ko Kalaisi mo e talavou koloaʻiá

Ko Kalaisi mo e Talavou Koloaʻiá,, tā ʻa Heinrich Hoffman

19–25 Siulai

Tokāteline mo e Ngaahi Fuakava 81–83

“He Ko Ia ʻOku Foaki Ki Ai ʻa e Meʻa Lahí, ʻOku ʻEkeʻi ʻa e Meʻa Lahi Meiate Ia”

Manatuʻi ʻoku ʻi ai ha ngaahi aʻusia fakalaumālie ʻa e kau mēmipa ʻo hoʻo kalasí ʻi heʻenau ako ʻa e folofolá ʻi ʻapí. Fakakaukauʻi ʻi he faʻa lotu ki ha founga te ke lava ai ʻo fakalotolahiʻi kinautolu ke nau vahevahe ʻenau ngaahi aʻusiá ke nau fepoupouaki ai.

Lekooti Hoʻo Ngaahi Ongó

fakaʻilonga ʻo e feʻinasiʻakí

Fakaafeʻi e Feʻinasiʻakí

Fakaafeʻi ʻa e kau mēmipa ʻo e kalasí ke nau fili ha kupuʻi lea mei ha taha ʻo e ngaahi vahe ko ʻení ʻe lava ke hoko ko ha tefito lelei ʻo e vahé: Tokāteline mo e Ngaahi Fuakava 81, 82 mo e 83. Ko e hā naʻa nau fili ai e ngaahi hingoa ko ʻení?

fakaʻilonga ʻo e akoʻí

Akoʻi ʻa e Tokāteliné

Tokāteline mo e Ngaahi Fuakava 81:5; 82:18–19

ʻOku totonu ke tau takitaha feinga ki he “meʻa ʻoku lelei ki [hotau] kaungāʻapí.”

• ʻOku fokotuʻu mai ʻe he lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ha ngaahi fehuʻi ke fakalaulauloto ki ai fekauʻaki mo e Tokāteline mo e Ngaahi Fuakava 81:5. ʻE lava foki ʻeni ke hoko ko ha ngaahi fehuʻi lelei ke aleaʻi ʻe hoʻo kalasí. ʻIkai ngata aí, ka ke fakakaukau foki ke vahevahe ha aʻusia fakataautaha ʻi ha taimi naʻá ke ongoʻi “vaivai” ai ʻi ha faʻahinga founga pea naʻe hoko e ngāue tokoni ʻa ha taha ke ne hiki hake pe fakamālohia ai koe. Mahalo naʻa ʻoku ʻi ai ha ngaahi aʻusia tatau ʻa e kau mēmipa ʻo e kalasí ke nau vahevahe.   Te ke lava foki ke vahevahe ʻa e fakamatala ʻa Palesiteni M. Lāsolo Pālati ʻoku ʻi he “Ngaahi Maʻuʻanga Tokoni Kehé.”

• Fakakaukau ke ke kole ki he kau mēmipa ʻo e kalasí ke nau ako ʻa e Tokāteline mo e Ngaahi Fuakava 82:18–19, ʻo kumi ha ngaahi tefitoʻi moʻoni ʻoku tokoni ke mahino kiate kinautolu ʻa e ngaahi taumuʻa mo e ngaahi tāpuaki ʻo hono tokoniʻi e niʻihi kehé. Hili ia pea tuku ange ke nau vahevahe ʻa e meʻa ne nau akó. Te ke lava foki ke huluʻi ʻa e foʻi vitiō “Ngaahi Akonaki ʻa Tōmasi S. Monisoni: Fakahaofi ʻa Kinautolu ʻOku Faingataʻaʻiá” (ChurchofJesusChrist.org). Naʻe fakafōtunga fēfē ʻe he kau mēmipa ʻo e uooti ʻa Pīsope Monisoní ʻa e meʻa ʻoku akoʻi ʻe he veesi 18–19?

Tokāteline mo e Ngaahi Fuakava 82:8–10

“Ko au, ko e ʻEikí, ʻoku ou haʻisia, ʻo ka mou ka fai ʻa e meʻa ʻoku ou leaʻakí.”

• Te mou lava ʻo lau fakataha pe ʻi ha ngaahi kulupu iiki e Tokāteline mo e Ngaahi Fuakava 1:37–38; 82:10; 130:20–21 ke tokoni ke mahino ki he kau mēmipa ʻo e kalasí ʻa e fekauʻaki ʻo ʻetau fie talangofuá mo e ngaahi tāpuaki kuo talaʻofa mai ʻe he ʻOtuá. Ko e hā ʻoku akoʻi mai ʻe he ngaahi potufolofola ko ʻení fekauʻaki mo e ʻEikí? Mahalo naʻa lava ke lisi ʻe he kau mēmipa ʻo e kalasí ʻa e ngaahi foʻi lea ʻoku nau fakamatalaʻi Hono ʻulungāngá, ʻo fakatatau mo e ngaahi veesi ko ʻení.

• Hili hono lau ʻa e veesi 10, ʻe lava leva ʻe he kau mēmipa ʻo e kalasí ke nau talanoa fekauʻaki mo e meʻa kuo talaʻofa mai ʻe he ʻEikí maʻatautolú mo e founga kuo tauhi ai ʻe he ʻEikí ʻEne ngaahi talaʻofá. ʻE lava ke tokoni e talanoa naʻe fai ʻe Sisitā Veisinia H. Piesi ʻi he “Ngaahi Maʻuʻanga Tokoni Kehé” ke ʻilo ʻe he kau mēmipa ʻo e kalasí ʻoku tāpuakiʻi kitautolu ʻe he ʻEikí ʻo fakatatau mo Hono potó, kae ʻikai tatau maʻu pē mo e founga ʻoku tau fie maʻú pe ʻamanaki ki aí.

• Ko e hā ʻoku tau ako mei he Tokāteline mo e Ngaahi Fuakava 82:8–10 fekauʻaki mo e ʻuhinga ʻoku foaki mai ai ʻe he Tamai Hēvaní e ngaahi fekaú? Mahalo naʻa maʻu ʻe he kau mēmipa ʻo e kalasí ha ngaahi ʻilo ʻi he ngaahi veesi ko ʻení ke fakaʻaongaʻi ʻi hono tokoniʻi ha kaungāmeʻa pe fānau ʻoku fakakaukau ʻoku fakapōpula ʻa e ngaahi fekaú. Pe ko haʻanau vahevahe ha ngaahi aʻusia kuó ne akoʻi kinautolu ke nau lau e ngaahi fekaú ko e ngaahi tāpuaki.

fakaʻilonga ʻo e ngaahi maʻuʻanga tokoni kehé

Ngaahi Maʻuʻanga Tokoni Kehé

Lotu haohaoá.

Naʻe akoʻi ʻe Palesiteni M. Lāsolo Pālati:

“ʻOku lahi ʻetau ngaahi fiemaʻú, ngaahi hohaʻá, mo e ngaahi ngāue ke faí ʻi hotau tuʻunga fakaākongá. Ka neongo ia,ʻoku ʻi ai ha ngaahi ngāue kuo pau ke ʻi he loto maʻu pē ʻa e mēmipa ʻi he Siasí. ʻOku tuʻutuʻuni ʻe he ʻEikí, ‘Ko ia, ke ke faivelenga; tuʻu ʻi he lakanga kuó u fili koe ki aí; tokoniