mahana e hiti ra nā roto i te mau ata

20–26 nō Tetepa

Te Parau Ha’api’ira’a ’e te mau Parau Fafau 106–108

« ’Ia ’īritihia te ra’i »

’Ua ha’api’i Elder Ulisses Soares e, « e ti’a ia tātou ’ia auraro i [te Fa’aora], nā roto i te utuhira’a ia tātou iho i roto i te mau pāpa’ira’a mo’a, ma te ’oa’oa i roto ia rātou, ’ia ’apo mai i tāna ha’api’ira’a tumu, ’e ma te tūtava ’ia ora i te huru o tōna orara’a » (« Nāhea e ti’a ai iā’u ’ia māramarama ? » Ensign ʼaore rā Liahona, Mē 2019, 7). ’A utuhi ai ’outou ia ’outou iho i roto i Te Parau Ha’api’ira’a ’e te mau Parau Fafau 106–8, ’a pāpa’i te mau rāve’a e nehenehe ’outou e tūtava nō te ora i te mau parau mau e ’itehia ia ’outou.

Pāpa’i i te mau mana’o e tae mai

I te hi’ora’a mātāmua, Te Parau Ha’api’ira’a ’e te mau Parau Fafau 107 e au ra nō ni’a i te fa’anahora’a i te mau tōro’a o te autahu’ara’a i roto i te hō’ē fa’anahora’a nā te feiā fa’atere nō te ’Ēkālesia a te Fatu. ’Oia mau, i te taime ’a nene’ihia ai teie heheura’a, ’ua hau a’ena te rirora’a ’ei melo nō te ’Ēkālesia i te rahira’a o te tahi feiā fa’atere e vai ra i reira. Nō reira, e mea faufa’a roa ’e e mea pāpū, ’ua tītauhia ’ia fa’ata’a maita’i roa i te mau ti’ara’a ’e te mau hōpoi’a a te Peresidenira’a Mātāmua, te pupu nō te Tino ’Ahuru ma piti, te Hitu ’Ahuru, te mau ’episekōpo, ’e te mau peresidenira’a pupu autahu’ara’a. Terā rā, ’ua rahi atu ā te mau ha’api’ira’a hanahana i roto i te tuha’a 107 i te nāhea noa ’ia fa’anaho i te mau tōro’a ’e te mau pupu autahu’ara’a. I’ō nei e ha’api’i te Fatu ia tātou nō ni’a i te hō’ē fa’anahora’a tahito o te autahu’ara’a o tei « ha’amauhia i te tau o Adamu » (’īrava 41). ’Ua riro tāna fā i te ha’amatara’a nō te fa’atupu i te reira nō te mau tamari’i a te Atua—mai ia ’outou—’ia fāri’i i te mau ’ōro’a fa’aorara’a o te ’evanelia, ’e ’ia ’oa’oa i te « mau ha’amaita’ira’a pae vārua ato’a o te ’Ēkālesia—’ia fāri’i i te ha’amaita’ira’a nō te fāri’ira’a i te mau parau aro nō te bāsileia o te ra’i ra [’e] ’ia ’īritihia te ra’i ia rātou » (mau ’īrava 18–19).

Hi’o « Te fa’aho’i-fa’ahou-ra’a mai i te fa’anahora’a tahito », Te mau heheura’a i roto i te hi’ora’a, 208–12.

ītona tuatāpapara’a a te ta’ata hō’ē

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau; 108

’Ua ha’api’i te Fatu, ’ua fa’aitoito, ’e ’ua turu i te feiā tāna i pi’i nō te tāvini.

I roto i Te Parau Ha’api’ira’a ’e te mau Parau Fafau 106 ’e 108, ’ua hōro’a te Fatu i te parau a’o ’e te mau parau fafau i ’ē piti o te mau melo tei pi’ihia nō te tāvini i roto i te ’Ēkālesia. E aha te mau pereota i roto i teie mau heheura’a e hōro’a nei i te fa’aitoitora’a ’e te mau mana’o nō ni’a i tā ’oe iho tāvinira’a i roto i te bāsileia o te Atua ? Teie e piti uira’a nō te feruri :

• Nāhea tō ’oe fāri’ira’a i « te aroha ’e te ha’apāpūra’a » nō te « ti’a » ? (Te Parau Ha’api’ira’a ’e te mau Parau Fafau 106:8).

• Nāhea e ti’a ai ia ’oe « ’ia ara maita’i roa i roto i te ha’apa’ora’a i tā ’oe mau euhe » ’aore rā, tā ’oe mau parau fafau ? (Te Parau Ha’api’ira’a ’e te mau Parau Fafau 108:3).

E aha te tahi atu mau fa’ahitira’a parau nō roto mai i te mau tuha’a 106 ’e 108 e mea faufa’a nō ’oe ?

