ʻE Tūʻulutui ʻa e Tui Kotoa Pē, tā ‘e J. Kirk Richards

22–28 Māʻasi

Tokāteline mo e Ngaahi Fuakava 29

ʻE Tānaki [ʻe Sīsū Kalaisi] ʻa Hono Kakaí

Ko e founga mahuʻinga taha ke teuteu ki hono akoʻi e Tokāteline mo e Ngaahi Fuakava 29 ko hono ako ia ʻi he faʻa lotu pea fekumi ki he tataki ʻa e Laumālié. Fakakaukau ki ha ngaahi founga kehe ke fakaafeʻi mai e Laumālié ki hoʻo moʻuí, ʻo hangē ko e ʻaukaí, ʻalu ki he temipalé, pe tokoni ki he niʻihi kehé.

Lekooti Hoʻo Ngaahi Ongó

Fakaafeʻi e Feʻinasiʻakí

Naʻe folofola ʻa e ʻEikí ki he Kāingalotú ʻi he Tokāteline mo e Ngaahi Fuakava 29:5 ke “hiki hake homou lotó pea fiefia.” Te ke lava ʻo fakaafeʻi e kau mēmipa ʻo e kalasí ke nau vahevahe ha meʻa ne nau ako ʻi heʻenau ako fakafoʻituituí pe fakafāmilí ʻoku nau ʻai ke “hiki hake [ai honau] lotó pea fiefia.”

Akoʻi ʻa e Tokāteliné

Tokāteline mo e Ngaahi Fuakava 29

Ne teuteuʻi ʻe he Tamai Hēvaní ha palani ki hotau hākeakiʻí.

• Ko e founga ʻe taha ke poupouʻi e ako ʻi ʻapí ko e vakai ki he ngaahi ʻekitivitī ʻoku maʻu ʻi he fokotuʻutuʻu ki he uike lolotongá ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Hangē ko ʻení, ʻe lava ke ke hiki ʻi he palakipoé ʻa e ngaahi konga ʻo e palani ʻo e fakamoʻuí, hangē ko e moʻui ʻi he maama fakalaumālié, Fakatupú, ko e Fakalelei ʻa Sīsū Kalaisí, mo e ngaahi meʻa peheé. ʻE lava ke vahevahe ʻe he kau mēmipa ʻo e kalasí ʻa e meʻa ne nau ako mei he Tokāteline mo e Ngaahi Fuakava 29 fekauʻaki mo e ngaahi konga ko ʻeni ʻo e palaní. Te ke lava foki ʻo ʻai ke nau vahevahe ʻa e meʻa te nau lava ʻo akoʻi mei he vahe ko ʻení ki ha taha ʻoku ʻikai haʻane ʻilo ki he palani ʻa e ʻOtuá.

Tokāteline mo e Ngaahi Fuakava 29:1–8, 14–21

ʻE tānaki ʻe Sīsū Kalaisi ʻa Hono kakaí kimuʻa ʻi Heʻene Hāʻele ʻAngaua Maí.

• Ke tokoni ke mahino ki he kau mēmipa ʻo e kalasí ʻa e ʻuhinga ʻoku tānaki ai ʻe Sīsū Kalaisi ʻa Hono kakaí, ʻe lava ke ke fakaafeʻi kinautolu ke lau ʻa e vees 1–8 pea aleaʻi e ngaahi fehuʻi fekauʻaki mo e tānakí, ʻo hangē ko e: Kuo tau aʻusia fēfē ʻa hono tānaki mo maluʻi kitautolu ʻe Kalaisí, ʻo hangē ko hono tānaki mo maluʻi ʻe he motuʻa-moá ʻa hono ʻuhikí? Ko e hā e founga ʻoku tau tānaki ai ki he Fakamoʻuí? (vakai ki he sīpinga ʻi he veesi 2). ʻE lava ʻe he kau mēmipa ʻo e kalasí ʻo vahevahe ʻa e founga kuo tāpuekina ai kinautolu ʻe he tānaki mo e moihū fakataha mo e kāingalotu kehe ʻo e Siasí.

  

  Kuo Tuʻo Fiha, tā ʻe Liz Lemon Swindle

• ʻE lava ke ke vahevahe ʻa e lea ʻa Palesiteni Lāsolo M. Nalesoni ʻi he “Ngaahi Maʻuʻanga Tokoni Kehé” ke tokoni ke fakakaukau e kau mēmipa ʻo e kalasí ki honau fatongia ke tokoni ki he Tamai Hēvaní ʻi hono tānaki ʻo ʻEne fānaú. Pe ko hoʻo huluʻi e vitió “A Witness of God” (ChurchofJesusChrist.org). Ko e hā ʻoku tau ako fekauʻaki mo e tānakí ʻi he ngaahi veesi ko ʻení? ʻOku fakamālohia fēfē ʻe he ngaahi pōpoakí ni ʻa e folofola ʻa e ʻEikí ʻi he Tokāteline mo e ngaahi Fuakava 29:1–8?

