Tau fa’atupura’a rā’au i te fare tāpe’ara’a nō Liberty, nā Al Rounds

18–24 nō ’Ātopa

Te Parau Ha’api’ira’a ʼe te mau Parau Fafau 121–123

« E te Atua, tei hea ra ’oe ? »

Te rāve’a maita’i a’e nō te fa’aineine nō te ha’api’i ’o te tai’ora’a ïa i te mau pāpa’ira’a mo’a, te ferurira’a i te mau ta’ata tā ’oe e ha’api’i, ’e te pe’era’a i te Vārua. E nehenehe te mau mana’o i roto i teie arata’ira’a ha’api’ira’a e pāturu i te fa’aurura’a tā ’outou e fāri’i.

Pāpa’i i te mau mana’o e tae mai

Tītau i te mana’o

’A ani i te mau pīahi ’ia mā’iti i te hō’ē parau poro’i i roto i Te Parau Ha’api’ira’a ’e te mau Parau Fafau 121–23 tā rātou e hina’aro e fa’a’ite i te hō’ē ta’ata e māuiui ra. ’A vaiiho ia rātou ’ia fa’ata’a mai i tā rātou i mā’iti.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 121:1–33 ; 122

Mai te mea e fa’a’oroma’i māite tātou i tō tātou mau tāmatara’a, e fa’ateitei te Atua ia tātou i ni’a roa.

• Tē vai ra paha te tahi mau pīahi, nō te teimaha o te mau tāmatara’a, tē feruri ato’a ra mai tā Iosepha Semita i parau i roto i Te Parau Ha’api’ira’a ’e te mau Parau Fafau 121:1–6. I muri a’e i te tai’o-’āmui-ra’a ’outou i teie mau ’īrava, e nehenehe ’oe e ani i te mau pīahi ’ia ’imi ’e ’ia fa’a’ite mai i te mau parau poro’i i roto i te mau ’īrava 7–33 ’o tē hōro’a ia rātou i te ti’aturi ’e te tāmāhanahana i roto i tō rātou mau tāmatara’a. E aha te aura’a e « fa’a’oroma’i māite » ? (’īrava 8). Nāhea te Fa’aora i te tauturu ia tātou ’ia fa’a’oroma’i māite ? Nāhea e nehenehe ai ia tātou ’ia tauturu te tahi ’e te tahi ’ia fa’a’oroma’i māite ?

• Nō te tauturu i te mau pīahi ’ia feruri e nāhea te mau tāmatara’a e nehenehe ai « e hōro’a ia [tātou] i te ’itera’a » ’e « ’ia riro ’ei maita’i nō [tātou] » (Te Parau Ha’api’ira’a ’e te mau Parau Fafau 122:7), e nehenehe ’oe e hōro’a ia rātou i te hō’ē ’api parau, ’e e ani ia rātou ’ia pāpa’i i te hō’ē tāmatara’a tā rātou i fārerei. I ni’a i te tahi atu pae o te ’api parau, e nehenehe te mau melo nō te piha ha’api’ira’a e pāpa’i i te mau ta’o « ’itera’a » ’e « maita’i ». ’A ’āparau ’āmui ai ’outou i Te Parau Ha’api’ira’a ’e te mau Parau Fafau 122, ’a fa’aitoito i te mau pīahi ’ia pāpa’i i te tahi mau mana’o tō rātou nō ni’a i te « tahi atu pae » o tō rātou mau tāmatara’a : te « ’itera’a » ’aore rā, te « maita’i » tei noa’a ia rātou. E ’ana’anatae paha te tahi mau pīahi ’ia fa’a’ite mai e mea nāhea tō rātou tāmatara’a i te rirora’a ’ei maita’i nō rātou i te hope’ara’a. ’Aore rā, e nehenehe rātou e tai’o i te ’ohipa i tupu nō Elder Koichi Aoyagi i roto i te « ’A tāpe’a noa na ’oe i tō haerea » (Ensign ’e ’aore rā Liahona, Novema 2015, 126–28).

Te Parau Haapiiraa e te mau Parau Fafau 121:34–46

’Ia riro tātou ’ei mea parauti’a nō te fāri’i i te « mau mana o te ra’i ».

• E mea maita’i paha ’ia fa’aau i te huru nō te tāpe’ara’a te « mana ’aore rā, te hō’ē vāhi iti a’e nō te tura » i roto i te ao nei, i te huru tā te Fatu i ha’api’i nō te tāpe’a i te reira (hi’o i te tuha’a 121). Nō te tauturu i teie ’āparaura’a, e nehenehe ’oe e hāmani e piti ’āna’ira’a i ni’a i te tāpura ’ere’ere ’o tei parauhia te mana o te ao nei ’e te mau mana o te ra’i. E nehenehe te mau pīahi e fa’a’ī i nā ’āna’ira’a i te mau ta’o ’e te mau pereota nō roto mai i Te Parau Ha’api’ira’a ’e te mau Parau Fafau 121: 34–46. Nāhea e nehenehe ai i teie mau ’īrava ’ia taui i te huru nō tā tātou hi’ora’a i tā tātou mau hōpoi’a i roto i tō tātou ’utuāfare, ’ei mau taea’e ’e ’ei mau tuahine aupuru, ’aore rā, i roto i te tahi atu mau ’ohipa tā tātou e ti’aturi e fa’auru ia vetahi ’ē nō te maita’i ?

