20–26 nō Tetepa

Te Parau Ha’api’ira’a ’e te mau Parau Fafau 106–108

« ’Ia vevetehia mai te ra’i ra »

’Ia tuatāpapa ’oe i Te Parau Ha’api’ira’a ’e te mau Parau Fafau 106–8, ’a feruri i te mau ’itera’a pae vārua tei roa’a i te mau melo o tā ’oe piha ha’api’ira’a ’a tuatāpapa ai rātou i teie mau tuha’a. ’A fa’aineine ai ’oe nō te ha’api’i ia rātou, e mea maita’i ïa ’ia ’ite ē, e aha tā rātou i tāpe’a mai hou ’outou ’a fārerei ai.

Pāpa’i i te mau mana’o e tae mai

Tītau i te mana’o

’A ani i te mau pīahi ’ia fa’a’ite mai i te hō’ē ’īrava i roto i teie mau tuha’a ’o tē ha’api’i ra i te hō’ē parau tumu ’o tē nehenehe e ha’apūai i te hō’ē ta’ata i roto i tā rātou tāvinira’a i te ’Ēkālesia.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 106 ; 108

E ha’api’i te Fatu, e fa’aitoito, ’e e pāturu i te feiā tāna e pi’i nō te tāvini.

• ’A tuatāpapa ai te mau pīahi i Te Parau Ha’api’ira’a ’e te mau Parau Fafau 106 ’e 108 i teie hepetoma, ’ua ’itehia paha ia rātou te mau parau ’o tē nehenehe e tauturu i te feiā e tāvini ra i roto i te mau pi’ira’a o te ’Ēkālesia (hi’o te arata’i ha’api’ira’a o teie hepetoma i roto i te Mai, pe’e mai—nō te ta’ata hō’ē ’e te ’utuāfare). E nehenehe e hōro’a i te mau pīahi i te taime nō te pāpa’i ni’a i te tāpura ’ere’ere i te mau pereota tei ’itehia mai ia rātou i roto i teie mau tuha’a, ’e e ani ia rātou ’ia fa’a’ite mai i tō rātou mau mana’o. E aha te mau mea i orahia mai e rātou e tū’ati nei ’aore rā, e fa’ahōho’a nei i teie mau pereota ?

Te Parau Ha’api’ira’a ’e te mau Parau fafau 107

E arata’i te Fatu i tāna ’Ēkālesia nā roto i te mana o te autahu’ara’a.

• E nehenehe ’oe e ha’amata i te hō’ē ’āparaura’a nō ni’a i te mau tōro’a autahu’ara’a nā roto i te anira’a i te piha ha’api’ira’a ’ia hāmani i te hō’ē tāpura o te mau tumu i hōro’a mai ai te Fatu ’ia tātou i te mau peropheta, ’āpōsetolo, ’e te tahi atu feiā fa’atere o te ’Ēkālesia. E nehenehe paha te mau melo nō te piha ha’api’ira’a e fa’a’ī maita’i i tā rātou tāpura i muri a’e i te tai’ora’a i Te Parau Ha’api’ira’a ’e te mau Parau Fafau 107:18–20. I muri iho, e nehenehe ’oe e hōro’a i te hō’ē taime nō te hi’o fa’ahou i te mau hōpoi’a tā te Fatu i hōro’a i te feiā e mau nei i teie mau tōro’a i muri nei : te Peresidenira’a Mātāmua (te mau ’īrava 9, 21–22, 65–66, 91–92), te Tino ’Ahuru ma Piti ’Āpōsetolo (te mau ’īrava 23–24, 33–35, 38, 58), te Hitu ’Ahuru (te mau ’īrava 25–26, 34, 93–97), ’e te mau ’episekōpo (te mau ’īrava 13–17, 68–76, 87–88). E aha tā tātou e nehenehe e rave nō te pāturu i tō tātou feiā fa’atere nā roto i tō tātou « ti’aturi, fa’aro’o, ’e te mau pure » ? (’īrava 22).

• Nāhea tātou i te pāhono mai te mea ē, e ui mai hō’ē hoa tō tātou e ’ere i tā tātou fa’aro’o, « E aha te autahu’ara’a ? » ’aore rā, « E aha te mau tāviri o te autahu’ara’a ? » E aha tā te mau ha’api’ira’a i roto i « Te tahi atu mau rāve’a tauturu » e fa’atupu i ni’a i tā tātou mau pāhonora’a ? E nehenehe ato’a paha e ’itehia i te mau pīahi te tahi mau mana’o maita’i i roto i Te Parau Ha’api’ira’a ’e te mau Parau Fafau 107: 1–4, 18–20 (hi’o ato’a Mau māite i te fa’aro’o, 124–28). Nāhea te autahu’ara’a i te tauturu ia tātou ’ia fāri’i i « te mau parau ’aro nō te bāsileia » ’e « ’Ia vevetehia mai te ra’i ra ia [tātou] » ? Nāhea te reira i te tauturu ia tātou « ’ia au noa ho’i i te ’itera’a ’e te aro o te Atua te Metua, ’e ia Iesu» ? (’īrava 19).

Te Parau Ha’api’ira’a ’e te mau Parau Fafau 107:27–31, 85

Tē fa’atere nei te Fatu i tōna bāsileia nā roto i te mau ’āpo’ora’a.

