9–15 nō ’Ātete

Te Parau Ha’api’ira’a ’e te mau Parau Fafau 88

« ’A ha’amau… te fare ’o te Atua »

’Ei ’orometua ha’api’i ’evanelia, e hōpoi’a nā ’outou i te tauturu i tā ’outou piha ’ia « ha’api’i i te tahi ’e te tahi te ha’api’ira’a tumu o te bāsileia » ’e « te mau parau pa’ari » (Te Parau Ha’api’ira’a ’e te mau Parau Fafau 88 :77, 118). Hau atu i te fa’a’itera’a i te mau mea tei fa’auruhia ia ’outou e ha’api’i nā roto mai i Te Parau Ha’api’ira’a ’e te mau Parau Fafau 88, ’a fa’aitoito i te mau pīahi ’ia ha’api’i i te tahi ’e te tahi i te mea tā rātou i ’apo mai.

Pāpa’i i te mau mana’o e tae mai

Tītau i te mana’o

I te tahi taime e nehenehe te hō’ē hōho’a e fa’auru i te fa’a’itera’a. E nehenehe ’outou e fa’a’ite i te hō’ē hōho’a nō te hō’ē ’āma’a olive (’aore rā e pāpa’i hōho’a i ni’a i te tāpura ’ere’ere) ’e e ani i te mau melo o te piha ’ia fa’a’ite mai i te mau ’īrava nō roto mai i Te Parau Ha’api’ira’a ’e te mau Parau Fafau 88 ’o tei tauturu ia rātou ’ia māramarama nō te aha i nehenehe ai ia Iosepha Semita e pi’i i teie heheura’a hō’ē « rau’ere ’olive… te parau poro’i nō te hau a te Fatu ia tātou » (tuha’a upo’o parau).

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 88:6–50

Nō ’ō mai te māramarama ’e te ture ia Iesu Mesia ra.

• Nō te tauturu i tā ’outou piha ’ia ta’a maita’i i Te Parau Ha’api’ira’a ’e te mau Parau Fafau 88:6–50, e ti’a ’ia pāpa’i māramarama ’e ture i ni’a i te tāpura ’ere’ere ’e e vāhi i te piha nā roto e piti pupu. E hi’o mai hō’ē pupu i Te Parau Ha’api’ira’a ’e te mau Parau Fafau 88:6–13, 40–50, ma te ’imira’a mai i te mau mea tā rātou i ’apo mai nō ni’a ia Iesu Mesia nā roto mai i te mau fa’ahorora’a o te māramarama i roto i teie mau ’īrava. E ’imi mai te tahi atu pupu i te mau ’īrava 13–26, 34–42, ma te ’imira’a mai i te mau mea tā rātou i ’apo mai nō ni’a i te faufa’a rahi nō te pe’era’a i tāna ture. E aha tā te mau parau mau nō ni’a i te māramarama ’e te ture i roto i te tuha’a 88 e ha’api’i nei ia tātou nō ni’a i te Faaora ? Nāhea te reira i te fa’auru ia tātou ’ia riro hau atu mai iāna te huru ?

Te Parau Ha’api’ira’a ’e te mau Parau Fafau 88:62–76, 119–26

E nehenehe tātou e riro mai ’ei mea mā nā roto i te Tāra’ehara a Iesu Mesia.

• Te fa’auera’a a te Fatu ’ia « ha’amo’a ia ’outou iho », e ’itehia e piti taime i roto i te tuha’a 88 (mau ’īrava 68, 74). Mai te mea e fa’auruhia ’outou ’ia ’āparau e aha te aura’a o te reira, e ti’a ’ia ha’amata i te hi’o ’āmui haere i te aura’a nō te ta’o ha’amo’a ’aore rā, ’ia hi’o fa’ahou te tahi o te mau tuha’a i tāpurahia i raro a’e i te « ha’amo’ara’a » i roto i te Buka arata’i o te mau pāpa’ira’a mo’a (scriptures.ChurchofJesusChrist.org). E nehenehe ato’a ’outou e ani i te mau melo o te piha ’ia tai’o i Te Parau Ha’api’ira’a ’e te mau Parau Fafau 88 : 62–76, 119–26 ’e ’ia tāu’aparau i te mau uira’a mai teie i te hō’ē hoa : Nāhea tātou i te ha’amo’ahia ? E aha te mau fafaura’a nō ’ō mai i te Fatu tā tātou e ’ite mai i roto i teie mau ’īrava ? Nō te aha te Fatu e hina’aro ai ’ia vai mā noa tātou ? E nehenehe ato’a rātou e ’ite i te mau pāhonora’a i teie mau uira’a i roto i te parau poro’i a te peresideni Dallin H. Oaks « Tāmāhia e te tātarahapa » (Ensign ’aore rā Liahona, Mē 2019, 91–94; hi’o ato’a « Te tahi atu mau rāve’a tauturu).

Te Parau Ha’api’ira’a ’e te mau Parau Fafau 88:77–78, 118–26

Tē hinaaro nei te Fatu ’ia ’imi tātou i te ’ite nā roto i te tuatāpapara’a ’e nā roto i te fa’aro’o.

