No te aha teie mau Hiero ?
Ua riro te mau hiero a Te Ekalesia a Iesu Mesia i te Feia Mo‘a i te Mau Mahana Hopea Nei ei mau fare mo‘a i reira te mau uiraa mure ore e pahonohia ai.
Te mau hiero e mau vahi i reira ta tatou mau uiraa no ni‘a i te oraraa e farii ai i te mau pahono no te mure ore
Aita anei te hoê tane e aore râ, te hoê vahine i roto i te hoê taime no te feruriraa, i feruri hohonu i te parau mo‘e hanahana o te oraraa nei ?
Aita anei oia i ui na e, « No hia mai au ? No te aha vau i tae mai ai i ô nei ? Te haere nei au i hea ? Eaha to‘u auraa e tei Hamani ia‘u ? E huna anei te pohe i ta‘u mau tao‘a herehia o te oraraa nei ? Eaha ïa te parau no to‘u utuafare ? Te vaira anei te hoê atu oraraa i muri iho i teie, e mai te mea te vai ra, e ite anei tatou te tahi i te tahi i reira ? »
Aita te mau pahonoraa i teie mau uiraa e itehia i roto i te paari o te ao nei. E ite-noa-hia te reira i roto i te parau heheu a te Atua. Ua riro te mau hiero a Te Ekalesia a Iesu Mesia i te Feia Mo‘a i te Mau Mahana Hopea Nei ei mau fare mo‘a i reira teie e te tahi atu mau uiraa mure ore e pahonohia ai. Ua haamo‘a-tata‘itahi-hia te reira ei fare no te Fatu, hoê vahi mo‘a roa e te hau i faataahia i te ao nei. I reira te mau parau mau e haapiihia ai e te mau oro‘a e ravehia ai o te hopo‘i mai i te ite o te mau mea mure ore e ia faaitoito i te mau taata ia ora ma te taa maitai i to tatou aia tupuna hanahana ei tamarii na te Atua e ei mana‘o paari no to tatou ite ei mea ora mure ore.
Ua riro te hiero ei mea otahi i roto i te tumu e te ohipa i te tahi atu mau fare pureraa a te tahi atu mau faaroo.
Teie mau fare, e mea taa ê i te mau tauasini Fare Pureraa i matarohia no te haamoriraa i patuhia i te mau vahi atoa o te fenua nei, ua riro ïa ei mea otahi i roto i te tumu e i te ohipa i te tahi atu mau fare pureraa a te tahi atu mau faaroo. E ere i te rahi o teie mau fare e aore râ, to ratou mau hoho‘a fare nehenehe i faariro ia ratou mai te reira. O te ohipa ra e ravehia i roto mai i to’na mau papa‘i.
Te faataaraa o te tahi mau fare no te mau oro‘a taa ê, i te taa-ê-raa o te tahi mau vahi haamoriraa, e ere i te mea apî. E haapa‘oraa teie i Iseraela tahito ra, i reira te feia e haamori ai i roto i te mau sunago i faataahia. Ta ratou vahi mo‘a roa, te matamua, te sekene i roto i te medebara e to’na vahi Mo‘a o tei Mo‘a roa, e i muri iho te monoraa mai te mau hiero, i reira te mau oro‘a taa ê e ravehia ai e i reira noa te feia i faataahia e rave ai i teie mau oro‘a.
Mai te reira atoa i teie mahana. Hou te haamo‘araa o te hoê hiero, e ani manihini Te Ekalesia a Iesu Mesia i te Feia Mo‘a i te Mau Mahana Hopea Nei i te huiraatira ia haere na roto i te fare e ia mataitai i to’na huru rau. Area râ, ia haamo‘a-ana‘e-hia e riro ia ei fare no te Fatu, e hopoi mai ïa i te hoê huru mo‘a roa e o te mau melo ana‘e o te Ekalesia tei ti‘amâ te faati‘ahia ia tomo. E ere i te hoê ohipa huna. E ohipa haamo‘ahia ra.
No tatou tata‘itahi te ohipa hiero ei melo no te utuafare mure ore o te Atua.
Te ohipa e ravehia i roto i teie mau fare e mau tumu mure ore i faataahia e te Atua e au i te parau faaau e te taata, oia te tamarii e te poieteraa a te Atua. No te rahiraa, e haape‘ape‘a te ohipa hiero no te utuafare, no tatou tata‘itahi melo no te utuafare mure ore o te Atua e no tatou tata‘itahi ei melo no te utafare i te fenua nei. E haape‘ape‘a te reira i te mo‘araa e te te natura mure ore o te fafauraa o te faaipoiporaa e te auraa utuafare.
