“12–18 ʻEpeleli. Tokāteline mo e Ngaahi Fuakava 37–40: ‘Kapau ʻOku ʻIkai Te Mou Taha ʻOku ʻIkai ʻAʻaku ʻa Kimoutolu,’” Haʻu, ʻo Muimui ʻIate Au—Maʻá e Lautohi Faka-Sāpaté: Tokāteline mo e Ngaahi Fuakava 2021 (2020)
“12–18 ʻEpeleli. Tokāteline mo e Ngaahi Fuakava 37–40,” Haʻu, ʻo Muimui ʻIate Au—Maʻá e Lautohi Faka-Sāpaté: 2021
Hiki ʻa e Kāingalotú ki Ketilaní, tā ʻe Sam Lawlor
12–18 ʻEpeleli
Tokāteline mo e Ngaahi Fuakava 37–40
“Kapau ʻOku ʻIkai Te Mou Taha ʻOku ʻIkai ʻAʻaku ʻa Kimoutolu”
Kimuʻa pea palani e meʻa te ke fai ʻi he kalasí, ako ʻi he faʻa lotu ʻa e Tokāteline mo e Ngaahi Fuakava 37–40. ʻE lava ke ke maʻu ange ha tataki fakalaumālie ʻi hoʻo teuteu ke faiakó ʻo kapau te ke ʻuluaki maʻu ha ngaahi aʻusia ʻoku ʻuhingamālie ʻi he ngaahi potufolofola ko ʻení.
Lekooti Hoʻo Ngaahi Ongó
Fakaafeʻi e Feʻinasiʻakí
Fakakaukau ke tohi ʻi he palakipoé, ʻa e, ʻI heʻeku lau ʻa e Tokāteline mo e Ngaahi Fuakava 37–40, naʻá ku ongoʻi naʻe folofola mai ʻa e ʻEikí kiate au . ʻE lava ʻe he kau mēmipa ʻo e kalasí ʻo vahevahe ʻa e founga te nau fakakakato ʻaki e sētesí. Poupouʻi kinautolu ke vahevahe ha ngaahi veesi mei he meʻa ne nau laú ko ha konga ʻo ʻenau talí.
Akoʻi ʻa e Tokāteliné
Tokāteline mo e Ngaahi Fuakava 37–38
ʻOku tānaki kitautolu ʻe he ʻOtuá ke tāpuekina kitautolu.
-
ʻOku faingofua ange he taimi ʻe niʻihi ke ako mei he ngaahi fakahā ʻi he Tokāteline mo e Ngaahi Fuakavá, ʻi heʻetau fakakaukau ʻoku tau ʻi he tuʻunga ʻo e kakai ne tomuʻa foaki ange ki aí. Ke tokoni ki he kau mēmipa ʻo e kalasí ke fai ʻeni ki he vahe 37–38, te ke lava ʻo fakaafeʻi kinautolu ke nau fakakaukau ʻoku nau nofo ʻi Feieti, Niu ʻIoke, ʻi he 1831. ʻE lava ʻe ha mēmipa ʻo e kalasí ʻo ʻai ke pehē ko Siosefa Sāmita ia pea lau ʻa e vahe 37 kiate kinautolu. Ne tau mei tali fēfē nai ʻa e fekau ko ʻení? Mahalo ʻe lava e kau mēmipa ʻo e kalasí ʻo fakakaukau ʻoku ʻi ai honau kaungāmeʻa ʻoku ʻikai ke fie kau ia he tānaki ki ʻOhaioó; ʻe lava ke nau fekumi ʻi he vahe 38 ki ha ngaahi tefitoʻi moʻoni ʻe lava ke ne fakalotolahiʻi honau kaungāmeʻá ke tauhi faivelenga ki he fekau ke tānakí fakatahá. (Kapau ʻe fie maʻu, ʻe lava ke ke tataki kinautolu kae tautautefito ki he veesi 1–4, 11–12, 17–22, mo e 27–33.) Mahalo ʻe loto lelei e kau mēmipa ʻo e kalasí ke vahevahe kau ki hano tokoniʻi kinautolu ʻe ha ngaahi tefitoʻi moʻoni meimei tatau mo ia ʻi he taimi naʻe fiemaʻu ai ke nau talangofua ki ha fekau ne ngali faingataʻa.
