Sipilingihili, Vahefonua Teivisi, Mīsuli, tā fakatātā ʻa Garth Robinson Oborn

7–13 Sune

Tokāteline mo e Ngaahi Fuakava 63

“Ko e Meʻa ʻOku Haʻu mei ʻOlungá ʻOku Toputapu”

Lekooti ʻa e ngaahi ongo ʻokú ke maʻú ʻi hoʻo ako ʻa e Tokāteline mo e Ngaahi Fuakava 63. Mahalo ʻe ngali siʻisiʻi ha ongo, kae hangē ko ha tengaʻi ʻakaú, ʻe lava ke tupu ia ʻo hoko ko ha faʻahinga meʻa mahuʻinga mo ʻaonga ʻi hoʻo toutou fekumi mo fakalaulauloto maʻu pē ki aí.

Lekooti Hoʻo Ngaahi Ongó

Fakaafeʻi e Feʻinasiʻakí

Ke tokoni ke tukutaha hoʻomou fealēleaʻakí ʻi he ngaahi potufolofola ʻoku pehē ʻe he kau mēmipa ʻo e kalasí ʻoku mahuʻinga tahá, te ke lava ʻo fakaafeʻi kinautolu ke nau hiki ʻi ha fanga kiʻi laʻipepa ha ngaahi veesi mei he vahe 63 ʻoku nau fie aleaʻi. Hili ia peá ke tānaki leva ʻa e fanga kiʻi laʻipepá pea kamata aleaʻi leva ʻa e ngaahi veesi naʻe fokotuʻu mai ʻe he kau mēmipa kehekehe ʻo e kalasí. Kole ange ke nau fakamatalaʻi ʻa e ʻuhinga ne nau fili ai e ngaahi veesi ko iá.

Akoʻi ʻa e Tokāteliné

Tokāteline mo e Ngaahi Fuakava 63:7–12

ʻOku hoko mai ʻa e ngaahi fakaʻilongá ʻi he tui pea mo e finangalo ʻo e ʻOtuá.

• Ke kamataʻi hano aleaʻi e ngaahi tefitoʻi moʻoni ʻoku akoʻi ʻi he Tokāteline mo e Ngaahi Fuakava 63:7–12, ʻe ala tokoni ke toe fakamanatu ha ngaahi sīpinga ʻi he folofolá ʻo ha kakai ne nau siotonu ʻi ha ngaahi fakaʻilonga pe ngaahi mana. Mahalo naʻa lava ke fakakaukau ʻa e kau mēmipa ʻo e kalasí ki ha sīpinga ʻo ha kakai naʻe fakamālohia ʻenau tuí ʻe ha fakaʻilonga (hangē ko ʻení, vakai ki he Luke 1:5–20, 59–64) pe ko ha kakai ne ʻikai ke nau tuʻu maʻu neongo ʻenau ʻosi siotonu ʻi ha fakaʻilongá (hangē ko ʻení, vakai ki he 1 Nīfai 3:27–31; ʻAlamā 30:43–56). ʻE lava leva ʻe he kau mēmipa ʻo e kalasí ke fakaʻaongaʻi e meʻa ne nau ako ʻi he Tokāteline mo e Ngaahi Fuakava 63:7–12 ke fakamatalaʻi ʻaki e ngaahi fakafōtunga kehekehe ko ʻeni ki he ngaahi fakaʻilongá. Pe ko haʻamou fakamanatu ha ngaahi potufolofola kehe fekauʻaki mo e ngaahi fakaʻilongá, hangē ko ia ʻoku lisi atu ʻi he “Fakaʻilongá” ʻi he Fakahinohino ki he Ngaahi Folofolá (ChurchofJesusChrist.org). ʻE lava fēfē ke tau fakapapauʻi ʻoku ʻikai ke tau kumi pe fakafalala ki he ngaahi fakaʻilongá ko ha fakavaʻe ʻo ʻetau tuí?

