Hiero nō Kirtland, nā Jon McNaughton.

27 nō Tetepa–3 nō ’Ātopa

Te Parau Ha’api’ira’a ’e te mau Parau Fafau 109–110

« ’O tō ’oe fare, ’ei vāhi nō tō ’oe mo’ara’a »

’Ei fa’ahorora’a i Te Parau Ha’api’ira’a ’e te mau Parau Fafau 109:24 – 28, ’ua parau Elder David A. Bednar, « Tē ani nei au ia ’outou ’ia tuatāpapa tāmau noa ’e ’ia feruri ma te pure i te mau hope’ara’a o teie mau pāpa’ira’a mo’a i roto i tō ’outou orara’a ’e tō ’outou ’utuāfare » (« Ma te tura i te i’oa ’e te ti’ara’a », Ensign ’aore rā Liahona, Mē 2009, 99). ’A feruri i teie anira’a ’a tuatāpapa ai ’outou.

Pāpa’i i te mau mana’o e tae mai

’Aita i mana’ohia ē e ’īriti te mau ’uputa nō te hiero nō Kirtland e tae roa atu i te hora 8:00 i te po’ipo’i nō te 27 nō Māti 1836. Terā rā, te feiā mo’a i ti’aturi e haere i te ’ōro’a ha’amo’ara’a ’ua ha’amata i te ’āna’i i te hora 7:00. I te ’ī-vave-ra’a te mau parahira’a ’e te mau aroā i te mau ta’ata i hina’aro e ha’amori, ’ua ani Iosepha Semita ’ia ha’amauhia te hō’ē fa’aroara’a. I te ’ī-hope-ra’a, ’ua fa’anahohia te piti o te tuha’a purera’a. ’E e ’ere noa te feiā ora o tei hina’aro rahi ’ia ’āmui mai. ’Ua fa’a’ite pāpū e rave rahi mau ’ite ē ’ua ’ite rātou i te mau melahi, i roto i te hiero, ’e tae noa atu i ni’a i te tāpo’i fare, i te taime ’e i muri a’e i te ha’amo’ara’a. E au rā ē, ’ua haere mai « te mau nu’u o te ra’i » e « hīmene ’e [e] pi’i » ’e te feiā mo’a i te mau mahana hope’a nei (« Auē te Vārua o te Atua », Te mau Hīmene, no. 2).

Nō te aha te ’ārepurepura’a rahi—i nā pae e piti o te pāruru ? Te parau fafau ē ’ei reira te feiā mo’a « e noa’a ai i te mana nō ni’a mai ra », ’o te tumu hō’ē ïa i ha’aputuputu ai rātou i Ohio i te parahira’a mātāmua (Te Parau Ha’api’ira’a ’e te mau Parau Fafau 38:32). ’E ’ua fafauhia i te mau mea rahi a’e nō te ’ananahi. « Teie ïa », ’ua parau te Fatu, « ’o te ha’amatara’a o te mau ha’amaita’ira’a ’o te nini’ihia i ni’a i te upo’o o tā’u mau ta’ata » (Te Parau Ha’api’ira’a ’e te mau Parau Fafau 110:10). Te tau e orahia nei e tātou—’e te tupu vitivitira’a te ’ohipa hiero ’e te mau ’ōro’a e vai ra nō nā mirioni feiā ora ’e tei pohe—’ua ha’amata ïa i Kirtland, « te pāruru i ni’a i te fenua nei [’ua] ha’amata i te mahae » (« Auē te Vārua o te Atua »).

Hi’o ato’a Feiā mo’a, 1:232–41 ; « Hō’ē fare nō tō tātou Atua », Te mau heheura’a i roto i taua taime ra, 169–72.

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau 109

Tē hina’aro nei te Fatu e ha’amaita’i mai iā’u i roto i tōna fare mo’a.

