« 4–10 nō ’Ātopa. Te Parau Ha’api’ira’a ’e te mau Parau Fafau 111–114 : ‘’E fa’aue au i te mau mea ato’a ’ei maita’i nō ’outou’ », Mai, pe’e mai—nō te Paraimere : Te Parau Ha’api’ira’a ’e te mau Parau Fafau 2021 (2020)
« 4–10 nō ’Ātopa. Te Parau Ha’api’ira’a ’e te mau Parau Fafau 60–62 », Mai, pe’e mai—nō te Paraimere : 2021
4–10 nō ’Ātopa.
Te Parau Ha’api’ira’a ʼe te mau Parau Fafau 111–114
« E fa’aue au i te mau mea ato’a ’ei maita’i nō ’outou »
’Ua ha’api’i te tuahine Cheryl A. Esplin, tauturu tahito i roto i te peresidenira’a rahi o te Paraimere ē, e ti’a ia tātou « [’ia tauturu] i tā tātou mau tamari’i ’ia fāri’i i te ha’api’ira’a tumu i roto i tō rātou ’ā’au ’ei reira… ’ia ’itehia ’oia i roto i tō rātou huru ’e tō rātou haere’a i te roara’a o tō rātou orara’a » (« Ha’api’i i tā tātou mau tamari’i ’ia māramarama », Ensign ’aore rā Liahona, Mē 2012, 10).
Pāpa’i i te mau mana’o e tae mai
Tītau i te mana’o
Nō te fa’aitoito i te mau tamari’i ’ia fa’a’ite mai, ’a hōpoi mai i te tahi mau tao’a e tū’ati i te tahi mea nō roto mai i te hō’ē ha’api’ira’a tahito. E vaiiho ia rātou ’ia paraparau nō ni’a i te mea tā te tao’a tāta’itahi e fa’aha’amana’o ra ia rātou.
Ha’api’i i te ha’api’ira’a tumu : Te mau tamari’i ’āpī a’e
Te Parau Ha’api’ira’a ’e te mau Parau Fafau 111:2, 10–11
E nehenehe te mau mea a te Atua e riro ’ei tao’a rahi nā’u.
’Ia feruri ana’e i te mau tamari’i i te ta’o tao’a rahi, e feruri rātou i te mau mea ta’a ’ē i te mau tao’a i fa’ahitihia i roto i Te Parau Ha’api’ira’a ’e te mau Parau Fafau 111:2, 10. Nāhea ’outou i te tauturu ia rātou ’ia ha’api’i mai i te poihere i te mau tao’a a te Fatu ?
Mau ’ohipara’a e nehenehe e rave
-
E ani i te mau tamari’i ’ia pāpa’i hōho’a i te mau mea e tae mai i te ferurira’a ’ia fa’aro’o ana’e rātou i te parau tao’a rahi. E fa’aau i te mau mea tā te ao nei e hi’o nei ’ei tao’a rahi ’e te mau mea tā te Fatu i poihere (hi’o Te Parau Ha’api’ira’a ’e te mau Parau Fafau 111:2, 10–11), mai tōna mau ta’ata, te pa’ari ’e te parauti’a ’e te ravera’a i te mau mā’itira’a maita’i.
-
Tauturu i te mau tamari’i ’ia fa’a’ī i te ’api ’ohipara’a nō teie hepetoma. E aha tā tātou e ha’api’i mai nō ni’a ia Iesu nā roto mai i te mau mea tāna i poihere ? Nāhea e ti’a ai ia tātou ’ia riro hau atu mai iāna te huru ?
Te Parau Ha’api’ira’a ’e te mau Parau Fafau 112:10
E arata’i te Fatu iā’u nā te rima ’e e pāhono i tā’u mau pure.
E tauturu Te Parau Ha’api’ira’a ’e te mau Parau Fafau 112:10 i te mau tamari’i tā ’outou e ha’api’i ra ’ia patu i te fa’aro’o ē, e fa’atere ’e e arata’i Iesu Mesia ia rātou i te roara’a o tō rātou orara’a.
