mahana e ’ana’ana ra nā roto i te mau ata

20–26 nō Tetepa

Te Parau Ha’api’ira’a ʼe te mau Parau Fafau 106–108

« ’Ia ’īritihia te mau ra’i »

’A feruri e aha tā ’outou i ’ite nō ni’a i te mau tamari’i tā ’outou e ha’api’i ra. E aha te huru o te mau ’ohipara’a ’o te ha’afātata atu ia rātou i te Fa’aora ? E ha’amana’o ē e nehenehe te mau ʼohiparaʼa nō te mau tamari’i ’āpī a’e i roto i teie fa’anahora’a e fa’atanohia nō te mau tamari’i paʼari, ’aore rā, te tahi i te tahi.

Pāpa’i i te mau mana’o e tae mai

ītona fa’a’itera’a

Tītau i te mana’o

E fa’a’ite i te mau tamari’i i te mau hōho’a o te feiā fa’atere o te ’Ēkālesia, mai te peropheta, te mau ’āpōsetolo, te peresidenira’a rahi o te Paraimere, ’e te tahi atu mau huimana fa’atere rahi ’e te ti’a fa’atere. Ani i te mau tamari’i ’ia paraparau mai nō ni’a e aha tā teie feiā fa’atere i rave ’e nō te aha rātou e māuruuru ai nō rātou.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī a’e

Te Parau Ha’api’ira’a ’e te mau Parau Fafau 107:18–20, 42–56

’Ua ha’amaita’ihia vau nā roto i te autahu’ara’a.

E nehenehe te tā’āto’ara’a o te mau tamari’i a te Metua i te Ao ra ’e fāri’i i te mau ha’amaita’ira’a e tae mai nā roto i te autahu’ara’a. E feruri i te mau rāve’a ’o tā ’outou e nehenehe e tauturu i te mau tamari’i tā ’outou e ha’api’i ra ’ia ’ite i te māuruuru nō taua mau ha’amaita’ira’a ra.

Mau ’ohipara’a e nehenehe e rave

• Pāpa’i hōho’a i ni’a i te tāpura ’ere’ere i te hō’ē hōho’a e fa’a’ite ra i « te ra’i [tei] vevetehia mai ia [tātou] » (Te Parau Ha’api’ira’a ’e te mau Parau Fafau 107:19) nā roto i te autahu’ara’a (mai te mau hihi e ’ana’ana nā roto mai i te hō’ē ata). Hōro’a i te mau tamari’i i te mau hōho’a e fa’a’ite ra i te mau ha’amaita’ira’a ’o te tae mai nā roto mai i te autahu’ara’a, mai te bāpetizora’a, te ’ōro’a mo’a, ’e te hiero. E ani ia rātou ’ia fa’a’ite mai nō te aha rātou e māuruuru ai nō te ha’amaita’ira’a i roto i tā rātou hōho’a, ’e e vaiiho ia rātou ’ia tu’u i tā rātou hōho’a i roto i te mau hihi māramarama i ni’a i te tāpura ’ere’ere. ’A fa’a’ite pāpū ē, e nehenehe tātou e fāri’i i teie mau ha’amaita’ira’a nō te mea ’ua fa’aho’i mai te Metua i te Ao ra i te autahu’ara’a.

• Hāmani i te hō’ē ’ē’a i ni’a i te tahua, ’e e hōro’a i te mau tamari’i i te mau hōho’a nō te mau ’ōro’a o te autahu’ara’a e hina’arohia e rātou ’ia nehenehe ia rātou ’ia pe’e i te ’ē’a nō te ho’i i te Metua i te Ao ra (hi’o i te Buka vaira’a hōho’a ’evanelia, nos. 103–8, 119–20). Tauturu i te mau tamari’i ’ia tu’u i te mau ’ōro’a ma te nahonaho i ni’a i te ’ē’a.

