15–21 Māʻasi

Tokāteline mo e Ngaahi Fuakava 27–28

“Kuo Pau Ke Fai ʻa e Meʻa Kotoa Pē ʻo Maau”

Neongo naʻe hoko ʻi ha taimi mo ha feituʻu kehe ʻa e ngaahi meʻa ne tupunga ai e ngaahi fakahā ʻi he Tokāteline mo e Ngaahi Fuakava 27–28 ka ʻoku kei mahuʻinga pē he ʻahó ni ʻa e ngaahi tefitoʻi moʻoni ʻoku akoʻi ʻi he ngaahi vahe ko ʻení. Ko e hā ha ngaahi tefitoʻi moʻoni te nau lava ʻo faitāpuekina e kau mēmipa hoʻo kalasí ʻi he ngaahi tūkunga ʻoku nau fehangahangai mo iá?

Lekooti Hoʻo Ngaahi Ongó

Fakaafeʻi e Feʻinasiʻakí

ʻOange ha kiʻi taimi ki he kau mēmipa ʻo e kalasí ke nau toe vakaiʻi ʻa e Tokāteline mo e Ngaahi Fuakava 27–28 pea kumi ha foʻi lea pe kupuʻi lea ʻoku mahuʻingamālie kiate kinautolu. Ke ʻoange ha faingamālie ke vahevahe e taha kotoa, ʻe lava ke ke vahevahe e kalasí ke nau tauhoa ʻo vahevahe e meʻa naʻa nau maʻú.

Akoʻi ʻa e Tokāteliné

Tokāteline mo e Ngaahi Fuakava 27:1–2

ʻOku totonu ke tau maʻu e sākalamēnití ʻaki ha mata ʻoku tāfataha pē ki he nāunau ʻo e ʻOtuá.

• Ke poupouʻi e fealeaʻaki fekauʻaki mo e Tokāteline mo e Ngaahi Fuakava 27:1–2, fakakaukau ke hiki ha fehuʻi hangē ko ʻení ʻi he palakipoé: Ko e hā ʻoku akoʻi mai ʻe he Fakamoʻuí fekauʻaki mo e taumuʻa ʻo e sākalamēnití? ʻE lava ke kumi ʻe he kau mēmipa ʻo e kalasí ha ngaahi kupuʻi lea ʻi he ngaahi veesi ko ʻení ʻe tokoni ke nau tali e fehuʻí. Mahalo te nau loto lelei ke vahevahe ʻa e ngaahi ongo kuo nau maʻu fekauʻaki mo e founga ke maʻu ha aʻusia toputapu ange ʻi hono maʻu e sākalamēnití.

  ʻE lava ke maʻu ʻe he kau mēmipa ʻo e kalasí ha toe ngaahi fakakaukau ʻi hono lau e folofola ʻa e Fakamoʻuí ʻi Heʻene fokotuʻu e sākalamēnití (vakai Luke 22:19–20; 3 Nīfai 18:1–11. vakai foki ʻa e vitió “The Last Supper” ʻi he ChurchofJesusChrist.org). Ko e hā nai ha meʻa kehe te tau fai ʻo kapau ne ʻi heʻetau houalotu sākalamēnití ʻa e Fakamoʻuí?

  

  ʻOku ʻi he sākalamēnití ha ngaahi fakataipe ʻo e feilaulau ʻa e Fakamoʻuí.

Tokāteline mo e Ngaahi Fuakava 27:15–18

ʻE tokoniʻi kitautolu ʻe he teunga tau ʻa e ʻOtuá ke tau matuʻuaki e koví.

• Te ke lava ʻo tokoni ke mahino ki he kau mēmipa ʻo e kalasí ʻa e founga ki hono fakaʻaongaʻi e teunga tau ʻa e ʻOtuá ke matuʻuaki ʻaki e kovi ʻi hotau kuongá? Fakakaukau ke kole ki ha taha ke ne tā ʻi he palakipoé ʻa e teunga tau ʻoku fakamatalaʻi ʻi he veesi 15–18. ʻE lava leva ke vahevahe ʻe he kau mēmipa ʻo e kalasí ha ngaahi fakakaukau ne nau maʻu ʻi heʻenau ako fakataautaha fekauʻaki mo e ngaahi kongokonga ʻo e teunga taú. Pe ko e lau ʻe he kalasí ʻa e Tokāteline mo e Ngaahi Fuakava 27: 15–18 pea fakahingoa e ngaahi kongakonga ‘o e teunga tau ʻi he palakipoé mo e ngaahi kongakonga ‘o e sinó ʻoku nau maluʻí. ʻOku ʻuhinga ki he hā ke tui ʻa e teunga tau ʻo e ʻOtuá? Mahalo naʻa lava e kau mēmipa ʻo e kalasí ʻo talanoa fekauʻaki mo e founga ʻoku hanga ai ʻe he ʻEikí ʻo maluʻi kitautolu mei he koví ʻi he taimi ʻoku tau tui ai e teunga tau ʻa e ʻOtuá.

