10–16 Mē

Tokāteline mo e Ngaahi Fuakava 49–50

“Ko e Meʻa Ko Ia ʻOku mei he ʻOtuá, Ko e Māmá Ia”

Ke lava ke “malanga ʻaki ʻa e folofola ʻo e moʻoní ʻi he Fakafiemālié” (Tokāteline mo e Ngaahi Fuakava 50:17), fekumi ki ha tataki fakalangi ʻi hoʻo fakalaulauloto ki he Tokāteline mo e Ngaahi Fuakava 49–50. Hili ia peá ke mateuteu leva ki he fakahinohino ʻa e ʻOtuá ʻi hoʻo faiakó.

Lekooti Hoʻo Ngaahi Ongó

Fakaafeʻi e Feʻinasiʻakí

Makehe mei hono vahevahe ha ngaahi ʻilo ne maʻu ʻe he kau mēmipa ʻo e kalasí ʻi he lolotonga ʻenau ako e folofolá, ʻe lava ke ʻaonga kiate kinautolu ha fealēleaʻaki ki he founga naʻe maʻu ai e ngaahi ʻilo ko iá. Te ke lava ʻo fakaafeʻi e kau mēmipa ʻo e kalasí ke nau fevahevaheʻaki ha ngaahi ʻilo mei ha veesi ʻi he Tokāteline mo e Ngaahi Fuakava 49–50 mo aleaʻi pe ko e hā e meʻa naʻá ne taki kinautolu ki he ngaahi ʻilo ko iá.

Akoʻi ʻa e Tokāteliné

Tokāteline mo e Ngaahi Fuakava 49; 50:1–36

ʻE lava ʻa e ngaahi moʻoni ʻo e ongoongoleleí ʻo tokoniʻi au ke u fakatokangaʻi ʻa e ngaahi akonaki loí.

• Naʻe foaki ʻa e vahe 49 ke fakapapauʻi ʻa e tokāteline moʻoni ʻokú ne fakatonutonu e meʻa ʻoku akoʻi ʻe he niʻihi kehé (vakai, lēsoni ʻo e uiké ni ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ki ha ngaahi puipuituʻa fakahisitōlia). Ke tokoni ki he kau mēmipa ʻo e kalasí ke nau vakavakaiʻi ʻa e konga ko ʻení, te ke lava ʻo vahevahe ʻa e kau mēmipa ʻo e kalasí ki ha ngaahi kulupu pea vahe ki he kulupu takitaha ha taha ʻo e ngaahi tefito fakatokāteliné (hangē ko ia ʻoku lisi atu ʻi he ʻuluʻi fakamatala ki he vahe 49). ʻE lava ke aleaʻi ʻe he ngaahi kulupú ʻa e ngaahi fehuʻi ko ʻení: Ko e hā ha ngaahi moʻoni naʻe akoʻi ʻe he ʻEikí fekauʻaki mo e tefito ko ʻení ʻi he vahe 49? Ko e hā e tui ʻa e kakaí fekauʻaki mo e tefito ko ʻení he ʻaho ní? Ko e hā mo ha ngaahi toe moʻoni kuo akoʻi ʻe he ʻEikí fekauʻaki mo ia ʻo fakafou ʻi heʻetau kau palōfita ʻi he ngaahi ʻaho kimui ní? ʻOange ha faingamālie ki he kau mēmipa ʻo e kalasí ke vahevahe ʻenau houngaʻia koeʻuhí ko e ngaahi moʻoni kuo fakahā ʻi hotau kuonga ní.

• Hangē ko e kaumātuʻa ʻi Ketilani “naʻe ʻikai mahino [kiate kinautolu] ʻa e hā mai ʻa e ngaahi laumālie kehekehé” (Tokāteline mo e Ngaahi Fuakava 50, ʻuluʻi fakamatalá), ʻoku tau faʻa fakakaukau he taimi ʻe niʻihi pe ko e meʻa ʻoku tau ongoʻi pe mamata ki aí ʻoku mei he Laumālié nai pe ko ha ivi tākiekina kehe ia. Ko e hā te tau lava ʻo ako mei he Tokāteline mo e Ngaahi Fuakava 50:1–36 ke tokoni ke tau fakatokangaʻi ʻa e tākiekina ʻo e Laumālié? Te ke lava ʻo tuku ki he mēmipa takitaha ʻo e kalasí ke ne fili ha ngaahi veesi ke ako pea toki kole ki he kau mēmipa ʻo e kalasí ke nau vahevahe ʻa e meʻa ʻoku nau ʻiló.

Tokāteline mo e Ngaahi Fuakava 49:15–17

Ko e mali ʻi he vahaʻa ʻo ha tangata mo ha fefiné ʻoku mahuʻinga ia ki he palani ʻa e ʻOtuá.

• Koeʻuhí ʻoku mātuʻaki mahuʻinga ʻa e malí ki he palani ʻa e Tamai Hēvaní, ʻoku vēkeveke ai ʻa Sētane ke ne veuveuki ia. Mahalo naʻa ʻaonga ki hoʻo kalasí kapau te nau ʻai ha lisi ʻi he palakipoé ʻo e ngaahi moʻoni kuo ʻosi fakahā ʻe he ʻEikí fekauʻaki mo e malí. Hangē ko ʻení, ko e hā ha ngaahi moʻoni fekauʻaki mo e malí ʻoku tau ako mei he Tokāteline mo e Ngaahi Fuakava 49:15–17? ʻOku ʻi ai mo ha ngaahi potufolofola kehe ʻe ala tokoni ʻi he Sēnesi 2:20–24; 1 Kolinitō 11:11; pe ko e ngaahi potufolofola kehe ʻoku maʻu ʻi he “Nofo Malí, Malí” ʻi he Fakahinohino ki he Ngaahi Folofolá (scriptures.ChurchofJesusChrist.org). ʻE toe lava foki ke maʻu ʻe he kau mēmipa ʻo e kalasí ha ngaahi moʻoni ʻi he “Ko e Fāmilí: Ko ha Fanongonongo ki Māmani.” Fakatatau mo e meʻa ʻoku tau maʻu ʻi he ngaahi maʻuʻanga tokoni ko ʻení, ko e hā ʻoku mātuʻaki mahuʻinga ai ʻa e mali ʻi he vahaʻa ʻo ha tangata mo ha fefiné ki he palani ʻa e ʻOtuá? (vakai, “Ngaahi Maʻuʻanga Tokoni Kehé”).

