Te mau Uiraa Matarohia

Eaha ta te taata e rave i roto i te hiero ?

E haapiihia tatou i roto i te hiero, e rave tatou i te mau fafauraa, e e fafauhia mai te mau haamaitairaa ia tatou. E farii tatou i te mau oro‘a e ti‘a ai ia tatou ia ora i mua i te aro o te Atua.

Te hoê oro‘a ta tatou e farii i roto i te hiero o te oro‘a hiero ïa. Te auraa no te ta‘o ra e oro‘a hiero te hoê ïa « horo‘a » e aore râ « e horo‘araa ». I roto i teie oro‘a, e haapiihia tatou i te tumu no te oraraa, te misioni e te Taraehara a Iesu Mesia, e te faanahonahoraa a te Metua i te Ao ra no Ta’na mau tamarii. E roaa ia tatou te tahi maa ite iti ha‘iha‘i roa no ni‘a i te huru o te oraraa i mua i To’na aro na roto i te iteraa i te hau o te hiero.

Te tahi atu oro‘a o te hiero, o te oro‘a ïa o te taatiraa, i reira ho‘i te tane e te vahine faaipoipo e taatihia ai i te tahi e te tahi e te mau tamarii e taatihia i to ratou na metua i roto i te utuafare mure ore. Te auraa o te reira oia ho‘i mai te mea e, e haapa‘o maite tatou i ta tatou mau fafauraa, e vai noa ïa to tatou mau autaatiraa utuafare e amuri noa’tu.

Taa‘e noa’tu te fariiraa i teie mau oro‘a no tatou iho, e nehenehe atoa tatou e farii i te reira no to tatou mau tupuna i pohe. Te auraa ra oia ho‘i, te mau taata tei pohe ma te ore i farii i te mau oro‘a i titauhia mai te bapetizoraa e te haamauraa, te oro‘a hiero, e te taatiraa, te rave‘a teie e farii ai ratou i teie mau oro‘a.

Eaha te huru i roto i te hiero ?

Te hiero o te hoê ïa vahi no te hau e te mo‘a, tei faataa‘ehia i te mau pe‘ape‘a e te arepurepuraa o te ao nei. Ua faanahonaho-maitai-hia ma te nehenehe te mau vahi atoa o te hiero no te faatupu i te hoê varua auraro. No te mea ho‘i e, e fare teie no te Fatu, e no te mo‘a o te ohipa e ravehia i roto ra, i roto i te hiero e nehenehe ta tatou e farii rahi i te Varua e ia fatata i piha‘i iho i te Fatu. E nehenehe ta tatou e farii i te heheuraa no tatou iho i reira e i te puai pae varua no te tauturu ia tatou ia upooti‘a i ni‘a i to tatou mau tamataraa. Teie te hoê tumu i faaitoitohia ai tatou ia haere tamau i te hiero.

Eaha te huru o to‘u ahu ia haere ana‘e au i te hiero ?

A oomo i te ahu au maitai o te Sabati ia haere ana‘e outou i te hiero. Eiaha to outou ei ahu e ei faanehenehe taa‘e roa, mai te huru râ i to te pureraa oro‘a. E faaite outou i te auraro e te faatura i te Fatu e i To’na fare e e titau outou i te Varua na roto i te tamâraa ia outou e te nehenehe maitai.

I roto i te hiero te vai ra te mau piha ahuraa i reira outou e taui ai i to outou mau ahu Sabati e a oomo ai i te mau ahu uouo. Ua riro teie tauiraa i te ahu ei faahaamana‘oraa e, te faaru‘e nei outou i te ao nei i muri ia outou no te tahi taime iti no te tomo i roto i te hoê vahi mo‘a. Ua riro te ahu uouo ei tapa‘o no te viivii-ore e no te mea e ua aifaito te ahuraa o te mau taata atoa i roto i te hiero, na te reira e faatupu i te hoê hi‘oraa tahoê e te aifaitoraa.

Eaha te taime e farii ai au i to‘u oro‘a hiero ?

Te rahiraa o te taime e farii outou i to outou oro‘a hiero na mua rii noa a‘e a haere ai outou i te misioni e aore râ hou a faaipoipohia ai outou i te hiero. Te mau melo otahi tei te hopea i to ratou tau apîraa e aore râ tei te area piti ahuru te matahiti aita i farii i te hoê piiraa misionare e aita e faaipoipohia ra i roto i te hiero, aita ïa ratou e fariihia ia rave i to ratou oro‘a hiero.

No te mau melo api, e tia‘i ratou hoê a‘e matahiti i muri a‘e i to ratou bapetizoraa e te haamauraa hou a farii ai i to ratou oro‘a hiero.

E ohipa faufaa roa te fariiraa i to outou iho oro‘a hiero. A aparau i te reira i to outou episekopo. A pure e a feruri hohonu no te ite e, eaha te taime e ineine ai outou.

Eaha ta‘u e nehenehe e parau ia vetahi ê no ni‘a i to‘u iteraa i roto i te hiero ?

