Hiero nō Kirtland

Te hiero nō Kirtland, nā Al Rounds

30 nō ’Ātete–5 nō Tetepa

Te Parau Ha’api’ira’a ʼe te mau Parau Fafau 94–97

« Nō te fa’aorara’a o Ziona »

Nāhea ’oe i te tauturu maita’i atu i te mau pīahi ’ia hina’aro e fāri’i i te mau ha’amaita’ira’a tei fafauhia i roto i Te Parau Ha’api’ira’a ’e te mau Parau Fafau 94–97 ?

Pāpa’i i te mau mana’o e tae mai

’ītona fa’a’itera’a

Tītau i te mana’o

E nehenehe paha te mau pīahi e fa’a’ite i te hō’ē mea tei ’itehia ia rātou i roto i Te Parau Ha’api’ira’a ʼe te mau Parau Fafau 94–97 ’o tē fa’auru ia rātou ’ia haere pinepine atu ā i te hiero. ’E ’aore rā, e nehenehe rātou e fa’a’ite i te tahi atu mau parau poro’i tei fa’auru ia rātou ’a tai’o ai rātou i teie mau tuha’a.

’ītona ha’api’ira’a

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 95:8 ; 97:10–17

E ha’amaita’i te Atua i tōna mau ta’ata i roto i te hiero.

• Nāhea e nehenehe ai ia ’oe ’ia fa’a’ohipa i te mau parau mau i ha’api’ihia i roto i Te Parau Ha’api’ira’a ’e te mau Parau Fafau 95 ’e 97 nō te fa’auru i te mau pīahi ’ia ’imi itoito atu ā i te mau ha’amaita’ira’a o te hiero ? Hō’ē rāve’a ’oia ho’i, e tu’u i te hō’ē hōho’a o te hiero i rōpū i te tāpura ’ere’ere, ’e e ani i te mau pīahi nō te aha te Fatu, i tō rātou mana’o, i ha’api’i ai i tōna Feiā Mo’a ’ia patu i te mau hiero. E nehenehe te mau melo nō te piha ha’api’ira’a e ’imi i te tahi mau pāhonora’a i roto i Te Parau Ha’api’ira’a ’e te mau Parau Fafau 95: 8 ; 97:10–17 ’e e pāpa’i i te mea tei ’itehia ia rātou i ni’a i te tāpura ’ere’ere, ma te hā’ati i te hiero. (E ’itehia ia rātou te tahi atu mau pāhonora’a i roto i te « Nō te aha te Feiā Mo’a i te mau Mahana Hope’a nei e patu nei i te mau hiero » [temples.ChurchofJesusChrist.org]). E mea nāhea teie mau fā i te tupura’a i roto i tō tātou orara’a ? Nāhea e nehenehe ai ia tātou ’ia fa’ariro i te hiero ’ei tuha’a faufa’a atu ā nō tō tātou orara’a ?

• Tē hōro’a nei te ’Ēkālesia e rave rahi rāve’a tauturu ’o tē ha’api’i nei nō ni’a i te mau hiero. ’A feruri e nāhea ’oe e nehenehe ai e fa’a’ohipa i te tahi o te reira nō te ha’amaita’i i te ’āparaura’a i roto i te piha ha’api’ira’a nō ni’a i Te Parau Ha’api’ira’a ’e te mau Parau Fafau 95 ’e 97 ’e nō te fa’auru i te mau pīahi ’ia ’imi itoito atu i te mau ha’amaita’ira’a o te hiero. ’Ei hi’ora’a, hou te ha’api’ira’a, e nehenehe ’oe e ani i te tahi mau pīahi ’ia hi’ohi’o fa’ahou i te mau rāve’a tauturu i ni’a temples.ChurchofJesusChrist.org ’e ’aore rā Te mau hiero o Te ’Ēkālesia a Iesu Mesia i te Feia Mo’a i te mau Mahana Hope’a nei (ve’a ta’a ’ē o te Ensign ’e ’aore rā, Liahona, ’Ātopa 2010). ’A ani i teie mau pīahi ’ia haere mai ma te ineine nō te fa’a’ite mai i te hō’ē mea tā rātou i ’apo mai ’o tē pāturu i te mau ha’api’ira’a i roto i te mau tuha’a 95 ’e 97.

  Mai te mea ē, tē ha’api’i nei ’oe i te feiā ’āpī, e nehenehe ’oe e ani ia rātou ’ia tai’o i « Te fa’arirora’a i te hiero ’ei tuha’a nō tō ’outou orara’a » (i roto i Te mau hiero o Te ’Ēkālesia a Iesu Mesia i te Feiā Mo’a i te mau Mahana Hope’a nei, 77–78) e ’ia fa’a’ite mai e mea nāhea rātou i te fa’ariro i te hiero ’ei ’ohipa mātāmua i roto i tō rātou orara’a.

  E nehenehe te hōho’a video « Two Apostles Lead a Virtual Tour of the Rome Italy Temple [E piti ’āpōsetolo e arata’i nei i te hō’ē tere māta’ita’i i te hiero nō Roma Italia] » ’e « Temples [Te mau hiero] » (ChurchofJesusChrist.org) e tauturu i te feiā e fa’aineine nei ’ia haere i te hiero.

  E nehenehe ato’a ’outou e hīmene ’āmui i te hō’ē hīmene nō ni’a i te mau hiero ’e e ’āparau e aha tā te reira e ha’api’i nei (hi’o te fa’ahorora’a tumu parau i roto i Te mau hīmene).

