Nauvoo te nehenehe, nā Larry Winborg

25–31 nō ’Ātopa

Te Parau Ha’api’ira’a ’e te mau Parau Fafau 124

« Hō’ē fare i tō’u nei i’oa »

Nō tē vaiiho i te Vārua ’ia fa’aha’amana’o mai ia tātou i te mau parau tumu ’a ha’api’i ai tātou (hi’o Ioane 14:26), e ti’a ia tātou nā mua roa ’ia tuatāpapa māite ’e ’ia feruri hōhonu i te reira mau parau tumu.

Pāpa’i i te mau mana’o e tae mai

Tītau i te mana’o

E nehenehe ’oe e ani i te mau pīahi ’ia fa’a’ite mai i te hō’ē mea tei ’itehia ia rātou i roto i Te Parau Ha’api’ira’a ’e te mau Parau Fafau 124 ’o tei fa’aue ia rātou ’ia feruri i te hō’ē parau tumu nō te ’evanelia i roto i te hō’ē hi’ora’a ’āpī. E aha tā rātou i tai’o— ’ei ta’ata hō’ē ’aore rā, ’ei ’utuāfare— o tei taui i tā rātou huru ’itera’a, te ferurira’a ’aore rā te orara’a ?

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 124:15, 20

Tē ’oa’oa nei te Fatu i te orara’a vi’ivi’i ’ore.

• I roto i te tuha’a 124, ’ua ha’apoupou te Fatu ia Hyrum Smith ’e ia George Miller nō tō rāua parauti’a. Nō te tauturu i te mau pīahi ’ia tuatāpapa hōhonu atu i teie huru, e nehenehe ’outou e ani ia rātou ’ia tai’o i Te Parau Ha’api’ira’a ’e te mau Parau Fafau 124:15, 20, ’e ’ia feruri i te mea tā rātou i ha’api’i mai nō ni’a i te parauti’a nā roto mai i teie mau ’īrava. E aha atu ā tā tātou i ’apo mai i roto i te mau pāpa’ira’a mo’a tei tāpurahia i raro a’e i te « Parauti’a » i roto i te Arata’i pāpa’iraa mo’a (scriptures.ChurchofJesusChrist.org) ’aore rā, i roto i te parau poro’i a Elder Richard J. Maynes « Te fāri’ira’a i te ti’aturira’a o te Fatu ’e o tō ’outou ’utuāfare » ? (Ensign ’aore rā Liahona, Novema 2017, 75–77). E nehenehe paha te mau melo o te piha ha’api’ira’a e fa’a’ite mai i te mau hi’ora’a o te mau ta’ata parauti’a tā rātou i mātau. Nō te aha te parauti’a i riro ai ’ei huru faufa’a rahi ?

Te Parau Ha’api’ira’a ’e te mau Parau Fafau 124:22–24, 60–61

Tē hina’aro nei te Fatu ia tātou ’ia mānava ’e ’ia fāri’i ia vetahi ’ē.

• E nehenehe te mau pīahi e ha’api’i mai i te hō’ē mea i roto i te tātarara’a a te Fatu nō ni’a i te fare o Nauvoo ’o tē nehenehe e tauturu ia rātou i roto i tā rātou mau fārereira’a ’e te tahi atu mau ta’ata e ’ere i te Feiā Mo’a i te mau Mahana Hope’a nei ’aore rā, i te feiā tei fa’aru’e i te ’Ēkālesia. E nehenehe ’oe e pāpa’i i te hō’ē hōho’a fare i ni’a i te tāpura ’ere’ere ’e e ani i te mau pīahi ’ia ’imi Te Parau Ha’api’ira’a ’e te mau Parau Fafau 124:22–24, 60–61 nō te mau ta’o tā te Fatu i fa’a’ohipa nō te tātara i te mau fā o te fare nō Nauvoo. I reira e nehenehe ai ia rātou ’ia pāpa’i i te mau ta’o ’ati a’e te fare. Nāhea teie mau parau e au ato’a ai nō te ’Ēkālesia a Iesu Mesia ? E aha tā tātou e nehenehe e rave nō te fa’atupu i teie ato’a huru peu fāri’i i roto i tā tātou pāroita ’e i tō tātou fare ?

Te Parau Ha’api’ira’a ’e te mau Parau Fafau 124:25–45, 55

’Ua fa’aue mai te Fatu ia tātou ’ia patu i te mau hiero ’ia ti’a ia tātou ’ia fāri’i i te mau ’ōro’a mo’a.

