Far West, nā Al Rounds

11–17 nō ’Ātopa

Te Parau Ha’api’ira’a ʼe te mau Parau Fafau 115–120

« E riro tāna tusia ’ei mea mo’a a’e iāna i tāna ’āpī ra »

’A fa’aineine ai ’oe nō te ha’api’i, e ha’amana’o ē, tā ’oe fā tumu ’o te tauturu ïa ia vetahi ’ē ’ia patu i te fa’aro’o ia Iesu Mesia.

Pāpa’i i te mau mana’o e tae mai

Tītau i te mana’o

Nā mua a’e ’outou e paraparau ai nō ni’a i te mau parau tumu i roto i te mau tuha’a 115–20 tei riro ’ei mea faufa’a rahi nō ’oe, ’a ani i te mau pīahi ’ia fa’a’ite mai e aha tei riro ’ei mea faufa’a nō rātou. ’Ei hi’ora’a, e nehenehe ’oe e ani i te mau pīahi ’ia fa’ahope i teie pereota : « Tē ’oa’oa nei au i te tai’o i te mau tuha’a 115–20 nō te mea… »

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 115:4–6

’Ua riro te ’Ēkālesia a Iesu Mesia i te Feiā Mo’a i te mau Mahana Hope’a nei ’ei pāruru ’e ’ei ha’apūra’a.

• E nehenehe te mau melo nō te piha ha’api’ira’a e ’imi i roto i te a’ora’a a te peresideni Russell M. Nelson « Te i’oa ti’a o te ’Ēkālesia » (Ensign ’e ’aore rā Liahona, Novema 2018, 87–90) nō te mau mana’o ’o tē tauturu ia rātou ’ia māramarama i te mau ’īrava 4–6. Nō te aha e mea faufa’a ’ia fa’a’ohipa i te i’oa ti’a o te ’Ēkālesia ?

• I muri a’e i te tai’o-’āmui-ra’a i Te Parau Ha’api’ira’a ’e te mau Parau Fafau 115: 4–6, e nehenehe te mau melo nō te piha ha’api’ira’a e ’āparau e nāhea te ’Ēkālesia ’e tōna mau melo i te riro mai te hō’ē mōrī ’aore rā, mai te hō’ē reva. E nehenehe ’oe e fa’a’ite i te hōho’a nō te hō’ē fare mōrī i roto i te vero, ’e e ani i te mau pīahi nāhea te reira i te tū’ati i te parau poro’i o te mau ’īrava 5–6. Nāhea te putuputura’a « i te fenua nō Ziona, ’e… i tōna mau titi » i te hōro’ara’a ia ’outou i te hō’ē « vāhi ha’apūra’a nō te vero » ? (’īrava 6).

  

  E nehenehe tātou e ’ana’ana ’ei māramarama nō te tauturu ia vetahi ’ē ’ia ’ite i te ha’apūra’a i roto i te ’Ēkālesia.

Te Parau Ha’api’ira’a ’e te mau Parau fafau 117

E mea mo’a tā tātou mau fa’atusiara’a nō te Fatu.

• ’A ani i te mau pīahi ’ia feruri ē, ’o rātou ’o Newel K. Whitney ’e ’aore rā, tāna vahine ’o Elizabeth, ’o tei fatu i te hō’ē fare toa manuia maita’i i Kirtland, terā rā, ’ua ani te Fatu ia rāua ’ia fa’aru’e i tō rāua fenua ’e ’ia haere i Missouri. I muri iho, e nehenehe rātou e tai’o i te mau ’īrava 1–11 ’e e fa’a’ite mai i te hō’ē mea tā te Fatu i parau ’o tei tauturu ia rāua ’ia rave i teie fa’atusiara’a.

• E nehenehe te mau hōho’a e tauturu i te mau pīahi ’ia feruri i te « tōpatara’a » tā tātou e nounou nei i te tahi taime, i mua ho’i i « te mau mea faufa’a rahi a’e » (’īrava 8). E nehenehe e fa’a’ite i te mau tauiha’a mai te hō’ē tōpatara’a pape ’e te hō’ē mōhina pape ’aore rā, hō’ē hu’ahu’a tōtōrā ’e hō’ē tāpū tōtōrā. E nehenehe te mau melo nō te piha ha’api’ira’a e feruri i te tahi atu mau hi’ora’a. E nehenehe ato’a ’oe e pāpa’i i ni’a i te tāpura ’ere’ere tōpatara’a ’e te mau mea faufa’a rahi a’e ’e e ani i te mau pīahi ’ia tāpura mai i te mau hi’ora’a nō te mau mea e nehenehe e tītauhia ia tātou ’ia « tu’u atu » (’īrava 5) ’ia ti’a ia tātou ’ia fāri’i i te « mau mea e rave rahi » nā te Atua ra (’īrava 7).

• Mai te mea ē, e tae mai te tahi mau mana’o i roto i te mau pīahi ’a tai’o ai i te mau parau a te Fatu nō ni’a ia Oliver Granger i roto i te mau ’īrava 12–15, ’a ani ia rātou ’ia fa’a’ite mai. Nō te aha tā tātou mau fa’atusiara’a i te riro ’ei mea mo’a a’e nō te Fatu i tō tātou ’āpī ?

