Vahefonua Teivisí, Mīsuli

14–20 Sune

Tokāteline mo e Ngaahi Fuakava 64–66

“ʻOku Fie Maʻu ʻe he ʻEikí ʻa e Loto mo e ʻAtamai Fie Faí”

Lolotonga hoʻomou ako ʻi he uike ní, fakakaukauʻi ʻi he faʻa lotu pe ko e hā ʻa e ngaahi tefitoʻi moʻoni mei he Tokāteline mo e Ngaahi Fuakava 64–66 te ne fakatupulaki ʻa e tui mo e ʻilo ʻa e kau mēmipa hoʻo kalasí.

Lekooti Hoʻo Ngaahi Ongó

Fakaafeʻi e Feʻinasiʻakí

Ke poupouʻi ʻa e kau mēmipa ʻo e kalasí ke nau vahevahe ha faʻahinga meʻa ʻoku nau pehē ʻoku mahuʻinga ʻi heʻenau ako folofola ʻi he uike ní, te ke lava ʻo kole ange ke nau fakakaukauloto ki he ngaahi faingataʻa ʻoku tau fehangahangai mo ia ʻi he kuonga ní. Hili ia peá ke toki fakaafeʻi ke nau vahevahe ha foʻi veesi mei he Tokāteline mo e Ngaahi Fuakava 64–66 ʻoku nau ongoʻi ʻe lava ʻo tokoni ʻi ha taha ʻo e ngaahi faingataʻa ko iá.

Akoʻi ʻa e Tokāteliné

Tokāteline mo e Ngaahi Fuakava 64:1–11

ʻOku fie maʻu ke tau fefakamolemoleʻaki.

• ʻE ala ʻaonga ki he kau mēmipa ʻo e kalasí ke nau talanoa ki he ʻuhinga ʻe lava ke faingataʻa ai hano fakamolemoleʻi ʻo e niʻihi kehé—mo ha founga kuo nau ikunaʻi ai e ngaahi fangataʻa ko iá. Te nau lava ke kumi ʻi he Tokāteline mo e Ngaahi Fuakava 64:1–11 ha ngaahi tefitoʻi moʻoni mo ha ngaahi moʻoni ʻokú ne ueʻi kinautolu ke nau faʻa fakamolemole ange. Ko e hā ʻoku tau ako fekauʻaki mo e Fakamoʻuí mei he ngaahi veesi ko ʻení? Ke tokoni ke fakatātaaʻi e ngaahi tāpuaki ʻo e fakamolemolé, te ke lava ʻo vahevahe ʻa e talanoa ʻo Mōleli Pauení mei he pōpoaki ʻa ʻEletā Sefilī R. Hōlaní “Ko e Ngāue ʻo e Fakaleleí” (Ensign pe Liahona, Nōvema 2018, 77–79) pe ko e vitiō “Faʻa Fakamolemolé: Naʻe Fakamaʻamaʻa ʻEku Kavengá” (ChurchofJesusChrist.org). Pe ko ha loto-fiemālie ha mēmipa ʻo e kalasí ke ne vahevahe ha talanoa fakafoituitui ʻo haʻane fakamolemoleʻi pe maʻu ha fakamolemole. Naʻe tāpuekina fēfē ʻa e kakai ʻi he ngaahi sīpinga ko ʻení ʻe he mālohi ʻo e fakamolemolé?

Tokāteline mo e Ngaahi Fuakava 64:31–34

ʻOku kolea ʻe he ʻEikí hotau “lotó mo e ʻatamai fie faí.”

• ʻOku ʻikai finangalo e ʻEikí ke tau “fiu” [he fai leleí]; ka neongo iá, ʻoku fakanatula pē ki he kakai ʻoku feinga ke fai honau lelei tahá—pea kau ai mahalo mo ha niʻihi ʻi hoʻo kalasí—ke nau “fiu ʻi he faileleí.” Ko e hā nai e ʻuhinga ʻoku hoko ai ʻa e fakafiu ko ʻení? Ko e hā ʻa e faleʻi ʻoku tau maʻu ʻi he Tokāteline mo e Ngaahi Fuakava 64:31–34 te ne ala tokoniʻi kitautolu ʻi he taimi ʻoku tau fefaʻuhi ai mo e faʻahinga ongo peheé?

• Koeʻuhí ke lelei ange hoʻomou alēleá, te ke lava ʻo fakaʻaliʻali ha ʻū tā ʻo ha meʻa ʻoku lahi mo fakaʻofoʻofa naʻe langa fuoloa ʻaki ha “ngaahi meʻa iiki”—hangē ko ha fakatātā taila maka pe ko ha fale piliki. Ko e hā ha niʻihi ʻo e ngaahi sīpinga ʻo e “ngāue lahi” kuo foaki mai ʻe he ʻEikí maʻatautolú? Ko e hā ha fanga kiʻi meʻa iiki te tau lava ʻo fai he taimí ni ke fakatoka ʻa e fakavaʻe ki he ngāue ko iá?

