C. C. A. Christensen (1831–1912), Te feiā mo’a i te ti’avaruhia mai te tuha’a fenua nō Jackson i Missouri, c. 1878, tempera i ni’a i te muslin, 77 ¼ × 113 initi. Brigham Young University Museum of Art, hōro’a nā te mau mo’otua a C. C. A. Christensen, 1970

6–12 nō Tetepa

Te Parau Ha’api’ira’a ʼe te mau Parau Fafau 98–101

« ’A fa’aea noa ’e ’a ’ite mai ē, ’o vau te Atua »

E aha te mau parau poro’i tā te mau tamari’i i roto i tā ’outou piha e hina’aro e fa’aro’o i teie hepetoma ? Nāhea te mau parau tumu i roto i Te Parau Ha’api’ira’a ’e te mau Parau Fafau 98–101 e tauturu ia rātou ’ia riro ’ei mau pipi maita’i a’e nā Iesu Mesia ?

Pāpa’i i te mau mana’o e tae mai

Tītau i te mana’o

E fa’aitoito i te mau tamari’i ’ia fa’a’ite mai i te hō’ē mea tā rātou i ha’api’i mai nō roto mai i te Parau Ha’api’ira’a ’e te mau Parau Fafau i te fare ’aore rā, i roto i te Paraimere. E ani ia rātou e aha tā rātou i ’oa’oa roa a’e nō ni’a i te ha’api’ira’a mai nā roto mai i te Parau Ha’api’ira’a ’e te mau Parau Fafau.

Ha’api’i i te ha’api’ira’a tumu : Te mau tamari’i ’āpī a’e

Te Parau Ha’api’ira’a ’e te mau Parau Fafau 98:39–40

E nehenehe au e fa’a’ore i te hapa a te feiā tei hāmani ’ino mai ’iā’u.

’Ua ani te Fatu i te feiā mo’a tei hāmani-’ino-hia i te tuha’a fenua nō Jackson, i Missouri, ’ia fa’a’ore i te hapa a te feiā i hāmani ’ino ia rātou. ’A ha’api’i ai ’outou i te mau tamari’i i te faufa’a nō te fa’a’orera’a hara, ’ia pāpu ē ’ua ta’a ato’a ia rātou ē, ’ia ha’apēpē mai te tahi ta’ata ia rātou, ’e ti’a ia rātou ’ia fa’a’ite tāmau noa i te hō’ē ta’ata pa’ari i ti’aturihia.

Mau ’ohipara’a e nehenehe e rave

• Nō te tauturu i te mau tamari’i ’ia māramarama i te mau tāmatara’a tā te feiā mo’a i Ziona i fa’aruru, e fa’a’ite atu ia rātou i te « Pene 34 : ’Ua fa’aara te Atua i te nuna’a nō Ziona » (Te mau ’ā’amu o te Parau Ha’api’ira’a ’e te mau Parau Fafau, 128–31, ’aore rā, te video e tano i ni’a ChurchofJesusChrist.org). E tai’o i Te Parau Ha’api’ira’a ’e te mau Parau Fafau 98:39–40, ’e e ani i te mau tamari’i ’ia fa’aro’o i te mea tā te Fatu i parau i te feiā mo’a ’ia rave i te anira’a mai tō rātou mau ’enemi i te fa’a’orera’a hara. Nō te aha Iesu i hina’aro ai ’ia fa’a’ore tātou i te hapa a te mau ta’ata, ’oia ato’a ia rātou e ’ere i te mea maita’i i ni’a ia tātou ?

• ’A tu’u i te hō’ē hōho’a nō te hō’ē hōho’a mata ’oa’oa i ni’a i te papa’i ’e hō’ē hōho’a mata ’oto i ni’a i te tahi atu papa’i. E fa’a’ite atu i te mau tamari’i te mau huru ta’a ’ē i reira tē vai ra te hō’ē ta’ata ’ino (e nehenehe ’outou e ’ite mai i te tahi mau ’ā’amu i roto i te Hoa ’aore rā te Liahona). ’A fa’a’ite atu i te mau rāve’a nō te pāhono i te mau ’ohipa ’ino, ’e ’ia tauturu i te mau tamari’i ’ia fa’aoti ē ’e fa’a’oa’oa ānei te pāhonora’a ia rātou ’aore rā ’e fa’a’oto ānei. E ani i te mau tamari’i ’ia fa’atoro i ni’a i te hōho’a mata tano i ni’a i te papa’i.

