“17–23 Mē. Tokāteline mo e Ngaahi Fuakava 51–57: ʻKo e Tauhi Faivelenga, mo Angatonu, mo Anga-fakapotopoto,’” Haʻu, ʻo Muimui ʻIate Au—Maʻá e Lautohi Faka-Sāpaté: Tokāteline mo e Ngaahi Fuakava 2021 (2020)
“17–23 Mē. Tokāteline mo e Ngaahi Fuakava 51–57,” Haʻu, ʻo Muimui ʻIate Au—Maʻá e Lautohi Faka-Sāpaté
ʻUluaki Fakatafé, tā ʻa James Taylor Harwood
17–23 Mē
Tokāteline mo e Ngaahi Fuakava 51–57
“Ko e Tauhi Faivelenga, mo Angatonu, mo Anga-fakapotopoto”
ʻE lava he taimi ʻe niʻihi ke hoko mai ʻa e tataki fakalaumālie fekauʻaki mo e meʻa ke akoʻí ʻi hoʻo aleaʻi ʻa e folofolá mo ha mēmipa ʻo e fāmilí pe kaungāmeʻa.
Lekooti Hoʻo Ngaahi Ongó
Fakaafeʻi e Feʻinasiʻakí
Fakakaukau ke ke vahevahe ʻa e ngaahi lea ko ʻeni meia ʻEletā Kuenitini L. Kukí: “ʻOku ou fakatauange te tau lava kotoa ʻo vakaiʻi fakafoʻituitui mo fakafāmili ʻa e fatongia tauhi ʻa ia ʻoku tau fatongia ʻakí ʻa ia ʻe ʻekeʻi meiate kitautolú” (“Ko e Fatongia Tauhí—Ko ha Falala Toputapu,” Ensign pe Liahona, Nōv. 2009, 94). Hili ia peá ke toki ʻeke ki he kau mēmipa ʻo e kalasí pe ko e hā ne nau ako mei he vahe 51–57 fekauʻaki mo honau fatongia tauhí.
Akoʻi ʻa e Tokāteliné
Tokāteline mo e Ngaahi Fuakava 51:9, 15–20
ʻOku fie maʻu ʻe he ʻEikí ke tau hoko ko e kau tauhi faivelenga, angatonu, mo anga-fakapotopoto.
-
Te ke tokoniʻi fēfē ʻa e kau mēmipa ʻo e kalasí ke nau fakakaukau ki he founga ʻoku kaunga ai e ngaahi folofola ʻa e ʻEikí ʻi he vahe 51 kiate kinautolú? Te ke lava ʻo hiki ʻi he palakipoé ʻa e Ko e hā kuo fakafalala mai ʻe he ʻEikí kiate aú? pea fakaafeʻi e kau mēmipa ʻo e kalasí ke hiki ʻenau talí (vakai, “Ngaahi Maʻuʻanga Tokoni Kehé” ki ha ngaahi fakakaukau). Hili iá pea te nau lava ʻo fekumi ki he ngaahi tefitoʻi moʻoni ʻi he veesi 9, 15–20 ʻoku akoʻi ange ʻa e founga ke nau hoko ai ko ha kau tauhi lelei ange ki he ngaahi meʻa ʻi heʻenau lisí. Pe te mou tokanga taha pē ki he ngaahi foʻi lea “faivelenga,” “angatonu” mo e “anga-fakapotopoto” ʻi he veesi 19, pea aleaʻi ʻa e founga ʻe lava ai ʻa e ngaahi foʻi leá ni takitaha ʻo tataki kitautolu ʻi hono fakahoko hotau fatongia tauhí. Kapau ʻe fie maʻu, toe vakaiʻi fakataha ʻa e ʻuhinga ʻo e “Lakanga Tauhí” ʻi he Fakahinohino ki he Ngaahi Folofolá (scripture.ChurchofJesusChrist.org).
Ko e kāingalotu ʻoku nau moʻui ʻaki e fono ʻo e fakatapuí ʻoku nau foaki e meʻa kotoa ʻoku nau maʻú ki he Siasí.
