Nauvoo te nehenehe, nā Larry Winborg

25–31 nō ’Ātopa.

Te Parau Ha’api’ira’a ’e te mau Parau Fafau 124–125

« Hō’ē fare i tō’u nei i’oa »

E aha te mau ha’api’ira’a nō roto mai i Te Parau Ha’api’ira’a ’e te mau Parau Fafau 124–25 tā te mau tamari’i e hina’aro e ha’api’i mai ? Feruri i teie uira’a a tuatāpapa ai ’outou i teie hepetoma.

Pāpa’i i te mau mana’o e tae mai

Tītau i te mana’o

Pia i te hō’ē hōho’a o te hiero fātata i’ō ’outou. E ani i te mau tamari’i e aha tā rātou i ’ite nō ni’a i te mau hiero. Vaiiho ia rātou ’ia fa’a’ite mai i tō rātou mau mana’o nō ni’a i te haerera’a i te hiero i te hō’ē mahana.

Ha’api’i i te ha’api’ira’a tumu : Te mau tamari’i ’āpī a’e

Te Parau Ha’api’ira’a ’e te mau Parau Fafau 124:15, 20

E ’oa’oa Iesu ’ia tāmata ana’e au i te rave i te maita’i.

I roto i te heheura’a tei pāpa’ihia i roto i te tuha’a 124, ’ua fa’a’ite te Fatu i tāna parau fa’ati’a nō Hyrum Smith ’e George Miller nō te mea ’ua tūtava rāua i te pe’e iāna. Nāhea ’outou i te tauturu i te mau tamari’i ’ia ’ite ē, e māuruuru te Fatu ia rātou ’ia tāmata ana’e rātou i te rave i te maita’i ?

Mau ’ohipara’a e nehenehe e rave

• Tauturu te mau tamari’i ’ia feruri i te mau mea tā rātou e nehenehe e rave maita’i. E fa’a’ite i te mau hōho’a nō te hōro’a ia rātou i te mau mana’o (e nehenehe ’outou ’e ’ite i te tahi i roto i te Buka hōho’a ’evanelia ’aore rā, te mau ve’a pāpa’i a te ’Ēkalesia). E ani i te mau tamari’i ’ia fa’atoro i ni’a i teie mau mea maita’i. Tai’o i Te Parau Ha’api’ira’a ’e te mau Parau Fafau 124:15 i te mau tamari’i, ’e e ani ia rātou ’ia fa’aro’o i te mea tā Fatu i fāri’i i tō Hyrum Smith mā’itira’a e rave i te maita’i. E aha tā Iesu e fāri’i ’ia tāmata ana’e tātou i te rave i te mau ’ohipa maita’i ?

• Hōro’a i te mau tamari’i i te hō’ē hōho’a māfatu, ’e e ani ia rātou ’ia pāpa’i i te mau hōho’a nō rātou iho e rave ra i te mau mea maita’i. E ani ia rātou ’ia fa’a’ite mai i te mea tā rātou i pāpa’i i te piha. E aha tā tātou e fāri’i ’ia rave ana’e tātou i te ’ohipa maita’i ? ’A fa’a’ite pāpū ē, e ’oa’oa o Iesu ia tātou ’ia tāmata ana’e tātou i te rave i te ’ohipa maita’i.

• Hīmene i te hō’ē hīmene nō ni’a i te ravera’a i te mau ’ohipa tā Iesu e hina’aro ia tātou ’ia rave, mai te « Brillant pour lui » (Chants pour les enfants, 38).

Te Parau Ha’api’ira’a ’e te mau parau fafau 124:28–29, 39

’Ua fa’aue Iesu i tōna mau ta’ata ’ia patu i te mau hiero.

’Ua riro noa te mau hiero ’ei tuha’a nō te fa’anahora’a a te Metua i te Ao ra nō tāna mau tamari’i. E tauturu te māramaramara’a i te reira i te mau tamari’i tā ’outou e ha’api’i ra ’ia fāri’i i te fa’atura rahi atu ā nō te hiero.

Mau ’ohipara’a e nehenehe e rave

• Tauturu i te mau tamari’i ’ia māramarama ē, i te ’itera’a te feiā mo’a i te hō’ē fa’aeara’a āpī i Nauvoo, ’ua parau te Fatu ia rātou ’ia patu i te hō’ē hiero (hi’o « Pene 50 : Te feiā mo’a i Nauvoo » (Te mau ’ā’amu o te Parau Ha’api’ira’a ’e te mau Parau Fafau, 183–84, ’aore rā, te video i ni’a ChurchofJesusChrist.org). E ani i te mau tamari’i ’ia fa’ahua patu i te hō’ē hiero.