Te Parau Ha’api’ira’a ʼe te mau Parau Fafau 119–20

Nā roto i te ’aufaura’a i te tuha’a ’ahuru, tē tauturu ra ïa tātou i te patu ’e « i te ha’amo’a i te fenua nō Ziona ».

• ’A feruri na i te pūai pae vārua e nehenehe e tae mai nā roto mai i te mau pīahi, i te fa’a’itera’a i te tahi ’e te tahi i te mau ha’amaita’ira’a tā rātou i fāri’i nā roto i te ha’apa’ora’a i te ture o te tuha’a ’ahuru. E nehenehe ato’a rātou e tai’o i Te Parau Ha’api’ira’a ’e te mau Parau Fafau 119:6 ’e ’ia ’āparau e nāhea e nehenehe ai i teie ture ’ia « ha’amo’a i te fenua nō Ziona » ’e ’ia fa’ariro i tō tātou pāroita ’aore rā, te ’āma’a « ’ei fenua nō Ziona ia [tātou] nei ». E nehenehe ato’a rātou e tai’o i te Malaki 3:8–12 nō te ’imi i te mau ha’amaita’ira’a tā te Fatu i fafau mai nō te ’aufaura’a i te tuha’a ’ahuru.

• Mai te mea ē, e uira’a tā te mau pīahi nō ni’a i te fa’a’ohipara’a o te tuha’a ’ahuru, e nehenehe ’oe e ani ia rātou ’ia tai’o i te tuha’a 120 ’e i te tātarara’a i roto i « Tē tahi atu mau rāve’a tauturu ». (Tē hōro’a ato’a nei o Elder David A. Bednar i te hō’ē tātarara’a maita’i roa i roto i « Te mau ha’amāramarama o te ra’i » [Ensign ’e ’aore rā Liahona, Novema 2013, 19–20]). Nāhea e nehenehe ai ia tātou ’ia tauturu ia vetahi ’ē ’ia fa’arahi i tō rātou fa’aro’o i te ture nō te tuha’a ’ahuru a te Fatu.

Te tahi atu mau rāve’a tauturu

Te ’Āpo’ora’a mātutu i te tuha’a ’ahuru.

’Ua haʼapiʼi ʼo Elder Robert D. Hales :

« Mai tei heheuhia mai e te Fatu, nā te hō’ē ’āpo’ora’a e fa’ata’a i te fa’a’ohipara’a o te tuha’a ’ahuru, tei roto i te reira ’āpo’ora’a te Peresidenira’a Mātāmua, te Tino Ahuru Ma Piti ’Āpōsetolo, ’e te ’episekōpora’a fa’atere rahi. ’Ua fa’ahiti ta’a ’ē mai te Fatu ē, e fa’aterehia te ’ohipa a te ’āpo’ora’a ‘nā tō’u iho reo ia rātou ra’ [Te Parau Ha’api’ira’a ’e te mau Parau Fafau 120: 1]. E parauhia teie ’āpo’ora’a te ’Āpo’ora’a mātutu i te tuha’a ’ahuru.

« E mea fa’ahiahia mau ’ia ’ite i teie ’āpo’ora’a ’ia ha’apa’o i te reo o te Fatu. ’Ua ’ite ’e e ’āmui te melo tāta’itahi i roto i te mau fa’aotira’a ato’a a te ’āpo’ora’a. ’Aita e fa’aotira’a e ravehia ē tae roa atu ē, ’ua tāhō’ē te reo o te ’āpo’ora’a. E ha’amāu’ahia te faufa’a moni o te tuha’a ’ahuru nō te mau ’ōpuara’a a te ’Ēkālesia, ’e tae noa atu te tōtauturu—te utuutura’a i te feiā veve ’e tei nava’i ore—te mau hiero, te mau fare ’e te ’atu’atura’a i te mau fare purera’a, te ha’api’ira’a, te fa’anahora’a ha’api’ira’a—ha’apoto noa, te ’ohipa a te Fatu…

« Tē fa’a’ite nei au i tō’u ’itera’a pāpū nō ni’a i te ’Āpo’ora’a mātutu i te tuha’a ’ahuru. ’Ua pārahi au i roto i teie ’āpo’ora’a e 17 matahiti te maoro, ’ei ’episekōpo fa’atere rahi o te ’Ēkālesia ’e i teienei ’ei melo nō te Tino ’Ahuru Ma Piti ’Āpōsetolo. Ma te hape ’ore, ’ua fa’a’ohipahia te faufa’a moni o te tuha’a ’ahuru a teie ’Ēkālesia nō tāna mau ’ōpuara’a » (« Tithing: A Test of Faith with Eternal Blessings », Ensign ’e ’aore rā Liahona, Novema 2002, 28).

Ha’amaita’ira’a i tā tātou ha’api’ira’a

Tītau manihini i te mau pīahi ’ia ha’api’i te tahi i te tahi. « E mea maita’i ’ia ani i te mau pīahi ’ia tauturu i te tahi ’e te tahi ’ia ’imi i te mau pāhonora’a i tā rātou mau uira’a. ’Ia fa’auruhia ’oe e te Vārua, e nehenehe ’oe e fa’aoti ’ia rave i te reira noa atu ā tē mana’o nei ’oe ē, ’ua ’ite ’oe i te pāhonora’a »(Ha’api’ira’a mai tā te Fa’aora, 24).