e aha tā rātou e fāri’i ’ia ’ite ana’e rātou i te hō’ē hiero.

Ha’api’i i te ha’api’ira’a tumu : Te mau tamari’i ’āpī a’e

Te Parau Ha’api’ira’a ʼe te mau Parau Fafau 95:8 ; 97:15–16

Te hiero ’o te fare ïa o te Fatu.

’Ua tauturu ato’a te mau tamari’i nō Kirtland, tei te iti ’e te mea faufa’a rā, nō te patu i te hiero nō Kirtland. Tauturu i te mau tamari’i ’o tā ’outou e ha’api’i nei ’ia ha’apūai i tō rātou here i te fare mo’a o te Fatu.

Mau ’ohipara’a e nehenehe e rave

• ’A fa’a’ite i te hō’ē hōho’a nō te hiero o Kirtland (hiʼo te fa’anahora’a o teie hepetoma i roto Mai, pe’e mai—nō te ta’ata hō’ē ’e te ’utuāfare). E fa’a’ohipa i te mau pereota nō roto mai i Te Parau Ha’api’ira’a ’e te mau Parau Fafau 95:8 nō te ha’api’i i te mau tamari’i nō ni’a i te mau fa’auera’a a te Fatu ’ia patu i teie hiero. E vaiiho i te mau tamari’i, te tahi i muri mai i te tahi, ’ia tāpe’a i te hōho’a ’e ’ia parau, « Te hiero o te fare ïa o te Fatu ».

  

  ’Ua patu te feiā mo’a i te hō’ē hiero ’ia vai fātata noa i te Atua.

• ’A parau i te mau tamari’i ē, i ni’a i te mau hiero ato’a ’ua pāpa’ihia « ’Ei mo’a i te Fatu. Te fare o te Fatu ». Mai te mea e nehenehe, ’a fa’a’ite ia rātou te hō’ē hōho’a o teie mau parau i ni’a i te hō’ē hiero. Nō te aha te hiero ’ua riro ’ei vāhi ta’a ’ē ? ’A tai’o te mau pereota nō roto mai i Te Parau Ha’api’ira’a ’e te mau Parau Fafau 97:15–16 ’o tē ha’api’i nei nō ni’a i te hiero i te rirora’a ’ei fare nō te Fatu, ’e ’a fa’a’ite i tō ’outou mau ’āehuehu nō ni’a i te hiero.

• E ani i te mau tamari’i ’ia fa’ahua ē ’ua tauturu rātou i te patura’a i te hō’ē hiero (tāpū i te rā’au, pātiti i te naero, pēni i te mau papa’i, ’e te tahi atu). E fa’ata’a i te faufa’a rahi o te hiero nō te Fatu, i te ’ohipa-pūai-ra’a te feiā mo’a nō te patu i te hiero nō Kirtland, ’e nō tā rātou fa’atusiara’a rahi nō te reira (hi’o Feiā Mo’a, 1:210).

• Hīmene ’āmui i te hō’ē hīmene nō te tauturu i te mau tamari’i ’ia roa’a i te tura nō te fare o te Fatu, mai te « Oh, j’aime voir le temple » (Chants pour les enfants, 99). E vaiiho i te mau tamari’i ’ia fa’a’ite mai i tō rātou mau ’āehuehu nō ni’a i te hiero.

Te Parau Ha’api’ira’a ’e te mau Parau Fafau 97:8

E nehenehe iāʼu e riro ’ei ta’ata ha’avare ’ore

I roto i Te Parau Ha’api’ira’a ’e te mau Parau Fafau 97:8, ’ua tātara te Fatu i te ha’avare ’ore mai te hō’ē o te mau huru o te feiā « ’ua fāri’ihia e au nei ».

Mau ’ohipara’a e nehenehe e rave

• ’A fa’ata’a i te mau tamari’i ē ’ua ha’api’i te Atua ē, ’ia riro ana’e tātou ’ei ta’ata ha’avare ’ore, e fāri’ihia tātou e āna (hi’o Te Parau Ha’api’ira’a ’e te mau Parau Fafau 97:8). ’A fa’a’ite ia rātou i te tahi mau ’ā’amu poto ’o te tauturu ia rātou ’ia māramarama, e aha te aura’a ’ia riro ’ei ta’ata ha’avare ’ore. E nehenehe teie mau ’ā’amu e tae mai nā roto mai i tō ’outou iho orara’a, nā roto mai i te orara’a o te tahi ta’ata tā ’outou i matau, ’aore rā, nō roto mai i te Hoa ’aore rā te Liahona. E tauturu i te mau tamari’i ’ia fa’ati’a fa’ahou mai i te mau ’ā’amu ia ’outou ’aore rā, ’ia fa’a’ite mai i te mau ’itera’a rau ma te ha’avare ’ore nō tō rātou orara’a.

