Te vāhi ha’apūra’a, nā Shaelynn Abel

5–11 nō Tiurai

Te Parau Ha’api’ira’a ʼe te mau Parau Fafau 76

« E rahi roa tō rātou utu’a ’e tō rātou hanahana e vai ā te reira e a muri noa atu »

Mai te rahira’a o te mau ’ōrama tei pāpa’ihia i roto i te mau pāpa’ira’a mo’a, ’ua tae mai te ’ōrama i roto i te tuha’a 76 i te taime ’a « feruri noa ai » Iosepha Semita ’e Sidney Rigdon i ni’a i te mau pāpa’ira’a mo’a (’īrava 19). E nehenehe ato’a ’outou e fāri’i i te heheura’a—tae noa atu i te arata’ira’a nō ni’a e nāhea ’ia ha’api’i—’a feruri ai ’outou i Te Parau Ha’api’ira’a ʼe te mau Parau Fafau 76.

Pāpa’i i te mau mana’o e tae mai

Tītau i te mana’o

Nō te tauturu i te mau melo o te piha ’ia paraparau mai nō ni’a i te mea tā rātou i tai’o i roto i Te Parau Ha’api’ira’a ʼe te mau Parau Fafau 76, e ani ia rātou ’ia feruri e ui mai te hō’ē hoa nō te tahi atu ha’apa’ora’a fa’aro’o e aha tō tātou ti’aturira’a nō ni’a i te orara’a i muri a’e i te pohe. E aha te mau ’īrava nō roto mai i te tuha’a 76 tā rātou e fa’a’ite atu i tō rātou hoa ? E nehenehe ato’a te mau melo o te piha e fa’a’ite mai i te tahi ’ohipa nō roto mai i « Voices of the Restoration : Testimonies of ‘the Vision’ » ’o tei ha’aputapū ia rātou.

Ha’api’i i te ha’api’ira’a tumu

Te Parau Ha’api’ira’a ʼe te mau Parau Fafau 76

E tae mau te fa’aorara’a nā roto mai ia Iesu Mesia, te tamaiti a te Atua.

• ’Ia feruri ana’e rātou i te tuha’a 76, e rave rahi mau ta’ata e feruri nei i ni’a i te fa’anahora’a nō te fa’aorara’a ’e i nā e toru bāsileia hanahana. Nāhea ’outou i te taututu i te mau melo o te piha ’ia hi’o i te fa’ahōho’ara’a tumu i roto i teie heheura’a o te Fa’aora ’o Iesu Mesia ïa ? E ui atu i te mau melo o te piha ’ia fa’a’ite mai i te hō’ē ’īrava tā rātou i ’ite mai i roto i te tuha’a 76 ’o te ha’apūai i tō rātou fa’aro’o ia Iesu Mesia. Mai te mea e hina’aro rātou i te tauturu, ’a arata’i atu ia rātou i te mau ’īrava 1–5, 20–24, 39–43, 69, 107–8.

• Nō te tauturu i te mau pīahi ’ia hi’o haere i te mau ta’a-’ē-ra’a i rotopū i te feiā e fatu i nā bāsileia hanahana e toru, e pāpa’i i ni’a i te tāpura ’ere’ere Tiretiera, mau ’īrava 50–70, 92–96; Teretetiera, mau ’īrava 71–79, 97; e Tiretia, mau ’īrava 81–90, 98–106, 109–12. E mā’iti te mau melo o te piha i te hō’ē o nā e toru mau pupu ’īrava ’e ’ia ’ite mai i te mau pereota ’o tē fa’ata’a nei i te tā’amura’a i roto ia Iesu Mesia ’e te mau ta’ata e fatu i te mau bāsileia e tano. E aha tā teie mau pereota e ha’api’i nei ia tātou nō ni’a i te rirora’a ’ei mau pipi nā Iesu Mesia ? Nāhea tātou i te ha’apūai i tō tātou aura’a e ’ōna ’e e te Metua ? Nāhea rāua i te fārerei ia tātou ? E aha te aura’a ’ia vai « itoito i te fa’a’itera’a i te parau nō Iesu » ? (’īrava 79).

