Ātea i tō’o’a o te rā, nā Al Rounds

11–17 nō ’Ātopa.

Te Parau Ha’api’ira’a ’e te mau Parau Fafau 115:120

« E mea mo’a a’e nō’u tāna tusia i tōna tupura’a i te rahi »

’A vaiiho i te Vārua ’ia arata’i ia ’outou i te mau parau tumu o tā te mau tamari’i e hina’aro rahi roa a’e. E ’ite mai paha ’outou i te mau mana’o tauturu i roto i te mau ’ohipara’a nā te mau tamari’i ’āpī a’e ’aore rā, nā te mau tamari’i pa’ari.

Pāpa’i i te mau mana’o e tae mai

Tītau i te mana’o

I te tahi taime, e mea maita’i paha ’ia paraparau nā mua i te mau metua o te hō’ē o te mau tamari’i ’e ’a tu’u atu ai i te mana’o ’ia ineine te tamari’i nō te haere mai i te piha ha’api’ira’a e fa’a’ite mai i te mea tāna i ha’api’i mai i te fare. E ’oa’oa paha te tamari’i ’ia fa’atere i roto i te piha ha’api’ira’a, te hō’ē ’ohipara’a ’o tāna i rave ’e te mau melo o tōnā ’utuāfare.

Ha’api’i i te ha’api’ira’a tumu : Te mau tamari’i ’āpī a’e

Te Parau Ha’api’ira’a ’e te mau Parau Fafau 115:4–5

E melo vau nō te ’Ēkālesia a Iesu Mesia i te Feiā Mo’a i te mau Mahana Hope’a Nei.

Nāhea ’outou i te tauturu i te mau tamari’i ’ia ’ite i te mau ha’amaita’ira’a nō te rirora’a ’ei tuha’a nō te ’Ēkālesia a Iesu Mesia ?

Mau ’ohipara’a e nehenehe e rave

• E ani i te mau tamari’i e nehenehe ānei te hō’ē o rātou e parau i te i’oa tā’āto’a o te ’Ēkālesia. E fa’a’ite ia rātou i te tāpa’o o te ’Ēkālesia (i ni’a i te hō’ē nene’ira’a a te ’Ēkālesia ’aore rā a te misiōnare), e pāpa’i i te i’oa i ni’a i te tāpura ’ere’ere, ’aore rā, e tai’o i te reira ia rātou nā roto mai i Te Parau Ha’api’ira’a ’e te mau Parau Fafau 115:4. E ani i te mau tamari’i ’ia parau i te i’oa nā muri ia ’outou ’a fa’atoro ai ’outou i te parau tāta’itahi. ’A fa’a’ite i te mau ta’o faufa’a rahi i roto i te i’oa, ’e e tauturu i te mau tamari’i ’ia ta’a maita’i nō te aha e mea faufa’a teie mau ta’o (hi’o « Pene 43 : ’Ua pi’i Iesu Mesia i tāna ’Ēkālesia », (Te mau ’ā’amu o te Parau Ha’api’ira’a ’e te mau Parau Fafau, 164).

• Hīmene ’āmui « L’Eglise de Jésus-Christ » (Chants pour les enfants, 48), ’e e fa’a’ite i te mau tamari’i i tō ’outou mana’o i te rirora’a ’ei melo nō te ’Ēkālesia a Iesu Mesia. Vaiiho ia rātou ’ia fa’ai’te mai e aha tō rātou mana’o nō ni’a i te ’Ēkālesia.

• E ani i te mau tamari’i ’ia ti’a i ni’a ’ia tai’o ana’e ’outou i te ta’o « ti’a » i roto i Te Parau Ha’api’ira’a ’e te mau Parau Fafau 115:5. E ani ia rātou ’ia pānena i tō rātou manimani rima mai te hihi mahana, ’ia tai’o ana’e ’outou « ’ia ’ana’ana mai na ». Hīmene ’āmui i te hō’ē hīmene nō ni’a i te rirora’a ’ei māramarama nō vetahi ’ē, mai te « Vois l’étoile au ciel » (Chants pour les enfants, 84). E fa’aha’amana’o i te mau tamari’i ē nō ō mai tō tātou māramarama ia Iesu Mesia, ’e e tauturu ia rātou ’ia feruri i te mau rāve’a ’ia « ’ana’ana mai » rātou.

Te Parau Ha’api’ira’a ’e te mau Parau Fafau 117:6

Nā Iesu Mesia i hāmani i te fenua ’e i te mau mea ato’a i ni’a iho.

Nō te fa’aitoito ia William Marks ’e ia Newel K. Whitney ’ia fa’atusia i tō rāua fenua ’e ’ia haere atu i Missouri, ’ua fa’aha’amana’o te Fatu ia rāua ē, nāna i hāmani i te mau mea ato’a i ni’a i te fenua nei. Nāhea te mau tamari’i i te ha’amaita’ihia nā roto i te ’itera’a i teie parau mau ?