E haapapû te reira e te mau tane e te mau vahine tata‘itahi atoa tei fanauhia i te ao nei e tamarii na te Atua, haamaitaihia e te hoê mea o To’na natura hanahana. Te tapitiraa o teie mau haapiiraa tumu e te faufaa e hopea maitai ia no te feia o tei farii, e ite te taata i amui mai e ua riro noa na te tane e te vahine tata‘itahi ei tamarii na te Metua i te Ao ra, e ua riro te taata tata‘itahi ei melo no te hoê utuafare hanahana; e ua riro te taata tata‘itahi ei taea‘e e aore râ ei tuahine no‘na.
I to te pharisea uiraa e, « Teihea na te parau rahi o te ture ra ? » Pahono atura te Faaora e, « E e hinaaro oe i to Atua ia Iehova ma to aau atoa , e ma to varua atoa, e ma to mana‘o atoa, e ma to puai atoa: o te parau teie i hau i mua.
E mai te reira atoa hoi te piti, E aroha’tu oe i to taata tupu mai to araha ia oe iho na » (Mareko 12:28, 30–31).
Te mau haapiiraa i parauhia i roto i te mau hiero apî e haapapû puai te reira i te mana‘o tumu mau no ta tatou mau ohipa i tei Hamani ia tatou e to tatou mau taata tupu. E faarahi te mau oro‘a mo‘a i teie mana‘o faahiahia no i te utuafare o te Atua. Te haapii mai ra te reira e te varua i roto ia tatou tata‘itahi e mea mure ore ïa, taa ê atu i te tino, e mea tahuti ïa. Eita te reira e horo‘a noa mai te ite o teie mau parau mau rarahi e faaitoito atoa râ i te melo ia here i te Atua e ia faaitoito ia’na ia faaite i te hoê autaea‘eraa rahi i te tahi atu mau tamarii a to tatou Metua.
Te fariiraa i te tumu mai e e tamarii te taata tata‘itahi na te Atua e tauturu ia tatou ia hi‘o e te vai nei te tumu hanahana i roto i te oraraa tahuti nei. I reira faahou â, e haapiihia te parau mau i heheuhia i roto i te fare o te Fatu. Te oraraa i te fenua nei e tuhaa ïa no te hoê tere i te mure ore. Ua ora na tatou ei tamarii varua hou tatou a haere mai ai i ô nei. Te faaite hua maira te mau papa‘iraa mo‘a no te reira. Te parau faaite a te Fatu ia Ieremia e: « Aita oe i hamanihia e au i roto i te opu, i ite ai au ia oe; e aita oe i fanau, i faataahia‘i oe e au, e ua haapa‘ohia oe e au, ei peropheta na te mau fenua » (Ieremia 1:5).
Te mau auraa faaieie o te oraraa utuafare e nehenehe e tamau noa i roto i te ao amuri a‘e
Ua haere mai tatou i roto i teie oraraa ei tamarii na te metua tahuti e ei mau melo no te mau utuafare. Ua riro te mau metua ei apiti e te Atua no te faatupu i Ta’na mau tumu mure ore ei haamaitairaa i Ta’na mau tamarii. No reira, ua riro te utuafare ei faanahonahoraa hanahana, e mea faufaa roa‘e i na pae e piti te tahuti e te mure ore.
Te ohipa rahi roa‘e e ravehia i roto i te mau hiero no te utuafare ïa. Faatumuhia i ni‘a i te ite o to’na auraa ei haamana‘o faahouraa i te mea e e noa’tu ua vai na tatou ei tamarii na te Atua hou tatou i fanauhia mai ai i roto i teie ao, e ora tamau noa a ia tatou e muri a‘e, e te tao‘a faaieie e te auraa mauruuru o te tahuti nei, tei hau i te nehenehe e te faufaa o tei itehia i roto i te utuafare, e tamau noa ia i roto i te ao amuri a‘e.
Ia faaipoipo ana‘e te hoê tane e te hoê vahine i roto i te fare o te Fatu, e taatihia raua eiaha noa no te tau o to raua oraraa tahuti nei area râ, no te tau e amuri atu. E ruuruuhia raua toopiti atoa ra i raro a‘e i te mana eiaha noa i te ture o te fenua e taati ia raua e tae noa’tu i te pohe area râ, na roto atoa i te autahu‘araa mure ore a te Atua, e haamauhia i te ra‘i i te mea e haamauhia i te fenua nei. Ia faaipoipo-ana‘e-hia te pea e ite papû raua i te heheuraa hanahana to raua auraa e to to raua mau tamarii e mou i te pohe area râ, e vai tamau noa i te mure ore, mai te mea e ora raua ma te ti‘amâ i teie haamaitairaa.