• Tai’o ’e te mau tamari’i i teie pereota : « tō’u fare mo’a, ’o tā tā’u mau ta’ata e fa’auehia i te mau tau ato’a ’ia hāmani i tō’u nei i’oa mo’a » (Te Parau Ha’api’ira’a ’e te mau Parau Fafau 124:39). Vaiiho i te mau tamari’i ’ia tāpe’a i te hō’ē hōho’a nō te hō’ē hiero tahito (hi’o Buka hōho’a o te ’evanelia, no. 52 ’aore rā, i te ’api ’ohipara’a nō teie hepetoma) ’e te hō’ē hōho’a nō te hō’ē hiero i roto i tō ’outou fenua. E fa’ata’a ē ’ua fa’aue tāmau noa te Metua i te Ao ra ’e ’o Iesu Mesia i tō rāua mau ta’ata ’ia patu i te mau hiero—i te tau tahito ra ’e i tō tātou nei ’anotau. Fa’a’ite i te mau ta’o ’e te mau pereota nō roto mai i Te Parau Ha’api’ira’a ’e te mau Parau Fafau 124:28–29 nō te tauturu i te mau tamari’i ’ia māramarama nō te aha te Fatu e hina’aro ai ia tātou ’ia patu i te mau hiero.

• E ani i te mau tamari’i ’ia fa’a’ī i te ’api ’ohipara’a nō teie hepetoma nō te tauturu ia rātou ’ia ta’a ē ’o tātou te nūna’a o te Atua ’e ’ua fa’aue-tāmau noa-hia i te nūna’a o te Atua ’ia patu i te mau hiero.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 124:12–21

E ’oa’oa te Fatu ’ia ha’apa’o maita’i ana’e au.

I roto i te tuha’a 124, ’ua ha’apoupou te Fatu i te feiā mo’a e rave rahi nō tō rātou ha’apa’o maita’i. E nehenehe tāna mau parau e tauturu i te mau tamari’i ’ia ’imi i te mau maita’i ’o tā rātou e fa’ananea.

Mau ’ohipara’a e nehenehe e rave

• Mā’iti i te tahi mau maita’i i fa’ahitihia i roto i Te Parau Ha’api’ira’a ’e te mau Parau Fafau 124:12–21, ’e e pāpa’i i te reira i ni’a i te tāpura ’ere’ere ’ati a’e te hō’ē hōho’a o te Fa’aora. E ani i te mau tamari’i ’ia ’imi i te mau ’īrava 12–21, nō te ’imi mai i teie mau ta’o. Tauturu ia rātou ’ia māramarama i te mau ta’o ’aita roa paha rātou i mātau. Mai te au i teie mau ’īrava, e aha te mana’o o te Fatu nō ni’a i te mau ta’ata e fa’ananea nei i teie mau maita’i ?

Te Parau Ha’api’ira’a ’e te mau Parau Fafau 124:28–30, 38–41

’Ua fa’aue Iesu i tōna mau ta’ata ’ia patu i te mau hiero.

Fātata roa te mau tamari’i tā ’outou e ha’api’i ra e nava’i te pa’ari nō te haere i te hiero ’e nō te ’āmui atu i roto i te mau ’ōro’a hiero. E aha tā ʼoutou e nehenehe e rave nō te tauturu ia rātou ’ia fa’aineine ?

Mau ’ohipara’a e nehenehe e rave

• Tāpo’i i te hō’ē hōho’a ’aore rā hō’ē hōho’a pāpa’i o te hiero. E ani i te mau tamari’i ’ia tai’o i Te Parau Ha’api’ira’a ’e te mau Parau Fafau 124:38–41 nō te tahi mau tāpa’o nō ni’a i te hōho’a. Vaiiho i te mau tamari’i ’ia heheu mai i te hōho’a ’e e ’āparau i te mea tā teie mau ’īrava e ha’api’i nei nō ni’a i te tumu i hina’aro ai te Fatu ia tātou e patu i te mau hiero.

• E ani i te mau tamari’i ’ia tai’o i Te Parau Ha’api’ira’a ’e te mau Parau Fafau 124:28–30 nō te ’imi mai i te mau tumu te Fatu i hōro’a ai ia Iosepha Semita te patura’a i te hiero nō Nauvoo. E fa’a’ite i tō ’outou mau ’āehuehu nō ni’a i te hiero ’e te mau ’ohipa i tupu ia ’outou i te ravera’a i te mau bāpetizora’a nō te feiā pohe. Tauturu i te mau tamari’i ’ia fa’ata’a mai e aha te maorora’a e tītauhia e nava’i ai te pa’ari nō te rave i te bāpetizora’a nō te feiā pohe i roto i te hiero.