• Mahalo ʻe fakatupu hohaʻa ki he kau mēmipa ʻo e kalasí ʻa e ngaahi fakamatala ʻi he Tokāteline mo e Ngaahi Fuakava 29:14–21 ʻo kau ki he niʻihi ʻo e ngaahi meʻa ʻe hoko ʻi he ngaahi ʻaho fakamuí. Tuku ke nau vahevahe e ngaahi meʻa ʻoku nau ongoʻí. Ko e hā ʻoku fakatokanga mai ai ʻa e ʻEikí kiate kitautolu fekauʻaki mo e ngaahi meʻa ko ʻeni ʻe hokó? Ko e hā e ngaahi moʻoni fakafiemālie ʻoku tau ako fekauʻaki mo e Fakamoʻuí mo e tānakí mei he veesi 1–8? ʻOku tokoni fēfē ʻa e tānakí ke tau nofo hanganaki atu ai ki he ngaahi meʻa ko ʻeni ʻe hokó ʻi he tui kae ʻikai ko e ilifiá? ʻE lava ke mou hivaʻi ha himi fekauʻaki mo e tānakí, ʻo hangē ko e “ ʻIsileli, ʻIsileli, ʻOku Ui ʻa e ʻOtuá” ( Ngaahi Himí, fika 6), ko ha konga hoʻomou fealēleaʻakí, pea aleaʻi ʻa e ngaahi meʻa ʻoku akoʻi mai ʻe he himí fekauʻaki mo hono tānaki ʻo ʻIsilelí.

Tokāteline mo e Ngaahi Fuakava 29:34–35

ʻOku fakalaumālie ʻa e ngaahi fekau kotoa ʻa e ʻEikí.

• Neongo ʻoku ngali fakatuʻasino ha ngaahi fekau ʻe niʻihi, ka ʻoku fakalaumālie ʻa e ngaahi fekau kotoa ki he ʻOtuá. ʻE lava ke lau fakataha ʻe he kau mēmipa ʻo e kalasí ʻa e veesi 34–35 ke mahino ʻa e moʻoni ko ʻení pea hiki ha ngaahi fekau ʻi he palakipoé, fakataha mo e ngaahi tefitoʻi moʻoni fakalaumālié mo e ngaahi tāpuaki ʻoku fekauʻaki mo e fekau takitaha. Te nau lava ‘o vahevahe ha ngaahi sīpinga mei heʻenau moʻuí pe mei he ngaahi potufolofola kuo tokoni ke nau vakai ai ki he natula fakalaumālie ʻo e ngaahi fekau ‘a e ʻOtuá. ʻOku tokoni fēfē ʻa e ʻekitivitī ko ʻení ki he founga ʻoku tau vakai ʻaki ki he ngaahi fekaú?

Ngaahi Maʻuʻanga Tokoni Lahi Ange

Tokāteline mo e Ngaahi Fuakava 29

Kau atu ki hono tānaki ʻo ʻIsilelí.

Naʻe akonaki ʻa Palesiteni Lāsolo M. Nalesoni ʻo pehē:

“Ko e moʻoni ko e ngaahi ʻaho fakaʻosí ʻeni, pea ʻoku fakavaveʻi ʻe he ʻEikí ʻEne ngāué ke tānaki ʻa ʻIsileli. Ko e tānaki ko iá, ʻa e meʻa mahuʻinga taha ʻoku hoko ʻi he māmaní ʻi he ʻaho ní. ʻOku ʻikai ha toe meʻa te ne fakatataua hono mālohí, ʻikai ha toe meʻa te ne fakatataua hono mahuʻingá, ʻikai ha toe meʻa te ne fakatataua hono fakaʻeiʻeikí. Pea kapau te ke fili ki ai, kapau ʻokú ke loto ki ai, te ke hoko ko hano konga kāfakafa. Te ke lava ʻo hoko ko ha konga kāfakafa ʻo ha meʻa ʻoku lahi, fakaofo, mo ha meʻa fakaʻeiʻeiki!

“ʻI heʻetau talanoa ko ia ki he tānaki fakatahá, ʻoku tau ʻuhinga ai ki he moʻoni mahuʻinga ko ʻení: ʻoku fie maʻu ʻe he tokotaha kotoa pē ʻi he fānau ʻetau Tamai Hēvaní, ʻi he ongo tafaʻaki ʻo e veilí fakatouʻosi, ʻa e pōpoaki ʻo hono toe fakafoki mai ʻa e ongoongolelei ʻo Sīsū Kalaisí. ʻOku nau fili maʻanautolu pē ʻo kapau ʻoku nau fie maʻu ke ʻilo lahi ange. …

“Kuo fakatatali ʻe he Tamai Hēvaní ha tokolahi ʻo ʻEne ngaahi laumālie fakaʻeiʻeiki tahá—pea mahalo, te u lava ʻo pehē, ʻa ʻEne timi lelei tahá—ki he konga fakaʻosi ko ʻení. Ko e ngaahi laumālie fakaʻeiʻeiki ko iá—ko e kau vaʻinga lelei taha ko iá, ko e kau helo ko iá—ʻa kimoutolu!” (“Hope of Israel” [fakataha lotu fakamāmanilahi maʻá e toʻu tupú, 3 ‘o Sune, 2018], ChurchofJesusChrist.org).

Ko Hono Fakatupulaki ʻEtau Founga Akoʻí

Akoʻi mahino mo faingofua. ʻOua ʻe feinga ke fakafiefiaʻi hoʻo kalasí, kae akoʻi mahino mo faingofua e tokāteliné. ʻE lava ke ke falala ʻe hanga ʻe he “ivi ʻo e folofola ʻa e ʻOtuá” ʻo maʻu ha “mālohi lahi ange [ki Heʻene] ngāué ʻi he fakakaukau ʻa e kakaí … [ʻi ha] toe meʻa kehe” ( ʻAlamā 31: 5).