ʻOku ʻOfa ʻa e Tauhisipí, tā ʻa Simon Dewey

28 Sune–4 Siulai

Tokāteline mo e Ngaahi Fuakava 71–75

“ʻOku ʻIkai ha Mahafu Kuo Ngaohi ke Tauʻi ʻAki ʻa Kimoua ʻe Monūʻia”

ʻI hoʻo lau ʻa e Tokāteline Mo e Ngaahi Fuakava 71–75, fakakaukau ki he kakai ʻokú ke akoʻí. Ko e hā ʻokú ke ʻilo fekauʻaki mo kinautolú? Ko e hā ʻoku nau fie maʻú?

Lekooti Hoʻo Ngaahi Ongó

Fakaafeʻi e Feʻinasiʻakí

Fakaafeʻi e kau mēmipa ʻo e kalasí ke nau vahevahe ha niʻihi ʻo e ngaahi moʻoni ne nau maʻu ʻi he lolotonga ʻo ʻenau ako ʻa e Tokāteline mo e Ngaahi Fuakava 71–75. Ko e hā ha ngaahi aʻusia kuo nau maʻu fekauʻaki mo e ngaahi moʻoni ko ʻení?

Akoʻi ʻa e Tokāteliné

Tokāteline mo e Ngaahi Fuakava 71

Te tau lava ʻo muimui ʻi he fakahinohino ʻa e Laumālie Māʻoniʻoní ʻi heʻetau taukaveʻi ʻa ʻetau tuí.

Tokāteline mo e Ngaahi Fuakava 72:8–16

Ko e kau pīsopé ko e kau tauhi kinautolu ʻi he ngaahi meʻa fakalaumālie mo fakatuʻasino ʻo e puleʻanga ʻo e ʻEikí.

• ʻE lava fēfē ke tokoni e ngaahi fakahinohino ʻa e ʻEikí kia Niueli K. Uitenei, ʻi he taimi naʻe ui ai ia ko e pīsope ʻi Ketilaní, kiate kinautolu ʻokú ke akoʻí ke nau houngaʻia ʻi he kau pīsope kuo ui ke tokoni kiate kinautolú? Te ke lava ʻo kole ki he kau mēmipa ʻo e kalasí ke nau kumi ʻi he Tokāteline mo e Ngaahi Fuakava 72:8–16, ki ha niʻihi ʻo e ngaahi fatongia ʻo Pīsope Uiteneí pea fakafehoanaki ia ki he ngaahi fatongia ʻo e kau pīsope ʻo e ʻaho ní ʻi he “Ngaahi Maʻuʻanga Tokoni Kehé.” Mahalo naʻa lava ke vahevahe ʻe he kau mēmipa ʻo e kalasí ʻa e founga kuo tāpuekina ai kinautolu ʻe ha tokoni ʻa ha pīsope. Ko e hā te tau lava ʻo fai ke tau poupouʻi kakato ange ai ʻetau pīsopé?

  

  ʻOku tokoni e kau pīsopé ki he kāingalotú ke feau ʻenau ngaahi fiemaʻu fakatuʻasinó.

Tokāteline mo e Ngaahi Fuakava 73

Te tau lava ʻo fekumi ki ha ngaahi faingamālie ke vahevahe ai e ongoongoleleí.

• Naʻe fakahā ʻe he ʻEikí kia Siosefa Sāmita mo Sitenei Likitoni ke na malanga ʻaki ʻa e ongoongoleleí ʻo “fakatatau ki he meʻa ʻe ʻaonga ke faí” (Tokāteline mo e Ngaahi Fuakava 73:4) lolotonga foki ʻena kei ngāue ke liliu e Tohi Tapú. Mahalo naʻa lava ke vahevahe ʻe he kau mēmipa ʻo e kalasí ha ngaahi founga kuo nau ʻiloʻi ne “ʻaonga ke [nau] fai” ke vahevahe ai ʻa e ongoongoleleí fakataha mo honau ngaahi fatongia kehé. ʻE lava ke nau maʻu ha faleʻi mahuʻinga ʻi he pōpoaki ʻa ʻEletā Tietā F. ʻUkitofá “Ngāue Fakafaifekaú: Ko Hono Vahevahe e Meʻa ʻi ho Lotó” (Ensign pe Liahona, Mē 2019, 15–18).