Hi’o ato’a Russell M. Nelson, « Utuutu ma te pūai ’e te mana o te Atua », Ensign ’aore rā Liahona, Mē 2018, 68–75 ; « Warren Cowdery », Te mau heheura’a i roto i taua taime ra, 219–23 ; « ‘Tei fa’atupuhia i ni’a i te’imira’a i te hō’ē heheura’a », Te mau heheura’a i roto i taua taime ra, 224–28.

Te Parau Ha’api’ira’a e te mau Parau Fafau 107

E arata’i te Fatu i tāna ’Ēkālesia nā roto i te mana o te autahu’ara’a.

Mai tā ’oe i tuatāpapa i te fa’aho’i-fa’ahou-ra’a-hia mai te ’evanelia, ’ua ’ite paha ’oe ē, ’aita te Fatu e fa’ata’a roa i te tā’āto’ara’a o te hō’ē ha’api’ira’a tumu i roto i te hō’ē noa heheura’a. Terā rā, e heheu mai ’oia i te mau mea « rēni i ni’a i te rēni » (Te Parau Ha’api’ira’a ’e te mau Parau Fafau 98:12) ’ia tītauhia te reira. Noa atu ē, ’ua hōro’a a’ena te Fatu i te arata’ira’a nō ni’a i te autahu’ara’a i te ’ōmuara’a o te matahiti 1829 (hi’o, ’ei hi’ora’a, mau tuha’a 20 ’e 84), ’ua hōro’a mai ’oia i te arata’ira’a hau atu i te feiā mo’a i te matahiti 1835 nō ni’a i te mau tōro’a ta’a ’ē o te autahu’ara’a e hina’arohia nō te fa’atere ’e nō te arata’i i tāna nana rahi.

’A tai’o ai ’outou nō ni’a i te mau tōro’a o te autahu’ara’a i muri nei, ’a feruri nāhea ’oe e nehenehe ai e turu i te feiā e tāvini nei i roto i teie mau pi’ira’a nā roto i tō ’oe « ti’aturira’a, te fa’aro’o ’e te [mau] pure » (Te Parau Ha’api’ira’a ’e te mau Parau Fafau 107:22).

• Te Peresidenira’a Mātāmua ’e te peresideni o te ’Ēkālesia (mau ’īrava 9, 21–22, 65–66, 91–92.)

• Te Tino ’Ahuru ma Piti ’Āpōsetolo(mau ’īrava 23–24, 33–35, 38, 58)

• Te Hitu ’Ahuru (mau ’īrava 25–26, 34, 93–97)

• Te mau ’episekōpo (mau ’īrava 13–17, 68–76, 87–88)

Te Parau Ha’api’ira’a ’e te mau Parau Fafau 107:1–20

E hōro’a mai te mau ’ōro’a o te autahu’ara’a i te mau ha’amaita’ira’a pae vārua ’e pae tino i te tā’āto’ara’a o te mau tamari’i a te Metua i te Ao ra.

’Ua ha’api’i Elder Neil L. Andersen : « Te autahu’ara’a, o te mana ïa ’e te ha’amanara’a tā te Atua i hōro‘a mai nō te fa’aora ’e nō te ha’amaita’i i te tā’āto’ara’a—te mau tāne, te mau vahine ’e te mau tamari’i. Mai te mea e mea ti’amā tātou, e ha’afaufa’a te mau ’ōro’a o te autahu’ara’a i tō tātou orara’a i ni’a i te fenua nei ’e e fa’aineine ia tātou nō te mau parau fafau hanahana o te ao nō muri iho »(« Te mana i roto i te autahu’ara’a », Ensign ’aore rā Liahona, Novema 2013, 92). ’A tai’o ai ’outou Te Parau Ha’api’ira’a ’e te mau Parau Fafau 107:1–20 (hi’o ta’a ’ē i te mau ’īrava 18–20) ’e te toe’a o te parau poro’i a Elder Andersen, ’a feruri e pāpa’i i te mau mana’o tā ’oe i fāri’i e nāhea te mana o te Atua i te ha’afaufa’a i tō ’oe orara’a i ni’a i te fenua nei ’e e fa’aineine ia ’oe nō te tau a muri atu. E aha tā ’oe e rave nō te fāri’i hope roa—’e ’ia tauturu ia vētahi ’ē ’ia fāri’i—i taua mau ha’amaita’ira’a ra ?

Hi’o ato’a Te Parau Ha’api’ira’a ’e te mau Parau Fafau 84:19–27 ; Dallin H. Oaks, « Te autahu’ara’a a Melehizedeka ’e te mau tāviri », Ensign ’aore rā Liahona, Mē 2020, 69–72.