Te Parau Ha’api’ira’a ’e te mau Parau Fafau 101:16

E nehenehe Iesu Mesia e hōro’a mai i te hau ’iā’u.

I tō te feiā mo’a fa’arurura’a i te hāmani-’ino-ra’a, ’ua tamāhanahana te Fatu ia rātou ma te paraura’a ē, « ’a fa’aea noa ’e ’a ’ite mai ē ’o vau te Atua ». ’A feruri nāhea teie a’o e nehenehe ai e tauturu i te mau tamari’i tā ’outou e ha’api’i ra.

Mau ’ohipara’a e nehenehe e rave

• E ani i te mau tamari’i ’ia ha’uti’uti i ni’a i tō rātou pārahira’a. I muri iho e ani ia rātou ’ia fa’aea i te ha’uti’uti ’ia fa’a’ite ana’e ’outou i te hō’ē hōho’a nō te Fa’aora ’e ’a parau ai i te parau « ’a fa’aea noa ’e ’a ’ite mai ē, ’o vau te Atua » (Te Parau Ha’api’ira’a ’e te mau Parau Fafau 101:16). ’A rave i teie ’ohipara’a e rave rahi taime. ’A fa’ata’a ē, ’a fifi rahi ai te orara’a o te feiā mo’a i te ’anotau o Iosepha Semita, ’ua hina’aro Iesu ia rātou ’ia fa’aea noa ’e ’ia ti’aturi iāna ’eiaha rā e ha’ape’ape’a. Nāhea Iesu e nehenehe ai e tauturu ia tātou i te taime e fifi ai tātou ?

• Hīmene ’āmui i te hō’ē hīmene nō ni’a i te fa’atura, mai te « Humblement, calmement » ’aore rā, « To think about Jesus » (Chants pour les enfants, Children’s Songbook 11, 71). Tauturu i te mau tamari’i ’ia ’ite i te ’āehuehu o te hau ’o te tae mai ’ia fa’aea hauti ’ore noa tātou ’e ’ia mana’o ia Iesu—’ei hi’ora’a, ’ia pure ana’e tātou ’aore rā ’ia rave i te ’ōro’a mo’a.

• E tauturu i te mau tamari’i ’ia ’ohipa i teie hepetoma i ni’a i te ’api ’ohipara’a. ’A fa’a’ū noa ai rātou, ’a parau ia rātou nāhea i te ferurira’a ia Iesu Mesia i te tauturura’a ia ’outou ’ia fāri’i i te hau, i roto ato’a i te mau taime fifi.

  

  Fa’ata’ara’a nō roto mai i Te Mesia ʼe te ’auvaha ture ’āpī, nā Heinrich Hofmann

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 98:1–3, 11–14 ; 101:16

E nehenehe tō’u mau tāmatara’a e tauturu iā’u ’ia riro hau atu mai ia Iesu Mesia.

Mai te mau tamari’i e fa’aruru nei i te mau tāmatara’a i roto i tō rātou orara’a, ’e hina’aro rātou i te fa’aro’o ē, e nehenehe te Fa’aora e tauturu mai ia rātou i roto i tō rātou mau ’ati ’e, e nehenehe terā mau ’ati e « ’ohipa ’āmui nō tō [rātou] maita’i » (Te Parau Ha’api’ira’a ’e te mau Parau Fafau 98:3).