• Mai te mea e parau fa’ati’a nō te hiero tā ’outou, ’a fa’a’ite atu i te mau tamari’i, ’aore rā, e ani i te hō’ē feiā ’āpī i roto i te pāroita ’ia fa’a’ite mai i te mau tamari’i i tāna parau fa’ati’a. Parau i te mau tamari’i nō te aha e mea faufa’a te parau fa’ati’a nō te hiero ’e e aha te tītauhia ia tātou e rave nō te fāri’i i te hō’ē. E fa’aitoito ia rātou ’ia ha’amata i te fa’aineine i teienei nō te fāri’i i tā rātou iho parau fa’ati’a.

  

  Iosepha Semita i te hiero nō Nauvoo, nā Gary E. Smith

Te Parau Ha’api’ira’a ’e te mau Parau Fafau 124:91–92

E nehenehe te hō’ē ha’amaita’ira’a patereareha e hōro’a iā’u i te arata’ira’a fa’auruhia.

Mai te mea ’ua fāri’i ’outou i te hō’ē ha’amaita’ira’a patereareha, ’a hi’o fa’ahou i te reira nā mua a’e i te ha’api’ira’a i te mau tamari’i nō ni’a i teie mau ha’amaita’ira’a. Nō te aha ’outou e māuruuru ai nō tō ’outou ha’amaita’ira’a patereareha ? Nāhea ’outou i te fa’auru i te mau tamari’i ’ia fa’aineine nō te fāri’i i tō rātou ?

Mau ’ohipara’a e nehenehe e rave

• E ani i te hō’ē o te mau tamari’i ’ia tai’o i Te Parau Ha’api’ira’a ’e te mau parau fafau 124:91–92, ’e e ani i te piha ha’api’ira’a ’ia fa’aro’o e aha tā te Fatu i pi’i ia Hyrum Smith ia rave. E aha tā te mau tamari’i i ’ite nō ni’a i te ha’amaita’ira’a patereareha ? Mai te mea ’ua fāri’i ’outou i te hō’ē ha’amaita’ira’a patereareha, ’a fa’a’ite i te mau tamari’i mai te aha te huru. (E ha’amana’o ē, e mea mo’a te mau mea ta’a ’ē o tō ’outou ha’amaita’ira’a patereareha.) ’A fa’ata’a ē, te mau ha’amaita’ira’a ta’a ’ē te ha’amaita’ira’a patereareha ’o tā tātou e fāri’i mai nā roto mai i te mau patereareha. E nehenehe teie mau ha’amaita’ira’a e tauturu ia tātou ’ia ha’api’i rahi mai nō ni’a ia tātou iho, ’e e aha tā te Metua i te Ao ra e hina’aro ia tātou e rave.

• ’A feruri i te ani i te hō’ē metua ’aore rā te hō’ē taea’e ’aore rā tuahine o te hō’ē o te mau tamari’i o tā ’outou e ha’api’i ra, ’ia fa’a’ite mai i te piha ha’api’ira’a nō te aha rātou e māuruuru ai nō tō rātou ha’amaita’ira’a patereareha. E ani ia rātou ’ia fa’a’ite mai nāhea tō rātou fa’aotira’a e hina’aro rātou e fāri’i i tō rātou ha’amaita’ira’a. ’A fa’a’ite i tō ’outou ’itera’a pāpū nō te ha’amaita’ira’a patereareha.

Fa’aitoito i te ’apora’a mai i te fare

E ani i te mau tamari’i ’ia fa’a’ite i te hō’ē melo o te ’utuāfare i te hō’ē ’ohipa tā rātou i ha’api’i mai nō ni’a i te mau hiero ’e nō te aha rātou e hina’aro ai e haere i te hiero i te hō’ē mahana.

Haʼamaitaʼiraʼa i tā tātou haʼapiʼiraʼa

E nehenehe te mau tamariʼi e ʼite i te fa’aurura’a a te Vārua. Ha’api’i i te mau tamari’i ē, te mau ’āehuehu nō te hau, te here ’e te tāmāhanahana tā rātou e fāri’i, ’ia parau ana’e rātou ’aore rā, ’ia hīmene ana’e rātou nō ni’a ia Iesu Mesia ’e tāna ’evanelia, nō roto mai ïa i te Vārua Maita’i. E nehenehe teie mau ’āehuehu e patu i tō rātou ’itera’a pāpū.