Mau ’ohipara’a e nehenehe e rave

• E hōpoi mai ’aore rā, e pāpa’i hōho’a i te mau poietera’a i roto i Te Parau Ha’api’ira’a ’e te mau Parau Fafau 117:6 tā te Fatu i parau ’ua hāmani ’oia (’aore rā e ani i te mau tamari’i ’ia pāpa’i hōho’a i tō rātou iho hōho’a). E ani i te mau tamari’i ’ia tāpe’a ’aore rā ’ia fa’a’ite mai i te mau hōho’a ’a tai’o noa ai ’outou te ’īrava. E parau i te mau tamari’i nō te aha e mea faufa’a nō ’outou ’ia ’ite ē, ’ua hāmani Iesu Mesia i teie mau mea.

• E hīmene ’āmui i te hō’ē hīmene nō ni’a i te mau mea i poietehia e te Fatu, mai te « Mon Père Celeste m’aime » (Chants pour les enfants, 16–17). E vaiiho i te mau tamari’i e paraparau nō ni’a i te tahi o te mau mea i poietehia e te Atua nō te tauturu ia rātou ’ia ’ite i tōna here.

Te Parau Ha’api’ira’a ʼe te mau Parau Fafau 119–20

E tauturu te tuha’a ’ahuru i te ’Ēkalesia ’ia rave i te ’ohipa a te Atua.

E rave rahi paha mau tamari’i tā ’outou e ha’api’i ra e mea ’āpī roa nō te fāri’i mai i te moni ’e nō te ’aufau i te tuha’a ’ahuru, terā rā, e mea maita’i nō rātou ’ia māramarama ē mea nāhea te mau tuha’a ’ahuru i te tauturu i te ’ohipa rahi tā te ’Ēkalesia e rave nei nā te ao ato’a nei.

Mau ’ohipara’a e nehenehe e rave

• E fa’ata’a e nāhea tātou ’ia ’aufau i te tuha’a ’ahuru ’e e aha tōna fa’a’ohipara’a (hi’o « Pene 44 : Te tuha’a ’ahuru », (Te mau ’ā’amu o te Parau Ha’api’ira’a ’e te mau Parau Fafau, 165–66, ’aore rā, te video i ni’a ChurchofJesusChrist.org). Pāpa’i hōho’a 10 moni toata i ni’a i te tāpura ’ere’ere, ’e e ani i te mau tamari’i ’ia tauturu mai ia ’outou ’ia tai’o i te reira. E fa’ata’a e hia te hōro’a nā te Fatu nō te tuha’a ’ahuru.

• Hīmene ’āmui i te hō’ē hīmene nō ni’a i te tuha’a ’ahuru, mai te « Je donne ma dîme au Seigneur » (Chants pour les enfants, 148), ’e e parau i te mau tamari’i nō te aha ’outou i māi’ti ai e ’aufau i te tuha’a ’ahuru. Mai te mea e nehenehe, ’a fa’a’ite i tō ’outou iho ’ā’amu.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 115:4–6

E nehenehe tōu hi’ora’a e tauturu ia vetahi ’ē ’ia haere mai i te Mesia ra ’e ’ia ’ite i te pārurura’a.

’Ua ’ite paha te mau tamari’i tā ’outou e ha’api’i ra i te mau ta’ata tei ro’ohia i te mau vero o te orara’a ’e ’o tē hina’aro nei i te « vāhi ha’apūra’a » (’īrava 6) e hōro’ahia i roto i te ’Ēkālesia. ’A feruri e nāhea ’outou ’ia fa’auru i te mau tamari’i ’ia « ti’a ’e ’ia ’ana’ana mai » (’īrava 5) ’e ’ia fa’a’ite mai i tō rātou māramarama i teie mau ta’ata.

Mau ’ohipara’a e nehenehe e rave

• E hōro’a fa’a’ohu i te hō’ē mori pata, hō’ē hōho’a o te mahana, ’aore rā te hō’ē ’ohipa e fa’ahōho’a i te māramarama o te ’evanelia a te Fa’aora. ’Ia tae i tō rātou taime nō te tāpe’a i te mōrī, e ani i te mau tamari’i ’ia tai’o i Te Parau Ha’api’ira’a ’e te mau Parau Fafau 115:4–5 ’e e fa’ahiti i te hō’ē ’ohipa tā rātou e nehenehe e rave nō te « ’ana’ana » mai te hō’ē mōrī nō vetahi ’ē (hi’o 3 Nephi 18:24).

• E ani i te mau tamari’i ’ia pāpa’i i te hō’ē hōho’a e fa’a’ite ra i Te Parau Ha’api’ira’a ’e te mau Parau Fafau 115:6. ’Ei hi’ora’a, e nehenehe rātou e pāpa’i hōho’a i te vero, ’e te mau ta’ata e pāruruhia ra i roto i te hō’ē fare a te ’Ēkālesia. E aha te mau mea tā te vero e nehenehe e fa’ahōho’a ? Nāhea te ’Ēkālesia i te hōro’a i te vāhi ha’apūra’a nō teie mau mea ?

Te Parau Ha’api’ira’a ’e te mau Parau Fafau 117

E mea mo’a tā’u mau tusia nā te Fatu.