• Tauturu i te mau tamari’i ’ia ha’api’i mai i te pereota mātamua o te hīro’a fa’aro’o ’ahuru ma toru : « Tē ti’aturi nei mātou ē, e mea ti’a i te ta’ata ’ia ora ma te parauti’a [ha’avare ’ore] ». Tauturu i te mau tamari’i ’ia hauti mai i te mau hi’ora’a nō te ha’avare ’ore ’e te ha’avare. ’Ei hi’ora’a, e nehenehe te mau tamari’i e hauti mai ma te hō’ē tao’a a te hō’ē taea’e ’aore rā tuahine ’e ’a parau ai i tō rātou nā metua ē, ’aita rātou i rave i te reira. I muri iho e tauturu i te mau tamari’i ’ia ha’uti mai i te hō’ē ā fa’anahora’a i reira rā e parau rātou i te parau mau i tō rātou nā metua. ’A fa’ata’a ē, ’o teie te rirora’a ’ei ta’ata ha’avare ’ore.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 95:1–3, 8, 11–17 ; 97:10, 17

Te hiero ’o te fare ïa o te Fatu.

’A feruri e nāhea ’outou e nehenehe ai e fa’a’ohipa i teie mau ’īrava nō te tauturu i te mau tamari’i ’ia māramarama i te faufa’a rahi o te hiero nō te Fatu—’e i te faufa’a rahi o te reira nō tātou pā’āto’a.

Mau ’ohipara’a e nehenehe e rave

• E ani i te mau tamari’i ’ia paraparau mai nō ni’a i te mau taime ’ua tītauhia ia rātou ’ia rave i te hō’ē ’ohipa ’aita rā i rave-’oi’oi-hia. Tauturu i te hō’ē tamari’i ’ia tai’o i Te Parau Ha’api’ira’a ’e te mau Parau Fafau 95:3, 8, ’e e ani i te mau tamari’i e aha te fa’auera’a tā te Fatu i parau ē ’aita te feiā mo’a i ha’apa’o. E tai’o ’āmui i te ’īrava 11. E aha tei ti’a i te feiā mo’a ’ia rave ’ia nehenehe ia rātou ’ia patu i te hiero ? E aha tā tātou e nehenehe e ’apo mai nō te fafaura’a tā te Fatu i fafau ia rātou ?

• I ni’a i te mau tāreta, ’a pāpa’i i te mau parau tumu nō ni’a i te hiero e ’itehia i roto i Te Parau Ha’api’ira’a ’e te mau Parau Fafau 95 ’e te 97, e tae noa atu i te mau fa’ahorora’a pāpa’ira’a mo’a e tano, ’e ’a tu’u i te mau tāreta i roto i te hō’ē pūtē. ’Ei hi’ora’a: E tītau te patura’a i te mau hiero i te fa’atusiara’a (Te Parau Ha’api’ira’a ’e te mau Parau Fafau 97:11–12) ’e E ti’a ia tātou ’ia vai ti’amā nō te tomo i roto i te hiero (Te Parau Ha’api’ira’a ’e te mau Parau Fafau 97:15–17). ’A vāhi te mau tamari’i ’ei pupu piti ta’ata. E vaiiho i te pupu tāta’itahi ’ia pāpa’i hōho’a i te hō’ē tāreta nō roto mai i te pūtē ’e i muri iho, e ’ohipa ’āmui nō te tai’o i te pāpa’ira’a mo’a i ni’a i te tāreta ’e ’ia parau mai i te aura’a o te parau tumu nō rātou. Tauturu i te mau tamari’i ’ia māramarama i te mea tā rātou e tai’o ra mai te mea e hina’arohia.

• E ani i te hō’ē taure’are’a nō roto mai i tā ’outou pāroita ’aore rā ’āma’a ’o tei haere i te hiero ’ia fa’a’ite mai i tōna ’itera’a, ’e ’ia parau i te mau tamari’i i te mea tā rātou e nehenehe e rave nō te fa’aineine ia rātou nō te hiero.

• E fa’a’ohipa i te parau pāpa’i « Tō ’outou ’ē’a nō te hiero » (i roto i Te mau hiero a Te ’Ēkālesia a Iesu Mesia i te Feiā Mo’a i te mau Mahana Hope’a Nei [ve’a ta’a ’ē o te Ensign ’aore rā, Liahona, ’Ātopa 2010], 72–75) nō te tauturu i te mau tamari’i ’ia māramarama e aha te tupu i roto i te mau hiero, ’e e nāhea rātou ’ia fa’aineine. ’A feruri i te hōro’a i te tamari’i tāta’itahi te hō’ē tuha’a o te parau pāpa’i nō te tai’o ’e ’ia vaiiho ia rātou ’ia fa’a’ite mai i te mea tā rātou i ha’api’i mai.

