Hiero nō Kirtland

Hiero nō Kirtland, nā Jon McNaughton.

27 nō Tetepa–3 nō ’Ātopa

Te Parau Ha’api’ira’a ’e te mau Parau Fafau 109–110

« ’O tō ’oe iho ïa fare, ’ei vāhi nō tō ’oe mo’ara’a na »

Tē fa’ata’a nei Te mau tuhaa 109 ’e te 110 i te tahi o te mau ’ohipa mo’a roa a’e i tupu i roto i te Fa’aho’i-fa’ahou-ra’a mai. ’Ia pāpū ē e vaiihohia te mau pīahi ’ia fa’a’ite mai i tō rātou mau mana’o ’a tuatāpapa ai rātou i teie mau ’ohipa i tupu.

Pāpa’i i te mau mana’o e tae mai

’ītona fa’a’itera’a

Tītau i te mana’o

’Ua parau te Fatu ē : « E parare atu te ro’o nō teie fare nei [te hiero nō Kirtland] i te mau fenua ’e’ē ra » (Te Parau Ha’api’ira’a ’e te mau Parau Fafau 110:10). E nehenehe ’oe e ani i te mau pīahi ’ia fa’a’ite mai i te hō’ē mea tei ’itehia e rātou i roto i tā rātou tuatāpapara’a, tā rātou e mana’o ra ē, e ti’a ’ia fa’a’itehia i te mau ta’ata ’ati a’e i te ao nei.

’ītona ha’api’ira’a

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 109 ; 110:1–10

Tē hina’aro nei te Fatu e ha’amaita’i ia tātou i roto i tāna fare mo’a.

• Te tuatāpapara’a i te tuha’a 109 ’o te hō’ē ïa rāve’a fa’ahiahia roa nō te tauturu i te mau pīahi ’ia ha’apūai i tō rātou hina’aro ’ia ha’amori i roto i te hiero. E nehenehe ’oe e pāpa’i i ni’a i te tāpura ’ere’ere i te nūmera o te tahi mau ’īrava e fa’ahiti ra i te mau ha’amaita’ira’a o te hiero— mai te mau ’īrava 12–13, 22–23, 24–28, 29–32. E nehenehe te mau melo nō te piha ha’api’ira’a e mā’iti i te mau ’īrava nō te tai’o ’e nō te feruri i ni’a i te reira, ’ei ta’ata hō’ē ’aore rā, ’ei pupu, ’e i muri iho, e ha’apoto mai nō te piha ha’api’ira’a i te ha’amaita’ira’a tā te reira mau ’īrava e fa’ata’a ra. Te mau melo tei haere i te hiero, e nehenehe rātou e fa’a’ite mai e mea nāhea teie mau ha’amaita’ira’a i te tupura’a i roto i tō rātou orara’a.

  E nehenehe ato’a ’outou e tai’o ’aore rā, e hīmene ’āmui « ’Auē te Vārua o te Atua » (Te mau hīmene, N°2), tei hīmenehia i te ha’amo’ara’a o te hiero nō Kirtland. E nehenehe te mau pīahi e fa’a’ite mai i te mau ha’amaita’ira’a o te hiero tei tātarahia i roto i te hīmene ’e e fa’a’ite mai i te tahi mau ’itera’a tā rātou i fāri’i nō ni’a i te reira, mai te mea e nehenehe.

• Te fāri’ira’a i te mau ha’amaita’ira’a o te hiero, pinepine te reira i te tītau i te fa’atusiara’a. E aha tā Te Parau Ha’api’ira’a ’e te mau Parau Fafau 109:5 e ha’api’i nei nō ni’a i te mau fa’atusiara’a i ravehia e te mau Feiā Mo’a mātāmua nō te patu i te hiero nō Kirtland ? E nehenehe paha hō’ē ta’ata e haere mai ma te ineine ’ia paraparau mai nō ni’a i teie mau fa’atusiara’a. E aha te mau fa’atusiara’a tā tātou e rave nei nō te fāri’i i te mau ha’amaita’ira’a o te hiero i teie mahana ? E hina’aro paha te mau pīahi e fa’a’ite mai i tō rātou mau ’itera’a. E ’itehia te tahi mau hi’ora’a nō teie tau i roto i te video « Sealed Together: The Manaus Temple Caravan [Tā’ati-’āmui-hia : Te hiero nō Manaus] » ’e « Temples Are a Beacon [E fare mōrī te mau hiero] » (ChurchofJesusChrist.org).

• E riro te tuatāpapara’a i te tātarara’a o te Fa’aora tei ti’afa’ahou i roto i Te Parau Ha’api’ira’a ’e te mau Parau Fafau 110:1–10 ’ei rāve’a maita’i roa nō te patu i tō tātou fa’aro’o ia Iesu Mesia. E nehenehe ’oe e ani i te mau pīahi ’ia tāpa’o i te fa’ahōho’ara’a i roto i teie mau ’īrava ’e ’ia feruri ē, e aha tā teie mau hōho’a e ha’api’i nei ia tātou nō ni’a ia Iesu Mesia. E aha tā te « aroā i ’ohipahia i te ’auro mau ra » e fa’ahōho’a nei ? ’aore rā, te reo « mai te tahera’a ïa o te pape rahi » ?

  ’O roto i te hiero nō Kirtland

  I nā pae e piti o te hiero nō Kirtland, tē vai nei te puripiti nō te feiā fa’atere autahu’ara’a.

