To Outou E‘a no te Haere i te Hiero
Na te mau tamarii
Ua ite anei outou e, tei hea te hiero fatata roa a‘e ia outou ? A papa‘i i te hoê hoho‘a no taua hiero ra, e a faatautau i te reira i te hoê vahi e nehenehe outou e ite ia’na i te mau mahana atoa.
Te hiero o te fare ïa o te Fatu. E vahi ïa i reira tatou e haapii mai ai no ni‘a i te Metua i te Ao ra, i reira e rave ai i te mau fafauraa (e aore râ, euferaa) i mua Ia’na, e i reira e farii ai i te mau haamaitairaa rarahi. I roto i te hiero, e rave tatou i te ohipa faufaa roa no tatou iho e no te mau melo o te utuafare tei pohe. Te ohipa e ravehia i roto i te hiero o te mau bapetizoraa ïa no tei pohe, te mau oro‘a hiero e te mau taatiraa. E parauhia teie mau mea e, te mau oro‘a o te hiero.
Eaha te Tupu i roto i te Hiero
Te Bapetizoraa no te Tei Pohe
I te va‘u o to outou matahiti, e bapetizohia outou e e haamauhia ei melo no te Ekalesia a Iesu Mesia i te Feia Mo‘a i te mau Mahana Hopea nei. E rave rahi o to outou mau tupuna tei pohe ma te ore i bapetizohia e i haamauhia. Noa’tu e ua pohe to ratou tino, te ora noa nei to ratou mau varua i roto i te ao varua, i reira ho‘i e ti‘a ai ia haapiihia ratou i te evanelia a Iesu Mesia.
I te 12 o to outou matahiti, e nehenehe ta outou e haere i te hiero e ia tauturu i teie mau taata na roto i te bapetizoraa e te haamauraa ia outou i roto i to ratou ra i‘oa. I muri iho e nehenehe ta ratou e ma‘iti e farii anei ratou e aore râ, aita, i te bapetizoraa e te haamauraa. E oomo outou paatoa i te ahu uouo ia bapetizo-ana‘e-hia outou no tei pohe, mai ta outou e na reira ia bapetizohia outou no outou iho.
A ani i to outou na metua ia tauturu ia outou ia hamani i te hoê tapura no te mau melo o te utuafare tei pohe ma te ore e bapetizohia i roto i te Ekalesia a Iesu Mesia i te Feia Mo‘a i te mau Mahana Hopea nei. A imi ua haere anei te hoê taata i te hiero no te bapetizo ia’na no ratou.
Te Oro‘a Hiero
Te hoê o te mau haamaitairaa rahi o te hiero o te oro‘a hiero ïa. Te auraa no te parau ra Oro‘a hiero e « horo‘a » ïa. Ia farii ana‘e outou i to outou oro‘a hiero, e haapii mai outou i te tahi atu mau mea no ni‘a i te faanahoraa no te faaoraraa e e rave outou i te mau fafauraa i mua i te Metua i te Ao ra. Mai te mea e, e haapa‘o outou i te reira mau fafauraa, te faaineine ra ïa outou ia outou no te ora i piha‘i iho i te Metua i te Ao ra e ia Iesu Mesia ia tae i te hoê mahana.
I roto i te hiero te vai ra hoê piha nehenehe e te hau tei parauhia te piha tiretiera. I roto i te piha tiretiera e fatata roa tatou i te Metua i te Ao ra e ia Iesu Mesia, e e ite tatou i te tahi tuhaa iti o te huru o te oraraa i piha‘i iho ia Raua i roto i te basileia tiretiera.
Te mau Taatiraa no teie Tau e no te taua e amuri Atu
Ia faaipoipo-ana‘e-hia te hoê tane e te hoê vahine i roto i te hiero, e tuturi raua i mua i te fata e e taatihia raua no teie tau e no te tau amuri atu. Te auraa ra, e nehenehe raua e ta raua mau tamarii e amu-itahi-hia ei utuafare mure ore. A faanaho ia faaipoipohia i roto i te hiero i te hoê mahana. Teie te haamaitairaa rahi a‘e o te hiero.
Te Parau Faati‘a o te Hiero
E vahi mo‘a te hiero. E haapapû te mau episekopo e te mau peresideni amaa e, ua ineine maitai e ua ti‘amâ ho‘i te feia e tomo i roto i te hiero. Hou a haere ai outou i te hiero, e farii outou i te hoê uiuiraa taa‘e i mua i to outou episekopo e aore râ, te peresideni amaa. E ui oia ia outou e, te vai ra anei to outou iteraa papû no ni‘a i te Ekalesia, te haapa‘o ra anei outou i te mau faaueraa, te paturu ra anei outou i te feia faatere, te haapa‘o ra anei outou i te Parau Paari, te aufau ra anei i te tuhaa ahuru, e e mea parau ti‘a anei outou i roto i te mau mea atoa ta outou e rave nei e e parau nei. E tauturu oia ia outou ia ite i te ohipa ta outou e rave ia ti‘amâ outou no te tomo i roto i te hiero.
Faaineine i Teie nei no te Tomo i roto i te Hiero
E horo‘a mai te Metua i te Ao ra e rave rahi mau haamaitairaa i te feia e ora ma te parau ti‘a e o te haere i te hiero. E mea faufaa ia faaineine ia outou no te tomo i roto i te hiero a vai apî noa ai outou.
Ua here te Metua i te Ao ra ia outou e te hinaaro nei Oia ia farii outou i te mau haamaitairaa no te hiero. E haamaitai Oia ia outou no te raveraa i te mau oro‘a o te hiero no outou iho e no vetahi ê. Noa’tu e, aita e ti‘a ia outou ia tomo i roto i te hiero i teie nei, mai te mea e, te vai ra hoê hiero fatata mai, e nehenehe ta outou e haere e mata‘ita‘i i te aua hiero e ia farii i te varua e vai ra i reira. E nehenehe atoa ta outou e tamau i te hoê hoho‘a o te hiero i roto i to outou fare no te faahaamana‘o ia outou i te faufaa o te hiero. A ora ma te parau ti‘a ia ti‘a ia outou ia ti‘amâ no te tomo i roto i te fare o te Fatu.
A hi‘o i te hi‘o i roto i teie hoho‘a. Te vai ra te tahi mau piha taatiraa e hi‘o to roto mai to teie. Na roto i te mau taatiraa i roto i te hiero, e nehenehe to tatou mau utuafare e vai e amuri noa’tu, mai te au i te hiparaa o teie hi‘o.
A hi‘o i te piha tiretiera i roto i teie hoho‘a e i roto i te hoho‘a i te api 64. Eaha te mana‘o i roto ia outou ia ite ana‘e outou i te hoê piha tiretiera ?
Hiero no Boston Massachusetts. Haamo‘ahia i te 1 no atopa 2000.
Piha Taatiraa, Hiero no Aba Nigeria
Piha Tiretiera, Hiero no Nuku‘alofa Tonga