  

  ’Ua ’ite Iosepha Semita i te ’ōrama nō te mau fāito o te hanahana i roto i te hō’ē piha mai teie.

Te Parau Ha’api’ira’a ’e te mau Parau Fafau 76:5–10, 113–18

E nehenehe te mau ’ohipa parau aro a te Atua ’ia « māramaramahia nā roto ana’e i te mana o te Vārua Maita’i ».

• E maita’i paha nō te mau melo o tā ’outou piha ’ia ’ite ē ’aita te tā’āto’ara’a o te mau melo o te ’Ēkālesia i fāri’i ’ōhie noa i te heheura’a i roto i te tuha’a 76. ’Ei hi’ora’a, ’ua parau Brigham Young : « Tā’u parau tu’utu’u ’oia ho’i i te taera’a mai te ’ōrama iā’u ra, ’ua pāto’i-’āfaro-hia te reira ’e ’ua pāto’ihia e tā’u mau ha’api’ira’a tahito. ’Ua parau vau, e tīa’i ri’i na. ’Aita vau i vahavaha i te reira, ’aita rā e nehenehe iā’u e māramarama i te reira ». ’Ua fa’ata’a mai ’oia ē, ’ua tītauhia iāna ’ia « feruri ’e ’ia pure, ’ia tai’o ’e ’ia feruri e tae roa ’ua ’ite au i te reira ’e ’ua ta’a maita’i te reira iā’u » (i roto « The vision », Revelations in Context, 150). E aha tā tātou e ha’api’i mai nā roto mai i tōna ’itera’a ’o te nehenehe e tauturu ia tātou ’ia heheu ana’e mai te Atua i te mau mea ta’a ’ē i tō tātou hāro’aro’ara’a i teie taime ? E aha tā Te Parau Ha’api’ira’a ’e te mau Parau Fafau 76:5–10, 113–18 e ha’api’i nei ia tātou nō ni’a e nāhea tātou i te fāri’i i « te mau parau mo’e nō te hina’aro ’o [te Atua] ? (’īrava 10).

Te Parau Ha’api’ira’a ’e te mau Parau Fafau 76:50–70, 92–95

Tē hina’aro nei te Atua i tāna mau tamari’i ato’a ’ia fana’o i te hanahana tiretiera ’e ’ōna.

• Nō vetahi, e riro e mea paruparau ’aore rā e mea teimaha ’ia feruri i te mau mea ato’a e anihia ia tātou ’ia fa’ati’ahia tātou nō te hanahana tiretiera. ’A feruri e nāhea ’outou i te tauturu i te mau melo o te piha ’ia ’ite mai i te tīa’ira’a « nā roto ia Iesu te ārai » (’īrava 69). ’Ei hi’ora’a, e nehenehe ’outou e ani ia rātou ’ia tai’o i te mau ’īrava 50–70 ’e 92–95. E ani ia rātou ’ia fa’a’ite mai nāhea rātou i te pāhono atu i te hō’ē ta’ata ’o tē parau mai : « Te orara’a i te ’evanelia i roto i teie nei ao i teie mahana e mea fifi mau, ’aita vau i pāpū e mea faufa’a te reira » ’aore rā, « ’aita vau i te mea maita’i roa nō te bāsileia tiretiera ». E aha tā tātou e nehenehe e parau nō te fa’auru ’aore rā nō te fa’aitoito i teie ta’ata ?

Ha’amaita’ira’a i tā tātou ha’api’ira’a

’Ia vai tūtonu noa i ni’a i te Fa’aora ’e tāna ha’api’ira’a tumu. « ’A ui tāmau ia ’outou iho, ‘nāhea te mea tā’u e ha’api’i nei i te tauturu i tā’u mau pīahi ’ia patu i te fa’aro’o i te Mesia, ’ia tātarahapa, ’ia rave ’e ’ia ha’apa’o i te mau fafaura’a e te Atua, ’e ’ia fāri’i i te Vārua Maita’i ?’ »(Ha’api’ira’a mai tā te Fa’aora, 20).