Mau ’ohipara’a e nehenehe e rave

• E ani i te mau tamari’i ’ia tauturu mai ia ’outou ’ia hāmani i te hō’ē tāpura i ni’a i te tāpura ’ere’ere nō te tahi mau fifi tā te hō’ē tamari’i i tō rātou fāito matahiti e fārerei nei. ’A parau i te mau tamari’i nō ni’a i te tahi o te mau tāmatara’a o tā te feiā mo’a i ora na i roto i te tuha’a fenua nō Jackson, i Missouri, i te matahiti 1833 (hi’o mau pene 34 ’e 35 i roto i Te mau ’ā’amu o te Parau Ha’api’ira’a ’e te mau Parau Fafau, 128–34). E aha te parau a’o tā rātou e hōro’a i te hō’ē tamari’i e fa’aruru nei i teie mau tāmatara’a ? E ani i te mau tamari’i ’ia tai’o i Te Parau Ha’api’ira’a ’e te mau Parau Fafau 98:1–3, 11–14, ma te hi’o i te arata’ira’a tā te Fatu i hōro’a. Nāhea rātou i te pe’e i teie a’o ’a fa’aruru ai rātou i te mau tāmatara’a mai teie i tāpurahia i ni’a i te tāpura ’ere’ere ?

• E ani i te mau tamari’i ’ia fa’aea hau noa ’e te muhu ’ore e ti’a ai nō te tahi tau minuti ma te hi’o i te hō’ē hōho’a o te Fa’aora ’aore rā, ma te fa’aro’o i te hō’ē hīmene nō ni’a ’iāna. I muri iho e ani ia rātou ’ia fa’a’ite mai e aha tā rātou i fāri’i ’e i ’ite i te taime muhu ’ore. Tai’o i Te Parau Ha’api’ira’a ’e te mau Parau Fafau 101:16. Nāhea te fa’aea-hauti-’ore-ra’a ’e te mana’ora’a ia Iesu i te tauturu mai ia tātou ? Tauturu i te mau tamari’i ’ia māramarama i te tū’atira’a i roto i te fa’aea-hauti-’ore-ra’a ma te fa’atura ’e tō tātou ’aravihi ’ia fāri’i i te Vārua ’e ’ia mana’o ia Iesu.

Te Parau Ha’api’ira’a ’e te mau Parau Fafau 98:23, 39–40

Tē hina’aro nei Iesu ’ia fa’a’ore au i te hapa a te feiā tei hāmani ’ino mai ’iā’u.

’Ua fa’auehia tātou ’ia here i te tahi ’e te tahi, ’ia fa’a’ore i tā vetahi ’ē hapa « hitu ’ahuru taime e hitu », ’e ’ia hōro’a i te tahi atu pāpāri’a (hi’o Mataio 5:39, 43–44. ; 18:21–22). Nāhea e nehenehe ai ia ’outou ’ia fa’a’ohipa i teie mau ’īrava nō te ha’api’i i te mau tamari’i i teie mau parau mau ?

Mau ’ohipara’a e nehenehe e rave

• ’A parau i te mau tamari’i nō ni’a i te mau hāmani-’ino-ra’a ’o tei tupu i roto i te tuha’a fenua nō Jackson, i Missouri, i te matahiti 1833 (hi’o mau pene 34 ’e 35 i roto i Te mau ’ā’amu o te Parau Ha’api’ira’a ’e te mau Parau Fafau, 128–34). E ani i te mau tamari’i e aha tō rātou mana’o mai te mea e melo rātou nō te ’Ēkālesia i taua taime ra. E ani ia rātou ’ia tai’o i Te Parau Ha’api’ira’a ’e te mau Parau Fafau 98:23, 39–40 nō te ’ite mai e aha tā te Fatu i hina’aro ’ia rave te feiā mo’a. Nō te aha e mea fifi ’ia fa’a’ore i te hapa a te feiā tei ha’apēpē mai ia tātou ? Nāhea tātou i te ha’amaita’ihia ’ia nā reira tātou ?

