Haerera’a i te fare, nā Yongsung Kim

12–18 nō Tiurai

Te Parau Ha’api’ira’a ʼe te mau Parau Fafau 77–80

« E arata’i vau ia ’outou »

E ha’amana’o ē te mau ’ohipara’a i roto i teie fa’anahora’a e mau mana’o noa ïa. ’A tuatāpapa ai ’outou ma te pure i Te Parau Ha’api’ira’a ʼe te mau Parau Fafau 77–80, e arata’i te Vārua ia ’outou nō te ’ite mai nāhea i te ha’api’i maita’i a’e i te mau melo o tā ’outou piha.

Pāpa’i i te mau mana’o e tae mai

Tītau i te mana’o

E nehenehe vetahi mau melo o tā ’outou piha e fa’a’ite mai i tō rātou mau mana’o mai te mea e ani ’outou ia rātou nā mua roa. ’A feruri i te fārerei atu vetahi o rātou, i te tahi tau mahana hou te piha ha’api’ira’a nō te ani ia rātou e ineine ānei rātou nō te fa’a’ite mai i te tahi ’ohipa ’o te ha’aputapū ia rātou i roto i Te Parau Ha’api’ira’a ʼe te mau Parau Fafau 77–80.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 77

Tē heheu nei te Atua i tāna mau parau aro i te feiā e ’imi nei ’ia ’ite i te reira.

• E nehenehe te mau melo o te piha e fa’a’ite mai i te mau mana’o tā rātou i ’ite mai nō ni’a i te mau taipe i roto i te buka nō te Apokalupo i roto i tā rātou tuatāpapara’a i te tuha’a 77 i teie hepetoma. Te paraparaura’a nō ni’a i te pāhonora’a tā Iosepha Semita i fāri’i e arata’i te reira i te hō’ē ’aparaura’a e nāhea te mau melo o te piha ’ia ’imi i te hāro’aro’ara’a ’ia tuatāpapa rātou i te mau pāpa’ira’a mo’a. E aha tā tātou i ha’api’i mai nā roto mai i te mau huru uira’a tā Iosepha i ui ? E fa’a’ite mai te mau melo o te piha i te mau ’itera’a rau mai te mea ’ua arata’i tā rātou mau uira’a nō te ’evanelia i te hō’ē hāro’aro’ara’a rahi a’e.

Te Parau Ha’api’ira’a ’e te mau Parau Fafau 78:17–19

E arata’i te Fatu ia tātou.

• Nō te ha’amata i te hō’ē tāu’ara’a parau nō Te Parau Ha’api’ira’a ’e te mau Parau Fafau 78:17–19, e nehenehe ’outou e fa’a’ite i te mau hōho’a nō te tahi o te mau melo o tā ’outou piha ’ei mau tāmari’i (’a ani ia rātou nā mua roa ’ia ’āfa’i mai i teie mau hōho’a i te piha ha’api’ira’a ). E vaiiho i te piha ’ia ’imi ’o vai tō ni’a i te hōho’a tāta’itahi. E nehenehe te mau melo o te piha tei ’āfa’i mai i te mau hōho’a e fa’ata’a mai e nāhea tō rātou tauira’a mai te taime ā ’a patahia ai teie mau hōho’a. I muri iho e tai’o i te piha i Te Parau Ha’api’ira’a ’e te mau Parau Fafau 78:17–19 ’e ’a feruri i te mau uira’a mai teie te huru : Mai te hea tātou i te rirora’a mai te mau tamari’i ri’i a te Fatu ? Mai te hea te huru ’oia i hina’aro ’ia riro tātou mai te mau tamari’i (hi’o Mosia 3:19), ’e mai te hea ’oia i hina’aro ’ia tupu tātou i te rahi ? E aha te a’o tāna i hōro’a ia tātou i roto i teie mau ’īrava nō te tauturu ia tātou ’ia tupu i te rahi ?

  Nō te ha’amāramarama maita’i atu ā i te mau melo o tā ’outou piha e nāhea te Fatu i te « arata’i [ia tātou] » (’īrava 18), ’a feruri i te fa’a’ite atu i te fa’ahitira’a parau i roto Te tahi atu mau rāve’a tauturu.

Te Parau Ha’api’ira’a ʼe te mau Parau Fafau 79–80

E mea faufa’a a’e te pi’ira’a ’ia tāvini i te Atua i te vāhi i reira tātou e tāvini ai.