• ’E fa’a’ite i te hō’ē hōho’a nō Adamu ’e Eva ’e tō rāua ’utuāfare (hi’o i te mau ’api ’ohipara’a nō teie hepetoma ’aore rā te Buka hōho’a o te ’evanelia, no. 5). ’A hi’o noa ai te mau tamari’i i te hōho’a, ’a ani ia rātou e aha ra tā Adamu ’e tā Eva e feruri ra nō ni’a i tō rāua ’utuāfare. Fa’a’ohipa Te Parau Ha’api’ira’a ’e te mau Parau Fafau 107:53–56 nō te fa’a’ite i te mau tamari’i e aha tā Adamu i rave nō te fa’a’ite ē, ’ua here ’oia i tōna ’utuāfare. ’A fa’a’ite i tō ’outou ’itera’a pāpū e nāhea te autahu’ara’a i te rirora’a ’ei ha’amaita’ira’a nō ’outou ’e tō ’outou ’utuāfare.

• Fa’ahiti i te mau melo o te ’utuāfare ’o tā Adamu i fa’atōro’a i te autahu’ara’a, ’ia au i Te Parau Ha’api’ira’a ’e te mau Parau Fafau 107:42–50, ’e e ani i te mau tamari’i ’ia tai’o e hia ta’ata ’o tāna i fa’atōro’a. Tauturu ia rātou ’ia māramarama nō te aha Adamu i hina’aro ai i te mau melo o tōna ’utuāfare ’ia fāri’i i te autahu’ara’a. E ani i te mau tamari’i ’ia paraparau nō ni’a i te mau taime rātou ’aore rā, tō rātou ’utuāfare fāri’ira’a i te mau ha’amaita’ira’a nā roto mai i te autahu’ara’a.

Te Parau Ha’api’ira’a ’e te mau Parau Fafau 108:7

E nehenehe au e ha’apūai ia vetahi ʼē.

E nehenehe ato’a te mau tamari’i ’āpī a’e ’e pe’e i te a’o e ha’apūai ia vetahi ’ē « i roto i tā ’outou parau ato’a, i roto i tā ’outou mau pure ato’a… ’e i roto i te mau mea ato’a tā ’outou e rave ».

Mau ’ohipara’a e nehenehe e rave

• Pāpa’i hōho’a i te hō’ē ta’ata i ni’a i te tāpura ’ere’ere, ’e e ani i te mau tamari’i ’ia fa’a’ite mai i te tahi mau mea tā teie ta’ata e nehenehe e rave nō te riro mai ’ei ta’ata pūai i te pae tino. (E nehenehe ’outou e pāpa’i i te mau uaua rarahi i ni’a i te ta’ata ’a fa’ahiti noa ai te mau tamari’i i te mau ’ohipa). Tai’o i Te Parau Ha’api’ira’a ’e te mau Parau Fafau 108:7, ’e e ani i te mau tamari’i ’ia fa’aro’o i te mau rāve’a e nehenehe ai tātou e « ha’apūai [i tō tātou] mau taea’e [’e mau tuahine] ». E fa’ata’a i te mau ta’o e riro ’ei mea fifi.

• Tauturu i te mau tamari’i ’ia feruri i te mau ta’ata tā rātou i ’ite e hina’aro paha ’ia ha’apūaihia. E aha tā tātou e nehenehe e parau atu ia rātou ’aore rā, e rave nō rātou ? Rave ’āmui nō te hāmani i te mau tāreta nā teie mau ta’ata, ’aore rā, e fa’aitoito i te mau tamari’i ’ia ha’amana’o ia rātou i roto i tā rātou iho mau pure ’e te pure ’utuāfare.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 107:1–8, 13–14, 18–20

E tauturu te autahu’ara’a iā’u ’ia ho’i i te Metua i te Ao ra.

’Ua fa’aho’i-fa’ahou-hia mai te autahu’ara’a a Melehisedeka ’e a Aarona nō te tauturu i te mau tamari’i a te Atua ’ia ho’i fa’aho’i iāna ra. Tauturu i te mau tamari’i ’o tā ’outou e ha’api’i ra ’ia māramarama e aha te mau ’ohipa ta’a ’ē a te autahu’ara’a ’e e nāhea rātou i te tauturu ia tātou ’ia ho’i i te Atua ra.

