Hala ʻi Tauʻatāina ʻi Mīsulí

Tauʻatāina, Mīsuli, tā ʻa Al Rounds

24–30 Mē

Tokāteline mo e Ngaahi Fuakava 58–59

“Femoʻuekina ʻi he Holi Lahi ʻi ha Ngāue Lelei”

Hili hono lau ʻo e Tokāteline mo e Ngaahi Fuakava 58–59, fakakaukau ki he ngaahi fehuʻi ko ʻení: Ko e hā ʻokú ke ongoʻi ʻoku ueʻi koe ke ke vahevahe mo hoʻo kalasí? Ko e hā ʻokú ke fakaʻamu ke nau ʻiló? Te ke tokoni fēfē nai ke nau ʻilo ʻa e ngaahi meʻa ko ʻení?

Lekooti Hoʻo Ngaahi Ongó

fakaʻilonga ʻo e feʻinasiʻakí

Fakaafeʻi e Feʻinasiʻakí

Koeʻuhí ke ueʻi ʻa e kau mēmipa ʻo e kalasí ke nau vahevahe ʻa e meʻa ne nau ako ʻi heʻenau ako folofolá, te ke lava ʻo hiki ʻa e ngaahi fehuʻi ko ʻení ʻi he palakipoé: Ko e hā ne tau akó? Te tau moʻui ʻaki fēfē ʻa e meʻa ne tau akó? ʻE lava ke hiki ʻe he kau mēmipa ʻo e kalasí ʻi lalo ʻi he fehuʻi ʻuluakí ʻa e ngaahi moʻoni ne nau maʻu ʻi he Tokāteline mo e Ngaahi Fuakava 58–59. Hili ia pea te nau lava ʻo fakaʻaongaʻi ha ngaahi miniti siʻi ke aleaʻi ʻa e ngaahi fakakaukau ke moʻui ʻaki e ngaahi moʻoni ko iá pea hiki ʻenau ngaahi fakakaukaú ʻi lalo ʻi he fehuʻi hono uá.

fakaʻilonga ʻo e akoʻí

Akoʻi ʻa e Tokāteliné

Tokāteline mo e Ngaahi Fuakava 58:1–5, 26–33

ʻOku maʻu ʻa e ngaahi tāpuakí ʻo fakatatau mo e taimi ʻa e ʻOtuá pea mo ʻetau faivelengá.

• ʻOku akoʻi ʻe he Tokāteline mo e Ngaahi Fuakava 58 ha ngaahi moʻoni te nau lava ke ʻomi ʻa e nongá ʻi he taimi ʻo e faingataʻá. Mahalo ne ʻosi ʻilo ʻe he kau mēmipa ʻo e kalasí ha niʻihi ʻo e ngaahi moʻoni ko ʻení ʻi he lolotonga ʻenau ako e vahe ko ʻení; fakaafeʻi ke nau vahevahe ʻa e meʻa ne nau ʻiló. Pe te nau kumi fakafoʻituitui pe fakakulupu ʻi he kalasí, ʻi he veesi 1–5, 26–33 ki ha meʻa ʻe ala ʻaonga ki ha taha ʻoku tofanga ʻi ha faingataʻa pe ʻoku tatali ki ha tāpuaki naʻe talaʻofa mai. Hili ʻenau vahevahe ʻa e meʻa ne nau maʻú, mahalo ʻe lava ʻe ha niʻihi ʻo e kau mēmipa ʻo e kalasí ke vahevahe ha ngaahi aʻusia pe ngaahi potufolofola kehe ʻoku nau fakapapauʻi ʻa e ngaahi moʻoni ʻi he ngaahi veesi ko ʻení.

•   ʻE lava foki ke tokoni ʻa e kupuʻi lea ʻa Sisitā Linitā S. Liivi ʻi he “Ngaahi Maʻuʻanga Tokoni Kehé” ki hoʻomou fealēleaʻakí. ʻOku liliu fēfē ʻe he ngaahi lea ʻa Sisitā Līví ʻa e anga ʻo ʻetau vakai ki hotau ngaahi ʻahiʻahí?

Tokāteline mo e Ngaahi Fuakava 58:26–29

Te tau lava ke “fakahoko ʻa e māʻoniʻoni lahi” ʻi he “fili tauʻatāina [ʻatautolu] pē.”

• Ko e hā naʻe ʻilo ʻe he kau mēmipa ʻo e kalasí mei heʻenau ako ʻa e Tokāteline mo e Ngaahi Fuakava 58:26–29 he uike ní? Mahalo naʻa lava ke ke vahevahe ʻa e kalasí ki ha ngaahi kulupu pea fakaafeʻi ʻa e kau mēmipa ʻo e kalasí ke nau aleaʻi ʻi heʻenau ngaahi kulupú ha ngaahi kupuʻi lea ne nau ʻilo ʻoku mahuʻingamālie ʻi he ngaahi veesi ko ʻení. ʻOku ueʻi fēfē kitautolu ʻe he ngaahi veesi ko ʻení ke tau “fakahoko ha māʻoniʻoni lahi”? (veesi 27). Ko e hā ʻoku finangalo ai ʻa e ʻEikí ke ʻoua naʻa “fakamālohiʻi [kitautolu] ʻi he ngaahi meʻa kotoa peé”? (veesi 26). Ko e hā ʻoku fokotuʻu mai ʻe he ngaahi vēsí ni fekauʻaki mo e tuʻunga ʻoku finangalo ʻa e ʻEikí ke tau aʻusiá?

Tokāteline mo e Ngaahi Fuakava 59:9–19

Ko e ʻaho Sāpaté ko e ʻaho ia ʻo e ʻEikí.