Mau ’ohipara’a e nehenehe e rave
-
Tauturu i te mau tamari’i ’ia feruri i te mau taime e mea faufa’a ’ia tāpe’a i te rima o te hō’ē melo o te ’utuāfare, mai te arata’ira’a iāna nā ni’a i te purumu ’aore rā, te tāmāhanahanara’a. E nehenehe rātou e hauti mai i te tahi mau hi’ora’a tā rātou e fa’a’ite mai. Tai’o i Te Parau Ha’api’ira’a ’e te mau Parau Fafau 112:10. Nō te aha e hina’aro tātou i te Fatu « ’ia arata’i nā [tō tātou] rima ? »
-
’A tu’u i te hō’ē tā’amu mata i ni’a i te hō’ē o te mau tamari’i, ’e e ani ’iāna ’ia haere nā roto i te piha ma te arata’ihia nā te rima o te tahi atu tamari’i. ’A parau nō ni’a i te hō’ē ’ohipa tei tupu ia ’outou ’a ’ite ai ’outou i te Fatu i te arata’ira’a ia ’outou nā te rima.
Hōho’aIesu ’e te hō’ē tamaiti ’e tōna metua vahine’A ti’a ’e ’a haere, nā Simon Dewey
Te Parau Ha’api’ira’a ’e te mau Parau Fafau 112:11
Tē hina’aro nei Iesu ’iāu ’ia here i te mau ta’ata ato’a.
Tauturu i te mau tamari’i ’ia ’ite ē, tē hina’aro nei te Fa’aora ia tātou ’ia here i te mau ta’ata ato’a, tae noa atu i te feiā ’aita e mea maita’i i ni’a ia tātou.
Mau ’ohipara’a e nehenehe e rave
-
’A fa’a’ite ai ’outou i te « Pene 41 : Te fifi i Kirtland » (Te mau ’ā’amu o te Parau Ha’api’ira’a ’e te mau Parau Fafau, 158–60), ’a ani i te mau tamari’i ’ia hāmani i te hō’ē hōho’a māfatu i tō rātou rima ’ia fa’aro’o ana’e rātou i te hō’ē ta’ata ’ia parau nō te hō’ē ta’ata tei rave i te hō’ē ’ohipa maita’i. Tauturu ia rātou ’ia māramarama ē, tē hina’aro nei te Fatu ia tātou ’ia here i te mau ta’ata ato’a, tae noa atu i te feiā e rave nei i te mau mā’itira’a tano ’ore.
-
Pāpa’i i te hō’ē hōho’a mata ’oto i ni’a i te tāpura ’ere’ere, ’e e ani i te mau tamari’i nāhea tātou ’ia fa’a’ite i te here ia vetahi e ’oto ra (hi’o Te Parau Ha’api’ira’a ’e te mau Parau Fafau 112:11). ’A fa’a’ite mai ai te mau tamari’i i te mau mana’o, ’a pāpa’i fa’ahou i te hōho’a mata oto ’ia riro mai ’ei hō’ē mata ’ata’ata. ’A fa’a’ite i tō ’outou ’itera’a pāpū nō ni’a i te mana e tae mai nā roto i te herera’a ia vetahi ’ē. ’A hīmene ’āmui i te hō’ē hīmene nō ni’a i te here, mai te « Aimez chacun » (Chants pour les enfants, 39).
Ha’api’i i te ha’api’ira’a tumu : Te mau tamari’i pa’ari
Te Parau Ha’api’ira’a ’e te mau Parau Fafau 112:10
E nehenehe au ’ia vai ha’eha’a ’e e ’imi i te arata’ira’a a te Atua.
Tē hina’aro nei te Metua i te Ao ra ia tātou ’ia vai ha’eha’a ’ia nehenehe iāna e arata’i ia tātou. Tauturu i te mau tamari’i ’ia māramarama e nāhea e ti’a ai ia rātou ’ia fa’a’ite i te ha’eha’a i mua i te Atua nā roto i te ravera’a i te mau mea mai te purera’a iāna ’e te fāri’ira’a i tāna parau a’o.