-
ʻOku ʻikai toe fekauʻi e Kāingalotu ʻi he Ngaahi ʻAho Kimui Ní ke nau tānaki ʻo hiki ki ha feituʻu kehe, ka ʻoku tau kei tānaki pē ʻi he ngaahi fāmilí, uōtí pea mo e ngaahi siteikí. Ke aleaʻi e founga ʻoku faitāpuekina ai kitautolu ʻe he tānaki ko ʻení ʻi he ʻaho ní, ʻe lava ke ke vahevahe ʻa e kalasí ki ha kulupu ʻe ua. Kole ki ha kulupu ‘e taha ke nau fekumi ʻi he Tokāteline mo e Ngaahi Fuakava 38:31–33 pea kumi e ngaahi tāpuaki ʻoku fekauʻaki mo e tānaki ko ia ko ha ngaahi fāmilí, pea kole ange ki he kulupu ʻe tahá ke nau fekumi ʻi he ngaahi potufolofola tatau ʻo kumi e ngaahi tāpuaki ʻoku fekauʻaki mo e tānaki ko ia ko ha ngaahi uōtí pe siteikí. ʻE lava leva ke nau vahevahe ʻenau ngaahi fakakaukaú mo e kalasí. ʻOku tāpuekina fēfē kitautolu ʻi heʻetau tānaki fakataha mai ko ha kalasi Lautohi Faka-Sāpaté?
Tokāteline mo e Ngaahi Fuakava 38:24–27
Kuo pau ke hoko ʻo taha ʻa e kakai ʻa e ʻOtuá.
-
Ne omi e Kāingalotu ne tānaki ki ʻOhaioó mei ha ngaahi tūkunga kehekehe, ka naʻe fekauʻi kinautolu ʻe he ʻEikí ke ikunaʻi honau ngaahi faikehekehé pea “ke [nau] taha pē” (veesi 27). Ko e hā ʻoku faʻa ʻikai lava ai ke tau vakai ʻoku tau tuʻunga tatau pē mo e niʻihi kehé? Poupouʻi e kau mēmipa ʻo e kalasí ke nau fakalaulauloto ki heʻenau angafai ki he niʻihi kehé ʻi heʻenau lau ʻa e Tokāteline mo e Ngaahi Fuakava 38:24–27. ʻOku ʻuhinga ki he hā ke ʻofa ki hotau ngaahi tokouá mo e tuofāfine pe tuongaʻané ʻo hangē pe ko kitautolú? Ko e hā ʻoku ʻikai ke tau lava ai ʻo hoko ko e kakai ʻa e ʻOtuá ʻo kapau ʻoku ʻikai ke tau uouangataha?
-
ʻE lava ʻe hono lau ʻa e Tokāteline mo e Ngaahi Fuakava 38:24–27 ʻo iku ki ha fealeaʻaki fekauʻaki mo e uouangataha ʻi hotau ngaahi vā fetuʻutakí—ʻi heʻetau hoko ko ha kau mēmipa ʻo ha uooti, ngaahi fāmili mo e ngaahi meʻa peheé. ʻE lava ke tokoni atu ʻa e ongo foʻi vitiō ko e “A Friend to All” pe “Love in Our Hearts” ʻi he ChurchofJesusChrist.org. Hangē ko ʻení, ʻe lava e kau mēmipa ʻo e kalasí ʻo vahevahe ha ngaahi fakamatala pe ongo ne tokoni ke mahino lelei ange kiate kinautolu ʻa e ngaahi tefitoʻi moʻoni ʻi he veesi 24–27. ʻE lava foki ke nau fakalaulauloto pea vahevahe e ngaahi fakakaukau fekauʻaki mo ha fehuʻi hangē ko e “Ko e hā te u lava ʻo fai ke tokoni ke ongoʻi uouangataha ange hoku uōtí?”