Tokāteline mo e Ngaahi Fuakava 63:13–16

ʻOku ʻuhinga ʻa e angamaʻá ke tauhi ʻetau fakakaukaú mo ʻetau tōʻongá ke maʻa.

• Neongo ʻoku fakamatala fakapatonu ha konga lahi ʻo e Tokāteline mo e Ngaahi Fuakava 63:13–16 ki he tonó, ka ʻe lava ke felāveʻi ʻa e ngaahi tefitoʻi moʻoni naʻe akoʻí ki hano faʻahinga maumauʻi pē ʻo e fono ʻo e angamaʻá. Fakakaukau ke ke fakaafeʻi ʻa e kau mēmipa ʻo e kalasí ke nau fakahaaʻi ʻa e ngaahi nunuʻa ʻoku fakamatalaʻi ʻi he Tokāteline mo e Ngaahi Fuakava 63:13–16. Te nau lava foki ke ʻai ʻa e “tokangá” (veesi 15) pe ha ngaahi fakaʻilonga ʻoku fakatokanga fekauʻaki mo e ngaahi nunuʻa ko ʻení. Te nau toe lava foki ke aleaʻi ʻa e meʻa ʻoku nau pehē ʻoku ʻuhinga ki ai ʻa e ngaahi nunuʻa ko ʻení. Hangē ko ʻení, ko e hā ka hoko ai hono maumauʻi e fono ʻo e angamaʻá ke iku tō ʻa e fakamāú ki ha taha “hangē ko ha tauhelé” (veesi 15)? Ko e hā ʻoku faleʻi ai ʻe he ʻEikí ke tau “fakatomala fakatoʻotoʻo” (veesi 15) mei he angahala fakasekisualé? (Vakai, Sisitā Linda S. Reeves ʻi he “Ngaahi Maʻuʻanga Tokoni Kehé”).

• ʻE lava ke hoko hono lau e Tokāteline mo e Ngaahi Fuakava 63:16 ke fakaiku ki ha fealēleaʻaki fekauʻaki mo e ivi tākiekina fakalilifu ʻo e ponokalafí ʻi hotau sosaietí. ʻOku fekauʻaki fēfē ʻa e fakatokanga ʻi he veesi 16 mo e palopalemá ni? (Neongo ʻoku ʻuhinga fakahangatonu ʻa e fakahaá ni ki ha kakai tangata ʻoku holi ki ha kakai fefine, ka ʻoku fakaʻaongaʻi ʻa e ngaahi fakatokangá ni ki he taha kotoa pē.) Ko e hā te tau lava ʻo fai ke maluʻi kitautolu mo kinautolu ʻoku tau ʻofa aí mei he ponokalafí? Mahalo naʻa loto-fiemālie ʻa e kau mēmipa ʻo e kalasí ke nau fefaleʻiʻaki. ʻE lava ke ʻomi ʻe he uepisaiti AddressingPornography.ChurchofJesusChrist.org ha ʻamanaki lelei mo ha tokoni ki ha taha ʻoku fefaʻuhi mo e ponokalafí.

  

  ʻOku tāpuekina kitautolu ʻi he taimi ʻoku tau tauhi ai ʻa e fono ʻo e angamaʻá.

Tokāteline mo e Ngaahi Fuakava 63:58–64

ʻOku totonu ke fakaʻapaʻapaʻi ʻa e ngaahi meʻa ʻoku toputapú.