Mau ’ohipara’a e nehenehe e rave
-
E ani i te mau tamari’i e aha te aura’a ’ia vai ha’eha’a. (E nehenehe rātou ’e tai’o te « Ha’eha’a » i roto i te Mau maite i te Fa’aro’o [mau ’api 86–87], ’ia hina’arohia). Tauturu ia rātou ’ia feruri i te mau ta’o ’aore rā te mau pereota nō te « ha’eha’a », ’e e ani ia rātou ’ia tai’o i Te Parau Ha’api’ira’a ’e te mau Parau Fafau 112:10, ma te mono i te hō’ē o teie mau ta’o ’aore rā, mau pereota i te « ha’eha’a » i roto i te ’īrava. Nō te aha te Metua i te Ao ra e hinaʼaro ai ia tātou ʼia vai ha’eha’a ? Nō te ha’api’i rahi mai atu ā, e nehenehe te mau tamari’i e tai’o te tahi atu mau pāpa’ira’a mo’a tei tāpurahia i raro a’e i te « Ha’eha’a » i roto i te Arata’i nō te mau pāpa’ira’a mo’a (scriptures.ChurchofJesusChrist.org).
-
Pāpa’i i te mau ta’o o Te Parau Ha’api’ira’a ’e te mau Parau Fafau 112:10 i ni’a i te tāpura ’ere’ere, ’e e ani i te mau tamari’i ’ia tai’o pūai i te reira. E ani i te hō’ē tamari’i ’ia rēni i te mau ha’amaita’ira’a nō te mau ta’ata ha’eha’a tei fa’ahitihia i roto i teie ’īrava. E fa’aitoito i te mau tamari’i ’ia fa’a’ite mai i te mau taime ’ua ’imi rātou ma te ha’eha’a i te tauturu a te Fatu ’e ’ua arata’ihia e āna, mai te taime ’a pāhonohia ai tā rātou mau pure.
Te Parau Ha’api’ira’a ’e te mau Parau Fafau 112:11
Tē hina’aro nei Iesu iā’u ’ia here i te mau ta’ata ato’a.
’O Iesu Mesia te hi’ora’a maita’i roa a’e nō te here i te mau ta’ata ato’a, ’e te feiā tei hāmani ’ino iāna. ’Ua fa’aruru ato’a Iosepha Semita i te hāmani-’ino-ra’a nā roto mai i te mau ta’ata tei riro nā ’ei mau hoa nōna. Tauturu i te mau tamari’i ’ia ha’api’i mai ē, e nehenehe tātou e here ia vetahi ’ē mai tā te Fa’aora ’e tā Iosepha Semita i nā reira.
Mau ’ohipara’a e nehenehe e rave
-
E ani i te mau tamari’i ’ia tai’o te tahi i muri mai i te tahi i te « Pene 41 : Te fifi i Kirtland » (Te mau ’ā’amu o te Parau Ha’api’ira’a ’e te mau Parau Fafau, 158–60). ’O vai i roto i te ’ā’amu tei fa’arahi atu i te mau fifi i Kirtland ? ’O vai tei tāmata i te ha’amaita’i mai i te reira ? E ani i te mau tamari’i ’ia tai’o i Te Parau Ha’api’ira’a ’e te mau Parau Fafau 112:11 ’e ’ia fa’ata’a nō te aha e mea faufa’a ’ia here i te mau ta’ata ato’a.
-
Nō te aha e mea faufa’a ’ia here i te mau ta’ata tei ta’a ’ē atu ia tātou ? Nō te aha te Metua i te Ao ra i hōro’a mai ai i te mau ta’a-’ē-ra’a ia tātou ? Nāhea tātou ’ia « vaiiho i tō [tātou] here ’ia rahi atu ā nō te ta’ata ato’a », ’e tae noa atu nō rātou tei ta’a ’ē atu ’ia tātou ? Hīmene ’e te mau tamari’i i te hō’ē hīmene nō ni’a i te herera’a ia vetahi ’ē, mai te « Je viens vers toi » (Chants pour les enfants, 78).
