Hiero nō Kirtland

Hiero nō Kirtland, nā Jon McNaughton.

27 nō Tetepa–3 nō ’Ātopa

Te Parau Ha’api’ira’a ’e te mau Parau Fafau 109–110

« ’O tō ’oe nei fare, ’ei vāhi nō tō ’oe mo’ara’a »

Nō te fāri’i i te mau ’itera’a pae vārua ’a tuatāpapa i Te Parau Ha’api’ira’a ’e te mau Parau Fafau 109–10 ’e te mau tamari’i i roto i tā ’outou piha ha’api’ira’a, ’a ’imi nā mua i te mau ’itera’a pae vārua ma te tuatāpapara’a i teie mau pāpa’ira’a mo’a i ni’a ia ’outou iho.

Pāpa’i i te mau mana’o e tae mai

ītona fa’a’itera’a

Tītau i te mana’o

’A fa’a’ite i te mau hōho’a ’o te nehenehe e tauturu i te mau tamari’i ’ia ha’amana’o ’e ’ia fa’a’ite mai i te hō’ē mea tā rātou i ha’api’i mai nō ni’a i te mau parau tumu ’aore rā, i te mau ’ohipa tei tupu i roto i Te Parau Ha’api’ira’a ’e te mau Parau Fafau 109–10. ’Ei hi’ora’a, e nehenehe ’outou e fa’a’ite i te hō’ē hōho’a i roto i te arata’i nō teie hepetoma i roto Mai, pe’e mai—nō te ta’ata hō’ē ’e te ’utuāfare.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī a’e

Te Parau Ha’api’ira’a ’e te mau Parau Fafau 109:12–13 ; 110:1–7

Te hiero ’o te fare ïa o te Fatu.

’A feruri e nāhea ’outou i te tauturu i te mau tamari’i ’ia fāri’i i te tura nō te fare o te Fatu ’e ’ia tīa’i i te mahana e nehenehe ai rātou e tomo i roto i te « vāhi o [tōna] mo’ara’a » (Te Parau Ha’api’ira’a ’e te mau Parau Fafau 109:13).

Mau ’ohipara’a e nehenehe e rave

• E ani i te mau tamari’i ’ia fa’ati’a mai ia ’outou i te hō’ē mea tā rātou i au roa nō ni’a i tō rātou fare. E fa’a’ite i te mau tamari’i i te hō’ē hōho’a nō te hiero nō Kirtland, ’e e fa’a’ohipa i Te Parau Ha’api’ira’a ’e te mau Parau Fafau 109:12–13 ; 110:1–7 nō te parau ia rātou nō ni’a i te mahana ’a ha’amo’ahia ai te hiero ’e ’ua riro mai ’ei fare nō te Fatu (hi’o ato’a « Pene 39 : ’Ua ha’amo’ahia te hiero nō Kirtland », Te mau ’ā’amu o te Parau Ha’api’ira’a ’e te mau Parau Fafau, 154). Nō te fa’a’ite ē, te hiero ’o te fare ïa o te Fatu, e tai’o i muri nei i roto i te pure ha’amo’ara’a, tā Iosepha Semita i hōro’a : « ’O tō ’oe nei fare, ’ei vāhi nō tō ’oe mo’ara’a » (Te Parau Ha’api’ira’a ’e te mau Parau Fafau 109:13). ’A ani i te mau tamari’i ’ia fa’a’ite mai i te mea tā rātou i au nō ni’a i te hiero.

• E hōro’a i te tamari’i tāta’itahi i te hō’ē hōho’a nō te hō’ē hiero, ’aore rā, e ani ia rātou ’ia pāpa’i hōho’a i te hō’ē. Hīmene ’āmui i te hō’ē hīmene nō ni’a i te mau hiero, mai te « Oh, j’aime voir le temple » (Chants pour les enfants, 99). E ani i te mau tamari’i ’ia ’āfa’i i tā rātou mau hōho’a i ni’a i te mau taime ato’a e hīmene rātou i te ta’o « hiero ». ’A fa’a’ite atu ia rātou i te tahi atu mau ta’o i roto i te hīmene ’o tē ha’api’i nei ia tātou i te hō’ē mea faufa’a roa nō ni’a i te hiero. E parau i te mau tamari’i e aha tā ’outou i fāri’i nō ni’a i te hiero, ’e e nāhea ’outou i ’ite ai ē ’o te fare o te Fatu teie.