• E ani i te mau tamari’i e nehenehe ānei ia rātou e feruri i te hō’ē taime ’a rave ai Iesu Mesia ’aore rā, te tahi ta’ata ’ē nō roto i te mau pāpa’ira’a mo’a i te mea tā Te Parau Ha’api’ira’a ’e te mau Parau Fafau 98:23 e ha’api’i nei. Nō te hōro’a ia rātou i te hō’ē hi’ora’a, ’a fa’a’ite i te hō’ē hōho’a nō te fa’asātaurora’a (mai te Buka hōho’a o te ’evanelia, no. 57). E ani i te mau tamari’i ’ia fa’a’ite mai i te mea tā rātou i ’ite nō ni’a i te fa’asātaurora’a o te Fa’aora (hi’o Luka 23). ’A ani ia rātou ’ia tai’o i te Luka 23:34. Nāhea tātou e nehenehe ai ’e pe’e i te hi’ora’a ’o Iesu Mesia ?

Te Parau Ha’api’ira’a ’e te mau Parau Fafau 101:23–32, 36, 38

Nā roto ia Iesu Mesia e nehenehe au e ’ite i te ’oa’oa.

’Aita te orara’a i ’ōpuahia ’ia ti’amā i te mau fifi, e nehenehe ra ’outou e tauturu i te mau tamari’i ’ia ’ite ē, e nehenehe rātou e ’ite mai i te ’īra’a o te ’oa’oa nā roto ia Iesu Mesia.

Mau ’ohipara’a e nehenehe e rave

• ’A tu’u i te pape i roto i te hō’ē ’āu’a. E ani i te mau tamari’i ’ia pāpa’i i te i’oa o te mau mea tā te Fa’aora i rave nō tātou, ’ia nehenehe ia tātou ’ia ’oa’oa, ’e e ani ia rātou ’ia tu’u i te hō’ē ’ōfa’i na’ina’i i roto i te ’āu’a nō te mau mea ato’a tā rātou e pi’i e tae roa ’ua ’ī te ’āu’a. E tai’o ’e te mau tamari’i i Te Parau Ha’api’ira’a ’e te mau Parau Fafau 101:36, ’e e ani ia rātou ’ia ’imi e nāhea e nehenehe ai ia tātou ’ia fāri’i i te ’īra’a o te ’oa’oa. E aha te tahi mau mea tā tātou e ti’a e rave nō te « ’imi… i te Fatu » (’īrava 38) ’ia nehenehe ia tātou ’ia fāri’i i te ’oa’oa ’o tāna e hina’aro e hōro’a mai ia tātou ?

• ’A fa’ata’a ē tē ha’api’i nei Te Parau Ha’api’ira’a ’e te mau Parau Fafau 101:23–32 nō ni’a i te huru o te orara’a ’ia ho’i fa’ahou mai Iesu Mesia. ’A tai’o ’āmui ai ’outou i teie mau ’īrava, ’a ’āparau nō ni’a i te mau mea ’o tā te mau tamari’i e ’ite mai ’o tē hōro’a mai ia tātou i te ’oa’oa ’ia ho’i fa’ahou mai ’oia. Nō te aha e mea maita’i ’ia ’ite nō ni’a i teie mau mea ’ia fa’aruru ana’e tātou i te mau taime fifi ?

Fa’aitoito i te ’apora’a mai i te fare

Tauturu i te mau tamari’i ’ia rave mai i te hō’ē ’īrava nō roto mai i Te Parau Ha’api’ira’a ’e te mau Parau Fafau 98–101 ’o tā rātou e hina’aro e fa’a’ite i tō rātou ’utuāfare. E tauturu ia rātou ’ia fa’anaho nāhea rātou i te fa’a’ite i te mea tā rātou i au nō ni’a i teie ’īrava.

Ha’amaita’ira’a i tā tātou ha’api’ira’a

Ha’amaita’ira’a ia ’outou ’ei ’orometua mai te Mesia. ’A feruri i te mau rāve’a tā ’outou e nehenehe e riro mai ’ei ’orometua hau atu mai te Mesia te huru. ʼA feruri i te faʼaʼohipa i te mau uiraʼa nō te hiʼopoʼaraʼa a te ta’ata iho i te ’api 37 nō te Ha’api’ira’a mai tā te Fa’aora nō te tauturu ia ’outou ’ia maita’i a’e.