Mau ’ohipara’a e nehenehe e rave

• Ani i te mau tamari’i ’ia ’imi Te Parau Ha’api’ira’a ’e te mau Parau Fafau 107:1–8, 13–14, 18–20 nō te mau ta’o ’e te mau pereota faufa’a rahi ’o tē ha’api’i nei ia rātou nō ni’a i te autahu’ara’a. E aha te mau hōpoi’a a te feiā e mau nei i te autahu’ara’a ? Nāhea te autahu’ara’a i te tauturu ia tātou ’ia ho’i i te Metua i te Ao ra ra ?

• Pāpa’i i te mau uira’a o te nehenehe e pāhonohia i roto i Te Parau Ha’api’ira’a ’e te mau Parau Fafau 107:1–8, 13–14, 18–20, mai teie « E aha te tahi atu i’oa o te autahu’ara’a a Melehizedeka ? » Hōro’a i te mau tamari’i i te tahi tau minuti nō te ’imi mai i te mau pāhonora’a i roto i te mau ’īrava nō e rave rahi mau uira’a e ti’a ai. ’A fa’a’ite i te mau tamari’i i te mau ha’amaita’ira’a tā ’outou i fāri’i nā roto i te autahu’ara’a.

• ’A tai’o i te mau tamari’i nō ni’a ia Melehizedeka i roto i te Fa’atoro parau Bibilia ’aore rā, Te arata’i nō te mau pāpa’ira’a mo’a (scriptures.ChurchofJesusChrist.org). E aha tā tātou e ha’api’i mai nā roto mai i tōna orara’a nō ni’a e aha te aura’a te fa’a’ohipara’a i te ha’amanara’a o te autahu’ara’a ?

Te Parau Ha’api’ira’a ’e te mau Parau Fafau 107:21–26, 33–35, 65–66

E arata’i te mau tāvini mā’itihia a te Fatu i tāna ’Ēkālesia.

E aha te mau ’itera’a tei patu i tō ’outou ’itera’a pāpū nō te feiā fa’atere o te ’Ēkalesia ? Nāhea ’outou i te tauturu i te mau tamari’i ’ia patu i tō rātou ’itera’a pāpū ?

Peresideni ’e te tuahine Nelson ’e te hō’ē tamari’i

’Ua ha’api’i te peropheta ia tātou i te mau mea tā te Atua e hina’aro ’ia ’ite tātou.

Mau ’ohipara’a e nehenehe e rave

• ’A pia i ni’a i te tāpura ’ere’ere i te hō’ē hōho’a nō te mau huimana fa’atere rahi ’e te mau ti’a fa’atere nō roto mai i te hō’ē nene’ira’a ’aita i maoro a’enei o te ’āmuira’a nō te Ensign ’aore rā, te Liahona. ’A tai’o ai te mau tamari’i i Te Parau Ha’api’ira’a ’e te mau Parau Fafau 107:21–26, 33–35, 65–66, e ani ia rātou ’ia pāpa’i i ni’a i te tāpura ’ere’ere e aha tā rātou i ha’api’i mai nō ni’a i te mau hōpoi’a a te tahi o teie mau feiā fa’atere. Nō te aha tātou e māuruuru ai nō tā rātou arata’ira’a ? ’A fa’a’ite i te tahi ’e te tahi e mea nāhea te roa’ara’a ia ’outou te ’itera’a pāpū nō te mau peropheta ’e te mau ’āpōsetolo.

• Pāpa’i i te mau ta’o ti’aturi, fa’aro’o, ’e pure i ni’a i te tāpura ’ere’ere. E ani i te mau tamari’i nāhea tātou e nehenehe ai e pāturu i te Peresidenira’a Mātāmua o te ’Ēkalesia ma tō tātou ti’aturi, te fa’aro’o ’e te pure (hi’o Te Parau Ha’api’ira’a ’e te mau Parau Fafau 107:22). Nō te aha e mea faufa’a ’ia pāturu i te mau tāvini mā’itihia a te Fatu ?

Te Parau Ha’api’ira’a ’e te mau Parau Fafau 108:3

E hōpoi mai te ora-maite-ra’a i tā’u mau fafaura’a i te mau ha’amaita’ira’a.