Te Parau Ha’api’ira’a ’e te mau Parau Fafau 110

Tei roto te mau tāviri o te autahu’ara’a e hina’arohia nō te rave i te ’ohipa a te Atua i te ’Ēkalesia i teie mahana.

E mea faufa’a te hiero o Kirtland i roto i te ’ā’amu o te ’Ēkalesia. ’Ua fā mai ’o Iesu Mesia i reira, ’e te mau peropheta tahito. ’Ua hōro’a mai teie mau peropheta ia Iosepha Semita, i te mau tāviri nō te autahu’ara’a ’o te hina’arohia nō te rave i te ’ohipa a te Atua i te mau mahana hope’a nei.

Mau ’ohipara’a e nehenehe e rave

• ’A fa’a’ohipa i te ’api ’ohipara’a nō teie hepetoma ’aore rā, i te « Pene 40 : Te mau ’ōrama i roto i te hiero nō Kirtland » (Te mau ’ā’amu o te Parau Ha’api’ira’a ’e te mau Parau Fafau, 155–57) nō te fa’a’ite i te mau tamari’i nō ni’a i te mau ta’ata i te ao ra ’o tei haere mai i te hiero. ’A fa’a’ite i te mau pereota nō roto mai i Te Parau Ha’api’ira’a ’e te mau Parau Fafau 110 ’o te tauturu ia ’outou ’e i te mau tamari’i ’ia māramarama i te mo’ara’a o teie mau ’ohipa i tupu.

• E fa’a’ite i te mau tamari’i i te tahi mau tāviri, ’e e parau e aha tā te mau tāviri e rave. E vaiiho i te mau tamari’i te tahi i muri mai i te tahi ’ia tāpe’a i te mau tāviri ’e ’ia fa’ahua e ’īriti i te hō’ē ’ōpani i pōnaohia. ’A nā reira ai rātou, e fa’ata’a ē, ’ua fāri’i Iosepha Semita i te mau tāviri o te autahu’ara’a i roto i te hiero nō Kirtland. E ’īriti teie mau tāviri i te mana ’e te mau ha’amaita’ira’a ’ia nehenehe ia tātou ’ia rave i te ’ohipa a te Atua i roto i tāna ’Ēkalesia, mai te fa’a’itera’a i te ’evanelia ’e te ravera’a i te ’ohipa hiero.

• Nō te tauturu i te mau tamari’i ’ia māramarama i te mau tāviri tā ’Elia i hōro’a mai ia Iosepha Semita, ’a hīmene ’āmui i hō’ē hīmene nō ni’a ia ’Elia ’aore rā, te ’ā’amu ’utuāfare, mai te « Truth from Elijah » (Children’s Songbook, 90–91). ’A parau nō ni’a i te hō’ē ’ohipa tei tupu tei tauturu i te fa’afāriura’a i tō ’outou ’ā’au i tō ’outou hui tupuna. E ani i te mau tamari’i ’ia fa’a’ite mai i te hō’ē mea tā rātou i ’ite nō ni’a i te hō’ē metua tupuna ’aore rā, i te tahi atu tupuna.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 109 ; 110:1–10

Te hiero ’o te fare ïa o te Fatu.

Nāhea ’outou ’ia fa’a’ite i te mau tamari’i i tō ’outou here i te fare o te Fatu ? ’A feruri e nāhea ’outou i te fa’auru ia rātou ’ia fāri’i i te tītaura’a a Elder Quentin L. Cook « nō tātou pā’āto’a, noa atu te vāhi tā tātou e ora ra, ’ia hi’o ia tātou iho i roto i te hiero » (« ’Ia hi’o ia ’outou iho i roto i te hiero », Ensign ’aore rā Liahona, Mē 2016, 101).