• Te a’o tā te Fatu i hōro’a nō te tauturu i te ha’amaura’a i te « ha’api’ira’a a te mau peropheta » i Kirtland (’īrava 137) e nehenehe e tauturu i tā ’outou piha i roto i tā rātou mau tauto’ora’a « ’ia ha’api’i te tahi ’e te tahi i te ha’api’ira’a ’evanelia nō te bāsileia » (’īrava 77). Penei a’e e ti’a ia ’outou ’ia hi’o haere i te mau ’īrava 77–78 ’e 118–26 ’e ’ia ’āparau e nāhea ’ia fa’ariro i tā ’outou piha ’ei hō’ē « fare nō te ha’api’ira’a » (’īrava 119). E nehenehe te mau melo o te piha e pāpa’i te tahi « mau ture nō te piha » ’aore rā, te mau parau tumu niuhia i ni’a i teie mau ’īrava ’o te arata’i i tā ’outou ’apora’a mai i roto i te piha. E ani ato’a i te mau pīahi ’ia fa’a’ite mai nāhea rātou i te tāmata e fa’a’ohipa i teie mau parau tumu « ’a ’imi ai [rātou] i te ’ite » (’īrava 118).

  

  E ti’a i tō tātou mau ’utuāfare ’ia riro ’ei mau vāhi nō te ’apo mai i te ha’api’ira’a pae vārua.

Te Parau Ha’api’ira’a ’e te mau Parau Fafau 88:119

Te hiero o te fare ïa ’o te Atua.

• Mai te mea e nehenehe, ’a pia i te hō’ē hōhoa nō te hiero fātata roa a’e i ni’a i te tāpura ’ere’ere, ’e e ani i te piha ’ia pāpa’i i piha’i iho i te reira te mau ta’o nō roto mai i te ’īrava 119 tei fa’a’ohipahia nō te fa’ata’a i te fare ’o te Fatu. E ani ia rātou ’ia fa’a’ite mai i te mau ’itera’a rau ’o tē fa’a’ite ra e nāhea te hiero e tū’ati ai i te mau fa’ata’ara’a tāta’itahi. E nehenehe ato’a e tāu’aparau e nāhea teie ’īrava i te arata’i i tō tātou orara’a.

Te tahi atu mau rāve’a tauturu

Tāmāhia nā roto i te tātarahapa

ʼUa haʼapiʼi te peresideni Dallin H. Oaks ē :

« E ha’amata te tātarahapara’a nā ni’a i tō tātou Fa’aora, e ’oa’oara’a te reira, e ’ere i te hōpoi’a…

« ’Ia tāmāhia tātou e te tātarahapa, e mea tītau ’ia fa’aru’e tātou i tā tātou mau hara ’e ’ia ’āfā’i i te reira i mua i te Fatu ’e i mua i tāna mau ha’avā i te tāhuti nei mai te mea e tītauhia (hi’o Te Parau Ha’api’ira’a ’e te mau Parau Fafau 58:43). ’Ua ha’api’i Alama ē, e mea tītau-ato’a-hia ia tātou ’ia « fa’atupu i te ’ohipa a te parau-ti’a » (Alama 5:35). Tei roto teie mau mea ato’a i te anira’a tāmau a te pāpa’ira’a mo’a ’ia haere mai i te Mesia.

Tītauhia ’ia rave tātou i te ’ōro’a i te mau mahana sābati ato’a. I roto i terā ’ōro’a, e fafau tātou ’e e fāri’i tātou i te mau ha’amaita’ira’a ’o te tauturu ia tātou ’ia upo’oti’a i te mau ’ohipa ato’a ’e te mau hina’aro e tāpe’a ia tātou ’ia tae i te maita’i roa tā te Fa’aora e ani nei ia tātou ’ia tae (hi’o Mataio 5:48; 3 Nephi 12:48). « ’Ia fa’aru’e [tātou] i te mau mea paieti ’ore ra, ’e ’ia aroha atu i te Atua ma tō [tātou] ’ā’au ato’a, ’e te mana’o ato’a, ’e te pūai ato’a », ’ei reira tātou e « maita’i roa [ai] i te Mesia ra » ’e e « mo’a » ai nā roto i te ha’amani’ira’a toto nō te riro « ’ei feiā mo’a ma te pōra’o ’ore » (Moroni 10:32–33). ’Auē ïa parau fafau ! ’Auē ïa temeio ! ’Auē ïa ha’amaita’ira’a ! » (« Tāmāhia e te tātarahapa », Ensign ’aore rā Liahona, Mē 2019, 92).

Ha’amaita’ira’a i tā tātou ha’api’ira’a

’Imi i te rāve’a nō te turu i te mau parau tumu. Hau atu i te mau mana’o i roto i teie arata’i, e nehenehe ’outou e ’imi i te mau video, te pehe ’aore rā te mau anoihi a te ’Ēkālesia nō te ha’api’i i te mau parau tumu i roto i Te Parau Ha’api’ira’a ’e te mau Parau Fafau 88. (Hi’o Ha’api’ira’a mai tā te Fa’aora, 17–18.)