• Fa’a’ite i te video « Deux apôtres mènent une visite virtuelle du temple de Rome en Italie » (ChurchofJesusChrist.org), ’e e ani i te mau tamari’i ’ia fa’a’ite mai e aha tō rātou mana’o nō ni’a i te haerera’a i te hiero i te hō’ē mahana.

• Hīmene ’āmui i te hō’ē hīmene nō ni’a i te hiero, mai te « Oh, j’aime voir le temple » (Chants pour les enfants, 99). E aha te mau pereota i roto i teie hīmene e ha’api’i nei ia tātou nō te aha e mea mo’a te hiero ?

Te Parau Ha’api’ira’a ’e te mau Parau Fafau 97:1–2, 8–9, 21

’O Ziona, « tei mā te ’ā’au »,

Tauturu i te mau tamari’i ’ia māramarama ē, e ’ere Ziona i te hō’ē noa vāhi ; ’o tei « mā te ’ā’au » ato’a ra (Te Parau Ha’api’ira’a ’e te mau Parau Fafau 97:21).

Mau ’ohipa e nehenehe e rave

• E ani i te mau tamari’i ’ia tai’o i Te Parau Ha’api’ira’a ’e te mau Parau Fafau 97:21, ’e e ani ia rātou e aha te aura’a o te parau « mā ». Nō te fa’ahōho’a, ’a fa’a’ite ia rātou i te hō’ē hāpaina pape mā ’e ’ia ’āparau nō te aha e mea faufa’a te pape mā. ’A tu’u i te hō’ē mea i roto i te pape nō te fa’arepo i te reira (mai te repo ’aore rā, te pēpa). E ani i te mau tamari’i ’ia tai’o fa’ahou i Te Parau Ha’api’ira’a ’e te mau Parau Fafau 97:21 ’e ’ia tu’u i tō rātou manimani rima i ni’a i te parau « mā ». E aha tō te reira aura’a nō tō tātou ’ā’au ’ia vai mā ? Tauturu i te mau tamari’i ’ia māramarama ē, te vai māra’a i roto i te ’ā’au e ’ere ïa te aura’a e’ita roa tātou e rave i te hape. E aha tā tātou e nehenehe e rave ’ia vai mā atu ā tātou i roto i te ’ā’au ? Nāhea te Fa’aora i te tauturu mai ia tātou ?

• Tauturu i te mau tamari’i ’ia ’imi Te Parau Ha’api’ira’a ’e te mau Parau Fafau 97:1–2, 8–9, 21, ’ia ’imi mai i te mau ta’o ’aore rā, te mau pereota ’o tē fa’ata’a nei nāhea ’ia vai mā i roto i te ’ā’au. E ani ia rātou ’ia mā’iti mai i te hō’ē ta’o ’aore rā hō’ē pereota, ’ia pāpa’i i te reira i ni’a i te hō’ē ’api parau, ’e ’ia tu’u atu te reira i roto i te hō’ē fa’ari’i. E huti mai i te hō’ē ’api parau i te taime hō’ē ’e e ani i te mau tamari’i ’ia fa’a’ite mai i te mau mea tā rātou e nehenehe e rave nō te fa’a’ohipa i teie mana’o i roto i tō rātou orara’a. ’Ei hi’ora’a, e aha tā tātou e nehenehe e rave nō te « ’imi i te parau mau » (’īrava 1) ’aore rā ’ia riro atu ā ’ei ta’ata « parauti’a [ha’avare ’ore] » (’īrava 8) ?

Fa’aitoito i te ’apora’a mai i te fare

E ani i te mau tamari’i ’ia fa’a’ohipa i te ’api ’ohipara’a o teie hepetoma nō te fa’a’ite i tō rātou ’utuāfare e aha tā rātou i ha’api’i mai i teie mahana nō ni’a i te hiero.

Haʼamaitaʼiraʼa i tā tātou haʼapiʼiraʼa

E fa’aitoito i te mau tamari’i ’ia ui i te mau uira’a. « E tauto’o i te hi’o i te mau uira’a a [te mau tamari’i] ’ei mau rāve’a, ’e ’eiaha ra ’ei fa’a’areareara’a ’aore rā, ’ei ha’afifira’a i tā ’outou ha’api’ira’a… ’E hōro’a mai taua mau uira’a ra ia ’outou i te tahi mau fa’a’itera’a faufa’a rahi, e aha tā te mau tamari’i e mana’o ra, tō rātou mau haʼapeʼapeʼara’a, ʼe tō rātou huru i te ’apora’a mai i te mau mea tā rātou e ha’api’i mai. E tauturu ia rātou ’ia ’ite ē e nehenehe te mau pāhonora’a i tā rātou mau uira’a e ’itehia i roto i te mau pāpa’ira’a mo’a ’e te mau parau a te mau peropheta ora » (Haʼapiʼiraʼa mai tā te Faʼaora, 25–26).