I roto i te tahi mau hi’ora’a, e mea ta’a ’ē te hiero nō Kirtland i te mau hiero tā tātou e ’ite nei i teie mahana. ’Aita e fata ’e ’aita e vāhi bāpetizora’a, ’e te mau ’ōro’a mai te bāpētizora’a nō te feiā i pohe ’e te tā’atira’a ’aita ā i fa’aho’ihia mai. Terā rā, te mau ha’amaita’ira’a i parauhia i roto i te tuha’a 109, te pure ha’amo’ara’a nō te hiero nō Kirtland, ’o te mau ha’amaita’ira’a ïa tā tātou e fāri’i nei i roto i te fare o te Fatu i teie mahana. ’A hi’o fa’ahou i te mau ’īrava i muri nei nō te ’ite mai i te tahi o teie mau ha’amaita’ira’a. ’A tai’o ai ’outou nō ni’a i te reira, ’a feruri nō te aha e mea faufa’a te reira nō ’outou ’e nō tō ’outou ’utuāfare.

Mau ’īrava 5, 12–13 (hi’o ato’a Te Parau Ha’api’ira’a ’e te mau Parau Fafau 110:6–8) : I roto i te hiero e nehenehe te Fatu e fa’a’ite mai iāna iho ia tātou, ’e e nehenehe tātou e fāri’i i tōna mana.

Mau ’īrava 9, 17–19, 26, 78–79 : I roto i te hiero e rave tātou i te i’oa o te Fatu i ni’a ia tātou iho.

Mau ’īrava 22–23 : ’A rave ’e ’a fa’atura ai tātou i te mau fafaura’a o te hiero, e hōro’a mai te Fatu ia tātou i te mana nō te rave i tāna ’ohipa.

Mau ’īrava 24– 3 : Mai te mea e haere tātou i te hiero ma te ti’amā, e nehenehe tātou e fāri’i i te pārurura’a a te Fatu.

Te tahi atu mau ha’amaita’ira’a :

E aha tā te Vārua e fa’auru ia ’oe ’ia rave nō te fāri’i i teie mau ha’amaita’ira’a ?

Te Parau Ha’api’ira’a ’e te mau Parau Fafau 109

E nehenehe te pure ha’amo’ara’a o te hiero nō Kirtland e ha’api’i iā’u nō ni’a i te pure.

Tuha’a 109 o te pure ha’amo’ara’a tei hōro’ahia ia Iosepha Semita nā roto i te heheura’a (hi’o i te upo’o parau o te tuha’a). E aha tā ’oe e ha’api’i mai nei nō ni’a i te pure i roto i teie tuha’a ? ’Ia tai’o ’oe i te reira, e mana’o paha ’oe i tā ’oe iho mau pure. E aha te mau mana’o tā ’oe e fāri’i o te nehenehe e tauturu ia ’oe ’ia ha’amaita’i i tā ’oe ’āparaura’a i te Metua i te Ao ra ? ’Ei hi’ora’a, e aha tā te peropheta i pure i roto i teie pure ?

Te Parau Ha’api’ira’a ʼe te mau Parau Fafau 110:1–10

E nehenehe te Fatu e fa’a’ite mai iāna iho iā’u i roto i te hiero.

E aha tō ’oe mana’o nō ni’a i te Fa’aora i muri a’e i te tai’ora’a i Te Parau Ha’api’ira’a ’e te mau Parau Fafau 110:1–10 ? Nāhea tāna fa’a’itera’a mai iāna iho ia ’oe i roto i te hiero ? E mea nāhea ’ōna i te tauturu ia ’oe ’ia ’ite ē, tē fāri’i nei ’oia i tā ’oe mau tauto’ora’a ’e mau fa’atūsiara’a ?

Te hope’ara’a tāta’itahi o te hiero nō Kirtland, tē vai ra te mau terono nō te feiā fa’atere o te autahu’ara’a.

Te Parau Ha’api’ira’a ʼe te mau Parau Fafau 110:14–16

Te mau tāviri o te autahu’ara’a e hina’arohia nō te rave i te ’ohipa a te Atua tei roto ïa i te ’Ēkālesia i teie mahana.