Tokāteline mo e Ngaahi Fuakava 38:39; 39–40
ʻOku finangalo e Tamaí ke foaki mai e ngaahi koloa ʻo ʻitānití maʻatautolu.
-
Faʻu ha saati ʻe ala tokoni ke aleaʻi ʻe he kau mēmipa ʻo e kalasí ʻa e Tokāteline mo e Ngaahi Fuakava 38:39. ʻE lava ke lisi ʻe he kau mēmipa ʻo e kalasí ʻi ha ʻotu ʻe taha ʻa e “ngaahi koloa ʻo e māmaní,” pe ngaahi meʻa ʻoku tau pehē ʻoku mahuʻinga ʻi hení ka ʻoku ʻikai ke nau tolonga ki he moʻui ʻi he maama ka hokó. ʻE lava ke nau hiki ʻi he otu ʻe tahá ʻa e “ngaahi koloa ʻo e taʻengatá,” pe ngaahi meʻa ʻoku mahuʻinga ki he ʻOtuá pea lava ke nau tolonga ʻo taʻengata. Ko e hā ha ngaahi aʻusia kuo nau akoʻi mai kiate kitautolu ʻoku mahuʻinga ange e ngaahi koloa ʻo e taʻengatá ʻi he ngaahi koloa ʻo e māmaní?
-
Naʻe maʻu ʻe Sēmisi Kovili ha ngaahi holi māʻoniʻoni ʻo hangē ko hotau tokolahi. Ka ʻoku hoko ʻa e ʻikai talangofua ki he fakahinohino ʻa e ʻOtuá ko ha fakatokanga mahuʻinga kiate kitautolu kotoa. Ke tokoni ke ako e kau mēmipa ʻo e kalasí mei he aʻusia ʻa Kovilí, ʻe lava ke ke fakaafeʻi hanau niʻihi ke fekumi ʻi he vahe 39 ki ha ngaahi meʻa ne kole ange ʻe he ʻEikí ke ne fai. ʻE lava ke fekumi e niʻihi kehé ki he ngaahi tāpuaki ne talaʻofa ange ki ai ʻo kapau ʻe talangofua. Te nau lava foki ʻo fekumi ʻi he vahe 40 ke ʻiloʻi ʻa e ʻuhinga ne ʻikai maʻu ai ʻe Sēmisi Kovili e ngaahi tāpuaki ko ʻení. ʻE lava fēfē ke ʻaonga ʻene aʻusiá kiate kitautolu? Ko e hā ha “tokanga ki he māmaní” ʻokú ne faʻa taʻofi kitautolu mei hono maʻu e folofola ʻa e ʻOtuá “ʻi he loto fiefia”? (Tokāteline mo e Ngaahi Fuakava 40:2).
Ko Hono Fakatupulaki ʻEtau Founga Akoʻí
ʻOua naʻá ke feinga ke akoʻi e meʻa kotoa pē. “ʻOku lahi fau e meʻa ke aleaʻi ʻi he lēsoni takitaha, ka ʻoku ʻikai fie maʻu ia ke ke akoʻi e meʻa kotoa pē ʻi he foʻi kalasi ʻe taha kae toki ongo e lēsoní ki ha loto ʻo ha taha—ʻi he taimi ʻe niʻihi, ʻoku feʻunga pē ha meʻa mahuʻinga ʻe taha pe ua” (Faiako ʻi he Founga ʻa e ʻEikí, 7). ʻE lava ke tokoni atu e Laumālie Maʻoniʻoní mo e ngaahi fakamatala ʻa e kau mēmipa ʻo e kalasí pea mo e ngaahi fakakaukau ʻi he fokotuʻutuʻu ko ʻení ke ke ʻiloʻi e meʻa ke tokangataha ki aí.