Te Parau Ha’api’ira’a ’e te mau Parau Fafau 97:8–9

E nehenehe tātou e fāri’ihia e te Fatu.

• E aha tā tātou e ha’api’i mai nā roto mai i Te Parau Ha’api’ira’a ’e te mau Parau Fafau 97: 8 nō ni’a i te aura’a o te parau ’ia fāri’ihia e te Fatu ? Nō te aha e mea ta’a ’ē nō te huru tā tātou e ’imi ai i te tahi taime i te mana’o ’ia fāri’ihia i roto i te ao nei ? E aha te mau ha’amaita’ira’a i fafauhia mai i roto i te ’īrava 9 nō te feiā e fāri’ihia e te Fatu ? E nehenehe ato’a te mau melo nō te piha ha’api’ira’a e hi’ohi’o fa’ahou i te parau poro’i a Elder Erich W. Kopischke « ’Ia fāri’ihia mai e te Fatu » (Ensign ’e ’aore rā Liahona, Mē 2013, 104–6) ’e ’ia fa’a’ite mai e mea nāhea te reira i te tauturu ia rātou ’ia māramarama i teie mau ’īrava. Tei roto te fa’ahitira’a parau i « Te tahi atu mau rāve’a tauturu » te anira’a a Elder Kopischke ’ia ’imi i te fāri’ira’a a te Fatu i roto i tō tātou orara’a.

Te Parau Ha’api’ira’a ’e te mau Parau Fafau 97:18–28

’O teie ho’i Ziona, « tei mā te ’ā’au ».

• Nō te tauturu i tā ’oe mau pīahi ’ia feruri e aha te Ziona, e nehenehe ’oe e pāpa’i i ni’a i te tāpura ’ere’ere E aha te Ziona ? ’e ’a ani ia rātou ’ia ’imi i te mau pāhonora’a i roto i Te Parau Ha’api’ira’a ’e te mau Parau Fafau 97:19 ’e 21 (hi’o ato’a Mose 7:18). Penei a’e e mea faufa’a ’ia ’āparau e nāhea te Fa’aora i te tauturu ia tātou « ’ia mā te ’ā’au ». E aha te mea e fa’auru ia tātou ’ia patu ia Ziona i roto i tō tātou orara’a ? I roto i tā tātou pāroita ’aore rā, ’āma’a ? I roto i tō tātou ’oire ?

  Hiero nō Kirtland

  Nā te patura’a i te hiero nō Kirtland i fa’arahi atu te « mā te ’ā’au » o te Feiā Mo’a.

• ’Ua ha’api’i mai te Fatu nō ni’a ia Ziona i muri a’e i tōna fa’aue-mātāmua-ra’a i te Feiā Mo’a ’ia patu i te hō’ē hiero « nō te fa’aorara’a o Ziona » (hi’o Te Parau Ha’api’ira’a ’e te mau Parau Fafau 97: 12, 18–28). Nō te aha e tuha’a faufa’a rahi te hiero nō te patura’a ia Ziona ? Mea nāhea te mau parau fafau tā te Fatu i parau nō ni’a ia Ziona i roto i te mau ’īrava 18–28 i tupu ai i tō tātou nei ’anotau ?

’ītona nō te tahi atu mau rāve’a tauturu

Te tahi atu mau rāve’a tauturu

’Ia fāri’ihia e te Fatu.

Nō ni’a i te « hi’ora’a ’ōhie » tei ha’api’ihia i roto i Te Parau Ha’api’ira’a ’e te mau Parau Fafau 97: 8, ’ua ha’api’i mai ’o Elder Erich W. Kopischke :

« Nā te ’imira’a ’e te ’apora’a i te mana’o fāri’i o te Fatu e arata’i ia tātou ’ia ’ite ē, ’ua mā’itihia ’e ’ua ha’amaita’ihia tātou e āna. E rahi atu ā tō tātou ti’aturira’a ē, nāna e fa’atere ia tātou ’e e arata’i ia tātou i te maita’i. E riro mai tōna aroha marū ’ei mea pāpū i roto i tō tātou ’ā’au, i roto i tō tātou orara’a, ’e i roto i tō tātou ’utuāfare.

« Ma tō’u ’ā’au ato’a, tē tītau manihini nei au ia ’outou ’ia ’imi i te mana’o fāri’i o te Fatu ’e ’ia ’oa’oa i tāna mau ha’amaita’ira’a tei fafauhia mai. ’A pe’e ai tātou i te hi’ora’a ’ōhie tā te Fatu i tu’u mai, e ’ite tātou ē, ’ua fāri’ihia tātou e āna, noa atu tō tātou ti’ara’a, tō tātou fāito, ’e ’aore rā, tō tātou mau fifi i te tāhuti nei » (« ’Ia fāri’ihia mai e te Fatu », Ensign ’e ’aore rā Liahona, Mē 2013, 106).

Ha’amaita’ira’a i tā tātou ha’api’ira’a

Ha’amātau i te mau ta’ata tā ’outou e ha’api’i nei. E mau ’itera’a, e mau hi’ora’a, ’e e mau tāreni ta’a ’ē tō te ta’ata tāta’itahi tā ’outou e ha’api’i nei. ’A pure nō te ’ite ē, nāhea te tauturura’a a te ta’ata tāta’itahi e nehenehe ai e riro ’ei ha’amaita’ira’a nō te piha ha’api’ira’a tā’āto’a. (Hiʼo Ha’api’ira’a mai tā te Fa’aora, 7).