Te Parau Ha’api’ira’a ’e te mau Parau Fafau 110:11–16

Tei roto i te ’Ēkālesia te mau tāviri autahu’ara’a tei tītauhia nō te fa’aoti i te ’ohipa a te Atua i teie mahana.

• Nō te tauturu i te mau pīahi ’ia māramarama i te mau tāviri o te autahu’ara’a tā Mose, Elia ’e ’o Eliaha i hōro’a ia Iosepha Semita ’e ia Oliver Cowdery ra i roto i te hiero nō Kirtland, e nehenehe ’oe e ani ia rātou ’ia tai’o ’e ’ia ’āparau i te fa’ahitira’a parau i roto i « Tē tahi atu mau rāve’a tauturu », ’ei ta’ata hō’ē ’aore rā, ’ei pupu. Nō te aha e mea faufa’a rahi teie mau tāviri i roto i tō tātou orara’a i teienei ? E nehenehe ato’a ’oe e ani i te mau melo tāta’itahi o te piha ha’api’ira’a ’ia mā’iti i te hō’ē o te mau peropheta tei hōro’a mai i teie mau tāviri—Mose, Elia, ’e Eliaha—’e ’ia ha’api’i mai nō ni’a iāna i roto i te Fa’atoro Bibilia ’aore rā, te Arata’i nō te pāpa’ira’a mo’a. E aha tā te orara’a o teie mau peropheta e ha’api’i nei ia tātou nō ni’a i te mau tāviri tā rātou i hōro’a mai ? E nehenehe teie e fa’atupu i te hō’ē ’āparaura’a nō ni’a i te mea tā te Fatu e tīa’i nei ia tātou ’ia rave i teienei tei ni’a teie mau tāviri i te fenua nei.

’ītona nō tē tahi atu mau rāve’a tauturu

Te tahi atu mau rāve’a tauturu

E hōro’a mai te mau tāviri i te mana ’e te ha’amanara’a nō te ’ohipa a te Atua.

’Ua ha’api’i Elder Quentin L. Cook ē :

« E ʼere te vāhi ’e te rahi o te hiero nō Kirtland i te mea mātau-roa-hia. I te pae rā o tōna faufaʼa rahi nō te taʼata nei, e faʼaineineraʼa ïa nō te ora mure ʼore. ’Ua faʼahoʼi mai te mau peropheta tahito i te mau tāviri autahuʼaraʼa nō te mau ʼōroʼa faʼaoraraʼa mure ’ore o te ʼevanelia a Iesu Mesia. Tei faʼatupu hoʼi i te ʼoaʼoa rahi i roto i te mau melo ha’apa’o maita’i.

« Tē hōro’a nei teie mau tāviri i te ‘mana nō ni’a mai’ [Te Parau Ha’api’ira’a ’e te mau Parau Fafau 38:38] nō te mau hōpoiʼa tei faʼataʼahia mai e te Atua ’ei fā mātāmua nō te ʼĒkālesia. I taua mahana Pāsa nehenehe ra, i roto i te hiero nō Kirtland, ʼua faʼahoʼihia mai e toru tāviri :

« ’A tahi, ʼua fā mai Mose nō te hōro’a mai i te mau tāviri nō te putuputuraʼa ia ’Īserā’ela mai nā poro e maha o te fenua nei, ʼoia hoʼi te ʼohipa misiōnare.

« Te piti, ʼua fā mai Elia nō te hōro’a mai i te mau tāviri nō te tau tuʼuraʼa ʼevanelia a Aberahama, tei roto hoʼi te faʼahoʼiraʼahia mai te fafauraʼa a Aberahama [hi’o i te Aberahama 2:8–11]. ’Ua ha’api’i mai te peresideni Russell M. Nelson ē, te fā o te mau tāviri o te fafaura’a, nō te fa’aineine ïa i te mau melo nō te bāsileia o te Atua [hi’o « Te mau fafaura’a » Ensign ’e ’aore rā Liahona, Novema 2011, 88]…

« Te toru, ʼua fā mai Eliaha nō te hōro’a mai i te mau tāviri nō te mana tāʼatiraʼa i roto i teie tau tuʼuraʼa ’evanelia, ʼoia hoʼi te ʼohipa nō te ʼāʼamu ʼutuāfare ʼe te mau ʼōroʼa o te hiero nō te faʼaoraraʼa i te feiā ora ʼe te feiā pohe » (« Fa’aineine nō te fārerei i te Atua », Ensign ’aore rā Liahona, Mē 2018, 114–15).

Ha’amaita’ira’a i tā tātou ha’api’ira’a

Tītau i te Vārua i roto i tā ’oe ha’api’ira’a « Te fā hope’a o te mau mea ato’a tā te hō’ē ’orometua ha’api’i ’evanelia e rave—te mau uira’a ato’a, te mau ’īrava pāpa’ira’a mo’a ato’a, te mau ’ohipara’a ato’a—nō te tītau ïa i te Vārua, nō te patu i te fa’aro’o, ’e nō te ani i te mau ta’ata ato’a ’ia haere mai i te Mesia ra… E nehenehe te pehe mo’a, te mau pāpa’ira’a mo’a, te mau parau a te mau peropheta nō te mau mahana hope’a nei, te fa’a’itera’a i te here ’e te ’itera’a pāpū, ’e te mau taime ferurira’a hau, e tītau i te Vārua ’ia pārahi mai i reira » (Ha’api’ira’a mai tā te Fa’aora,10).