  

  Ko e mali ʻi he vahaʻa ʻo ha tangata mo ha fefiné ko e tuʻutuʻuni ia ʻa e ʻOtuá.

Tokāteline mo e Ngaahi Fuakava 50:13–22

ʻOku fakatou fakamāmaʻi ʻa e kau faiakó mo e kau akó ʻe he Laumālié.

• ʻE lava ke hoko ʻa e fakahinohino ʻa e ʻEikí fekauʻaki mo hono malangaʻi mo hono maʻu ʻo e moʻoní, ke maʻu ai ha faingamālie lelei ke aleaʻi ʻa e fatongia ʻoku vahevahe ʻiate koe ko e faiakó mo e kau mēmipa ʻo e kalasí ʻi hono fakatupulaki e ako ʻo e ongoongoleleí. Fakakaukau ke ke kole ki he kau mēmipa ʻo e kalasí ke nau toe vakaiʻi tautau toko ua ʻa e Tokāteline mo e Ngaahi Fuakava 50:13–22 pea aleaʻi ʻa e ngaahi fatongia ʻo e Laumālié, kau faiakó, mo e kau akó. ʻE lava ke vahevahe ʻe ha ngaahi hoa ʻe niʻihi ʻa e meʻa ne nau akó mo e kalasí. Ko e hā mo ha toe ngaahi “founga kehe” ʻe niʻihi ʻoku tau faʻa feinga ai ke akoʻi pe ako e ongoongoleleí? (veesi 17). ʻE founga fēfē haʻatau lelei ange ʻi hono maʻu ʻo e Laumālié? Ko e hā ʻoku ueʻi kitautolu ke tau fakahoko ʻi hotau tukui ʻapí mo e siasí ke tau akoʻi mo ako lelei ange ai ʻa e ongoongoleleí?

Ngaahi Maʻuʻanga Tokoni Kehé

ʻOku mātuʻaki mahuʻinga ʻa e nofo-malí ki he palani ʻa e Tamai Hēvaní.

Naʻe fakamatalaʻi ʻe ʻEletā Tēvita A. Petinā ʻa e ʻuhinga ʻoku mātuʻaki mahuʻinga ai e nofo-malí ki he palani ʻo e fakamoʻui ʻa e ʻOtuá:

“Fakatatau mo e palani faka-ʻOtuá, ʻoku fakataumuʻa ke fakalakalaka fakataha ʻa e tangatá mo e fefiné ki he haohaoá mo ha nāunauʻia kakato. Koeʻuhí ko e mahino hona natulá mo e meʻa ʻokú na malavá, ʻoku ʻomi ai ʻe he tangata mo e fefine takitaha ki he vā fetuʻutaki ʻo e nofo-malí ha ngaahi fakakaukau mo ha ngaahi taukei makehe. Neongo ʻoku kehekehe pē e tokoni ʻa e tangatá mo e fefiné, ka ʻoku faitatau ʻena tokoni ki he maʻumaʻulutá mo e uouangatahá, ʻa ia he ʻikai lava ke aʻusia ʻi ha toe founga kehe. ʻOku fakakakato mo fakahaohaoaʻi ʻe he tangatá ʻa e fefiné, pea fakakakato mo fakahaohaoaʻi ʻe he fefiné ʻa e tangatá, ʻi heʻena feakoʻaki mo fefakamālohiaʻakí mo fetāpuekinaʻaki ʻiate kinauá. …

“Ko e ʻapi ʻoku ʻi ai ha husepāniti mo ha uaifi ʻoku feʻofoʻofani mo fetauhiʻakí, ko e ʻātakai lelei taha ia ʻe lava ke ohi hake ai ʻa e fānaú ʻi he ʻofa mo e angatonu pea lava ke feau ai e ngaahi fiemaʻu fakalaumālie mo fakatuʻasino ʻa e fānaú. Pea hangē ko e tokoni ʻa e ngaahi natula makehe fakatouʻosi ʻo tangata mo fafine ke fakakakato e vā fetuʻutaki ʻo e nofo-malí, ʻoku mahuʻinga pehē ʻa e ngaahi natula ko iá ki hono ohi hake, tauhi, mo e akoʻi ʻo e fānaú” (Marriage Is Essential to His Eternal Plan,” Ensign, June 2006, 82–84).

Fakatupulaki ʻo ʻEtau Founga Akoʻí

Tataki ha ngaahi fealēleaʻaki fakalaumālie. ʻOku ʻi ai ha tokoni ke fai ʻe he tokotaha kotoa pē, ka ko e taimi ʻe niʻihi ʻoku ʻikai maʻu ʻe he tokotaha kotoa pē ha faingamālie. Muimui ki he tākiekina ʻa e Laumālié, kumi ha ngaahi founga ke fakatupulaki ai e tokolahi ʻo e kau mēmipa ʻo e kalasí te nau lava ʻo vahevahe ʻenau ngaahi fakakaukaú mo ʻenau ongó.