Springhill, Daviess County, Missouri, nā Garth Robinson Oborn

7–13 nō Tiunu

Te Parau Ha’api’ira’a ’e te mau Parau Fafau 63

« ’O tei nō ni’a mai ra e mea mo’a ïa »

’A pāpa’i i te mau mana’o tā ’outou e fāri’i ’a tuatāpapa ai ’outou i Te Parau Ha’api’ira’a ’e te mau Parau Fafau 63. E mea na’ina’i paha te hō’ē mana’o, terā rā mai te hō’ē huero, e nehenehe te reira e riro ’ei mea faufa’a ’e te maita’i mau mai te mea e ’imi tāmau ’outou ’e e feruri.

Pāpa’i i te mau mana’o e tae mai

Tītau i te mana’o

Nō te tauturu i te fa’atumu i tā ’outou ’āparaura’a i ni’a i te mau tuha’a ’o tā te mau melo o te piha i ’ite mai e mea faufa’a, e ani ia rātou ’ia pāpa’i i ni’a i te mau ’api parau na’ina’i te tahi mau ’īrava nō roto mai i te tuha’a 63 ’o tā rātou e hina’aro e ’āparau. I muri iho, e ha’aputu mai ’outou i te ’api parau ’e e ha’amata i te ’āparaura’a i te mau ’īrava i tu’uhia mai nā e rave rahi mau pīahi. E ani ia rātou ’ia fa’a’ite mai nō te aha rātou i mā’iti ai i teie mau ’īrava.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 63:7–12

E tae mai te mau tāpa’o nā roto i te fa’aro’o ’e te hina’aro ’o te Atua.

• Nō te ha’amata i te hō’ē ’āparaura’a nō ni’a i te parau tumu i ha’api’ihia i roto i Te Parau Ha’api’ira’a ’e te mau Parau Fafau 63:7–12, e tauturu te reira ’ia hi’o fa’ahou i te tahi mau hi’ora’a i roto i te mau pāpa’ira’a mo’a o te mau ta’ata tei ’ite mata i te mau tāpa’o ’aore rā, te mau temeio. Penei a’e e nehenehe te mau melo o te piha e feruri i te mau hi’ora’a o te mau ta’ata tei ha’apūaihia tō rātou fa’aro’o nā roto i te hō’ē tāpa’o (hi’o, ’ei hi’ora’a, Luka 1:5–20, 59–64) ’aore ra, te mau ta’ata tei fa’ataiā noa atu i muri iho i te ’itera’a i te hō’ē tāpa’o, 1 Nephi 3:27–31; Alama 30:43–56). E nehenehe te mau melo o te piha i muri iho e fa’a’ohipa i te mea tā rātou i ’apo mai i roto i Te Parau Ha’api’ira’a ’e te mau Parau Fafau 63:7–12 nō te fa’ata’a mai i teie mau huru ta’a ’ē o te mau tāpa’o. ’Aore rā, e hi’o fa’ahou ’outou i te tahi atu mau tuha’a o te pāpa’ira’a mo’a nō ni’a i te mau tāpa’o, mai teie i tāpurahia i raro a’e « Tāpa’o » i roto te Buka arata’i o te mau pāpa’ira’a mo’a (scriptures.ChurchofJesusChrist.org). Nāhea tātou e ’ite pāpū ai ē ’aita tātou e ’imi nei ’aore rā e ti’aturi nei i ni’a i te mau tāpa’o ’ei niu nō tō tātou fa’aro’o ?

Te Parau Ha’api’ira’a ʼe te mau Parau Fafau 63:13–16

Te aura’a o te vi’ivi’i-’ore ’o te tāpe’ara’a ïa i tō tātou mau mana’o ’e tā tātou mau ’ohipa ’ei mea mā.

• Noa atu ē te tuha’a rahi o Te Parau Ha’api’ira’a ’e te mau Parau Fafau 63:13–16, tē parau ta’a ’ē nei nō ni’a i te fa’aturi, e riro paha te mau parau tumu tei ha’api’ihia ’ei mea tano nō te mau ’ōfatira’a ture ato’a nō te ture o te vi’ivi’i ’ore. ’A feruri e ani i te mau melo o te piha ’ia ’ite mai i te mau fa’autu’ara’a tei fa’ata’ahia i roto i Te Parau Ha’api’ira’a ’e te mau Parau Fafau 63:13–16. E nehenehe ato’a rātou e rave i te « arara’a » (’īrava 15) ’aore rā te mau tāpa’o fa’aarara’a ’o tē fa’aara nei i teie mau fa’autu’ara’a. E nehenehe ato’a rātou e ’āparau i te mea tā rātou e mana’o ra nō ni’a i te aura’a o teie mau fa’autu’ara’a. ’Ei hi’ora’a, nō te aha te ’ōfatira’a i te ture nō te vi’ivi’i ’ore e arata’i ai te reira i te ha’avāra’a o te hō’ē ta’ata « mai te hō’ē mārei » (’īrava 15) ? Nō te aha te Fatu i a’o mai ai ia tātou ’ia « tātarahapa ’oi’oi » (’īrava 15) nō te hara ’āpeni ? (hi’o te fa’ahitira’a parau a te tuahine Linda S. Reeves i roto i « Te tahi atu mau rāve’a tauturu »).