• E nehenehe paha te mau melo nō te piha ha’api’ira’a e feruri ē, tē ora nei rātou i Nauvoo i te matahiti 1841 ’e tē rave ra i te ’ohipa i ni’a i te hiero nō Nauvoo, ’a ui mai ai te hō’ē hoa ē, « Nō te aha tātou e tāmau noa ai i te patu i teie mau hiero ? » E aha tā tātou e parau i teie hoa ? E nehenehe te mau melo nō te piha ha’api’ira’a e ’imi i te mau mana’o i roto i Te Parau Ha’api’ira’a ’e te mau Parau Fafau 124:28–30, 37–42, 55. Mai te mea ’aita te tahi mau melo o te piha ha’api’ira’a i mātau i te mau ’ōro’a i fa’ahitihia i roto i teie mau ’īrava, e nehenehe ’outou e tātara i te mau fā ’e te mau ha’amaita’ira’a o teie mau ’ōro’a. Hi’o temples.ChurchofJesusChrist.org nō te arata’ira’a nō ni’a i te mea e tano ’ia ’āparau i rāpae i te hiero ’e nō te mau hōho’a o te mau hiero o tā ’outou e nehenehe e fa’a’ite i roto i te piha ha’api’ira’a.

  

  Iosepha Semita i te Hiero nō Nauvoo, nā Gary E. Smith.

Te Parau Ha’api’ira’a ’e te mau Parau Fafau 124:45–55

E ha’amaita’i te Fatu i te feiā e tūtava i te ha’apa’o i tāna mau fa’auera’a.

• ’Ua fa’auehia i te feiā mo’a ’ia patu i te hō’ē hiero i te mata’eina’a nō Jackson, terā rā, « ’ua fa’ataupupuhia ho’i e tō rātou ra mau ’enemi » (Te Parau Ha’api’ira’a ’e te mau Parau Fafau 124:51). I roto i te mau ’īrava 49–55, i reira tō te Fatu paraparaura’a mai i teie fifi, tē vai ra te hō’ē parau poro’i tāmāhanahana nō te mau ta’ata e hina’aro e ha’apa’o i te mau fa’auera’a a te Atua terā rā, ’ua fa’ataupupuhia rātou ’ia nā reira, nō te ’utuāfare ānei ’aore rā, nō te huru terera’a ’ohipa ānei. E nehenehe ’oe e tai’o i teie mau ’īrava ’e te mau pīahi, ’e e ani ia rātou ’ia feruri i te mau huru e ’ore ai e ti’a i te ta’ata ’ia fa’atupu i tō rātou mau hina’aro ti’a, nō te mea, e’ita e noa’a ia rātou ’ia ārai i te huru terera’a o te ’ohipa. E aha te parau a’o e ’itehia ia tātou i roto i teie mau ’īrava, ’o tē nehenehe e tauturu i te hō’ē ta’ata i roto i taua huru fifi ra ? E aha tā teie mau ’īrava e haʼapiʼi nei ia tātou nō niʼa i te ha’apa’o?

Te Parau Ha’api’ira’a ’e te mau Parau Fafau 124:91–92

E nehenehe te Fatu e arata’i ia tātou nā roto i tō tātou ha’amaita’ira’a pātereāreha.

• E fāna’o ānei te mau melo o tā ’oe piha ha’api’ira’a i te hō’ē ’āparaura’a nō ni’a i te mau pātereāreha ’e te mau ha’amaita’ira’a pātereāreha ? E nehenehe ’oe e ha’amata nā roto i te ani-manihini-ra’a i te mau pīahi ’ia tai’o i Te Parau Ha’api’ira’a ’e te mau Parau Fafau 124:91–92, ma te ’imi i te mea i pi’ihia ia Hyrum Smith ’ia rave. I muri iho e nehenehe ’oe e pāpa’i i ni’a i te tāpura ’ere’ere e aha ’e nō te aha ’e e ani i te mau pīahi ’ia tai’o i « Te mau ha’amaita’ira’a pātereāreha » (Mau māite i te fa’aro’o, 111–13) nō te ’ite ē, e aha te mau ha’amaita’ira’a pātereāreha, ’e nō te aha e mea faufa’a te reira. Nāhea te hō’ē ta’ata ’ia fa’aineine iāna nō te fāri’i i te hō’ē ha’amaita’ira’a pātereāreha ? E nehenehe ’oe e ani i te tahi mau ta’ata tei fāri’i i tō rātou ha’amaita’ira’a pātereāreha ’ia fa’a’ite mai nō te aha rātou i ’oa’oa ai i te reira. (’A fa’aha’amana’o ia rātou ’eiaha e fa’a’ite mai i te mau mea nōna iho ’aore rā, i te mau mea mo’a i roto i tō rātou ha’amaita’ira’a). Nāhea tātou ’ia fa’a’ite ē, tē ha’afaufa’a rahi nei tātou i tō tātou ha’amaita’ira’a pātereāreha ?

Ha’amaita’ira’a i tā tātou ha’api’ira’a

’A pure nō tā ’outou mau pīahi. Pure ma te fa’ahiti i te i’oa o te feiā tā tātou e ha’api’i ra. E nehenehe ’outou e pure nō te hāro’aro’a i tō rātou mau hina’aro ’e nō te ’ite e aha te ha’api’i nō te pāhono i te reira mau hina’aro. E nehenehe ato’a ’outou e ani i te Metua i te Ao ra ’ia « fa’aineine i tō rātou ’ā’au » (Alama 16:16) nō te fāri’i i te mau parau mau tā ’outou e ha’api’i. (Hiʼo Ha’api’ira’a mai tā te Fa’aora,6.)