Vaitafe Mīsulí

Tafuʻanga Afi ʻi Mīsuli, tā ʻa Bryan Mark Taylor

31 Mē–6 Sune

Tokāteline mo e Ngaahi Fuakava 60–62

“ʻOku ʻi Hoku Nimá ʻa e Kakano Kotoa Pē”

Naʻe pehē ʻe ʻEletā Lānolo A. Lasipeni: “Kuo pau ke tau ʻuluaki fakamālohia fakalaumālie kitautolu pea toki fakamālohia kinautolu ʻoku tau feohí. Fakalaulaulotoa maʻu pē e folofolá, pea manatuʻi e ngaahi fakakaukau mo e ngaahi ongo ʻokú ke maʻu ʻi hoʻo lau kinautolú” (“Telia Naʻa Ngalo ʻIate Koe,” Ensign pe Liahona, Nōv. 2016, 114).

Lekooti Hoʻo Ngaahi Ongó

fakaʻilonga ʻo e feʻinasiʻakí

Fakaafeʻi e Feʻinasiʻakí

Te ke lava ke tataki ha faʻahinga pōtalanoa mahuʻinga ʻaki hano fakaafeʻi e kau mēmipa ʻo e kalasí ke nau tali ha fehuʻi pau pe ha foʻi fakakaukau ʻoku fekauʻaki mo e ngaahi potufolofola ne nau lau ʻi ʻapí. Hangē ko ʻení, te ke lava ʻo fakaafeʻi kinautolu ke nau vahevahe ha faʻahinga meʻa ne nau ako ʻi he uiké ni fekauʻaki mo e Tamai Hēvaní pe ko Sīsū Kalaisi.

fakaʻilonga ʻo e akoʻí

Akoʻi ʻa e Tokāteliné

Tokāteline mo e Ngaahi Fuakava 60:2–3, 7, 13–14; 62:3, 9

ʻOku hōifua ʻa e ʻEikí ʻi he taimi ʻoku fakaava ai hotau ngutú ke vahevahe ʻa e ongoongoleleí.

• ʻI heʻetau hoko ko e kāingalotu ʻo e Siasí, ʻoku tau ʻilo ai ko e ongoongolelei kuo toe fakafoki maí ko ha koloa maʻongoʻonga ia ʻokú ne tāpuekina e moʻui e fānau ʻa e ʻOtuá. Ko ia ai ko e hā leva ʻoku tau faʻa momou ai ʻi he taimi ʻe niʻihi ke vahevahe ʻetau fakamoʻoní mo e niʻihi kehé? Fakakaukau ke ke fakaafeʻi e kau mēmipa ʻo e kalasí ke nau lisi ʻi he palakipoé ha ngaahi ʻuhinga he ʻikai ke fakaava ai hotau ngutú ke vahevahe ʻa e ongoongoleleí. ʻE lava ke lau ʻe he kau mēmipa ʻo e kalasí ʻa e Tokāteline mo e Ngaahi Fuakava 60:2–3, 7, 13–14; 62:3, 9, ʻo kumi ha ngaahi foʻi lea pe kupuʻi lea ʻokú ne ueʻi kinautolu ke nau vahevahe ʻa e ongoongoleleí. ʻE lava ke nau hiki ʻa e meʻa ne nau maʻú ʻi he palakipoé. Mahalo naʻa lava ke vahevahe ʻe ha kau mēmipa ʻe niʻihi ʻo e kalasí ha aʻusia ne nau ikunaʻi ai ʻenau manavasiʻí ka nau vahevahe ʻa e ongoongoleleí mo ha taha.

• ʻOku ʻi he Tokāteline mo e Ngaahi Fuakava 60–62 kotoa ha ngaahi akonaki, ʻoku fakatou fakamatalaʻi mo fokotuʻu mai, ʻoku fekauʻaki mo hono vahevahe ʻo e ongoongoleleí. Ke tokoni ke ʻilo ʻe he kau mēmipa ʻo e kalasí ʻa e ngaahi akonaki ko ʻení, te ke lava ʻo kole ki he tokotaha takitaha ke ne toe fakamanatu ha taha ʻo e ngaahi vahe ko ʻení pea vahevahe ha meʻa ʻoku nau maʻu ʻokú ne akoʻi kiate kinautolu fekauʻaki mo hono vahevahe ʻo e ongoongoleleí. ʻE ala fakalakalaka ʻenau fealēleaʻakí kapau te nau laukonga fekauʻaki mo e kau faifekau tā sīpinga leleí ʻi ha ngaahi konga kehe ʻo e folofolá (hangē ko ʻení, vakai ki he, Ngāue 8:27–40; ʻAlamā 19:16–17) pea mou aleaʻi ʻa e meʻa ne tau ako mei aí. Ko e hā ha ngaahi sīpinga te tau lava ʻo vahevahe mei heʻetau moʻui ʻatautolú? ʻE lava nai ʻe ha mēmipa ʻo e kalasí ke ne vahevahe ʻa e founga naʻe fakafeʻiloaki ai ia ki he ongoongoleleí pea mo ʻene ongo fekauʻaki mo e kakai ne nau akoʻi iá? ʻE ala ʻaonga ki hoʻo kalasí kapau te nau fakatātaaʻi ʻa e ngaahi founga ʻe lava ai ke tau “fakaava [hotau] ngutú” ʻo vahevahe ʻa e ongoongoleleí.

  kau faifekau ʻi ha loto pasi

  ʻOku finangalo ʻa e ʻOtuá ke tau vahevahe ʻa e ongoongoleleí mo e niʻihi kehé.