I roto i te tuha’a 117, ’ua a’o te Fatu ia William Marks ’e ia Newel K. Whitney ’ia fa’atusia i tā rāua mau tao’a i Kirtland nō te mau ha’amaita’ira’a rahi a’e i Missouri. ’Ua ha’apoupou ato’a ’oia ia Oliver Granger nō te mau tusia tāna i rave. E aha tō ’outou mana’o i tā te mau tamari’i e nehenehe e ha’api’i mai nā roto mai i tō rātou mau hi’ora’a ?

Mau ’ohipara’a e nehenehe e rave

• E ani i te mau tamari’i ’ia feruri ē, e fatu fare toa manuia rātou i Kirtland, mai ia Newel K. Whitney. E aha tā rātou e fāri’i mai te mea e ani te Fatu ia rātou ’ia fa’aru’e i tā rātou fare toa ’e ’ia haere i te hō’ē vāhi āpī ? Tai’o i te mau tamari’i Te Parau Ha’api’ira’a ’e te mau Parau Fafau 117:1–11, ’e e ani i te mau tamari’i ’ia tāpe’a ia ’outou ’ia fa’aro’o ana’e rātou i te hō’ē mea ’o te tauturu ia rātou ’ia roa’a te fa’aro’o nō te rave i te mau tusia ’e ’ia ha’apa’o i te parau a te Fatu. E aha tā tātou e fa’atusia nei i teie mahana nō te ha’apa’o i te parau a te Fatu ?

• E fa’ata’a poto noa i te mau tamari’i nō te aha te feiā mo’a i fa’aru’e ai ia Kirtland, ’aore rā, e vaiiho i te hō’ē o te mau tamari’i ’ia rave i te reira (hi’o « Pene 41 : Te fifi i Kirtland », (Te mau ’ā’amu o te Parau Ha’api’ira’a ’e te mau Parau Fafau, 158–60). E fa’ata’a ē ’ua ani te Fatu ia Oliver Granger ’ia fa’aea i Kirtland ’e ’ia ’aufau i te mau tārahu a te ’Ēkālesia. Nō te aha ’ua riro ’ei ’ohipa fifi ? E aha tā te Fatu i parau i roto i Te Parau Ha’api’ira’a ’e te mau Parau Fafau 117:13 ’o te nehenehe e tauturu ia Oliver—’aore rā i te hō’ē o tātou—’ia rave i te mau fa’atusiara’a nō te ha’apa’o i te parau a te Fatu ?

Te Parau Ha’api’ira’a ʼe te mau Parau Fafau 119–20

E tauturu te tuha’a ’ahuru i te ’Ēkalesia ’ia rave i te ’ohipa a te Atua.

’A feruri e nāhea ’outou i te tauturu i te mau tamari’i ’ia māramarama nāhea te tuha’a ’ahuru—noa atu te na’ina’i o te fāito moni ’o tā rātou e ’aufau—nō te tauturu i te patura’a i te bāsileia o te Fatu (hi’o Mau maite i te Fa’aro’o, 180–82).

Mau ’ohipara’a e nehenehe e rave

• E ani i te mau tamari’i ’ia feruri ē, tē hi’o nei te hō’ē hoa i te hō’ē fare a te ’Ēkālesia ’e e ui mai, « nāhea tā ’outou ’Ēkālesia i te ’aufaura’a nō teie fare ? » Nāhea tātou i te fa’ata’a i te tuha’a ’ahuru i teie hoa ? ’A parau i te mau tamari’i ’ia hi’o i Te Parau Ha’api’ira’a ’e te mau Parau Fafau 119:4 ; 120:1 ’a feruri ai rātou i teie uira’a.

• Tauturu i te mau tamari’i ’ia feruri i te mau mea e ti’a i te ’Ēkālesia ’ia rave maoti te tuha’a ’ahuru. Nāhea teie mau mea i te ha’amaita’i i tō tātou orara’a ? E fa’a’ite i tō ’outou mau mana’o nō ni’a i te ture nō te tuha’a ’ahuru ’e e nāhea te reira i te ha’amaita’i ia ’outou.

  

  Nā roto i te ’aufaura’a i te tuha’a ’ahuru, e nehenehe tātou e fa’a’ite i tō tātou here i te Atua ’e e tauturu i tāna ’ohipa.

Fa’aitoito i te ’apora’a mai i te fare

E ani i te mau tamari’i ’ia pāpa’i e aha tā rātou i fāri’i i roto i tō rātou ’ā’au ’aore rā, i tō rātou ferurira’a tei tae mai i tō rātou vārua i te roara’a o te Paraimere i teie mahana. E fa’aitoito ia rātou ’ia fa’a’ite mai i teie mau ’āehuehu ’e mau mana’o i tō rātou ’utuāfare.

Ha’amaita’i i tā tātou ha’api’ira’a

Pāturu i te mau metua. ’A ’ite mai i te mau rāve’a nō te fa’a’ite i te mau metua e aha tā tā rātou mau tamari’i i ha’api’i mai i roto i te Paraimere ’e e ani ia rātou nāhea ’outou ’ia turu i tā rātou mau tauto’ora’a ’ei mau metua (hi’o Ha’api’ira’a mai tā te Fa’aora, 25).