21–27 Sune

Tokāteline mo e Ngaahi Fuakava 67–70

“Mahuʻinga … ʻi he Koloa ʻo e Māmaní Kotoa”

ʻOku loloto ange ʻa e mateuteu ke faiakó ʻi he fakakaukau pē ki he meʻa te ke lea ʻaki mo fakahoko ʻi hoʻo hoko ko e faiakó. ʻOku totonu ke kau foki ai ʻa e meʻa ʻe lava ke fakahoko ʻe he kau akó ke nau feakoʻiʻakí. Te ke fakaafeʻi fēfē ʻa e kau mēmipa ʻo e kalasí ke nau vahevahe ha ngaahi aʻusia pe ngaahi ʻilo kuo nau maʻu ʻi hono lau e ngaahi potufolofola ko ʻení?

Lekooti Hoʻo Ngaahi Ongó

Fakaafeʻi e Feʻinasiʻakí

Te ke lava ʻo hiki ʻi he palakipoé Naʻe akoʻi au ʻe he ʻEikí he uiké ni … pea fakaafeʻi ʻa e kau mēmipa ʻo e kalasí ke nau fakaʻosi ʻa e sētesí ʻaki ha meʻa ne nau ako.

Akoʻi ʻa e Tokāteliné

Tokāteline mo e Ngaahi Fuakava 67:1–9

ʻOku moʻoni ʻa e ngaahi fakahā naʻe fakafou mai ʻia Siosefa Sāmitá pea naʻe haʻu ia mei he ʻOtuá.

• Ko hono maʻu ko ia ha mahino ki he puipuituʻa fakahisitōlia ʻo e Tokāteline mo e Ngaahi Fuakava 67 ʻe ala tokoni ia ki hono aleaʻi ʻo e vahe ko ʻení. Mahalo naʻa lava ʻe ha mēmipa ʻo e kalasí ke ne fakamatalaʻi fakanounou ʻa e ngaahi tūkunga naʻe tupunga ai ʻa e fakahā ko ʻení (vakai, Tokāteline mo e Ngaahi Fuakava 67, ʻuluʻi fakamatala ʻo e vahé; Kau Māʻoniʻoní, 1:140–43). Kapau ne tau ʻi he fakataha naʻe aleaʻi ai hono pulusi ʻo e ngaahi fakahaá, ko e hā ha ngaahi ʻuhinga ne tau mei ʻohake ke poupouʻi ʻa e fakakaukaú? Ko e hā ha meʻa ne tau mei talaange ki he kakai naʻa nau hohaʻa ki he ngaahi mele ʻi he fakalea ʻa Siosefa Sāmitá? Ko e hā ʻoku akoʻi mai ʻe he vahe 67 fekauʻaki mo e kau palōfitá mo e fakahaá? ʻE lava foki ke vahevahe ʻe he kau mēmipa ʻo e kalasí ʻa e founga ne nau ʻilo ai ʻiate kinautolu pē ʻoku moʻoni ʻa e ngaahi fakahā ko ʻení.

Tokāteline mo e Ngaahi Fuakava 68:1–6

Ko e ngaahi lea fakalaumālie ko ia ʻa e kau tamaioʻeiki ʻa e ʻEikí ko e ngaahi folofola ia ʻa e ʻEikí.

• Ke tokoni ki he kau mēmipa ʻo e kalasí ke nau aleaʻi ʻa e Tokāteline mo e Ngaahi Fuakava 68:1–6, te ke lava ʻo fakaafeʻi kinautolu ke nau lau ʻi ha fanga kiʻi kulupu iiki ʻa e ngaahi veesi ko ʻení pea fevahevaheʻaki ha ngaahi moʻoni ʻoku nau ʻilo fekauʻaki mo e ngaahi akonaki ʻa e kau tamaioʻeiki ʻa e ʻEikí. Fakaafeʻi ʻa e ngaahi kulupú ke nau fevahevaheʻaki ʻa e founga ʻoku nau ʻilo ai ʻoku moʻoni ʻa e ngaahi tefitoʻi moʻoni ʻoku akoʻi ʻi he veesi 4. ʻE lava ke vahevahe ʻe he kau mēmipa ʻo e kalasí ha ngaahi aʻusia ʻo ha taimi naʻa nau lea pe akoʻi ai ʻo fakatatau mo e “ueʻi ʻa kinautolu ʻe he Laumālie Māʻoniʻoní” (veesi 3) pea mo e founga naʻe ʻiate kinautolu ai ʻa e ʻEikí pea tuʻu ʻi honau tafaʻakí (vakai, veesi 6).

• Kapau te ke loto ke mou aleaʻi ʻa e founga ʻoku fakaʻaongaʻi ai e ngaahi akonaki ko ʻeni ʻa e kau tamaioʻeiki ʻa e ʻEikí ʻi he konifelenisi lahí, ʻe lava ke tokoni ʻa e lea ʻa ʻEletā Sefilī R. Hōlani ʻi he “Ngaahi Maʻuʻanga Tokoni Kehé”. ʻE lava foki ke vahevahe ʻe he kau mēmipa ʻo e kalasí ha ngaahi pōpoaki mei ha konifelenisi kimuí ni naʻá ne fakamālohia ʻenau tui ki he tokāteline ʻoku hā ʻi he ngaahi veesi ko ʻení.