• Hō’ē rāve’a nō te ’āparau i te a’ora’a ’e te mau ha’amaita’ira’a nehenehe i roto i Te Parau Ha’api’ira’a ’e te mau Parau Fafau 121: 45–46 ’o te vāhira’a ïa i te piha ha’api’ira’a ’ei pupu, ’e ’ia ani i te pupu tāta’itahi ’ia tuatāpapa ’e ’ia ’āparau i te hō’ē pereota nō roto mai i te mau ’īrava, mai teie, « ’ia fa’a’una’una noa te tai’ata ’ore i tō ’outou mau ferurira’a i te mau taime ato’a » ’aore rā, « mai te hupe nō te ra’i mai ra ». E nehenehe rātou e ’imi i te mau tātarara’a o te mau ta’o, e tai’o i te mau ’īrava nō te reira i roto i te mau fa’ata’ara’a i raro i te ’api, ’e ’ia ’āparau e aha te aura’a o te mau pereota nō rātou. E hina’aro paha te tahi mau pupu e pāpa’i i te mau hōho’a nō te fa’ahōho’a i tā rātou pereota. ’A ani i te pupu tāta’itahi ’ia fa’a’ite mai i te piha ha’api’ira’a i te mea tā rātou i ha’api’i mai.

Te Parau Ha’api’ira’a ’e te mau Parau Fafau 122:8–9

’Ua pou ’o Iesu Mesia i raro a’e i te mau mea ato’a ra, ’e tē ha’apūai nei ia tātou i roto i tō tātou mau tāmatara’a.

• E nehenehe te hāro’aro’ara’a ē, « ’ua pou Iesu Mesia i raro a’e i [te mau mea] ato’a ra » e hōro’a i te mau pīahi i te ti’aturira’a ’ia fāriu atu i ni’a iāna. E nehenehe teie atu mau ’īrava pāpa’ira’a mo’a e tauturu i te ha’amāramaramara’a i te aura’a o teie pereota : Isaia 53: 3–4 ; Hebera 2:17–18 ; 1 Nephi 11:16–33 ; Alama 7:11–13. E nehenehe te mau pīahi e tai’o i teie mau ’īrava, ’e tae noa atu i Te Parau Ha’api’ira’a ’e te mau Parau Fafau 122:8, ma te ’imi i te hō’ē mea ’o tē patu i tō rātou fa’aro’o ē, e nehenehe Iesu Mesia e tauturu ia rātou i roto i tō rātou mau tāmatara’a. E nehenehe ato’a e ’itehia ia rātou te fa’aurura’a i roto i te mau hīmene nō ni’a i te Fa’aora, mai te hīmene « I hea vau e fāri’i ai i te hau ? »(Te mau hīmene, N°62.)

• E hōro’a mai te fa’ahitira’a parau i roto i « Tē tahi atu mau rāve’a tauturu » i te tahi atu mana’o nō ni’a i te huru o tō te Fa’aora poura’a i raro a’e i te mau mea ato’a. E nehenehe ’oe e feruri i te hō’ē rāve’a nō te fa’ata’a ē, nāhea te vaira’a i « raro a’e » i te hō’ē tauiha’a teimaha, i te « ha’apāpū maita’i i tō tātou ti’ara’a nō te amo i te [reira] ». Nāhea te ’itera’a ē, ’ua pou te Fa’aora i raro a’e i te mau mea ato’a i te tauturu ia tātou i roto i tō tātou mau tāmatara’a ?

  

  ’Ua ’ite Iesu i tō tātou mamae. ’Eiaha tō’u hina’aro, ’ia ti’a rā tō ’oe hina’aro, nā Walter Rane.

Tē tahi atu mau rāve’a tauturu

’Ua pou te Mesia i raro a’e i te mau mea ato’a.

’Ua haʼapiʼi ʼo Elder Dallin H. Oaks :« E rave rahi mirioni ta’ata mata’u i te Atua ’o tē pure nei i te Atua ’ia fa’ati’ahia rātou i rāpae i tō rātou mau ’ati. ’Ua heheu mai tō tātou Fa’aora ē, ’ua pou mai ’oia i raro a’e i te mau mea ato’a ra’ (PH&PF 88:6). Mai tā Elder Neal A. Maxwell i ha’api’i, ‘I te mea ho’i ē, « ’ua pou ’oia i raro a’e i te mau mea ato’a ra », ’ua māramarama, ’ua ’ite pāpū roa ’oia iho, i te fāito hope’a o te mamae o te ta’ata nei’ [Ensign, Nov. 1997, 23]. E nehenehe roa tā tātou e parau ē, nō te mea ’ua pou ’oia i raro a’e i te mau mea ato’a ra, tē ti’a nei ’oia i te vāhi tano maita’i nō te amo ia tātou ’e nō te hōro’a ia tātou i te pūai e tītauhia ia tātou nō te fa’a’oroma’i i tō tātou mau ’ati » (« Ha’apūaihia nā roto i te Tāra’ehara a Iesu Mesia », Ensign ’e ’aore rā Liahona, Novema 2015, 64).

Ha’amaita’ira’a i tā tātou ha’api’ira’a

E mea fa’auruhia tō ’oe pi’ira’a. ’Ei ’orometua ha’api’i, ’ua pi’ihia ’oe nā te Fatu nō te ha’amaita’i i tāna mau tamari’i. Tē hina’aro nei ’oia ’ia manuia ’oe, nō reira, mai te mea ē, e ora ’oe ma te ti’amā nō te fāri’i i tāna tauturu, e hōro’a ’oia ia ’oe i te heheura’a tei tītauhia nō ’oe (hi’o Ha’api’ira’a mai tā te Fa’aora, 5).