Nō te ta’a maita’i i te mau tāviri nō te autahu’ara’a o tā Mose, Elia, ’e Eliaha i hōro’a ia Iosepha Semita ’e ia Oliver Cowdery i roto i te hiero nō Kirtland, e ti’a ia ’oe e tai’o i te parau poro’i a Elder Quentin L. Cook « ’Ia fa’aineine nō te fārerei i te Atua » (Ensign ’aore rā Liahona, Mē 2018, 114–17). ’Ua fa’a’ite mai Elder Cook nāhea teie mau tāviri e tū’ati ai i te ’ohipa a te ’Ēkālesia i teie mahana. E nehenehe ato’a ’oe e feruri i te ha’api’ira’a mai nō ni’a i teie mau peropheta tahito nā roto i te tuatāpapara’a ia « Mose », « Elia », ’e « Eliaha » i roto i te Arata’i nō te mau pāpa’ira’a mo’a (scriptures.ChurchofJesusChrist.org). ’A feruri e aha te ti’a ia ’oe e rave nō te tauturu i roto i te ’ohipa e tū’ati i teie mau tāviri.

Hi’o ato’a « Te mau tāviri o te autahu’ara’a », Mau Māite i te Fa’aro’o, 126–27 ; Henry B. Eyring, « E haere ’oia i mua ia tātou », Ensign ’aore rā Liahona, Mē 2020, 66–69.

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Te Parau Ha’api’ira’a ’e te mau Parau Fafau 109’Ei ’utuāfare, ’a ’imi i te tahi mau ’īrava i roto i te tuha’a 109 e fa’auru ia ’outou ’ia fa’arahi i te taime i roto i te hiero (’ei hi’ora’a, hi’o te mau ’īrava tei tāpurahia i raro a’e i te « Mau mana’o nō te tuatāpapara’a pāpa’ira’a mo’a a te ta’ata hō’ē »). Paraparau nāhea ’outou e nehenehe ai e rave i te mea tā te peresideni Russell M. Nelson e ani mai : « ’A ’imi i te hō’ē rāve’a nō te haere e fārerei tāmau i te Fatu—’ia vai i roto i tōna fare mo’a—i muri iho, e ha’apa’o i terā fārereira’a tāmau ma te hapa ’ore ’e te ’oa’oa » (« Rirora’a ’ei feiā mo’a i te mau mahana hope’a nei hi’ora’a maita’i », Ensign ’aore rā Liahona, Novema 2018, 114). Mai te mea ’aita ā ’outou ’aore rā, tō ’outou ’utuāfare i haere atu ra i te hiero, e nehenehe tā ’outou e māta’ita’i temples.ChurchofJesusChrist.org nō te tauturu i te fa’aineine ia ’outou iho nō te haere.

Te Parau Ha’api’ira’a ’e te mau Parau Fafau 109:78–80.’Ua pāpa’ihia te hīmene ra « Auē te Vārua o te Atua » (Te mau Hīmene, no. 2) nō te ha’amo’ara’a o te hiero nō Kirtland—’e i reira ’ua hīmenehia i te mau ’ōro’a ha’amo’ara’a nō te mau hiero ato’a mai te reira taime. E nehenehe ’outou e hīmene ’āmui i teie hīmene ’e e ’imi i te mau pereota ’o tē fa’arahi i tō ’outou māuruuru nō te mau hiero i te mau mahana hope’a nei. Nāhea teie hīmene e tū’ati ai i te parau poro’i o Te Parau Ha’api’ira’a ’e te mau Parau Fafau 109:78–80 ?

E nehehene ’outou e ’ite i te pure ha’amo’ara’a nō te hiero piri a’e ia ’outou i te temples.ChurchofJesusChrist.org.

Te Parau Ha’api’ira’a ’e te mau Parau Fafau 110’A tai’o ai te mau melo o tō ’outou ’utuāfare i te tuha’a 110 ’e ’a hi’o ai i te hōho’a i te pae hope’a o teie buka iti, e ani ia rātou ’ia feruri e aha tō rātou ferurira’a ’āhiri ē, tei pīha’i iho rātou ia Iosepha Semita ’e Oliver Cowdery i roto i te hiero nō Kirtland. ’A hōro’a i tō ’outou ’utuāfare i te hō’ē rāve’a nō te fa’a’ite mai e aha tō rātou mana’o nō ni’a i te Fa’aora.