Te Parau Ha’api’ira’a ’e te mau Parau Fafau 107:41–57

E ha’amaita’i te autahu’ara’a i te mau ’utuāfare.

’Ua hina’aro o Adamu i tōna hua’ai ’ia ha’amaita’ihia nā roto i te autahu’ara’a. E aha te mau fafaura’a tāna i fāri’i ? (hi’o mau ’īrava 42, 55). ’A tai’o ai ’outou nō ni’a i te mea tā Adamu i rave, ’a feruri i tō ’oe iho mau hina’aro nō tō ’oe ’utuāfare ’ia ’oa’oa i te mau ha’amaitaira’a o te autahu’ara’a. E aha tei fa’auruhia ia ’outou ’ia rave nō te tauturu i tō ’outou ’utuāfare ’ia fāri’i i teie mau ha’amaita’ira’a ?

Tē ha’amaita’i nei Adamu i tōna hua’ai

Te haamaita’i nei Adamu i tō’na hua’ai, nā Clark Kelley Price

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Te Parau Ha’api’ira’a ’e te mau Parau Fafau 106:6.E aha tā tō tātou ’utuāfare e nehenehe e rave nō te fa’atupu i te « ’oa’oa i te ra’i ra » ?

Te Parau Ha’api’ira’a e te mau Parau Fafau 107:22.E aha tā tātou e rave nō te turu i tō tātou feiā fa’atere « nā roto i… te ti’aturira’a, te fa’aro’o ’e te pure » ?

Te Parau Ha’api’ira’a ’e te mau Parau Fafau 107:27-31, 85Te mau parau tumu ’o te arata’i i te mau ’āpo’ora’a a te ’Ēkālesia e nehenehe ato’a e tauturu ia tātou ’ia ruru ’āmui ’ei ’utuāfare. E aha te mau parau tumu i roto i teie mau ’īrava tā tātou e nehenehe e fa’a’ohipa nō tā tātou mau ’āpo’ora’a ’utuāfare ? (Hi’o M. Russell Ballard, « Te mau ’āpo’ora’a ’utuāfare », Ensign ’aore rā Liahona, Mē 2016, 63 – 65).

Te Parau Ha’api’ira’a ’e te mau Parau Fafau 107:99–100E hōro’a i te hō’ē melo o te ’utuāfare te mau arata’ira’a i pāpa’ihia nō te hō’ē ’ohipa e rave nō te ’utuāfare, ’e e ani manihini iāna ’ia mā’iti e nāhea ’ia rave i te ’ohipa : ma te itoito, ma te fa’atau, ’aore rā, ma te ’ore e tai’o i te mau arata’ira’a. E vaiiho i te toe’a o te ’utuāfare ’ia hi’o iāna ’ia rave i te ’ohipa ’e ’a feruri e aha te ha’afātatara’a tā te melo o te ’utuāfare e mā’iti. I muri iho e vaiiho i te tahi atu mau melo o te ’utuāfare ’ia rave i te reira. Nō te aha te Fatu e hina’aro ai ia tātou ’ia ha’api’i mai i tā tātou mau hōpoi’a ’e e rave i te reira ma te itoito ato’a ? (Hi’o Becky Craven, « Ara ’eiaha e nevaneva », Ensign ’aore rā Liahona, Mē 2019, 9–11.)

Te Parau Ha’api’ira’a ’e te mau Parau Fafau 108:7.Nāhea tātou i te ha’apūai i te tahi ’e te tahi i roto i tā tātou mau ’āparaura’a ? i roto i tā tātou mau pure ? i roto i tā tātou mau parau a’o, ’aore rā fa’aitoitora’a ? i roto i te mau mea ato’a tā tātou e rave ra ? E nehenehe ’outou e mā’iti hō’ē o teie nō te ’ohipa ’ei ’utuāfare.

Nō te mau mana’o hau atu nō te ha’api’ira’a i te mau tamari’i, hi’o te arata’i nō teie hepetoma i roto Mai, pe’e mai—nō te Paraimere

Hīmene tei mana’ohia : « Mai fa’aro’o i te reo o te peropheta », Te mau Hīmene, no.°11.

Ha’amaita’i i tā ’oe iho tuatāpapara’a pāpa’ira’a mo’a

Tāpa’o i te mau mana’o e tae mai. ’Ia tae mai te mau mana’o o te ’ā’au ’e te mau feruri ia ’outou, e tāpa’o i te reira. ’A nā reira ai ’outou, tē fa’a’ite ra ’outou i te Fatu ē, tē ha’afaufa’a ra ’outou i tāna arata’ira’a. (Hi’o Ha’api’ira’a mai tā te Fa’aora, 12, 30.)

Tē ha’amaita’i nei Melehizedeka ia Aberahama

Tē ha’amaita’i nei Melehizedeka ia Aberahama, nā Walter Rane.