Tokāteline mo e Ngaahi Fuakava 68:25–31

ʻOku maʻu ʻe he ngaahi mātuʻá ha fatongia ke akoʻi ʻenau fānaú.

• ʻOku ʻi ai nai ha ngaahi mātuʻa ʻi hoʻomou kalasí—pe ko ha niʻihi te nau hoko ko ha mātuʻa he kahaʻú? Mahalo naʻa ʻaonga kiate kinautolu ha talanoa fekauʻaki mo e faleʻi ʻa e ʻEikí ki he ngaahi mātuʻá ʻi he vahe 68. Hangē ko ʻení, ʻe lava ke fili ʻe ha ngaahi mātuʻa ʻe niʻihi ʻi he kalasí ha tefitoʻi moʻoni mei he veesi 25–28 pea fakamatalaʻi ʻa e founga ʻoku nau feinga ai ke akoʻi ʻa e ngaahi meʻa ko ʻení ki heʻenau fānaú (ʻoku ʻi he veesi 29–31 foki ha ngaahi tefitoʻi moʻoni mahuʻinga ʻe niʻihi). Pe ʻe lava ke talanoa ʻa e kau mēmipa ʻo e kalasí ki he founga ne akoʻi ai ʻe heʻenau mātuʻá kiate kinautolu ʻa e ngaahi tefitoʻi moʻoni ʻo e ongoongoleleí.

  Ko e hā ʻoku hoko ai e ʻapí ko e feituʻu lelei taha ke ako ai ʻe he fānaú ʻa e ongoongoleleí? Ko e hā ha meʻa te tau talaange ki he ngaahi mātuʻa ʻoku nau ongoʻi taʻefeʻunga pe mafasia ʻi he fatongia ke akoʻi ʻenau fānaú?

  

  Kuo foaki ʻe he ʻOtuā ki he ngaahi mātuʻá ʻa e fatongia ke akoʻi ʻenau fānaú.

Tokāteline mo e Ngaahi Fuakava 70:1–4

ʻOku tau haʻisia ki he ngaahi fakahā kuo foaki mai ʻe he ʻEikí kiate kitautolú.

• Naʻe foaki ʻe he ʻEikí ha fatongia tauhi ki ha kau tangata ʻe niʻihi ʻi ha ngaahi fakahā ke ʻave kinautolu ki Mīsuli pea tokangaʻi hono pulusí. Ko e hā ha faʻahinga founga te tau lau ai kitautolu ko ha kau tauhi ki he ngaahi fakahaá? Ko e hā mo ha ngaahi akonaki mei he vahe ko ʻení fekauʻaki mo e fatongia tauhí ʻe lava ke fakaʻaongaʻi kiate kitautolu?

Ngaahi Maʻuʻanga Tokoni Kehé

ʻOku folofola mai e ʻOtuá kiate kitautolu ʻi he kuongá ni.

Naʻe fakamatalaʻi ʻe ʻEletā Sefilī R. Hōlani ʻa e founga ʻoku kaunga ai ʻa e tefitoʻi moʻoni ne akoʻi ʻi he Tokāteline mo e Ngaahi Fuakava 68:4 ki he konifelenisi lahí: “ʻOku ou kole atu ke mou fakakaukau he ngaahi ʻaho ka hoko maí, ʻo ʻikai ngata pē ʻi he ngaahi pōpoaki kuo mou fanongoá, ka ki he fakaofo moʻoni ʻo e konifelenisi lahí—ʻa e meʻa ʻoku tau tui ʻa kitautolu Kāingalotu ʻo e Siasí ko e ʻuhinga ʻo e konifelenisí pea mo e meʻa ʻoku tau fakaafeʻi e māmaní ke nau fanongo mo vakai ki aí. ʻOku tau fakamoʻoni ki he puleʻanga, faʻahinga mo e lea pea mo e kakai kotoa pē, ko e naʻinaʻi kuo mou fanongoa ʻi hotau taimí mo hotau kuongá, ʻoku fai ia ʻo fakatatau mo e tataki ʻa e Laumālie Māʻoniʻoní, ‘ʻi he fakakaukau ʻa e ʻEikí, … ko e folofola ʻa e ʻEikí, … ko e leʻo ʻo e ʻEikí pea mo e mālohi ʻo e ʻOtuá ki he fakamoʻuí’ [T&F 68:4]” (“Ko Ha Fuka ki he Ngaahi Puleʻangá,” Ensign pe Liahona, Mē 2011, 111).

Fakatupulaki ʻEtau Founga Akoʻí

Tokoni ke felangakihakeʻaki ʻa e kau akó. “Ko e tokotaha fakafoʻituitui kotoa pē ʻi hoʻo kalasí ko ha maʻuʻanga tokoni fungani ia ʻo e fakamoʻoní, ʻiló, mo e taukei ʻi hono moʻui ʻaki e ongoongoleleí. Fakaafeʻi kinautolu ke nau vahevahe atu pea mou felangakihakeʻaki” (Ko e Faiako ʻi he Founga ʻa e Fakamoʻuí, 5).