Te Parau Ha’api’ira’a ’e te mau Parau Fafau 110:15.E aha tē tauturu i te « fāriura’a i te ’ā’au » o tā ’outou mau tamari’i i tō rātou mau tupuna ? E nehenehe ’outou e ’ite mai i te tahi mau mana’o ’ārearea i te FamilySearch.org/discovery. E nehenehe ’outou e ’ohipa āmui nō te ’ite mai i te mau tupuna e hina’aro nei i te mau ’ōro’a hiero ’e e fa’anaho nō te rave i terā mau ’ōro’a i te hiero. E nehenehe ato’a ’outou e paraparau nō ni’a nāhea te ’ohipa tei fa’aho’i-fa’ahou-hia mai e Elia i roto i te hiero nō Kirtland i te fa’arahi i tō ’outou here nō tō ’outou hui tupuna.

Nō te mau mana’o hau atu nō te ha’api’ira’a i te mau tamari’i, hi’o te arata’i nō teie hepetoma i roto Mai, pe’e mai—nō te Paraimere.

Te hīmene i mana’ohia : « Auē te Vārua o te Atua », Te mau Hīmene, no. 2.

Mau reo nō te fa’aho’i-fa’ahou-ra’a mai

Te mau fa’a’itera’a pae vārua ’e te hiero nō Kirtland

Mai te hō’ē auahi ura ra, nā Glen S. Hopkinson

E ’ite mai ’outou i raro nei te mau parau a te feiā mo’a i te mau mahana hope’a nei tei vai na i roto i te hiero nō Kirtland i te taime o tōna ha’amo’ara’a, ’e i roto i te tahi atu mau purera’a i muri mai. E rave rahi tei fa’aau i tō rātou mau ’itera’a i tei orahia e te feiā mo’a i tahito ra ’a « fa’a’ahuhia ai rātou i te mana nō ni’a mai ra » i te mahana nō te Penetekote (Luka 24:49 ; hi’o ato’a Te ’Ohipa 2:1–4 ; Te Parau Ha’api’ira’a ’e te mau Parau Fafau 109:36–37).

Eliza R. Snow

« E nehenehe te mau ’ōro’a nō taua ha’amo’ara’a ra ’ia fa’ahiti-fa’ahou-hia, terā rā, ’aore roa e reo tāhuti e nehenehe e fa’ata’a i te mau fa’a’itera’a o te ra’i nō taua mahana fa’ahiahia ra. ʼUa fā mai te mau melahi i te tahi mau ta’ata, ʼua ʼite rā te tāʼātoʼaraʼa ʼo tei tae mai i te vārua hanahana, ʼe ʼua ’ī te ʼāʼau tātaʼitahi i te ‘ʼoaʼoa fāito ʼore ʼe te hanahana’ ».¹

Sylvia Cutler Webb

« Te hō’ē o tā’u mau ha’amana’ora’a mātāmua o te ha’amo’ara’a o te hiero. ’Ua rave mai tō mātou metua tāne ia mātou i ni’a i tōna turi ’e ’ua parau mai ia mātou nō te aha mātou e haere ai ’e e aha te aura’a nō te ha’amo’ara’a i te hō’ē fare o te Atua. ’E noa atu ē e mea ’āpī roa vau i terā taime, tē ha’amana’o maita’i ra vau i te taime. E nehenehe au e hi’o i muri i roto i te mau terera’a o te mau matahiti ’e ’ia hi’o mai tā’u i hi’o ia Iosepha te peropheta, e ti’a ra ma tōna nā rima e toro ra i te ra’i, tōna hōho’a mata mahe’a, te roimata e tahe ra i ni’a i tōna pāpāri’a ’a paraparau ai ’oia i taua mahana fa’ahiahia ra. Fātata e au ra ’ua tahe te roimata o te tā’āto’ara’a. ’Ua ’ī roa te fare ’e ’ua pārahi te rahira’a o te mau tamari’i i ni’a i te turi o te mau ta’ata pa’ari a’e ; ’ua pārahi tō’u tuahine i ni’a i tō tō’u metua tāne, ’o vau i ni’a i te turi o tō’u metua vahine. Tē ha’amana’o ato’a nei au i te mau ’ahu tā mātou i ’ō’omo. ’Ua ’āpī roa tō’u ferurira’a i taua taime ra nō te haru-hope-ra’a mai i te aura’a o te reira, terā rā, i te roara’a o te tau, ’ua ho’i hau noa mai te reira iā’u, ’e tē māuruuru nei au, ’ua fāna’o vau i te reira.« ²