• Tē vai ra paha te mau ta’ata i roto i tā ’outou piha tei māuruuru ’ore i te ha’amatara’a i te hō’ē pi’ira’a tei fāri’ihia i roto i te pāroita ’aore rā te ’āma’a ’aore rā i te vāhi i reira rātou i te ’āfa’ira’ahia nō te tāvini ’ei misiōnare. Vetahi paha te hina’aro e fa’a’ite mai i tō rātou mau ’itera’a. Nāhea te parau a’o a te Fatu i roto i Te Parau Ha’api’ira’a ’e te mau Parau Fafau 80:3 i te tauturu ia tātou i roto i teie mau ’ohipa e tupu ? E aha te aura’a te parau « ’aita e pe’ape’a » ? ’Aore rā, te parau « ’aita e ti’a ia ’ōrua ’ia haere ’ē » ? E aha te mea faufa’a a’e nā te Fatu mai te mea nō ’ō mai te reira i tō tātou mau pi’ira’a ? E riro te mau mana’o ’o Elder David A. Bednar nō ni’a i te tuha’a 80 i roto i tāna a’ora’a « Pi’ihia i te ’ohipa » i te tauturu ato’a (Ensign ’aore rā Liahona, Mē 2017, 68).

• Te mau heheura’a i roto i te mau tuha’a 79 ’e 80 ’ua fa’atae-mau-hia nō te feiā tei pi’ihia nō te poro i te ’evanelia, terā rā tei roto te mau parau tumu e tano nō tātou pā’āto’a i roto i tā tātou tāvinira’a i te Fatu. Nō te tauturu i te mau melo o te piha ’ia ’ite mai i teie mau parau tumu, e nehenehe ’outou e ui atu ia rātou ’ia fa’ahua ē e hoa tō rātou tei tōmo mai i roto i te ’Ēkālesia ’aita i maoro a’enei ’e tei fāri’i iho nei i tōna pi’ira’a mātāmua ? E ani i te mau pīahi ’ia pāpa’i i te hō’ē rata i tō rātou hoa nō te pāturu ’e nō te a’o ’e ’ia fa’aitoito ia rātou ’ia fa’ahiti i te mau tuha’a 79 ’e 80 ’ia nā reira rātou. I muri iho e ani i te tahi mau pīahi ’ia fa’a’ite mai i te mea tā rātou i pāpa’i.

  

  E māuruuru te Fatu ’ia tāvini ana’e tātou iāna ’e ia vetahi ’ē.

Te tahi atu mau rāve’a tauturu

E arata’i te Fatu ia tātou nā roto i te Vārua Maita’i.

’Ua fa’a’ite mai te peresideni Henry B. Eyring i te hō’ē ’ohipa tei tupu ’a pure ai ’oia nō te fāri’i i te arata’ira’a nō ni’a i te hō’ē fa’aotira’a faufa’a rahi mau ’e ’ua ha’api’i mai ’ia arata’ihia e te Fatu.

« ’Ua pure au, e rave rahi hora te maoro, terā rā, mai te mea ra ē, ’aita e pāhonora’a. Tau taime ri’i noa nā mua a’e i te tātaiao, ’ua puta mai ra te hō’ē mana’o i roto iā’u. Mai tō’u tamariira’a mai ā, ’a tahi ra vau ’a ’ite pāpū ai i tō’u rirora’a mai te hō’ē tamari’i te huru. ’Ua ha’amata tō’u ’ā’au ’e tō’u vārua i te ’ite i te mārū. ’Ua ’itehia te hau i roto i te taua taime mārū ra.

« Mā tō’u māere ri’i, ’ua ’ite au iā’u iho i te purera’a, e te Metua i te Ao ra, ’aita e pe’ape’a nō te mea tā’u e hina’aro nei. ’Aita vau e tau’a fa’ahou i te mea tā’u e hina’aro nei. ’Ua hina’aro noa vau ē ’ia ha’apa’ohia tō ’oe hina’aro. Tā’u noa ïa e hina’aro nei. ’A fa’a’ite mai e aha tā’u e rave’.

« I taua taime rā, ’ua ’ite a’era vau i te hō’ē hau ’aita vau i ’ite a’e nei. ’E ’ua tae mai te parau poro’i, ’e ’ua pāpū iā’u nō hea mai te reira. ’Ua ta’a maita’i iā’u te ’ohipa tā’u e rave. ’Aita vau i fāri’i i te fafaura’a nō te hope’ara’a. ’Ua ’ite noa rā vau i te ha’apāpūra’a ē, ’ua ha’api’ihia vau i tō’u tamari’ira’a, i te ’ē’a e ’ite ai au i te mau huru mea ato’a tāna e hina’aro nō’u » (« Mai te tamari’i », Ensign ’aore rā Liahona, Mē 2006, 16).

Ha’amaita’ira’a i tā tātou ha’api’ira’a

Ha’amata e te mau pāpa’ira’a mo’a. Hou i te fāriu atu i ni’a i te tahi atu mau rāve’a tauturu, ’a tuatāpapa itoito ’e ’a feruri i te mau pāpa’ira’a mo’a. E ani manihini te reira i te Vāru’a ’ia tauturu ia ’outou ’ia turu’i i ni’a i te mea tā ’outou i tuatāpapa ’a ha’api’i ai ’outou (hi’o Ha’api’ira’a mai tā te Fa’aora 12).