Tokateline mo e Ngaahi Fuakava 52:10; 53:3; 55:1–3
Ko e meʻafoaki ʻo e Laumālie Māʻoniʻoní ʻoku maʻu ia ʻi he hilifaki ʻo e nimá.
-
ʻOku lave ha ngaahi veesi kehekehe ʻi he ngaahi fakahā ko ʻení ki he maʻu ʻo e Laumālie Māʻoniʻoní ʻi he hilifaki ʻo e nimá. Kapau ‘e mahuʻinga hano aleaʻi e tefitó ni ki hoʻo kalasí, te ke ala fehuʻi ki he kau mēmipa ʻo e kalasí pe ko e hā ne nau ako mei he Tokāteline mo e Ngaahi Fuakava 52:10; 53:3; 55:1–3 fekauʻaki mo e meʻafoaki ʻo e Laumālie Māʻoniʻoní. Ke ʻilo lahi ange ki he tefitó ni, vakai ki he, Ngāue 8:14–17; 19:1–6. Mahalo naʻa fakamatala ʻa e kau mēmipa ʻo e kalasí ki heʻenau aʻusia ki hono maʻu ʻo e meʻafoaki ʻo e Laumālie Māʻoniʻoní pe meʻa te nau lava ʻo fai ke hokohoko atu ʻenau maʻu ʻa Hono ivi tākiekiná ʻi heʻenau moʻuí.
Tokāteline mo e Ngaahi Fuakava 52:9–11; 22–27
Te tau lava ʻo vahevahe ʻa e ongoongoleleí ʻi ha feituʻu pē ʻoku tau ʻi ai.
-
Ko e taimi naʻe fekauʻi atu ai ʻe he ʻEikí ha kau taki ʻo e Siasí ki Mīsulí, naʻá Ne fakahā ange ke nau fakaʻaongaʻi honau taimi ʻoku fakamoleki ki he fonongá ʻaki ʻenau “malanga ʻi he halá” (veesi 25–27). ʻE lava hano lau e Tokāteline mo e Ngaahi Fuakava 52:9–11, 22–27 ʻo fakaiku ki ha pōtalanoa fekauʻaki mo ha founga te tau lava ai ke vahevahe ʻa e ongoongoleleí “i he halá,” pe ʻi he lolotonga ʻo e fonongaʻanga angamaheni ʻo ʻetau moʻuí. ʻE lava ke talanoa ʻa e kau mēmipa ʻo e kalasí fekauʻaki mo e founga ʻoku nau fokotuʻu ai e vahevahe ʻo e ongoongoleleí ko ha konga angamaheni ʻo ʻenau moʻuí.
Tokāteline mo e Ngaahi Fuakava 52:14–19
Naʻe foaki ʻe he ʻOtuá ha sīpinga ke fakaʻehiʻehi mei he kākaá.
-
Ke fakafeʻiloaki ʻa e sīpinga naʻe fakahā ʻe he ʻEikí ʻi he Tokāteline mo e Ngaahi Fuakava 52:14–19, te ke lava ʻo vahevahe ha ngaahi sīpinga kehe ʻoku maheni mo e kalasí, hangē ko e ngaahi sīpinga ki hano faʻu ʻo ha ʻū meʻa pe sīpinga ʻo ha ngaahi tōʻonga. Mahalo naʻa ʻoku ʻi ai ha ngaahi sīpinga ʻa e kau mēmipa ʻo e kalasí ke vahevahe. Ko e hā ʻoku mahuʻinga ai ʻa e ngaahi sīpingá? Te tau fakaʻaongaʻi fēfē ʻa e sīpinga ʻi he veesi 14–19 ke tau fakaʻehiʻehi ai mei he ngaahi kākā ʻoku tau ʻilo ʻi māmani he ʻaho ní?
Tokāteline mo e Ngaahi Fuakava 54
Te u lava ʻo tafoki ki he ʻEikí ʻi he taimi ʻoku uesia ai au ʻe he fili ʻa e kakai kehé.
