“19–25 ʻEpeleli. Tokāteline mo e Ngaahi Fuakava 41–44: ‘Ko ʻEku Fono Ke Puleʻi ʻAki ʻa Hoku Siasí,’” Haʻu, ʻo Muimui ʻIate Au—Maʻá e Lautohi Faka-Sāpaté: Tokāteline mo e Ngaahi Fuakava 2021 (2020)
“19–25 ʻEpeleli. Tokāteline mo e Ngaahi Fuakava 41–44,” Haʻu, ʻo Muimui ʻIate Au—Maʻá e Lautohi Faka-Sāpaté
19–25 ʻEpeleli
Tokāteline mo e Ngaahi Fuakava 41–44
“Ko ʻEku Fono Ke Puleʻi ʻAki ʻa Hoku Siasí”
He ʻikai te mou lava ʻo aleaʻi fakakalasi ʻa e ngaahi tefitoʻi moʻoni kotoa ʻoku akoʻi ʻi he Tokāteline mo e Ngaahi Fuakava 41–44. Fekumi ki ha ueʻi fakalaumālie ke tokoni kiate koe ʻi hono fili ko ia e ngaahi tefitoʻi moʻoni ʻe ʻaonga taha ki hoʻo kalasí.
Lekooti Hoʻo Ngaahi Ongó
Fakaafeʻi e Feʻinasiʻakí
ʻI he taimi ne pulusi ai e ngaahi fakahā ʻi he vahe 42 ne tohi ʻa Siosefa Sāmita ʻo pehē ne “talitali fiefia kinautolu ʻe he [Kāingalotú]” (“Letter to Martin Harris,” Feb. 22, 1831, josephsmithpapers.org). Poupouʻi e kau mēmipa ʻo e kalasí ke vahevahe ha meʻa mei heʻenau ako fakataautaha pe fakafāmili he uike ní, ʻa ia ne nau fiefia hono maʻu iá.
Akoʻi ʻa e Tokāteliné
Tokāteline mo e Ngaahi Fuakava 41–42
ʻOku puleʻi ʻe he ngaahi fono ʻa e ʻOtuá ʻa Hono Siasí pea lava ke puleʻi ʻetau moʻuí.
-
ʻI he Tokāteline mo e Ngaahi Fuakava 41 ne tokoniʻi ai ʻe he ʻEikí ʻa e Kāingalotú ke teuteu ke maʻu ʻEne ngaahi fonó, ʻa ia naʻá Ne fakahā ʻi ha ngaahi ʻaho siʻi pē mei ai (vakai, vahe 42). Naʻe mei tokoni fēfē nai ʻa e fakahā ʻi he vahe 41 ke maʻu ʻe he Kāingalotú ʻa e fono ʻa e ʻOtuá? Ke tokoni ke tali ʻe he kau mēmipa ʻo e kalasí ʻa e fehuʻi ko ʻení, ʻoku totonu ke ke fakaafeʻi kinautolu ke lau ʻa e Tokāteline mo e Ngaahi Fuakava 41:1–6 pea kumi e ngaahi tefitoʻi moʻoni ʻe lava tokoni ke tau maʻu ʻa e fono ʻa e ʻOtuá. Te tau fakaʻaongaʻi fēfē ʻa e ngaahi tefitoʻi moʻoni ko ʻení ʻi he taimi ʻoku tau maʻu ai ha ngaahi faingamālie ke maʻu fakahinohio mei he ʻEikí?