Mau ’ohipara’a e nehenehe e rave

• ’A mā’iti i te mau ’īrava i roto mai i te tuha’a 109 ’aore rā, 110 tā ’outou ’e mana’o ra e fa’ateatea i te mau ha’amaita’ira’a o te hiero (vetahi tei fa’a’itehia i roto i te arata’i nō teie hepetoma i roto i Mai, pe’e mai—nō te ta’ata hō’ē ’e te ’utuāfare). E tāpura i teie mau ha’amaita’ira’a i ni’a i te tāpura ’ere’ere, ’e e ani i te mau tamari’i ’ia ’imi i te mau ’īrava tā ’outou i mā’iti nō te ’imi mai i te reira mau ha’amaita’ira’a. Nāhea tātou i te fa’ata’a i te hō’ē ta’ata nō te aha e mea faufa’a te hiero nō tātou ?

• E ani i te mau tamari’i ’ia tai’o muhu ’ore Te Parau Ha’api’ira’a ’e te mau Parau Fafau 110:1–10, ’e e ani ia rātou ’ia fa’a’ite mai i te mea tā rātou i ’apo mai nō ni’a ia Iesu Mesia ’aore rā, te hiero nā roto mai i teie mau ’īrava. E ani i te mau tamariʼi ’ia pāpa’i i te hō’ē hōhoʼa nō rātou iho ’e te Fa’aora i roto i te hiero.

• E ani i te mau tamari’i ’ia feruri i te hō’ē hoa e tāmata ra i te ’ite mai i tō rātou fare. Nāhea tātou i te tauturu i tō tātou hoa ’ia ’ite mai teihea tō tātou fare ? Nāhea tātou e ’ite ai ē, te hiero ’o te fare ïa o te Fatu ? Tai’o Te Parau Ha’api’ira’a ’e te mau Parau Fafau 109:12–13 ’e te mau tamari’i, ’e e parau ia rātou e nāhea ’outou i ’ite ai ē, te hiero o te fare ïa o te Fatu. Fa’a’ite i te mau hōho’a o te mau hiero, ’e e vaiiho i te mau tamari’i ’ia fa’a’ite mai i tō rātou mau mana’o nō ni’a i te fare o te Fatu.

• Hīmene ’e te mau tamari’i, « ’Auē te Vārua o te Atua » (Te mau Hīmene, no. 2), ’e ’a parau ia rātou ē ’ua hīmenehia teie hīmene i te ha’amo’ara’a o te hiero nō Kirtland—’e i roto i te mau ha’amo’ara’a o te hiero i teie mahana. Nō te aha e hīmene maita’i teie nō te ha’amo’ara’a i te hiero nō Kirtland ?

  i roto i te hiero nō Kirtland

  I te mau hope’a ato’a o te hiero nō Kirtland, tē vai ra te mau terono nō te feiā fa’atere o te autahu’ara’a.

Te Parau Ha’api’ira’a ’e te mau Parau Fafau 110:11–16

Tei roto te mau tāviri o te autahu’ara’a e hina’arohia nō te rave i te ’ohipa a te Atua i te ’Ēkālesia i teie mahana.

’Ua parau ’o Elder Gary E. Stevenson, « te tā’āto’ara’a o te mau tamari’i a te Metua i te Ao ra [’ua] fa’a’erehia i te mau ’ōro’a fa’aora o te ’evanelia a Iesu Mesia—e tae roa ’ua ravehia te hō’ē fa’aho’i-fa’ahou-ra’a mai tei ravehia e [Mose, Elia ’e e Eliaha] » (« Tei hea te mau tāviri ’e te mana o te autahu’ara’a ? » Ensign ʼaore rā Liahona, Mē 2016, 33).

