5–11 ʻEpeleli

Tokāteline mo e Ngaahi Fuakava 30–36

“ʻOku Ui Koe Ke Malanga ʻAki ʻEku Ongoongoleleí”

ʻI hoʻo lau ʻa e Tokāteline mo e Ngaahi Fuakava 30–36, ko e hā ha pōpoaki ʻokú ke ongoʻi ʻe ʻaonga kiate kinautolu ʻokú ke akoʻí? Ko e hā ha meʻa ʻe tokoni ke ueʻi fakalaumālie kinautolu ke nau vahevahe ʻa e ongoongoleleí mo e niʻihi kehé?

Lekooti Hoʻo Ngaahi Ongó

Fakaafeʻi e Feʻinasiʻakí

Mahalo ʻe lava ke vahevahe ʻe he kau mēmipa ʻo e kalasí ha meʻa ne nau lau ʻi he Tokāteline mo e Ngaahi Fuakava 30–36 ʻokú ne ueʻi fakalaumālie kinautolu ke nau vahevahe ʻa e ongoongoleleí.

Akoʻi ʻa e Tokāteliné

Tokāteline mo e Ngaahi Fuakava 30–36

ʻOku uiuiʻi kitautolu ke tau malanga ʻaki e ongoongolelei ʻo Sīsū Kalaisí.

• ʻOku fokotuʻu atu ʻe he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke fekumi ʻi he Tokāteline mo e Ngaahi Fuakava 30–36 ki he meʻa naʻe kole ʻe he ʻEikí mei Heʻene kau faifekaú mo e meʻa ʻokú Ne talaʻofa kiate kinautolú. ʻE lava ʻe he kau mēmipa ʻo e kalasí ke vahevahe ʻa e meʻa ne nau ʻiló. (Vakai ki ha sīpinga ʻi he, Tokāteline mo e Ngaahi Fuakava 30:8; 31:3–5; 32:1, 5; 35:24.) Mahalo te ke lava ʻo fakaafeʻi kinautolu ke fai ha tohi ki ha taha ʻoku lolotonga ngāue pe teuteu ke ngāue fakafaifekau pea fakakau ai ha niʻihi ʻo e ngaahi fakahinohino mo e talaʻofa ne fai ʻe he ʻEikí.

• ʻOkú ke akoʻi ha toʻu tupu ʻoku nau teuteu ke ngāue ko ha kau faifekau? Kapau ko ia, ʻe lava ke ke fakaafeʻi e mēmipa takitaha ʻo e kalasí ke nau fekumi ʻi ha taha ʻo e ngaahi vahe mei he Tokāteline mo e Ngaahi Fuakava 30–36 ki ha meʻa ʻokú ne ueʻi fakalaumālie kinautolu ke ngāue. Te ke lava ʻo fakamahinoʻi ange ko e kau faifekau ʻoku fakamatala ki ai e ngaahi vahe ko ʻení ne nau foʻou pea ʻikai taukei ʻi he Siasí. Ko e hā naʻá ne fakafeʻungaʻi kinautolu ke vahevahe e ongoongoleleí? Te ke lava foki ke huluʻi ha taha ʻo e ngaahi vitiō ʻoku lisi atu ʻi he “Ngaahi Maʻuʻanga Tokoni Kehé.” Ko e hā ʻoku fokotuʻu mai ʻe he ngaahi vitiō ko ʻení ʻo fekauʻaki mo e ʻuhinga ʻoku totonu ke tau ngāue fakafaifekau aí mo e founga te tau lava ai ʻo teuteú?

• ʻOku ʻikai maʻu ʻe he taha kotoa ha faingamālie ke ngāue fakafaifekau taimi kakato, ka te tau lava kotoa ʻo fakaafeʻi e niʻihi kehé ke haʻu kia Kalaisi pea fanongo ki he pōpoaki ʻo hono fakafoki mai ʻo e ongoongoleleí. ʻE lava ʻe he kau mēmipa ʻo e kalasí ʻo hiki ha lisi ʻo e ngaahi founga kehekehe te nau lava ai ʻo “fakaava [honau] ngutú” (Tokāteline mo e Ngaahi Fuakava 33:8–10). Ko e hā ha ngaahi faingamālie fakanatula ʻoku tau maʻu ke vahevahe ai ʻetau tuí mo e niʻihi kehé? Ko e hā e faleʻi ʻi he Tokāteline mo e Ngaahi Fuakava 30–36 ʻoku ʻaonga ki hono vahevahe ʻa e ongoongoleleí ʻi he ngaahi founga ko ʻení? Fakakaukau ke kole ki ha niʻihi ʻo e kalasí kuo nau aʻusia ha ngaahi meʻa lelei ʻi hono vahevahe ʻo e ongoongoleleí ke vahevahe ʻenau ngaahi fakakaukaú pea tali ha ngaahi fehuʻi ʻe ala maʻu ʻe he kalasí.

• Naʻe talaʻofa e ʻEikí kia ʻĒsela Teia mo Notelopi Suiti kapau ʻe fakaava ʻa hona ngutú ke vahevahe ʻa e ongoongoleleí, te na “hoko ʻo tatau mo Nīfai ʻo e kuonga muʻá” (Tokāteline mo e Ngaahi Fuakava 33:8). Ko e hā ha ngaahi ʻulungaanga ʻo Nīfai ʻe lava ʻo fakafekauʻaki mo hono vahevahe ʻo e ongoongoleleí? (vakai, hangē ko ʻení, 1 Nīfai 3:7; 4:6; 10:17; 17:15; 2 Nīfai 1:27–28). ʻE lava fēfē ʻe he ngaahi ʻulungaanga ko ʻení ʻo tokoniʻi kitautolu ʻi heʻetau ngaahi feinga ko ia ke vahevahe e ongoongoleleí?