-
Kuo tofanga hatau tokolahi ʻi ha ngaahi meʻa taʻe-fakafiemālie ʻi he taimi ʻoku ʻikai fakahoko ai ʻe ha taha ʻoku tau falala ki ai ʻa ʻene ngaahi tukupaá. Naʻe hoko ʻeni ki he Kāingalotu mei Kolesivili, Niu ʻIoké, ʻa ia naʻa nau hanganaki ke nofoʻi ʻa e kelekele ʻo Līmani Kopelī ʻi ʻOhaioó. Ke ako ʻa e kau mēmipa ʻo e kalasí mei he meʻá ni, ʻe lava ke nau toe vakaiʻi ʻa e ʻuluʻi fakamatala ʻi he vahe 54 (vakai foki, Kau Māʻoniʻoní, 1:136–39; “Hili ʻa e Faingataʻa Lahí,”). ʻE lava pē ke nau fakakaukauloto ki hanau kaungāmeʻa ʻi he Kāingalotu ʻi Kolesivilí pea nau maʻu ha faleʻi ʻi he vahe 54 ʻe lava ke nau vahevahe mo honau kaungāmeʻá. Pe te nau fekumi ʻi he fakahaá ki ha meʻa ʻe ala tokoni ki ha taha ʻoku faingataʻaʻia koeʻuhí ko e ngaahi fili ʻa ha taha kehe. (Te ke lava ʻo fakamahinoʻi ange ʻa e talaʻofa ʻi he veesi 6 kiate kinautolu ʻoku nau tauhi ʻenau ngaahi fuakavá.)
-
ʻOku ʻi he Tokāteline mo e Ngaahi Fuakava 54:10 ha ngaahi kupuʻi lea ʻe ala ʻuhingamālie ki he kau mēmipa hoʻo kalasí, hangē ko e “faʻa kātaki ʻi he faingataʻá” “kumi vave kiate au,” mo e “fiemālie ki honau laumālié.” ʻE lava ke fili ʻe he kau mēmipa ʻo e kalasí ha kupuʻi lea ke nau fakalaulauloto mo ako, ʻo ngāue ʻaki e ngaahi futinoutí pe toe ngaahi maʻuʻanga tokoni kehé ke vakai ai ki ha ngaahi potufolofola fekauʻaki. Hili iá ʻe lava leva ke nau vahevahe ʻenau ngaahi fakakaukaú.
Ngaahi Maʻuʻanga Tokoni Kehé
Ko hotau ngaahi fatongia tauhí.
Naʻe fakamatalaʻi ʻe Palesiteni Sipenisā W. Kimipolo: “ʻI he Siasí, ko e lakanga tauhí ko ha falala fakalaumālie toputapu pe fakatuʻasino ʻoku haʻisia ki ai. Koeʻuhí ʻoku ʻa e ʻEikí ʻa e meʻa kotoa pē, ʻoku tau hoko leva ko e kau tauhi ki hotau sinó, ʻatamaí, ngaahi fāmilí, mo e koloá. (Vakai, Tokāteline mo e Ngaahi Fuakava 104:11–15.) Ko e tokotaha tauhi faivelengá ko ha tokotaha ia ʻoku pule angatonu, tokangaʻi ʻa ia ʻoku ʻaʻaná, pea mo tokangaʻi ʻa e masivá mo e faingataʻaʻiá” (Welfare Services: The Gospel in Action,” Ensign, Nov. 1977, 78).
Fakatupulaki ʻEtau Founga Akoʻí
Tokoniʻi ʻa e kau akó ke nau fepoupouaki. Fokotuʻu ha ʻātakai ʻi he kalasí ke nau fepoupouaki mo fefakalotolahiʻaki ai. Fakaafeʻi ke nau vahevahe ha ngaahi fakakaukau mo ha ngaahi founga ngāue te ne fakatupulaki ʻenau ako fakafoʻituituí mo fakafāmilí. (Vakai, Ko e Faiako ʻi he Founga ʻa e Fakamoʻuí, 36.)