E nehenehe ta outou e paraparau no ni‘a i te huru o te rotoraa o te hiero, e e nehenehe atoa ta outou e faaite i te mau mana‘o tei tupu i roto ia outou i roto i te hiero. Tera râ, te mau fafauraa e te mau oro‘a no te hiero, e tae noa’tu i te mau parau i faahitihia, e mau mea mo‘a roa te reira, e aita ïa e ti‘a ia paraparauhia i rapae i te hiero. Na roto i te haapaeraa i te paraparau i teie mau mea mo‘a i rapae i te hiero, te paruru ra ïa tatou i te reira i te tahitohitoraa, te haamaauraa, e aore râ te faatura-ore-raa. Eiaha to outou ei huru tau‘a ore ia paraparau ana‘e outou i to outou mau iteraa no roto i te hiero,

Eaha te tumu e faaohipahia ai te tapa‘o i roto i te hiero ?

A haa ai Oia i ni‘a i te fenua nei, ua haapii pinepine te Faaora na roto i te parabole no te faahoho‘a i te mau parau mau mure ore. Ua parau mai Oia e, e na reira atoa tatou i te haapiihia i roto i te hiero. Te vai ra te tapa‘o i roto i te mau oro‘a e te mau fafauraa o te hiero, to ratou faahoho‘araa, te faanahoraa, e te ahu e oomohia. Mai te mea e, e feruri hohonu outou i ni‘a i teie mau tapa‘o na roto i te arata‘iraa a te Varua Maitai, e tauturu te reira ia outou ia ite i te parau mau, ia haapii no ni‘a i te Metua i te Ao ra e ia Iesu Mesia, e e tupu outou i te rahi i te pae varua.

Te vai ra te tahi mau melo o to‘u utuafare aita e nehenehe e tomo i roto i te hiero. Eaha ta‘u e nehenehe e rave no te tauturu ia ratou ia feruri ratou e, tei roto atoa ratou i te parau no to‘u faaipoiporaa i te hiero ?

E nehenehe teie tumu parau ia riro ei tumu parau huru fifi rii. Te hiero e fare ïa no te Fatu, tei haamo‘ahia No’na, e no reira, te feia e tomo i roto e mea ti‘a ïa ia ratou ia mau i te hoê parau faati‘a no te hiero, na te reira ho‘i e haapapû e te haapa‘o nei ratou i te mau ture Ta’na i haamau. Area râ, te feia aita ta ratou e parau faati‘a no te hiero, e farii-popou-hia ratou i roto i te aua o te hiero, e e rave rahi hiero te vai te hoê piha i reira ratou e nehenehe ai e tia‘i a taatihia ai te mau melo o te utuafare. E nehenehe ta te hoê tane e te vahine faaipoipo te vai ra to raua mau melo o te utuafare aita e nehenehe e tomo i roto i te hiero, e ani i te episekopo e aore râ, i te tahi atu melo o te Ekalesia ia parahi i piha‘i iho ia ratou i roto i te piha tia‘iraa.

E nehenehe atoa ta te tane e te vahine faaipoipo e faanaho e to raua episekopo ia faatupu i te hoê pureraa taa‘e i muri a‘e no te mau fetii e te mau hoa aita ta ratou e parau faati‘a no te hiero. E riro teie pureraa ei rave‘a faatupuraa i te mana‘o i roto ia ratou e, tei roto atoa ratou i teie oro‘a, e no te haapii atoa i te parau no te faaipoiporaa mure ore. Noa’tu e aita e ravehia te hoê oro‘a taa‘e e aita ho‘i e euheraa te tahi e te tahi, e nehenehe e faatupu i te oomoraa tape‘a rima i roto i teie pureraa.

Eaha ta‘u e rave no te faaineine ia‘u ia farii i te mau oro‘a o te hiero ?

E nehenehe outou e faaineine ia outou na roto i te haere-tamau-raa i te hiero no te rave i te bapetizoraa no te feia tei pohe, na roto i te haereraa i te mau haapiiraa faaineineraa no te hiero faatupuhia e to outou episekopo, e na roto i te tai‘oraa i te mau papa‘iraa mo‘a e te mau parau i roto i teie buka iti.

E nehenehe atoa outou e faaineine ia outou na roto i te haapa‘oraa i te mau ture a te Fatu no te ti‘amâraa ia haere i te hiero. A faaamu i to outou iteraa papû i te Atua te Metua e ia Iesu Mesia e Ta’na evanelia i faaho‘i-faahou-hia mai. Haapa‘o i te ture no te Parau Paari e i te ture no te viivii-ore. Paturu i to outou mau ti‘a faatere o te Ekalesia, aufau i te hoê tuhaa ahuru ti‘a, e a haere i te mau pureraa. Ia riro outou ei taata parau ti‘a i roto i ta outou mau ohipa e o vetahi ê, e a haapapû e ua tuati to outou oraraa utuafare i te mau haapiiraa a te Ekalesia. A haapa‘o i ta outou mau fafauraa o te bapetizoraa ia ineine ho‘i outou no te farii i te mau fafauraa teitei a‘e o te hiero.

Piha tiretiera, te Hiero no Mount Timpanogos Utah.

Hiero no Jordan River Utah. Haamo‘ahia i te 16 no novema 1981.

Hiero no Navu Illinois Haamo‘ahia i te 27 no tiunu 2002.