-
ʻI he fokotuʻutuʻu ki he uike ní ʻi he Haʻu, ʻo Muimui ʻIate Aú—Maʻá e Fakafoʻituituí mo e Ngaahi Fāmilí ʻoku fokotuʻu atu ai ke vahevahe ʻa e ngaahi veesi ʻi he vahe 42 ki ha ngaahi kulupu ʻe nima, ʻa ia ʻoku nau fakamatalaʻi ha tefitoʻi moʻoni mahuʻinga ʻo e ongoongoleleí. Mahalo naʻa fakafaingofuaʻi ʻe he ngaahi kulupu ko ʻení ke mou aleaʻi ʻa e vahe ko ʻení ʻi he kalasí. Hangē ko ʻení, ʻe lava ke ke tohi ʻa e fakamoʻoni fakafolofolá ʻi he palakipoé pea fakaafeʻi e mēmipa takitaha ʻo e kalasí ke fili ha kulupu ʻe taha. Kole ki he kau mēmipa ʻo e kalasí ke lau ʻenau ngaahi vēsí pea fekumi ki ha meʻa ʻoku nau ongoʻi ʻoku mahuʻinga kiate kitautolu ʻi hotau ngaahi kuongá ni. Te nau lava leva ʻo vahevahe ha ngaahi sīpinga mei heʻenau moʻuí ʻokú ne fakatātaaʻi ʻa hono tāpuekina kitautolu ʻi he taimi ʻoku tau puleʻi ai ʻetau moʻuí ʻaki e ngaahi fono ko ʻení.
Tokāteline mo e Ngaahi Fuakava 41:9–11
ʻOku kole mai ʻa e ʻEikí ki Heʻene kau tamaioʻeikí ke nau feilaulau.
-
Naʻe fekauʻi ʻa ʻEtuate Patilisi ko e fuofua pīsope ʻo e Siasi kuo toe fakafoki maí ke tuku ʻa ʻene ngāue maʻuʻanga moʻuí pea ke “fakamoleki hono taimí kotoa” ʻi hono uiuiʻí. Neongo ʻoku ʻikai fie maʻu ʻeni meiate kitautolu, ka ko e hā ʻoku tau ʻilo ʻi he ngaahi veesi ko ʻení ʻoku lava ke ʻaonga ki heʻetau ngāue ki he ʻOtuá? (Ki ha toe fakamatala lahi ange kia ʻEtuate Patilisi, vakai “A Bishop unto the Church,” Revelations in Context, 77–83.)
Tokāteline mo e Ngaahi Fuakava 42:61, 65–68; 43:1–7
ʻOku ʻomi ʻe he fakahaá ʻa e nonga, fiefia, mo e moʻui taʻengatá.
-
Mahalo ʻe hangē e kau mēmipa hoʻo kalasí ko e kau taki kimuʻa ʻo e Siasí, ʻo ʻi ai haʻanau ngaahi fehuʻi ʻe ngali hangē ha “ngaahi meʻa liló,” he ʻoku nau fie maʻu ha fakahinohino mei he ʻEikí. ʻE lava ke ke poupouʻi kinautolu ke tohi ha ngaahi fehuʻi pe palopalema ʻoku nau maʻu ʻa ia ʻoku nau fie maʻu ai ha fakahā fakataautaha. Ko e hā ʻoku tau maʻu ʻi he Tokāteline mo e Ngaahi Fuakava 42:61, 65–68 ʻe lava ke tokoni ʻi heʻetau fekumi ki ha fakahaá?
-
Te ke lava ʻo fakaafeʻi e kau mēmipá ke lau ʻa e Tokāteline mo e Ngaahi Fuakava 43:1–7 ke tokoni ke mahino kiate kinautolu ʻa e founga ʻoku ʻomi ai ʻe he ʻOtuá ʻa e fakahā ke tataki ʻa Hono Siasí. ʻE toe lava foki ke nau mamata ʻi he vitiō “Prophets and Revelation—Hearing His Voice” (ChurchofJesusChrist.org).
Tokāteline mo e Ngaahi Fuakava 43:8–10
ʻOku tau fakatahá ke “feakoʻaki mo fefakamaamaʻaki.”