Te vaira anei te hoê tane o tei here maitai i te hoê vahine e aore râ, te hoê vahine o tei here maitai i te hoê tane, o tei ore i pure ia tamau noa to raua auraa i ô atu i te menema ? Ua hunahia anei te hoê tamarii e na metua o tei ore i haapapû i ta raua i here e, eita ratou e riro na raua i roto i te ao amuri a‘e ? E nehenehe anei te hoê i ti‘aturi i te ora mure ore e feaa e e faati‘a te Atua o te ra‘i e horo‘a i Ta’na mau tamaiti e mau tamahine i tera taipe faaieie o te oraraa, te here e itehia i roto i to’na parau faufaa i roto i te auraa utuafare ? Aita, te tumu titauraa e te auraa utuafare e vai tamau noa ia i muri mai i te pohe. E hinaaro te aau o te taata i te reira, e ua heheu mai te Atua o te ra‘i i te hoê rave‘a e nehenehe te reira e faatupuhia‘i. E hopoi mai te mau oro‘a mo‘a o te fare o te Fatu i te reira.
E roaa te mau haamaitairaa o te hiero no te taato‘araa.
Teie râ e aura e ere roa i te mea tano, mai te mea te mau haamaitairaa o teie mau oro‘a e roaa noa no te feia o tei riro mai ei melo no Te Ekalesia a Iesu Mesia i te Feia Mo‘a i te Mau Mahana Hopea Nei i teie nei. Te auraa ra o te rave‘a ia tomo i roto i te hiero e ia rave i to’na mau haamaitairaa ua matara no te feia atoa o tei farii i te evanelia e ia bapetizohia i roto i te Ekalesia. Te tumu te reira, te Ekalesia i tuu ai i mua te hoê faanahonahoraa misionare rarahi na te ao nei e e tamau noa â i te faamahora i teie faanahonahoraa ia aano atu â e ti‘a ai, no te mea e hopoi‘a na‘na, i raro a‘e i te heheuraa hanahana, ia haapii i te evanelia i te mau nunaa atoa, te mau opu atoa, te mau reo atoa e te mau taata atoa.
Area râ, te vai ra mirioni rahiraa o tei taahi mai na i te fenua nei e o tei ore roa i faaroo noa‘e i te evanelia. E pato‘i anei ratou i teie mau haamaitairaa o tei pupuhia i roto i te mau hiero o te Fatu ?
Na roto i te mau monoraa a te feia ora o te ti‘a no tei pohe, e roaa taua mau oro‘a ra no te feia o tei haere na roto atu i te tahuti nei. I roto i te ao varua e ti‘amâraa to teie mau taata ia farii e aore râ ia pato‘i i teie mau oro‘a i te fenua nei i ravehia no ratou, oia hoi te bapetizoraa, te faaipoiporaa e te taatiraa i te mau auraa utuafare. Aita e faaheporaa i roto i te ohipa a te Fatu area râ, e mea ti‘a ia riro ei rave‘a.
Te ohipa i roto i te hiero e ohipa no te here no roto mai i te feia ora no te feia pohe.
Teie ohipa faaoraraa e ohipa matameha‘i no te here no roto mai i te feia ora no te feia pohe. E mea ti‘a roa ia ravehia te hoê opuaraa aano no te ma‘imiraa i te aamu utuafare ia iteahia e ia tahoêhia te feia o tei reva atu na mua. No te tauturu i roto i teie ma‘imiraa, ua faaau te Ekalesia i te hoê faanahonahoraa aamu utuafare e ua haamau i te mau pû ma‘imiraa faito ore na te ao atoa nei. E matara noa teie mau pueraa parau tahito i te taato‘araa eua faaohipahia e te feia e rave rahi e ere i te melo no te Ekalesia i roto i te ma‘imiraa i to ratou mau tupuna. Ua aruehia teie faanahonahoraa e te feia ma‘imi tuatapaparaa na te ao nei e ua faaohipahia e te mau fenua rau ei parururaa i ta ratou iho mau pu‘e parau. Area râ, te tumu matamua o te horo‘araa ïa i te mau melo o te Ekalesia te mau tautururaa e hinaarohia no te tahoê i to ratou mau tupuna o ta ratou e faaaano no ratou te mau haamaitairaa o ta ratou iho e oaoa E nehenehe ïa ratou e parau ia ratou iho e, « Mai te mea ua here au i ta‘u vahine e ta‘u mau tamarii ma te here mau e te hinaaro nei au ia ratou no te tau amuri atu, eita anei e ti‘a no to‘u papa ruau e to‘u tupuna e te tahi atu mau tupuna i pohe e farii atoa i taua â mau haamaitairaa mure ore ra ? »
E horo‘a te mau hiero i te rave‘a no te haapii i te parau mau o teie mau mea o te oraraa.
