29 Māʻasi–4 ʻEpeleli

Toetuʻú

“Ko Au Ia ʻa ia ʻOku Moʻuí, Ko Au Ia ʻa ia naʻe Fakapōngí”

ʻOku ʻikai ha meʻa ʻe mahuʻinga ange ka ko e mahino kiate kitautolu ʻa e Fakalelei ʻa Sīsū Kalaisí. Fakakaukau ki he kakai ʻe omi ki hoʻo kalasí, ko e hā ʻe tokoni ke fakaloloto ange ai ʻenau tui kia Sīsū Kalaisí?

Lekooti Hoʻo Ngaahi Ongó

Fakaafeʻi e Feʻinasiʻakí

ʻI hono ako ʻe he kau mēmipa hoʻo kalasí e Tokāteline mo e Ngaahi Fuakavá he taʻu ní, mahalo ne nau maʻu ha ngaahi potufolofola fekauʻaki mo e Fakamoʻuí ʻoku mahuʻingamālie kiate kinautolu. Kamata e kalasí ʻaki hano ʻoange kiate kinautolu ha faingamālie ke vahevahe e ngaahi potufolofola ko ʻení. Kuo fakaloloto fēfē nai ʻe heʻetau ako e Tokāteline mo e Ngaahi Fuakavá ʻa ʻetau tui kia Sīsū Kalaisí?

Akoʻi ʻa e Tokāteliné

Ne fakahoko ʻe Sīsū Kalaisi ha “fakalelei haohaoa.”

• Koeʻuhi ʻoku mahuʻinga fau ʻa e tokāteline ʻo e Fakalelei ʻa Sīsū Kalaisí, fakakaukau ke tuku ha taimi feʻunga ke fakapapauʻi ʻoku mahino ia ki he kau mēmipa ʻo e kalasí. Ke fai ʻeni, ʻe lava ke ke tohi ʻi he palakipoé ha ngaahi fehuʻi hangē ko ʻení: Ko e hā ʻa e Fakalelei ʻa Sīsū Kalaisí? Ko e hā ʻene kaunga ki heʻeku moʻui fakaʻahó? Ko e hā ʻene kaunga ki heʻeku moʻui taʻengatá? Te u maʻu fēfē ʻa e mālohi ʻo e huhuʻi ʻa e Fakamoʻuí ʻi heʻeku moʻuí? ʻOange ki he kau mēmipa ʻo e kalasí ha taimi ke nau fakalaulauloto ki he ngaahi fehuʻi ko ʻení pea kumi ha ngaahi potufolofola ʻe tokoni ki hono tali kinautolú. ʻE lava ʻe he kau mēmipa ʻo e kalasí ʻo tohi ʻenau ngaahi fakamoʻoni fakafolofolá ʻi he palakipoé, pea lava ke mou aleaʻi fakakalasi hanau niʻihi. Ko ha ngaahi sīpinga ʻeni: Luke 22:39–44; 1 Sione 1:7; 2 Nīfai 2:6–9; Mōsaia 3:5–13, 17–18; ʻAlamā 7:11–14; Molonai 10:32–33; Tokāteline mo e Ngaahi Fuakava 19:16–19; 45:3–5.

• ʻE mahuʻingamālie ki he kau mēmipa ʻo e kalasí ke mamata ʻi he vitiō “The Savior Suffers in Gethsemane” (ChurchofJesusChrist.org) kimuʻa pea nau lau e folofola ʻa e Fakamoʻuí fekauʻaki mo ʻEne faingataʻaʻia ʻi he Tokāteline mo e Ngaahi Fuakava 19:16–19. ʻOku fakaloloto fēfē ʻe he ngaahi veesi ko ʻení ʻa ʻetau houngaʻia ʻi he feilaulau ʻa Sīsū Kalaisí? ʻE lava ke ke vahevahe ha ngaahi vitiō kehe fekauʻaki mo e Toetuʻú ʻa ia ʻoku lisi ʻi he “Ngaahi Maʻuʻanga Tokoni Kehé.”

  

  ʻEiki ʻo e Lotú, tā ‘e Kim Yongsung

Tokāteline mo e Ngaahi Fuakava 76:11–14, 20–24; 110:1–10

Naʻe fakamoʻoni ʻa e Palōfita ko Siosefa Sāmitá ʻoku moʻui ʻa Sīsū Kalaisi.

• Naʻe mamata ʻa Siosefa Sāmita ki he Fakamoʻui kuo toe tuʻú pea fai ha fakamoʻoni mālohi ʻoku moʻui ʻa Sīsū Kalaisi. Ke tokoni ki he kau mēmipa ʻo e kalasí ke ako e fakamoʻoni ʻa Siosefa Sāmitá, ʻe lava ke ke vahevahe kinautolu ki ha kulupu ʻe ua pea vahe ki he kulupu takitaha ke lau ʻa e Tokāteline mo e Ngaahi Fuakava 76:11–14, 20–24 pe 110:1–10. Fakaafeʻi e kau mēmipa ʻo e kalasí ke kumi ha foʻi lea ʻi he ngaahi veesi ko ʻení ʻokú ne fakamatalaʻi e Fakamoʻuí. ʻE lava e kau mēmipa ʻo e kalasí ʻo taufetongi ʻi hono tohi ʻi he palakipoé ha ngaahi foʻi lea ke tataki ha fealeaʻaki fekauʻaki mo e ngaahi ʻulungaanga mo e mālohi ʻo e Fakamoʻuí. ʻOku fakamālohia fēfē ʻe he fakamoʻoni ʻa Siosefa Sāmitá ʻa ʻetau tui ki he faka-ʻotua mo e misiona ʻo Sīsū Kalaisí?