• ’Ua parau te peresideni M. Russell Ballard ē : « ’Ua ’ite au ē, ’ua riro te mau ’āpo’ora’a ’ei fa’anahora’a nā te Fatu, ’e ’ua hāmani ’oia i te mau mea ato’a i roto i te ao nui nā roto i te hō’ē ’āpo’ora’a i te ao ra » (« Te mau ’āpo’ora’a ’utuāfare », Ensign ’aore rā Liahona, Mē 2016, 63). Nāhea e ti’a ai ia ’oe ’ia tauturu i te feiā tā ’oe e ha’api’i nei ’ia hāro’aro’a e aha te huru te ’āpo’ora’a i te fare ’e i te fare purera’a ? E nehenehe paha ’oe e ani i te tahi mau melo ’ia haere mai ma te ineine e fa’a’ite mai i tō rātou mau ’itera’a i te fare purera’a ’aore rā, i te fare, i reira ho’i tō rātou fa’a’ohipara’a i te mau parau tumu o te ’āpo’ora’a i roto i Te Parau Ha’api’ira’a ’e te mau Parau Fafau 107: 27–31, 85 (’e ’aore rā, i roto i te a’ora’a a te peresideni Ballard tei fa’ahitihia i ni’a nei). E nehenehe e ani i te mau pīahi i roto i te hepetoma ’ia haere mai i roto i te piha ha’api’ira’a ma te ineine nō te fa’a’ite mai tō rātou mana’o nō ni’a i te mau mea e fa’ariro i te hō’ē ’āpo’ora’a ’ei ’āpo’ora’a maita’i. ’A fa’aitoito i te mau pīahi ’ia fa’ata’a i te mau parau tumu tā rātou i ’apo mai i roto i te ’āparaura’a, ’o tē tauturu ’ia ha’amaita’i atu ā ia rātou, ’a ’āmui ai i roto i te mau ’āpo’ora’a ’utuāfare ’e te mau ’āpo’ora’a a te ’Ēkālesia.

  

  Te ’āpo’o-’āmui-ra’a ’o te hō’ē ïa rāve’a nā te Fatu nō te fa’aoti i tāna ’ohipa.

Te tahi atu mau rāve’a tauturu

Mana o te autahu’ara’a

’Ua haʼapiʼi Elder Dallin H. Oaks ē :

« ’Aita tātou i mātau i te paraparau nō ni’a i te fāri’ira’a te mau vahine i te mana o te autahu’ara’a i roto i tō rātou mau pi’ira’a nō te ’Ēkālesia, terā rā, e aha pa’i te reira mana ’ē atu ? ’Ia fa’ata’a-ana’e-hia te hō’ē vahine—te mea ’āpī ’aore rā, te mea pa’ari—nō te poro i te ’evanelia ’ei misiōnare rave tāmau, e hōro’ahia iāna te mana o te autahu’ara’a nō te rave i te hō’ē ti’ara’a autahu’ara’a. ’Oia ato’a nō te hō’ē vahine ’o tē fa’ata’ahia nō te ha’a ’ei ti’a fa’atere ’aore rā, ’ei ’orometua ha’api’i i roto i te hō’ē pupu a te ’Ēkālesia i raro a’e i te fa’aterera’a a te hō’ē ’o tei mau i te mau tāviri o te autahu’ara’a. Te ta’ata e ha’a i roto i te hō’ē tōro’a ’aore rā, te hō’ē pi’ira’a, tei fāri’ihia nā roto mai i te hō’ē ’o tei mau i te mau tāviri o te autahu’ara’a, e fa’a’ohipa ’oia i te mana o te autahu’ara’a nō te rave i tāna mau ’ohipa i fa’ata’ahia » (« Te mau tāviri ’e te mana o te autahu’ara’a », Ensign ’aore rā Liahona, Mē 2014, 51).

’Ua parau te peresideni M. Russell Ballard :

« E mea hōro’a hua te Metua i te Ao ra i tōna mana. ’Ua matara teie mana i te mau tāne ato’a ’e te mau vahine ato’a nō te tauturu i roto i tō rātou orara’a. Te feiā ato’a tei fafau i te mau fafaura’a mo’a i mua i te Fatu ’e ’o tei fa’atura i te reira, ’ua fa’ati’ahia rātou ’ia fāri’i i te heheura’a nō te ta’ata iho, ’ia ha’amaita’ihia e te utuutura’a a te mau melahi, ’ia ’āmui atu ’e te Atua, ’ia fāri’i i te ’īra’a o te ’evanelia, ’e, i te pae hope’a, ’ia riro ’ei ta’ata ’āi’a i pīha’i iho ia Iesu Mesia, nō te mau mea ato’a a te Metua » (« Men and Women and Priesthood Power », New Era, Tetepa 2014, 4–5).

Ha’amaita’ira’a i tā tātou ha’api’ira’a

Tauturu i te mau pīahi ’ia turu i te tahi ’e te tahi. « ’Ua riro te pīahi tāta’itahi i roto i tā ’outou piha ’ei puna rahi nō te ’itera’a pāpū, te mau mana’o, ’e te mau ’itera’a nō te orara’a i te ’evanelia. ’A ani ia rātou ’ia fa’a’ite mai ’e ’ia fa’ateitei i te tahi ’e te tahi » (Ha’api’ira’a mai tā te Fa’aora, 5).