• Ke tokoniʻi e kau mēmipa ʻo e kalasí ʻi hono kumi e meʻa naʻe akoʻi ʻe he ʻEikí ki he ʻuluaki Kāingalotu ʻi Mīsulí fekauʻaki mo e Sāpaté, te ke lava ʻo fakaafeʻi kinautolu ke nau kumi ʻi he Tokāteline mo e Ngaahi Fuakava 59:9–19 pea ʻai ha lisi ʻi he palakipoé ʻo e meʻa ʻoku akoʻi mai ʻe he veesi takitaha fekauʻaki mo e Sāpaté. ʻE toe lava foki ke vahevahe ʻe he kau mēmipa ʻo e kalasí ʻa e founga kuo tupulaki ai ʻenau fakamoʻoni ki he ʻaho Sāpaté ʻi heʻenau tauhi ʻa e ʻaho Sāpaté ke māʻoniʻoní . ʻOku ʻi he Sabbath.ChurchofJesusChrist.org ha ngaahi vitiō ʻe ala tokoni ke kamataʻi ha fealēleaʻaki.

• Naʻe akoʻi ʻe he ʻEikí ʻi he Tokāteline mo e Ngaahi Fuakava 59, fekauʻaki mo e ʻaho Sāpaté ʻo fakaʻaongaʻi ha ngaahi foʻi lea hangē ko e “fiefia,” “loto fiefia,” mo e “fofonga malimali” (veesi 14–15). ʻE lava ke kumi ʻe he kau mēmipa ʻo e kalasí ha ngaahi foʻi lea hangē ko ʻení ʻi he veesi 9–19. Hili ia pea ʻe lava ke vahevahe ʻe he kau mēmipa ʻo e kalasí ʻa e meʻa ʻoku nau fakahoko ke ʻai ʻa e Sāpaté ke fakafiefiá. Te tau fakaʻaongaʻi fēfē ʻa e ngaahi vēsí ni ke akoʻi ki he niʻihi kehé ʻa e ʻuhinga ʻoku tau fakaʻapaʻapaʻi ai ʻa e ʻaho Sāpaté?

• ʻE lava foki ke hoko ʻa e fealēleaʻakí ni ko ha faingamālie ke vahevahe ai ʻe he kau mēmipa ʻo e kalasí ha ngaahi fakakaukau fekauʻaki mo e founga ʻoku nau fakaʻaongaʻi ai mo honau ngaahi fāmilí ʻa e Sāpaté ke ngaohi honau ʻapí ko e senitā ki heʻenau ako ʻa e ongoongoleleí. Fakaafeʻi ke nau vahevahe ʻa e founga ʻoku tokoniʻi ai kinautolu ʻe heʻenau ngāué ke nau kei “tauhi ai [kinautolu] ke maʻa ange mei māmani” (veesi 9).

  mā mo e ʻū ipu sākalamēniti

  Ko e sākalamēnití ko ha konga mahuʻinga ia ʻo hono fakaʻapaʻapaʻi ʻo e Sāpaté.

fakaʻilonga ʻo e ngaahi maʻuʻanga tokoni kehé

Ngaahi Maʻuʻanga Tokoni Kehé

ʻE lava ke tākiekina kitautolu ʻe hotau ngaahi faingataʻaʻiá ki he Fakamoʻuí.

Naʻe akoʻi ʻe Linitā S. Liivi, ko ha mēmipa mālōlō ʻo e Kau Palesitenisī Lahi ʻo e Fineʻofá ʻo pehē:

“ʻOku fakaʻatā ʻe he ʻEikí ke ʻahiʻahiʻi mo siviʻi kitautolu, pea taimi ʻe niʻihi ʻoku fai ia ki he taupotu taha te tau malavá. Kuo tau mātā hano holoki ha moʻui ʻa ha niʻihi ʻoku tau ʻofa ai— mo kitautolu— ʻo holofa ki he kelekelé pea tau fifili pe ko e hā ʻoku tuku ai ʻe ha Tamai Hēvani ʻofa ke hoko e faʻahinga meʻa peheé. Ka ʻoku ʻikai ke Ne tuku kitautolu ʻi he efú; ʻoku mafao mai Hono toʻukupú mo Ne fakaafeʻi loto vēkeveke kitautolu kiate Ia. …

“… ʻOkú Ne vēkeveke mai ke tokoni, fakafiemālieʻi, mo fakamaʻamaʻa ʻetau mafasiá ʻi heʻetau falala ki he mālohi ʻo e Fakaleleí mo tauhi ʻetau ngaahi fuakavá. Mahalo ko e ngaahi ʻahiʻahi mo e faingataʻa ʻoku tau fehangahangai mo iá, ko e ngaahi meʻa tonu pē ia ʻokú ne tataki mai kitautolu kiate Ia mo tau pikitai ai ki heʻetau ngaahi fuakavá ke tau lava ʻo toe foki ki Hono ʻaó ʻo maʻu ʻa e ngaahi meʻa kotoa pē ʻoku ʻa e Tamaí” (“Maʻu e Ngaahi Tāpuaki Hoʻo Fuakavá,” Ensign pe Liahona, Nōv. 2013, 119–20).

Fakatupulaki ʻEtau Founga Akoʻí

Fakapapauʻi ʻokú ke akoʻi ʻa e tokāteline moʻoní. “Toutou fehuʻi loto pē, ‘ʻE tokoni fēfē ʻa e meʻa ʻoku ou akoʻí ki he kau mēmipa ʻo ʻeku kalasí ke nau langaki ha tui kia Kalaisi, fakatomala, fakahoko mo tauhi e ngaahi fuakava mo e ʻOtuá, mo maʻu ʻa e Laumālie Māʻoniʻoní?’” (Ko e Faiako ʻi he Founga ʻa e Fakamoʻuí, 20).