Tokāteline mo e Ngaahi Fuakava 60:2–4; 61:1–2, 20, 36–38; 62:1, 6

ʻOku akoʻi kitautolu ʻe he folofolá fekauʻaki mo Sīsū Kalaisi.

• Fakaafeʻi e kau mēmipa ʻo e kalasí ke nau hiki ʻi he palakipoé ha faʻahinga meʻa ne nau ako fekauʻaki mo e Fakamoʻuí ʻi he uiké ni, mei heʻenau ako ʻa e vahe 60–62, fakataha mo e ngaahi veesi fekauʻaki mo iá. Pe ko haʻanau kumi ʻi he Tokāteline mo e Ngaahi Fuakava 60:2–4; 61:1–2, 20, 36–38; 62:1, 6 ke maʻu ʻa e ngaahi meʻa naʻe akoʻi fekauʻaki mo e Fakamoʻuí. Ko e hā ha ngaahi talanoa mei he folofolá pe mei heʻetau moʻuí ʻoku nau fakafōtunga ʻa e ngaahi fatongia mo e ngaahi ʻulungaanga ʻo e Fakamoʻuí kuo tau ako ki aí? (hangē ko ʻení, Sione 8:1–11; ʻEta 2:14–15). Te ke lava ʻo fakaafeʻi e kau mēmipa ʻo e kalasí ke nau vahevahe ʻenau fakamoʻoni kia Sīsū Kalaisí pe fakakaukauloto pē ki Heʻene mahuʻinga kiate kinautolú.

Tokāteline mo e Ngaahi Fuakava 60:5; 61:22; 62:5–8

ʻOku finangalo ʻa e ʻEikí ke tau fai ha ngaahi fili “ʻe hā ngali lelei kiate [kitautolú].”

• Fakakaukau ke ke fakaafeʻi ʻa e kau mēmipa ʻo e kalasí ke nau lau tauhoa pe ʻi ha fanga kiʻi kulupu iiki ʻa e Tokāteline mo e Ngaahi Fuakava 60:5; 61:22; 62:5–8 pea nau vahevahe ʻa e meʻa ʻoku nau ongoʻi ko e pōpoaki ia ʻa e ʻEikí kiate kitautolú. Ko e fē ha taimi ne nau ongoʻi ai ʻoku totonu ke nau ngāue ʻaki ʻenau fakaʻutoʻuta leleí ʻi hono fai ha filí? Fakakaukau ke ke vahevahe ʻa e lea ʻa Palesiteni Tāleni H. ʻOakesi ʻi he “Ngaahi Maʻuʻanga Tokoni Kehé” ko ha konga ʻo hoʻomou fealēleaʻakí. ʻE lava fēfē ke tokoniʻi ʻe he mātuʻá ʻa ʻenau fānaú ke nau ako ʻa e tefitoʻi moʻoni mahuingá ni?

fakaʻilonga ʻo e ngaahi maʻuʻanga tokoni kehé

Ngaahi Maʻuʻanga Tokoni Kehé

Fakaʻaongaʻi ʻetau fakaʻutoʻuta lelei tahá.

Naʻe akoʻi ʻe Palesiteni Tālini H. ʻOakesi:

“Ko e holi ko ia ke tataki ʻe he ʻEikí ko ha mālohinga ia, ka ʻoku fie maʻu ke ʻalu fakataha ia mo ha mahino ʻoku lahi e ngaahi fili ʻoku tuku ʻe he Tamai Hēvaní ke tau fai pē ʻe kitautolu ʻa e filí. Ko e fili fakatāutahá ko e taha ia ʻo e ngaahi tupulakiʻanga ʻoku fie maʻu ke tau aʻusia ʻi he moʻui fakamatelié. Ko kinautolu ʻoku nau tuku ki he ʻEikí ke Ne fai ʻa e fili kotoa pē mo kolea ke maʻu ha fakahā ʻi he foʻi fili takitaha, ʻe aʻu ki ha tuʻunga te nau lotua ai ha fakahinohino pea ʻikai maʻu ia. Hangē ko ʻení, ʻoku faʻa angamaheni ke hoko ʻeni ʻi he ngaahi tūkunga ko ia ʻoku maʻamaʻa ai ʻa e fili ke faí pe ʻoku ʻikai ha fili ia ʻe leleí.

“ʻOku totonu ke tau fakakaukauʻi fakalelei ia ʻi hotau ʻatamaí, ʻo fakaʻaongaʻi ʻa e ngaahi mālohi kuo foaki kiate kitautolu ʻe hotau Tupuʻangá. Pea ʻoku totonu leva ke tau lotua ha fakahinohino pea ngāueʻi ia ʻo kapau te tau maʻu ia. Kapau ʻoku ʻikai ke tau maʻu ha fakahinohino, ʻoku totonu leva ke fai ʻetau fakaʻutoʻuta lelei tahá” (Our Strengths Can Become Our Downfall,” Ensign, Oct. 1994, 13–14).

Fakatupulaki ʻo ʻEtau Founga Akoʻí

ʻIloʻi kinautolu ʻoku faingataʻaʻiá. ʻE ala faingataʻa ke ʻiloʻi e ngaahi faingataʻaʻia ʻo kinautolu ʻokú ke akoʻí. Ka ʻi he tokoni ʻa e Laumālié mo hoʻo kau takí, te ke lava ʻo ʻilo ai ʻa e founga lelei taha ke tokoniʻi e niʻihi fakafoʻituitui ko ʻení. (Vakai, Ko e Faiako ʻi he Founga ‘a e Fakamo‘uí, 8–9.)