’A feruri e nāhea ’outou e nehenehe ai e tauturu i te mau tamari’i tā ’outou ’e ha’api’i ra « ’ia ha’apa’o maita’i… i [tā rātou] mau tāpūra’a », ’aore rā, mau fafaura’a. Nāhea te ravera’a i te reira i te ha’amaita’i ia rātou i teienei ’e ananahi ?

Mau ’ohipara’a e nehenehe e rave

• E ani i te mau tamari’i ’ia rave i te hō’ē mea e tītauhia te ha’apa’o maita’i nō te manuia, mai te tāmatara’a i te fa’a’ī i te hō’ē ’āu’a i te pape, ’ia ’ore te reira ’ia mani’i. E aha te tupu ’ia ’ore ana’e tātou e ha’apa’o maita’i ? E ani ia rātou ’ia tai’o i Te Parau Ha’api’ira’a ’e te mau Parau Fafau 108:3 ’e ’ia ’ite mai e aha tei anihia ia Lyman Sherman ’ia ha’apa’o maita’i. Tāpura ’e te mau tamari’i i te mau fafaura’a tā rātou i rave ’e te Metua i te Ao ra, i te bāpetizora’ahia rātou ’e i te ’amura’a i te ’ōro’a mo’a. Tauturu ia rātou ’ia feruri i te mau rāve’a tā rātou e ha’apa’o maita’i nō te tāpūra’a i teie mau fafaura’a.

• Hīmene i te hō’ē hīmene ’e te mau tamari’i nō ni’a i te ha’apa’ora’a i te mau fafaura’a, mai te « Je serai vaillant » (Chants pour les enfants, 85). Tauturu ia rātou ’ia rave i te hō’ē tāpa’o nō te hō’ē pereota nō roto mai i te hīmene, ’o te fa’aha’amana’o ia rātou ’ia ha’apa’o i tā rātou mau fafaura’a, ’e ’ia fa’aitoito ia rātou ’ia fa’a’ite i tā rātou tāpa’o i te ’utuāfare.

• ’A hōro’a i te mau tamari’i i te mau tufa’a o te a’ora’a a te tuahine Becky Craven « Hi’o maita’i ’aore rā e tāu’a ’ore » (Ensign ’aore rā Liahona, Mē 2019, 9–11), ’e e ani ia rātou ’ia fa’a’ite mai i te hō’ē ’ohipa tei fa’auru ia rātou ’ia ha’apa’o maita’i nō ni’a i te orara’a i tā rātou mau fafaura’a.

ītona ’apora’a mai

Fa’aitoito i te ’apora’a mai i te fare

’A fārerei i te tahi taime i te mau metua o te mau tamari’i o tā ’outou e ha’api’i ra nō te fa’aitoito ia rātou i roto i tā rātou mau tauto’ora’a nō te ha’api’i i te ’evanelia i roto i te ’utuāfare. E nehenehe ’outou e parau atu ia rātou i te hō’ē mea tā tā rātou mau tamari’i i fa’a’ite i roto i te Paraimere, ’o tā rātou i ha’api’i mai i te fare.

Haʼamaitaʼiraʼa i tā tātou haʼapiʼiraʼa

E faʼatano i te mau ʼohiparaʼa nō te pāhono i te mau hinaʼaro. ’Eiaha e hi’o i teie mau arata’ira’a ’ei mau fa’auera’a e tītauhia ia ’outou ’ia pe’e. E fa’a’ohipa rā i te reira ’ei ha’aputura’a mana’o nō te tātara mai i tō ’outou iho fa’aurura’a ’a feruri hōhonu ai ’outou i te mau hina’aro o te mau tamari’i tā ’outou e ha’api’i nei. I te tahi mau taime, ’e fa’auruhia paha ’outou ’ia fa’atano i te hō’ē ’ohipara’a ’aore rā tumu parau nō te mau tamari’i ’āpī nō te ha’api’i i te mau tamari’i pa’ari a’e, ’aore rā, nō te tahi ’e te tahi.

’api ’ohipara’a : E ha’amaita’i te autahu’ara’a i tō’u orara’a