26 ʻEpeleli–2 Mē

Tokāteline mo e Ngaahi Fuakava 45

“ʻE Fakahoko ʻa e Ngaahi Talaʻofá”

ʻI hoʻo ako ʻa e Tokāteline mo e Ngaahi Fuakava 45, fakakaukau ki he ngaahi veesi, ngaahi konga lea mei he kau taki ʻo e Siasí, ngaahi aʻusia, ngaahi fehuʻi, pea mo ha ngaahi maʻuʻanga tokoni kehe te ke ala fakaʻaongaʻi ke akoʻi ʻa e tokāteliné. ʻI hoʻo faiakó, fakaafeʻi ʻa e kau mēmipa ʻo e kalasí ke nau lekooti ʻa e ngaahi ueʻi fakalaumālie ʻoku nau maʻú pea fokotuʻu ha palani ke fakahoko kinautolu.

Lekooti Hoʻo Ngaahi Ongó

Fakaafeʻi e Feʻinasiʻakí

ʻE lava ke hiki ʻe he kau mēmipa ʻo e kalasí ʻi ha kiʻi laʻipepa ʻa e fika ʻo ha veesi mei he Tokāteline mo e Ngaahi Fuakava 45 naʻá ne ueʻi fakalaumālie kinautolu. Hili iá peá ke tānaki ʻa e fanga kiʻi laʻipepá, fili ha niʻihi, pea fakaafeʻi ʻa e kau mēmipa ʻo e kalasí ne nau tohi iá ke nau lau ʻa e ngaahi vēsí ki he kalasí pea fakamatalaʻi ʻa e ʻuhinga naʻa nau fili ai iá. Poupouʻi ha niʻihi kehe ke nau vahevahe ʻenau ngaahi fakakaukaú.

Akoʻi ʻa e Tokāteliné

Tokāteline mo e Ngaahi Fuakava 45:1–5

Ko Sīsū Kalaisi ʻa hotau Taukapo ki he Tamaí.

• ʻE lava nai ʻe ha taha ʻi hoʻo kalasí ʻo fakamatalaʻi pe ko e hā ʻa e meʻa ʻoku fai ʻe ha taha ʻoku taukapo? Mahalo naʻa ʻaonga ke kumi ʻa e ʻuhinga ʻo e taukapó ʻi ha tikisinale. ʻI he mahino ko ʻení, ʻe lava leva ʻe he kau mēmipa ʻo e kalasí ke nau lau tautau toko ua ʻa e Tokāteline mo e Ngaahi Fuakava 45:3–5. Te nau lava ke fevahevaheʻaki ha ngaahi foʻi lea pe kupuʻi lea mei he ngaahi veesi ko ʻení ʻoku tokoni ke mahino kiate kinautolu ʻa e fatongia ʻo Sīsū Kalaisi ʻi Heʻene hoko ko hotau Taukapo ki he Tamaí. (Vakai foki, 2 Nīfai 2:8–9; Mōsaia 15:7–9; Molonai 7:27–28; Tokāteline mo e Ngaahi Fuakava 29:5; 62:1.) Fakakaukau ke ke kole ki he kau mēmipa ʻo e kalasí ke nau vahevahe ʻenau ngaahi ongo fekauʻaki mo e hoko ʻa e Fakamoʻuí ko honau Taukapó.

Tokāteline mo e Ngaahi Fuakava 45:11–75

ʻOku ʻikai fie maʻu ke tau ilifia ki he Hāʻele ʻAnga Ua Maí.

• Te ke tokoniʻi fēfē nai ʻa e kau mēmipa ʻo e kalasí ke nau ʻiloʻi ʻa e ngaahi fakatokanga mahino mo e ngaahi talaʻofa fakatuʻamelie ʻi he vahe 45? Hangē ko ʻení, te ke lava ʻo hiki ʻi he palakipoé ʻa e ongo ʻuluʻi tohi Ngaahi Kikité mo e Ngaahi Tāpuaki Kuo Talaʻofá, pea ʻe lava ʻe he kau mēmipa ʻo e kalasí ke hiki ʻi lalo he ongo ʻuluʻi tohi ko ʻení ʻa e ngaahi akonaki ʻoku nau maʻu ʻi he Tokāteline mo e Ngaahi Fuakava 45:11–75. Ko e hā ka finangalo ai ʻa e ʻEikí ke tau tomuʻa ʻilo kau ki he ngaahi meʻa ko ʻení? Ko e hā te tau lava ʻo fai ke tau maʻu ai ʻa e ngaahi tāpuaki kuo talaʻofa maí?