• Mahalo kuo fakafehokotaki ʻe ha niʻihi ʻo e kau mēmipa ʻo e kalasí ʻa e ngaahi akonaki ʻi he Tokāteline mo e Ngaahi Fuakava mo e ngaahi lea mo e ngaahi tefitoʻi moʻoni ʻi he himi ʻOku Moʻui Hoku Huhuʻí” (Ngaahi Himí, fika 68; vakai, fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Mahalo te nau loto fiemālie ke vahevahe ʻa e meʻa ne nau ʻiló. ʻE lava foki ke ke lau pe hivaʻi ʻa e himi ko ʻení ʻi he fekumi ko ia ʻa e kalasí ki ha ngaahi fehokotaki mo e ngaahi potufolofola ko ʻení: Tokāteline mo e Ngaahi Fuakava 6:34; 45:3–5; 84:77; 98:18; 138:23. Ko e hā e founga ne tau ʻilo ai ʻoku moʻui hotau Huhuʻí?

Tokāteline mo e Ngaahi Fuakava 29:26–27; 42:45–46; 63:49; 88:14–17, 27–31; 93:33–34

Te tau toetuʻu koeʻuhi ko Sīsū Kalaisi.

• Ke tokoni ke aleaʻi ʻe he kau mēmipa ʻo e kalasí ʻa e meʻa ʻoku akoʻi ʻe he Tokāteline mo e Ngaahi Fuakavá fekauʻaki mo e toetuʻú, ʻe lava ke ke fakaafeʻi kinautolu ke nau fakakaukauloto ʻoku ʻi ai haʻanau kaungāmeʻa pe mēmipa honau fāmilí naʻe fehuʻi ange pe ko e hā e ʻuhinga ke toetuʻú. Te tau tokoni fēfē ke mahino ki he tokotaha ko iá ʻa e ʻuhinga ʻo e toetuʻú? Poupouʻi ʻa e kau mēmipa ʻo e kalasí ke fekumi ʻi he Tokāteline mo e Ngaahi Fuakava 88:14–17, 27–31 ki ha meʻa ʻe ala tokoni. ʻOku kau ʻi he ngaahi fakamoʻoni fakafolofola kehé ʻa e ʻAlamā 11:40–45 mo e ʻAlamā 40:21–23. Ko e hā ha meʻa te tau vahevahe ke tokoni ki hotau kaungāmeʻá pe mēmipa hotau fāmilí ke nau ongoʻi ʻa e fiefia mo e ʻamanaki lelei ʻoku maʻu mei he tokāteline ʻo e toetuʻú?

• Te ke tokoniʻi fēfē ʻa e kau mēmipa ʻo e kalasí ke nau fakakaukau ki he meʻaʻofa ʻo e toetuʻu ʻa e Fakamoʻuí? Mahalo te ke lava ʻo hiki ʻi he palakipoé ʻa e Koeʻuhi ko Sīsū Kalaisi … pea fakaafeʻi e kau mēmipa ʻo e kalasí ke fekumi ʻi he ngaahi potufolofola ko ʻení ki ha ngaahi lea te ne lava ʻo fakakakato e kupuʻi lea ko ʻení: Tokāteline mo e Ngaahi Fuakava 29:26–27; 42:45–46; 63:49; 93:33–34. ʻOku uesia fēfē ʻe he ngaahi moʻoni ʻi he ngaahi veesi ko ʻení ʻa e anga ʻo ʻetau vakai ki he maté? ʻOku nau uesia fēfē ʻetau moʻui fakaʻahó?

Ngaahi Maʻuʻanga Tokoni Lahi Ange

Ngaahi vitiō fekauʻaki mo e Toetuʻú ʻi he ChurchofJesusChrist.org.

“He Lives: Testimonies of Jesus Christ”

“Because He Lives”

“Because of Him”

“His Sacred Name—An Easter Declaration”

Ko Hono Fakatupulaki ʻEtau Founga Akoʻí

Tokoniʻi e kau mēmipa ʻo e kalasí ke nau fekumi ʻi he ngaahi folofolá. “ʻI hoʻo faiakó, fai ha ngaahi fehuʻi ʻe fie maʻu ke kumi ai ʻe he kau akó ha ngaahi tali ʻi he folofolá. … Tokoni ke nau ʻilo neongo naʻe tohi ʻa e folofolá he ngaahi taʻu lahi kuohilí, ka ʻoku ʻi ai e ngaahi tali ʻa e ʻEikí ki he ngaahi fehuʻi mo e palopalema lahi ʻoku tau fehangahangai mo iá” (Faiako ʻi he Founga ʻa e Fakamoʻuí, 30).