Mau ’ohipara’a e nehenehe e rave

• E ani i te mau tamari’i ’ia ’imi Te Parau Ha’api’ira’a ’e te mau Parau Fafau 110:11–16 nō te ’ite mai i te mau i’oa o nā peropheta tahito e toru tei fā mai i roto i te hiero nō Kirtland. ’I muri iho e tauturu ia rātou ’ia ’ite mai i te mau ta’o i roto i teie mau ’īrava ’o tē fa’a’ite nei i te mea tā te peropheta tāta’itahi i « fafau », ’aore rā, i hōro’a, ia Iosepha Semita ’e ia Oliver Cowdery. E nehenehe ’outou e ’ite mai i te hō’ē fa’a’itera’a tauturu i roto i te « Pene 40 : Te mau ’ōrama i roto i te hiero nō Kirtland » (Te mau ’ā’amu o te Parau Ha’api’ira’a ’e te Parau Fafau, 156–57).

• E fa’ahiti atu i teie fa’a’itera’a nō te mau tāviri o te autahu’ara’a nā te peresideni Russell M. Nelson : « I roto i tō ’outou pūtē, tē vai ra paha te hō’ē tāviri nō tō ’outou fare ’aore rā pere’o’o. Te mau tāviri o te autahu’ara’a ra, e mea tāpe’a-’ore ’e ’itea-’ore-hia. E ‘tū’ama’ rātou i te mana o te autahu’ara’a » (« Te hōpoi’a tāta’itahi nō te autahu’ara’a », Ensign ’aore rā Liahona, Novema 2003, 45-46’). Nō te fa’ahōho’a i te faufa’a rahi o te mau tāviri o te autahu’ara’a, ’a ’aparau i te mau tamari’i i te mau fifi nō te mo’era’a i te hō’ē tāviri fare ’aore rā, te tāviri pere’o’o. Nāhea te reira e tuea ai i te mau fifi nō te mo’era’a te mau tāviri o te autahu’ara’a ? Tauturu i te mau tamari’i ’ia māramarama ’o vai te mau nei i te mau tāviri o te autahu’ara’a i teie mahana, ’e e nāhea teie mau tāviri i te fa’a’ohipahia nō te ’īriti i te mau ha’amaita’ira’a nō te tā’āto’ara’a o te mau tamari’i a te Atua (hi’o « Te mau tāviri o te autahu’ara’a », Mau maite i te Fa’aro’o, 126–27).

• Nō te fa’ata’a hau atu i te mau tāviri tei fa’aho’ihia mai i roto i te hiero nō Kirtland, e fa’a’ite i te video « By the hand of Elijah the Prophet » (ChurchofJesusChrist.org). E ’aparau e aha tā tātou e rave nō te ’āmui atu i roto i te ’ohipa ’o tā te mau tāviri a Elia i fa’ati’a. ’Aore rā, e fa’a’ite i te video « Gatherers in the kingdom » (ChurchofJesusChrist.org) ’e e paraparau nō ni’a e nāhea tātou i te tauturu ’ia ha’aputu i te mau tamari’i a te Metua i te Ao ra iāna ra.

ītona ’apora’a mai

Fa’aitoito i te ’apora’a mai i te fare

E ani i te mau tamari’i ’ia fa’a’ohipa i te ’api ’ohipara’a nō teie hepetoma ’aore rā, i te hō’ē hōho’a tā rātou i pāpa’i i roto i te piha ha’api’ira’a nō te ha’api’i i tō rātou ’utuāfare i te mea tā rātou i ha’api’i mai i teie mahana nō ni’a i te mau hiero ’aore rā, i te mau tāviri o te autahu’ara’a.

Ha’amaita’ira’a i tā tātou ha’api’ira’a

Hāmani i te hō’ē vāhi nō te here ’e te fa’atura. « E fa’aurura’a pūai tō tō ’outou hi’ora’a i ni’a i te huru o te [mau tamari’i]… Ma tā ’outou mau parau ’e tā ’outou mau ravera’a, ’a fa’a’ite ia rātou ē ’ua here ’outou i te ’evanelia ’e tē ha’ape’ape’a nei ’outou nō tō rātou tupura’a pae vārua » (Ha’api’ira’a mai tā te Fa’aora, 14).

’api ’ohipara’a : ’Ua fa’aho’i-fa’ahou-hia mai te mau tāviri o te autahu’ara’a i roto i te hiero nō Kirtland