• Kapau ʻokú ke akoʻi e toʻu tupú, mahalo te ke fie fakafehokotaki ʻa e Tokāteline mo e Ngaahi Fuakava 27:15–18 mo e ngaahi tuʻunga moʻui ʻi he Ki Hono Fakamālohia ʻo e Toʻu Tupú. Hangē ko ʻení, ʻe lava ʻe he kau mēmipa ʻo e kalasí ʻo lau ʻa e ngaahi veesi ko ʻení pea aleaʻi ʻa e ʻuhinga ʻoku tau fie maʻu ai e teunga tau ʻo e ʻOtuá. Te nau lava leva ke ngāue tautau toko ua pea vakaiʻi ha taha ʻo e ngaahi tuʻunga moʻui ʻi he Ki Hono Fakamālohia ʻo e Toʻu Tupú. Ko e hā ʻoku tau ako mei he ngaahi maʻuʻanga tokoni ko ʻení fekauʻaki mo hono ʻohofi kitautolu ʻe Sētané? ʻE tokoni fēfē ʻa e teunga tau ʻo e ʻOtuá ke tau matuʻuaki e ngaahi ʻohofi ko ʻení? Te tau lava fēfē ʻo tui ʻa Hono teunga taú?

Tokāteline mo e Ngaahi Fuakava 28

ʻOku maʻu ʻe he palōfita moʻuí ha fakahā maʻá e siasi ʻo e ʻEikí.

• Ke tokoni ke ako e kau mēmipa ʻo e kalasí fekauʻaki mo e fatongia ʻo e palōfitá, ʻe lava ke mou toe vakaiʻi ʻa e aʻusia naʻá ne tataki ʻa Siosefa Sāmita ke lotu pea maʻu ʻa e vahe 28 (vakai ki he fakamatala ʻo e ʻuluʻi vahé), pea mou toki lau ʻa e veesi 2–3, 6–7, 11–13. ʻOku feinga fēfē ʻa Sētane ke fakalotoʻi kitautolu ke muimui kiate kinautolu kuo ʻikai fili ʻe he ʻEikí? ʻE lava ke ke fakaafeʻi e kau mēmipa ʻo e kalasí ke vahevahe ha ngaahi aʻusia naʻá ne fakamālohia ʻenau fakamoʻoni ʻoku maʻu fakahā ʻa e palōfitá maʻá e Siasí.

• Ko e founga ‘e taha ke toe fakamanatu ai ʻe he kalasí ʻa e Tokāteline mo e Ngaahi Fuakava 28 ko e fakakaukau ʻoku nau ʻiloʻi ha taha naʻá ne toki maʻu ha uiuiʻi foʻou ʻi he Siasí. Ko e hā te tau lava ʻo vahevahe mei he Tokāteline mo e Ngaahi Fuakava 28:1–6, 13–16 ke tokoni ki he tokotaha ko iá ‘i hono uiuiʻí? ʻE lava ke tānaki atu ʻe he “Ngaahi Maʻuʻanga Tokoni Kehé” ha ngaahi fakakaukau ki he fealeaʻakí.

Ngaahi Maʻuʻanga Tokoni Lahi Ange

Faleʻi fekauʻaki mo e fakahā fakatāutahá.

Naʻe akonaki ʻa Palesiteni Siosefa F. Sāmita mo hono ongo tokoni ʻi he Kau Palesitenisī ʻUluakí ʻo pehē:

“Ko e taimi pē ko ē ʻoku fakahoko mai ai ʻe ha ngaahi mata meʻa-hā mai, ngaahi misi, ngaahi lea kehekehe, ngaahi kikite, ngaahi ongo pea mo ha ngaahi meʻafoaki pe ueʻi fakalaumālie ha faʻahinga meʻa ʻoku ʻikai fenāpasi mo e ngaahi fakahā kuo tali ʻe he Siasí pe fehangahangai mo e ngaahi tuʻutuʻuni ʻo hono kau maʻu mafai totonú, ʻe lava ke ʻilo heni ʻe he Kau Māʻoniʻoni ʻi he Ngaahi ʻAho Kimui Ní ʻoku ʻikai mei he ʻOtuá ia, neongo pe ko e hā hono lahi haʻane hā ngali tonu. … ʻE lava ke maʻu ʻe he Kāingalotú ha fakahinohino mo ha fakahā Fakalangi kiate kinautolu pē, ʻo tatau pē ʻi he ngaahi meʻa fakaēmamaní pea mo e ngaahi meʻa fakalaumālié, ka ʻoku ʻikai ʻomi ha mafai ia ai ke nau tataki e niʻihi kehé. …

“ʻOku lekooti ʻi he hisitōlia ʻo e Siasí ha ngaahi meʻa lahi ne hangē ha ngaahi fakahā ne fakamatalaʻi ʻe ha kau kākā pe niʻihi loto vēkeveke ne nau tui ki he ngaahi fakahā ko iá ʻo feinga ke tataki e niʻihi kehé ke nau tali ia, pea ʻi he meʻa kotoa ko iá ne hoko mai ai e taʻefiemālié, lotomamahí mo e ngaahi fakatamakí” (Joseph F. Smith, Anthon H. Lund, Charles W. Penrose, “A Warning Voice,” Improvement Era, Sept. 1913, 1148–49).

Ko Hono Fakatupulaki ʻEtau Founga Akoʻí

Tokanga taha ki he tokāteline moʻoní. Naʻe akoʻi ʻe Palesiteni Poiti K. Peeka ʻo pehé. “ʻOku liliu ʻe he tokāteline moʻoni mo mahinó ʻa e tōʻonga fakakaukaú mo e ʻulungāngá” (“Do Not Fear,” Ensign pe Liahona, Mē 2004, 79). Kapau ʻoku tau fie tokoni ke ʻomi ha ngaahi laumālie kia Sīsū Kalaisi, kuo pau ke tukutaha ʻetau tokangá ki Heʻene ngaahi akonakí.