Tokāteline mo e Ngaahi Fuakava 75:2–16

ʻOku finangalo ʻa e ʻOtuá ke tau “ngāue ʻaki [hotau] iví kotoa.”

• Ko e ngaahi fakahinohino ko ia ʻa e ʻEikí ki ha niʻihi ʻo e kaumātuʻa tokolahi fekauʻaki mo e founga ke vahevahe ai ʻa e ongoongoleleí, ʻe lava ke ne ueʻi ʻa e kau mēmipa ʻo e kalasí ke nau vahevahe fakamātoato ange ʻa e ongoongoleleí. Te ke lava ke hiki ʻi he palakipoé ʻa e Ngāue ʻaki ho iví pea kole ki he kau mēmipa ʻo e kalasí ke nau lisi ʻa e ngaahi foʻi lea mo e ngaahi kupuʻi lea ʻoku haʻu ki heʻenau fakakaukaú, ʻi he taimi ʻoku nau fakakaukau ai ki ha taha ʻokú ne ngāue ʻaki hono iví kotoa ki hono vahevahe ʻo e ongoongoleleí. Te nau toe lava foki ke aleaʻi hono ʻuhinga ʻo e “tatalí” pe “nofonoá” ʻi hono vahevahe ʻo e ongoongoleleí. Ko e hā ʻoku akoʻi kitautolu ʻe he Tokāteline mo e Ngaahi Fuakava 75:2–16 fekauʻaki mo e founga ʻoku poupouʻi ai ʻe he Fakamoʻuí ʻa kinautolu ʻoku nau tauhi faivelenga kiate Iá?

Ngaahi Maʻuʻanga Tokoni Kehé

Ngaahi fatongia ʻo ha pīsope.

Naʻe akoʻi ʻe Palesiteni Kōtoni B. Hingikelī:

“ʻOku houngaʻia moʻoni hoku lotó ʻi heʻetau kau pīsopé. ʻOku ou mātuʻaki houngaʻia ʻi he fakahā ʻa e Fungani Māfimafí ʻa ia ne ʻuhinga ai hono fokotuʻu pea ʻoku lolotonga ngāue ai ʻa e lakanga ko ʻení. …

“… ʻOku mau fakatuʻamelie te mou hoko ko e taulaʻeiki lahi pule ʻo e uōtí, ko ha fai-fakahinohino ki he kakaí, ko ha taha maluʻi mo e tokoni kiate kinautolu ʻoku faingataʻaʻiá, ko ha fakafiemālie kiate kinautolu ʻoku mamahí, ko ha tokotaha foaki kiate kinautolu ʻoku faingataʻaʻiá. ʻOku mau fakatuʻamelie te mou hoko ko ha taha tauhi mo e maluʻi ʻo e tokāteline ʻoku akoʻi ʻi homou uōtí, ʻi he tuʻunga lelei ʻo e akoʻí, ʻi hono fakakakato ʻo e ngaahi lakanga lahi ʻoku fie maʻú. …

“… Kuo pau ke ke fakapapauʻi ʻoku ʻikai fiekaia pe taʻevala pe taʻe-nofoʻanga ha taha. Kuo pau ke ke ʻiloʻi ʻa e ngaahi tūkunga ʻo e feituʻu kotoa ʻokú ke tokangaʻí.

“Kuo pau ke ke hoko ko ha tokotaha fakafiemālie mo e fai-fakahinohino ki ho kakaí. Kuo pau ke ke mateuteu ke tali lelei ha taha ʻoku tangi he mamahí. Kuo pau ke ke mateuteu ke vahevahe ʻenau ngaahi kavengá. Kuo pau ke ke tokoni ʻi he ʻofa ʻo aʻu ai pē ki he taha ʻoku faihalá” (“The Shepherds of the Flock,” Ensign, May 1999, 52–53).

Fakatupulaki ʻo ʻEtau Founga Akoʻí

Hoko ko ha faiako anga faka-Kalaisi ange. Fakakaukau ke ke fakaʻaongaʻi ʻa e ngaahi fehuʻi vakaiʻi fakaekita ʻi he peesi 38 ʻo e Ko e Faiako ʻi he Founga ʻa e Fakamoʻuí ke tokoni atu ke ke ako ʻa e founga te ke lava ai ʻo faiako tatau ange mo e Fakamoʻuí.