Oliver Cowdery

« I te pō, ’ua fārerei au i te feiā fa’atere o te ’Ēkālesia i roto i te fare o te Fatu. ’Ua nini’ihia mai te Vārua—’ua ’ite au i te hanahana o te Atua, mai te hō’ē ata rahi, tei pou mai ’e tei fa’aea i ni’a iho i te fare, ’e ’ua fa’a’ī i te reira mai te hō’ē mata’i pūai i te nu’ura’a. ’Ua ’ite ato’a vau e rave rahi mau reo i te tahera’a, mai te auahi, i vai i ni’a i e rave rahi ta’ata…’a parau ai rātou i te tahi mau reo ’e ’a tohu ai ».³

Benjamin Brown

« [’Ua] ’itehia te mau ’ōrama e rave rahi. ’Ua ’itehia te hō’ē tūru’a ’aore rā te hō’ē ata i te vaira’a i ni’a i te fare, ’ana’ana mai te mahana e hiti ra i ni’a i te ata mai te ’auro. ’Ua ’ite-ato’a-hia e piti e toru ta’ata e fa’atahataha ra nā roto i te piha ’e te mau tāviri ’ana’ana i roto i tō rātou rima, ’e te hō’ē ato’a fifi ’ana’ana i roto i tō rātou rima ».⁴

Orson Pratt

« Tei reira te Atua, tei reira tāna mau melahi, te Vārua Maita’i ra tei rotopū i te mau ta’ata… ’e ’ua fa’a’īhia rātou i te torōna mai ni’a mai i tō rātou upo’o ’e tae roa atu i tō rātou ’āvae ma te pūai ’e te fa’aurura’a a te Vārua Maita’i ».⁵

Nancy Naomi Alexander Tracy

« [I] te otira’a ’e te ha’amo’ara’ahia te hiero… ’ua riro te reira ’ei nā mahana e piti ’oa’oa roa a’e o tō’u orara’a. Te hīmene tano maita’i o tei pāpa’ihia nō te reira taime ’o ‘te Vārua o te Atua mai te hō’ē auahi e ’amā ra’. E parau mau ē ’ua vai te fa’aurura’a a te ra’i i ni’a i taua fare ra… ’Ua ’ite au ē, ’o te ra’i i ni’a i te fenua nei ».⁶

Fa’ata’ara’a

1. I roto Edward W. Tullidge, Te mau vahine mōmoni (1877), 412.

2. I roto Karl Ricks Anderson, Kirtland nā Iosepha Semita : Te mau ’ā’amu a te ’ite (1996), 182–83.

3. Te buka ’ā’amu o Oliver Cowdery, 27 nō Māti 1836, Fare vaira’a buka ’ā’amu a te ’Ēkālesia, Roto Miti.

4. Rata nā Benjamin Brown i tāna vahine, ’o Sarah, circa nō ’Ēperēra 1836, Benjamin Brown ha’aputura’a ’utuāfare, Fare vaira’a buka ’ā’amu a te ’Ēkālesia, Roto Miti ; tomara’a ’e reta rarahi fa’a’āpīhia te pāpa’ira’a.

5. Orson Pratt, « Mau mana’o », Deseret News, 12 nō Tēnuare 1876, 788.

6. I roto i te Richard E. Turley Tamāiti. ’e te Brittany A. Chapman, eds., Te mau vahine fa’aro’o i roto i te mau mahana hope’a nei (2011), 1:442.

’Ua fā mai Mose, Elia, ’e Eliaha i roto i te hiero nō Kirtland, nā Gary E. Semita