-
Tauturu i te mau tamari’i ’ia ’imi mai i te mau hi’ora’a nō te mau taime ’a here ai te Fa’aora i te feiā tei hāmani ’ino ’iāna (’ei hi’ora’a, hi’o Luka 23:34).
Te Parau Ha’api’ira’a ’e te mau Parau Fafau 112:12–15, 26
Te feiā tei fa’afāriu-pāpū-hia, ’ua mātau ia Iesu Mesia.
’Ua riro te fa’afāriura’a ia Iesu Mesia, ’ei ’ohipa e vai nō te orara’a tā’āto’a, e ’ere noa i te « [paraura’a] ē ’ua ’ite [tōna] i’oa » (Te Parau Ha’api’ira’a ’e te mau Parau Fafau 112:26). Tauturu i te mau tamari’i ’ia māramarama maita’i e aha te aura’a i te reira nō te ’ite-mau-ra’a i te Fa’aora.
Mau ’ohipara’a e nehenehe e rave
-
’A fa’a’ite i te mau tamari’i ē, i roto i te matahiti 1837, te tahi o te mau ’āpōsetolo tei ’aro atu i te peropheta Iosepha Semita. Nō te aha e mea faufa’a ’ia pe’e i te peropheta ? (hi’o i te ’īrava 15). Tauturu i te mau tamari’i ’ia hāmani i te hō’ē tāpura nō te mau mea tā te Fatu i parau ia Thomas B. Marsh, te peresideni nō te pupu nō te Tino ’Ahuru ma Piti ’āpōsetolo, ’ia rave (hi’o i Te Parau Ha’api’ira’a ’e te mau Parau Fafau 112:12–15). ’A fa’a’ohipa i te tāpura nō te ’āparau e nāhea tātou i te fa’afāriu hau atu ā ia Iesu Mesia.
-
E ani i te mau tamari’i e aha tō rātou mana’o i te aura’a ’ia poro hua ’ia ’ite ia Iesu Mesia ’aita rā i ’ite mau iāna (hi’o Te Parau Ha’api’ira’a ’e te mau Parau Fafau 112:26). E aha tā te ’īrava 14 e ha’api’i nei ia tātou e ti’a ia tātou ’ia rave nō te ’ite maita’i a’e iāna ? Tauturu te mau tamari’i ’ia māramarama e aha te aura’a « ’ia rave i [tō tātou] sātauro » (Tātarara’a a Iosepha Semita, Mataio 16:25–26 [in the Bible appendix]) ’aore rā, « ’ia fa’a’amu i [tāna] mau māmoe ».
Fa’aitoito i te ’apora’a mai i te fare
E ani i te mau tamari’i ’ia pū’ohu mai i te mea tā rātou i ha’api’i mai i roto i te piha ha’api’ira’a i teie mahana. Tauturu ia rātou ’ia pāpa’i i te hō’ē parau ’aore rā, e pāpa’i i te hō’ē hōho’a ’o te fa’aha’amana’o ia rātou i te mea tā rātou i ha’api’i mai ’o tā rātou e fa’a’ite atu i tō rātou ’utuāfare.
Ha’amaita’i i tā tātou ha’api’ira’a
E mea hi’opo’a te mau tamari’i ’e e ha’api’i mai nā roto e rave rahi mau rāve’a. E ’oa’oa te mau tamari’i ’ia ha’api’i mai nā roto i te mau ’itera’a ’āpī ’e te rau. E fa’a’ohipa i te mau ’ohipara’a o te tauturu ia rātou ’ia haere i mua, e fa’a’ohipa i tō rātou mau hōro’a ato’a, ’ia hi’o haere ’e ’ia tāmata i te mau mea ’āpī. (Hi’o Ha’api’ira’a mai tā te Fa’aora, 25–26.)