• E nehenehe te tai’ora’a i Te Parau Ha’api’ira’a ’e te mau Parau Fafau 63:16 e arata’i i te hō’ē ’āparaura’a nō ni’a i te mana umera’a o te hōho’a faufau i roto i tō tātou tōtaiete. Nāhea te mau fa’aarara’a i roto i te ’īrava 16 i te tū’ati i ni’a i teie fifi ? (Noa atu tē fa’ahoro ta’a ’ē nei i ni’a i te mau tāne e nanao nei i te mau vāhine, ’ua riro teie mau fa’aarara’a nō te ta’ata ato’a). E aha tā tātou e rave nō te pāruru ia tātou iho ’e i te feiā fātata ia tātou i te hōho’a faufau ? E nehenehe paha te mau melo o te piha i te hōro’a mai i te mau a’o i te tahi ’e te tahi. E hōroa mai te tahua ’ītenati AddressingPornography.ChurchofJesusChrist.org i te tīa’ira’a ’e te tauturu i te feiā e aro nei i te hōho’a faufau.

  

  E ha’amaita’ihia tātou ’ia ha’apa’o ana’e tātou i te ture nō te vi’ivi’i-’ore.

Te Parau Ha’api’ira’a ’e te mau Parau Fafau 63:58–64

’Ia fa’aturahia te mau mea mo’a.

• E ’āparau ’outou ’e tā ’outou mau pīahi i Te Parau Ha’api’ira’a ’e te mau Parau Fafau 63:58–64 mai te hō’ē fa’aarara’a i mua i te rave-faufa’a-’ore-ra’a i te i’oa o te Fatu ’e te tahi o te mau rāve’a tauturu i roto i te Mau tumu parau o te ’Evanelia tei parauhia te parau pāpa’i te « tū’a’ā » (topics.ChurchofJesusChrist.org) ’o te nehenehe e tāu’aparauhia. E nehenehe ato’a ’outou e tauturu i te mau melo o te piha ’ia fa’a’ohipa ā’ano atu i teie mau ’īrava. ’Ei hi’ora’a, e nehenehe ’outou e ’āparau e aha tā te pereota « ma te mana ’ore » (’īrava 62) e tu’u mai nei i tō tātou ’itera’a o te pu’e parau. E nehenehe ato’a te mau pīahi e tāpura mai i te tahi atu mau mea « nō ni’a mai » ’aore rā nō ’ō mai i te Atua ra. E aha te aura’a ’ia paraparauhia teie mau mea « ma te ara » ? (’īrava 64).

Te tahi atu mau rāve’a tauturu

E fa’ati’a te vi’ivi’i-’ore ia tātou nō te auhoara’a i te Vārua Maita’i.

’Ua ha’api’i mai te tuahine Linda S. Reeves, melo tahito nō te Peresidenira’a rahi o te Sōtaiete Tauturu ē :

« ’Aita vau i ’ite i te hō’ē mea ’o te fa’ati’a ia tātou ’ia fāri’i i te auhoara’a tāmau o te Vārua Maita’i, hau atu te rahi i te vi’ivi’i-’ore…

« Mai te mea ē, e māta’ita’i tātou, e tai’o tātou, ’e ’aore rā e rave tātou i te hō’ē mea tei raro mai i te mau fa’aturera’a a tō tātou Metua i te Ao ra, e fa’a’ino te reira ia tātou. Noa atu te fāito o tō tātou matahiti, mai te mea ē, te mau mea tā ’outou e māta’ita’i ra, e tai’o ra, e fa’aro’o ra, ’aore rā e mā’iti ra i te rave, ’aita e tū’ati ra i te mau fa’aturera’a a te Fatu i roto i te Nō te Pūai o te Feiā ’Āpī, ’a tūpohe, ’a tāora i rāpae, ’a pāhae, ’e ’a tāpiri i te ’ōpani…

« …Tē ti’aturi nei au ē, mai te mea ē, e nehenehe tā tātou e ha’amana’o ’e e hi’o i te mau mahana ato’a i tō te Metua i te ao ra ’e tō tātou Fa’aora here rahi ia tātou, e hina’aro ïa tātou ’ia rave i te mau mea ato’a tā rāua e ani mai nō te ho’i fa’ahou i mua i tō rāua aro, ’atihia e tō rāua here mure ’ore » (« Ti’amā nō tō tātou mau ha’amaita’ira’a i fafauhia mai », Ensign ’aore rā Liahona, Novema 2015, 10–11).

Ha’amaita’ira’a i tā tātou ha’api’ira’a

’A fa’a’ohipa i te pehe mo’a. E ha’apūai te mau parau poro’i i roto i te mau hīmene ’e te mau hīmene nō roto mai i te Chants pour les enfants i te ha’api’ira’a tumu tā ’oe e tuatāpapa ra i roto i te mau pāpa’ira’a mo’a. ’Ei hi’ora’a, te hīmenera’a i te hō’ē hīmene nō ni’a i te ’āruera’a i te i’oa ’o te Atua, mai te « E ’ārue tātou nei » (Te mau hīmene, no. 39), e nehenehe e ha’apūai i te parau poro’i i roto i Te Parau Ha’api’ira’a ’e te mau Parau Fafau 63:58–64.