E no reira teie mau fare mo‘a i riro ai ei mau hi‘oraa no te mau faanohoraa rahi, te hau e te faatura e hopoihia i mua. E pii ratou i te feruriraa ei tuhaa o te orama a Ioane te Heheu Parau i roto i te reira i papa‘ihia te tuatapaparaa i teie uiraa e i teie pahonoraa: « O vai teie nei feia e ahu i te ahu teatea nei ? E mai hea mai â ratou ? …
« O te feia i haere mai mai roto mai i te ati rahi ra, e ua horoi i to ratou ahu, e ua teatea i te toto o te Arenio ra.
« I parahi ai ratou i mua i te terono o te Atua ra, e i haamori ai ratou ia’na i te rui e te ao i roto i to’na ra hiero » (Apokalupo 7:13–15).
Te feia o tei haere mai i teie mau fare mo‘a tei ahu i te ahu teatea mai ta ratou i apiti mai i reira iho. E haere noa mai ratou e te hoê parau faati‘a na to ratou mau hui mana faatere, ei haapapûraa i to ratou ti‘amâraa. Ia haere atu ratou i roto ma te mâ i te feruriraa, mâ i te tino e mâ i te ahu no te tomoraa i roto i te hiero o te Atua. E ia tomo mai ratou titauhia ratou ia faaru‘e i te ao nei i muri ia ratou e ia haapapû i ni‘a i te mau mea hanahana.
Teie faaohiparaa, mai te mea e nehenehe e parauhia, e amo i ta’na iho utua, no te feia o teie mau tau o te haavi eita ïa e farii i te hoê rave‘a no te opani i rapae i te ao nei e ia tomo i roto i te fare o te Fatu, i reira e feruri hohonu ma te maniania ore i te mau mea mure ore a te Atua ? E horo‘a mai teie mau vahi mo‘a i te rave‘a, eita e noaa i te mau vahi atoa, ia haapii e ia feruri no nì‘a i te auraa mau o te mau mea o te oraraa nei – to tatou auraa e te Atua e to tatou tere mure ore no te oraraa hou teie oraraa i teie oraraa nei e no te anotau amuri atu i reira tatou e ite ai e amui ai te tahi i te tahi, oia’toa ta tatou iho i here e to tatou mau tupuna o tei reva atu na mua ia tatou e no ratou i tae mai ai to tatou aia tupuna no te mau mea o te tino, te feruriraa e te varua.
I roto i te mau hiero e horo‘ahia ia tatou te parau fafau e te haamaitairaa mure ore a te Atua
E mea papû e teie mau hiero e mea otahi i rotopu i te mau fare atoa. E mau fare no te haapiiraa. E mau vahi no te mau oro‘a e te mau fafaura. E tuturi tatou i ni‘a i te mau fata i mua i te Atua tei Hamani ia tatou e tei horo‘a mai te mau fafauraa o Ta’na haamaitairaa mure ore. I roto i te mo‘araa o ta ratou mau farereiraa e au maitai tatou Ia‘na e e ia haamana‘o i Ta’na Tamaiti, to tatou Faaora e Ora, te Fatu o Iesu Mesia, o tei tavini ei mono no tatou tata‘itahi i roto i te tusia faaora no tatou. I ô nei tatou e vaiiho ai i to tatou iho haapa‘oraa ia tatou iho e ia tavini i te feia eita e nehenehe e tavini ia ratou iho. I ô nei, i raro a‘e i te mana o te autahu‘araa o te Atua, e taatihia ai tatou i roto i te mo‘aroa o te auraa’toa o te taata nei – ei tane e ei vahine, ei mau tamarii e ei metua, ei mau utuafare i raro a‘e i te taatiraa o te oreroa e nehenehe ia haamouhia e e ore ai te pohe e haape‘ape‘a.
E mau fare mo‘a teie mau fare i hamanihia e tae noa’tu i te mau tau pouri i reira te mau Feia Mo‘a tiahi-haere-noa-raa-hia e haamani-ino-raa-hia. Ua hamanihia e ua atuatuhia teie mau fare i te mau tau veve e te manuïa-roa-raa. No roto mai te reira i te faaroo mau o te hoê tai‘o numera e nuu noa i mua o tei faaite papû no te hoê Atua ora, no te Fatu i ti‘a faahou, no te mau peropheta e no te heheuraa hanahana e no te hau e no te ite papûraa i te mau haamaitairaa mure ore e itehia i roto noa i te fare o te Fatu.
Vahi bapetizoraa, Hiero no Papeete Tahiti
Hiero no Stockholm Tuete Haamo‘ahia i te 2 no Tiurai 1985.
Hiero no Manti Utaha. Haamo‘ahia i te 21 no Me 1888. Haamo‘a-faahou-hia i te 14 no Tiunu 1985.