• Mahalo naʻa lava ke fevahevaheʻaki ʻe he kau mēmipa ʻo e kalasí ha faleʻi fekauʻaki mo e founga ke fakatuʻamelie mo ʻamanaki lelei ai ʻi heʻetau fehangahangai mo e ngaahi meʻa fakamamahi ne kikiteʻi ki hotau kuongá (hangē ko ia ʻoku fakamatalaʻi ʻi he Tokāteline mo e Ngaahi Fuakava 45:11–75). Ke tokoniʻi e kau mēmipa ʻo e kalasí ke nau ʻamanaki lelei ki he Hāʻele ʻAnga Ua Maí kae ʻikai ilifiá, te ke lava ʻo huluʻi ʻa e foʻi vitiō “ʻE Mole ʻa e Loto ʻo e Tangatá” (ChurchofJesusChrist.org). Ko e hā ʻa e faʻahinga fakakaukau ʻoku vaivai ai ʻa e loto ʻo e kakaí ʻi hotau kuongá? (vakai, veesi 26). Ko e hā ʻa e faleʻi naʻe fai ʻe Palesiteni Nalesoni ʻi he foʻi vitiō ko ʻení ke tokoni ke tau fehangahangai mo e ngaahi tūkunga fakailifiá ʻi he loto-nongá?

Tokāteline mo e Ngaahi Fuakava 45:31–32

“Tuʻu ʻi he ngaahi potu toputapú,” pea he ʻikai ueʻi ʻa kinautolu.

• Mahalo naʻa loto-fiemālie ʻa e kau mēmipa ʻo e kalasí ke vahevahe ʻa e mahino ʻoku nau maʻu ki he founga ʻoku nau feinga ai ke “tuʻu ʻi he ngaahi potu toputapú,” hangē ko e naʻinaʻi ʻa e ʻEikí ʻi he Tokāteline mo e Ngaahi Fuakava 45:31–32. ʻE founga fēfē haʻatau langa ha ngaahi potu toputapu ʻi heʻetau moʻuí? ʻE lava ʻe he fakamatala ʻi he “Ngaahi Maʻuʻanga Tokoni Kehé” mo e foʻi vitiō “Tuʻu ʻi he Ngaahi Potu Toputapú—Tupu ʻi Homou Tōʻongá” (ChurchofJesusChrist.org) ke tānaki atu ha ngaahi ʻilo ki he fealēleaʻakí ni.

  

  Tala-fakatātā ʻo e Kau Taupoʻou ʻe Toko Hongofulú, tā ʻa Dan Burr

Ngaahi Maʻuʻanga Tokoni Kehé

“Tuʻu ʻi he ngaahi potu toputapú.”

Naʻe akoʻi ʻe Sisitā ʻEni M. Tipi, ko ha mēmipa mālōlō ʻo e Kau Paleistenisī Lahi ʻo e Kau Finemuí, ko e fakahinohino ko ia ke tuʻu ʻi he ngaahi potu toputapú pea ʻoua ʻe hiki mei aí “ʻokú ne fakamatalaʻi ʻa e founga te tau lava ai ʻo maʻu ha maluʻi, ivi, pea mo ha nonga ʻi he taimi taʻemanongá.” Hili ʻene fakamahinoʻi ʻe lava ke kau ʻi he ngaahi potu toputapú ni ʻa hotau ngaahi temipalé, falelotú, mo hotau ngaahi ʻapí, naʻá ne pehē “te tau takitaha maʻu ha ngaahi [potu toputapu] lahi ange.” Naʻá ne hoko atu ʻo pehē:

“Mahalo te tau tomuʻa fakakaukau ki he foʻi lea feituʻú ko ha ʻātakai fakatuʻasino pe feituʻu fakasiokālafi. Ka, ʻe lava ʻo lau ko ha feituʻu ‘ha tūkunga mahino, tuʻunga, pe ko ha fakakaukau’ [Merriam-Webster.com Dictionary, “place,” merriam-webster.com]. ʻOku ʻuhinga ʻeni ʻe lava ke fakakau ʻi he ngaahi feituʻu toputapú ha taimi makehe—ʻa e taimi ʻoku fakamoʻoni mai ai ʻa e Laumālie Māʻoniʻoní kiate kitautolú, taimi ʻoku tau ongoʻi ai ʻa e ʻofa ʻa e Tamai Hēvaní, pe taimi ʻoku tau maʻu ai ha tali ki heʻetau lotú. Pea mahulu atu aí, ʻoku ou tui ko e taimi pē ʻokú ke loto toʻa ai ke taukaveʻi e totonú, tautautefito ʻi he ngaahi tūkunga ʻoku ʻikai loto fiemālie ai ha taha ke fai iá, ʻokú ke fokotuʻu ha feituʻu toputapu” (“Ko Homou Feituʻu Toputapú,” Ensign pe Liahona, Mē 2013, 115).

Fakatupulaki ʻEtau Founga Akoʻí

Hoko ko ha fakamoʻoni moʻui. ʻI hoʻo moʻui ʻaki ko ia e tokāteline ʻokú ke akoʻí, te ke lava ai ʻo fakahoko haʻo fakamoʻoni mālohi fakataautaha ʻoku moʻoni ia. ʻE fakamoʻoniʻi leva ʻe he Laumālie Māʻoniʻoní hoʻo fakamoʻoní ki he loto ʻo e kau mēmipa hoʻo kalasí. Fakakaukauʻi ʻa e ngaahi tefitoʻi moʻoni te ke akoʻi ʻi he uike ní pea mo e ngaahi uike ka hoko maí. Te ke lava fēfē ke moʻui kakato ʻaki kinautolu? (Vakai, Ko e Faiako ʻi he Founga ʻa e Fakamoʻuí, 13–14.)