• Te ke lava ke aleaʻi mo hoʻo kalasí ʻa e Tokāteline mo e Ngaahi Fuakava 63:58–64 ko ha fakatokanga ki he tākuanoa ʻi he huafa ʻo e ʻEikí, mo ha niʻihi ʻo e ngaahi potufolofola ʻi he Fakahinohino ki he Ngaahi Folofolá ʻi he tefito ko e “Lea Taʻefeʻungá” (scriptures.ChurchofJesusChrist.org) ke ne tokoniʻi ha faʻahinga fealēleaʻaki pehē. Te ke toe lava foki ʻo tokoni ki he kau mēmipa ʻo e kalasí ke nau fakaʻaongaʻi ʻa e ngaahi vēsí ni ʻi ha founga lahi ange. Hangē ko ʻení, te mou lava ʻo aleaʻi pe ko e hā ʻoku tānaki mai ʻe he kupuʻi lea “ʻikai te nau maʻu ha mafaí” (ʻi he veesi 62) ki heʻetau mahino ki he fakamatalá. ʻE toe lava foki ke lisi ʻe he kau mēmipa ʻo e kalasí ha ngaahi meʻa toputapu kehe ʻoku haʻu “mei ʻolunga,” pe mei he ʻOtuá. ʻOku ʻuhinga ki he hā ke “tokanga” ʻi hono lea ʻaki ʻo e ngaahi meʻa ko ʻení? (veesi 64).

Ngaahi Maʻuʻanga Tokoni Kehé

ʻOku fakafeʻungaʻi kitautolu ʻe he angamaʻá ki he takaua ʻa e Laumālie Māʻoniʻoní.

Naʻe akoʻi ʻe Sisitā Linitā S. Liivi, ko ha mēmipa mālōlō ʻo e Kau Palesitenisī Lahi ʻo e Fineʻofá:

“ʻOku ʻikai ke u ʻiloʻi ha faʻahinga meʻa ʻe laka ange ʻi he angamaʻá, te ne fakafeʻungaʻi kitautolu ki he takaua ʻo e Laumālie Māʻoniʻoní. …

“ʻI heʻetau kau ko ia ki hono siofi, lautohi pe aʻusia ha faʻahinga meʻa ʻoku maʻulalo hifo he tuʻunga moʻui ʻetau Tamai Hēvaní, ʻoku hanga ʻe he meʻa ko iá ʻo fakavaivaiʻi kitautolu. Neongo pe ko e hā hotau taʻu motuʻá, kapau ko e meʻa ʻoku tau sio, lau, fanongo ki ai pe fili ke faí ʻoku ʻikai fenāpasi mo e ngaahi tuʻunga moʻui ʻa e ʻEikí ʻi he Ki Hono Fakamālohia ʻo e Toʻu Tupú,,, tamateʻi ia, haehae momoiki ia, lī ia ki tuʻa pea haʻaki e matapaá. …

“… ʻOku ou tui kapau te tau manatuʻi mo ʻiloʻi fakaʻaho e loloto ʻo e ʻofa ʻetau Tamai Hēvaní mo hotau Fakamoʻuí kiate kitautolú, te tau loto fiemālie ke fai ha faʻahinga meʻa pē ke tau toe foki ai ki Hona ʻaó, ʻo ʻākilotoa ai kitautolu ʻe Heʻena ʻofa taʻengatá” (“Taau mo Hotau Ngaahi Tāpuaki kuo Talaʻofa Maí,” Ensign pe Liahona, Nōv. 2015, 10–11).

Fakatupulaki ʻo ʻEtau Founga Akoʻí

Fakaʻaongaʻi ʻa e mūsika māʻoniʻoní. ʻE lava ʻa e ngaahi pōpoaki ʻi he ngaahi himí mo e ngaahi hiva mei he Tohi Hiva ʻa e Fānaú ke fakamamafaʻi ʻa e tokāteline ʻoku mou ako ʻi he ngaahi folofolá. Hangē ko ʻení, ʻe lava ʻe hano hivaʻi ha foʻi hiva fekauʻaki mo hono fakahīkihikiʻi e huafa ʻo e ʻOtuá, hangē ko e “Kolōlia ki he ʻOtuá” (Ngaahi Himi, fika 42), ke fakamamafaʻi ʻa e pōpoaki ʻi he Tokāteline mo e Ngaahi Fuakava 63:58–64.