-
Te tau fakaʻaongaʻi fēfē ʻa e Tokāteline mo e Ngaahi Fuakava 43:8–10 ke akoʻi ha taha ʻokú ne ongoʻi ʻoku ʻikai fie maʻu ke haʻu ki he ngaahi fakatahaʻanga ʻa e Siasí? ʻE lava ke tokoni atu e lisi ʻi he “Ngaahi Maʻuʻanga Tokoni Kehé” ke nofotaha ʻa e fealēleaʻaki ko ʻení ʻi he ngaahi taumuʻa fakalangi ʻo e ngaahi kōlomu ʻo e lakanga fakataulaʻeikí mo e Fineʻofá (ʻoku kaunga foki ʻa e lisí ki he ngaahi kalasi ʻa e Kau Finemuí). ʻE lava ke vahevahe ʻe he kau mēmipa ʻo e kalasí ʻa e founga kuo faitāpuekina ai kinautolu ʻi heʻenau kau atu ki he ngaahi kōlomú, Fineʻofá mo e ngaahi kalasi ʻi he Lotú. Ko e hā ʻoku fokotuʻu mai ʻe he veesi 8–10 fekauʻaki mo e meʻa ʻoku totonu ke tau fai ke teuteu pea kau atu ai ki heʻetau ngaahi fakatahá?
ʻĪmisiKalasi Lautohi Faka-Sāpate ʻa e toʻu tupúKo e fakatahaʻ i he lotú ko ha founga ia ʻe taha te tau lava ai ʻo “feakoʻaki mo fefakamaamaʻakí.”
Ngaahi Maʻuʻanga Tokoni Lahi Ange
Ko e ʻuhinga ʻoku fokotuʻutuʻu ai kitautolu ki ha ngaahi kōlomu mo e Fineʻofá.
Naʻe fakamatalaʻi ʻe Sisitā Suli B. Peki ne hoko kimuʻa ko ha Palesiteni Lahi ʻa e Fineʻofá, ʻa e ʻuhinga kuo fokoutuʻutuʻu ai kitautolu ʻe he ʻOtuá ki ha ngaahi kōlomu ‘o e lakanga fakataulaʻeikí mo e Fineʻofá:
-
“Ke fokotuʻutuʻu kitautolu ʻi he malumalu pea ʻi he sīpinga ʻo e lakanga fakataulaʻeikí.”
-
“Ke tokangataha ʻa e foha mo e ʻofefine ʻo e Tamai Hēvaní ki he ngāue ʻo e fakamoʻuí pea fakakau kinautolu ki ai. Ko e ngaahi kōlomú mo e Fineʻofá ko ha fokotuʻutuʻu fakaākonga mo ha fatongia ke tokoni ʻi he ngāue ʻa ʻetau Tamai Hēvaní ke fakahoko e moʻui taʻengatá ki Heʻene fānaú.”
-
“Ke tokoni ki he kau pīsopé pe levaʻi lelei e tukuʻanga koloa ʻa e ʻEikí. ʻOku toe kau pē ki ai mo hono foaki ʻe he kāingalotu ʻo e Siasí honau ‘taimí, talēnití, ʻofá, ngaahi koloá, mo ha ngaahi founga fakapaʻanga [Tohi Tuʻutuʻuni Fika 2: Ko Hono Puleʻi ʻo e Siasí,6.1.3, ChurchofJesusChrist.org]. ʻOku fakaʻaongaʻi e ngaahi talēniti ʻo e Kāingalotú ke tokoni ki hono tokangaʻi e masivá mo e faingataʻaʻiá pea ke langa e puleʻanga ʻo e ʻEikí.”
-
“Ke tokonaki ha maluʻi mo ha hūfangaʻanga maʻá e fānau ʻa e Tamai Hēvaní mo honau ngaahi fāmilí ʻi he ngaahi ʻaho kimui ní.”
-
“Ke fakamālohia mo poupouʻi kitautolu ʻi hotau ngaahi fatongia fakafāmilí mo e ngaahi fatongia ko e ngaahi foha mo e ʻofefine ʻo e ʻOtuá.” (“Why We Are Organized into Quorums and Relief Societies” [Brigham Young University devotional, Jan. 17, 2012], speeches.byu.edu.)
Ko Hono Fakatupulaki ʻEtau Founga Akoʻí
Fakaafe. “Kae ʻikai fakahoko maʻu pē ʻa e fakaafe ke fai ha meʻa pau, fakakaukau ke fakaafeʻi e kau akó ke nau fakakaukau ki ha founga pē ʻa kinautolu ke fakaʻaongaʻi ai e meʻa kuo nau akó” (Ko e Faiako ʻi he Founga ʻa e Fakamoʻuí,35).