• Ke tokoni ki he kau mēmipa ʻo e kalasí ke nau fakakaukau lahi ange ki he Tokāteline mo e Ngaahi Fuakava 64:34, te ke lava ʻo tohiʻi ʻa e Loto mo e ʻAtamai Fie Faí ʻi he palakipoé. ʻE lava ke hiki ʻe he kau mēmipa ʻo e kalasí ʻi lalo ʻi he ngaahi ʻuluʻitohi ko ʻení ʻa e ngaahi meʻa ʻoku nau ongoʻi ko e ʻuhinga ia ʻo e foaki hotau lotó mo e ʻatamai fie faí ki he ʻEikí. Ke maʻu ha fakamatala ki he ngaahi foʻi lea ko ʻení, vakai ki he lea ʻa ʻEletā Tōnolo L. Holositulomu ʻi he “Ngaahi Maʻuʻanga Tokoni Kehé.” ʻE lava foki ke ʻomi ha ngaahi ʻilo ʻe he ngaahi potufolofola hangē ko ʻení: Mōsaia 7:33; ʻEta 4:15; Tokāteline mo e Ngaahi Fuakava 43:34; Mōsese 7:18; Siosefa Sāmita—Hisitōlia 1:19.

Tokāteline mo e Ngaahi Fuakava 65

ʻOku hanga ʻe he puleʻanga ʻo e ʻOtuá ʻi he māmaní ʻo teuteuʻi ʻa e māmaní ki he toe hāʻele mai ʻa e Fakamoʻuí.

• ʻOku ʻomi ʻe he Tokāteline mo e Ngaahi Fuakava 65 ha fakamatala fakalaumālie ki he misiona ʻo e Siasi ʻo e ʻEikí ʻi he ngaahi ʻaho kimui ní. Ke tokoni ke fakatokangaʻi ʻe he kau mēmipa ʻo e kalasí ʻenau konga ʻi he misioná ni, te ke lava ʻo fakaafeʻi kinautolu ke nau fekumi ʻi he vahe 65 ki he ngaahi tali ki he ʻū fehuʻi hangē ko ʻení: Ko e hā ʻoku finangalo ʻa e ʻEikí ke fakahoko ʻe Hono puleʻangá ʻi he māmaní? Ko e hā ʻokú Ne finangalo ke u fai ke tokoní? Te mou lava foki ʻo vakai ki he pōpoaki ʻa Palesiteni Tāleni H. ʻOakesi ʻi he “Ngaahi Maʻuʻanga Tokoni Kehé.” ʻE lava ke vahevahe ʻe he kau mēmipa ʻo e kalasí ʻa e founga te nau tali ʻaki e ngaahi fehuʻi ʻa Palesiteni ʻOakesí.

Ngaahi Maʻuʻanga Tokoni Kehé

“ʻA e loto mo e ʻatamai fie faí.”

Naʻe fokotuʻu ʻe ʻEletā Tōnolo L. Holositulomu ʻa e ʻuhinga ko ʻení ki he kupuʻi lea “loto mo ha ʻatamai fie faí”:

“Ko e [mafú] ko e fakataipe ia ʻo e ʻofa mo e tukupā. ʻOku tau fai ha ngaahi feilaulau mo fua e ngaahi kavenga ʻa ha kakai ʻoku tau ʻofa ai, ʻa ia he ʻikai ke tau fakahoko ʻi ha toe ʻuhinga kehe. Kapau ʻoku ʻikai ke ʻi ai ha ʻofa, ʻoku mōlia leva ʻetau tukupaá. …

“ʻOku ʻuhinga ʻa e maʻu ha ‘ʻatamai fie faí’ ke fai hotau lelei tahá mo e fakakaukau lelei tahá pea fekumi ki he poto ʻo e ʻOtuá. ʻOkú ne fokotuʻu mai ko e ako līʻoa taha ʻi he kotoa ʻo ʻetau moʻuí ʻoku totonu ke fekauʻaki ia mo e ngaahi meʻa ʻoku natula taʻengatá. ʻOku ʻuhinga ia kuo pau ke ʻi ai ha vā fekauʻaki pau ʻi he vahaʻa ʻo e fanongo ki he folofola ʻa e ʻOtuá mo e talangofua ki aí” (“The Heart and a Willing Mind,” Ensign, June 2011, 31–32).

Teuteu ki he Hāʻele ʻAnga Ua Maí.

“ʻE fēfē kapau ko ʻapongipongi ʻa e ʻaho ʻe hāʻele mai ai ʻa [Sīsū Kalaisí]? Kapau ʻoku tau ʻilo te tau feʻiloaki mo e ʻEikí ʻapongipongi—ʻi haʻatau mate fakafokifā pe ko Haʻane hāʻele fakatuʻupakē mai—ko e hā te tau fai he ʻaho ní? Ko e hā ha vetehia te tau fai? Ko e hā ha ngaahi angafai te tau taʻofi? Ko e hā ha ngaahi moʻua te tau totongi? Ko e hā ha ngaahi fakamolemole te tau fai? Ko e hā ha ngaahi fakamoʻoni te tau fakahoko?” (Dallin H. Oaks, “Preparation for the Second Coming,” Ensign pe Liahona, May 2004, 9).

Fakatupulaki ʻo ʻEtau Founga Akoʻí

Maʻu ha mālohi mei he Fakamoʻuí. “ʻI hoʻo feinga ko ia ke moʻui ʻaki mo faiako hangē ko e Fakamoʻuí, ʻe ʻi ai ha ngaahi taimi te ke tōnounou ai. ʻOua naʻá ke lotofoʻi; ka ke tuku ke hanga ʻe ho ngaahi fehālākí mo e ngaahi vaivaí ʻo fakatafoki koe ki he Tamai Hēvaní pea mo e Fakamoʻuí” (Ko e Faiako ʻi he Founga ʻa e Fakamoʻuí, 14).