  

  ʻOku kole mai e ʻEikí ke tau malanga ʻaki e ongoongoleleí ʻi hotau kuongá ni ʻo hangē ko e Siasi ʻi he kuonga muʻá.

Tokāteline mo e Ngaahi Fuakava 32–33; 35

ʻOku teuteuʻi kitautolu ʻe he ʻEikí ki he ngāue ʻokú Ne finangalo ke tau faí.

• Kuo tokoniʻi fēfē kitautolu ʻe he ʻEikí ke fakahoko ʻEne ngāué? Mahalo ko ha kamataʻanga lelei ke fealeaʻaki mo e moʻui ʻa e kakai ʻoku fakamatalaʻi ʻi he Tokāteline mo e Ngaahi Fuakava 32–33, 35 ke fakalaulauloto ai ki he ngaahi aʻusia ko ʻení. Hangē ko ʻení, ʻe lava ke ke vahevahe mo e kalasí e fakamatala ʻa ʻĒsela Teia ki heʻene mata meʻa-hā-maí ʻi he “Ngaahi Maʻuʻanga Tokoni Kehé” pea fakaafeʻi leva e kau mēmipa ʻo e kalasí ke nau lau ʻa e Tokāteline mo e Ngaahi Fuakava 33:1–13, ʻa ia ko e konga ʻo ha fakahā kia ʻĒsela Teia. Ko e hā e founga ne teuteuʻi ʻaki ʻe he ʻEikí ʻa ʻĒsela ki he ngāue naʻe finangalo ʻa e ʻEikí ke ne fakahokó? (vakai, Tokāteline mo e Ngaahi Fuakava 33: 2). ʻE lava foki ke ke kole ange ki he kau mēmipa ʻo e kalasí ke nau vahevahe ha ngaahi puipuituʻa fekauʻaki mo e vā fetuʻutaki ʻo Paʻale P. Pālati pea mo Sitenei Likitoní (vakai, “Voices of the Restoration: Early Convert Testimonies” ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Naʻe faitāpuekina fēfē ʻe he vā fetuʻutaki ko ʻení ʻa e Siasí? Ko e hā ha fakamoʻoni ʻoku tau vakai ki ai ne kau ʻa e toʻukupu ʻa e ʻEikí ʻi he moʻui ʻa e kau tangatá ni? Mahalo ʻe lava e kau mēmipa ʻo e kalasí ʻo vahevahe ha ngaahi aʻusia ne tokoni kiate kinautolu ke nau vakai ʻoku ʻafioʻi kinautolu ʻe he ʻEikí ʻi ha founga tatau.

Ngaahi Maʻuʻanga Tokoni Lahi Ange

Ngaahi vitiō fekauʻaki mo e ngāue fakafaifekaú (ʻi he ChurchofJesusChrist.org).

“Ko Ho ʻAho ke Ngāue Fakafaifekaú”

“Ko ha Fatongia ʻo e Lakanga Fakataulaʻeikí”

Ko e mata meʻa-hā-mai ʻa ʻĒsela Teiá.

Ne tohi ʻa ʻĒsela Teia naʻá ne maʻu ha mata meʻa-hā-mai kimuʻa siʻi pē pea papitaisó “ne haʻu ai ha tangata ʻo ʻomai kiate au ha takainga pepa peá ne foaki mai foki mo ha talupite peá ne talamai ke u [puhi] ia. Ne u talaange ki ai kuo teʻeki ke u [puhi] ha meʻa pehē ʻi heʻeku moʻuí. Naʻá ne pehē mai te ke lava ʻo [puhi] ia, ʻahiʻahiʻi angé. … Naʻá ne ʻomi ʻa e ongo fakaʻofoʻofa taha kuó u fanongo ki aí” (“Revelation, October 1830–B, Revelation Book 1,” historical introduction, josephsmithpapers.org). ʻI he maʻu ko ia kimui ʻe Siosefa Sāmita ha fakahā fekauʻaki mo ʻĒsela Teia mo Notelopi Suití ʻa ia ʻoku lekooti ko e Tokāteline mo e Ngaahi Fuakava 33, ne fakaʻuhingaʻi ʻe ʻĒsela ʻa e fakahaá ko e takainga pepa ʻi heʻene mata meʻa-hā-maí.

Ko Hono Fakatupulaki ʻEtau Founga Akoʻí

Poupouʻi ha ʻātakai ʻoku fakaʻapaʻapá. “Tokoni ke mahino ki he kau mēmipa hoʻo kalasí ʻoku ʻi ai ʻenau kaunga kotoa ki he laumālie ʻo e kalasí. Poupouʻi kinautolu ke nau tokoni ʻo fokotuʻu ha ʻātakai tauʻatāina, ʻofa, mo fakaʻapaʻapa ke ongoʻi malu ʻa e taha kotoa ke vahevahe ʻenau ngaahi aʻusiá, ngaahi fehuʻí, mo e fakamoʻoní” (Ko e Faiako ʻi he Founga ʻa e Fakamoʻuí, 15).