Aita e Hoo to to Maua Faaipoiporaa Hiero
Haere roa e i muri a‘e i te toparaa ta‘u ohipa matamua e te paapaaraa ta‘u ohipa piti, i reira to‘u feruriraa e, e ti‘a anei ia‘u ia arata‘i i ta‘u vahine, o Beny, i te hiero. Ua faaroo maua e, no te haere i reira, e tamatahia te faaroo, tera râ, i to maua faariroraa i te faaipoiporaa hiero ei opuaraa na maua, aita roa maua i ite eaha te teimaha o te tamataraa o to maua faaroo.
Ua farerei maua o Beny i roto i to maua fenua ai‘a o Panama i muri a‘e i ta maua misioni. No te ture i Panama, ua titauhia i te mau taata e hinaaro e haamata i to ratou oraraa faaipoipohia i roto i te hiero, ia faaipoipo ia ratou i te tivira na mua noa a‘e a tere atu ai i roto i te hiero fatata a‘e, oia te Hiero no Guatemala City Guatemala. E riro ïa ei tere moni rahi e te fifi atoa, tera râ, ua riro te taatiraa ei haamaitairaa aita roa maua e hinaaro ia ere maua i te reira.
I te mahana a faaite ai au i te reira, i te po‘ipo‘i a‘e ua ere au i ta‘u ohipa. Aita vau i haaparuparu, ua faaoti au e imi i te moni na roto i te faatereraa i te pereroo utaraa taata. Ua ino to‘u pereoo utaraa taata i te pô matamua. Ma te pe‘ape‘a tera râ ma te hinaaro papû, ua faaoti au i muri iho e hoo i te piriaro. I te po‘ipo‘i a haere ai au e ohi mai i te mau piriaro i te fare hamaniraa, ua ite a‘e ra vau e, ua paapaa hope roa te reira fare i te pô na mua’tu. Mai te huru ra e, ua pee ê atoa to‘u mau ti‘aturiraa i roto i te auauahi.
Te toe ra te tahi noa tau ava‘e rii hou a tupu ai te tere hiero, tae mai i teie taime, te mau tautooraa atoa ta‘u i rave no te imi i te moni, ua topa ta‘ue noa te reira. Ua faaru‘e atu ra i te fare paapaa e ua haere e hi‘o ia Beny.
« Aita hoê mea i roaa ia‘u », ta‘u ïa parau ia’na. « Ia‘u i mana‘o, eiaha paha oe e faaipoipo ia‘u ».
« Ahiri e te faaipoipo nei au no te moni, ua faaipoipo ê na ïa vau », ta’na ïa parau. « Aita râ vau e faaipoipo nei no te moni. Te faaipoipo nei au ia oe no te mea ua here au ia oe ».
Ua riro teie ei parau faufaa roa. Ua feruri a‘e ra maua e, ua manuïa maua i te hoê tamataraa faufaa roa. A tura‘i rii atu ai maua i mua ma te faaroo, ua haamata te tahi mau uputa i te matara. Ua itehia ia‘u te ohipa hamani tauhaa, noa’tu e, aita te moni i rava‘i roa no te pahono i to maua mau hinaaro. E ua tauturu mai te hoê episekopo maitai ia maua i te aufauraa i te tarahu pereoo. Noa’tu te maitai o ta’na tauturu, aita te reira i tano roa. Ua hinaaro maua na maua hoa e amo i te haamau‘araa. No to maua râ iteraa i te hinaaro mau ia tauturu, ua ani maua ia’na ia horo‘a i te hoê ohipa na Beny. Ua na reira oia.
Ia rava‘i ta maua moni no te tere i te hiero, ua faaipoipo maua i te pae tivira, e ua ineine roa maua no te haere i Guatemala e te tahi atu na 10 mau melo o te Ekalesia Aitâ râ ta maua tamataraa i hope atu ra.
Na roto i te tahi faaearaa ohipa rahi roa i te pae no te utaraa taata, ua mau to matou tere i te oti‘a no Costa Rica. I muri a‘e e piti mahana to matou tia‘iraa i te oti‘a, ua faaoti a‘e ra to matou taata faahoro pereoo e ho‘i. Tera râ, ua faaoti a‘e ra maua o Beny, e e piti atu na taea‘e, e hoê tane e te vahine faaipoipo, eiaha e otohe. I muri a‘e i to matou hi‘oraa i to matou pereoo mataeinaa ia taviri e ia faaru‘e mai ia matou, ua tomo atu ra matou i roto ia Costa Rica. Ua haere noa matou, ma te taoto i raro a‘e i te mau tafarefare i te pae purumu, e tae roa’tu i te oti‘a no Nicaragua. I reira ua imi matou i te hoê taxi no te haere i roto i te oire pû, e i reira to matou hooraa i te titeti pereoo utaraa taata no te haere i te oti‘a fenua no Honduras. E piti mahana – e e piti faahou pereoo mataeinaa – ua tae a‘e ra matou i te hiero. Ua repo roa matou e te rohirohi atoa, e ua hau roa ta matou haamau‘araa i ta matou i faanaho ra, tera râ, ua oaoa matou.
Ia po‘ipo‘i a‘e, i muri a‘e i to matou mau tamataraa atoa e te taere hoi, ua taatihia matou no te tau mure ore ei tane e ei vahine faaipoipo. E oaoa rahi to matou – ua faufaahia te ohipa, te tia‘iraa e te haape‘ape‘araa – !
E ere te mau taata atoa e faaipoipo i roto i te hiero o te farerei i teie huru tamataraa, tera râ, no Beny e no‘u nei (e no te tahi atu tei haere i te hiero na muri iho ia maua), ua riro teie mau iteraa ei rave‘a haamaitairaa ia matou. Ua riro ïa ei iteraa rahi a‘e i te mau iteraa atoa o to‘u oraraa.
Ahiri ta maua opuaraa e faaipoipo i roto i te hiero i riro ei opuaraa noa no te here i te tahuti nei, aita ïa maua e rave i te reira. No te mea râ e, ua ti‘aturi maua i te mana taatiraa o te autahu‘araa tei faaho‘ihia mai i to tatou nei anotau, aita maua i faaru‘e, ma te ite e, to maua faaipoiporaa hiero – no teie tau e no te tau amuri atu – e mau‘araa maitai te mau tusia atoa ta maua i rave.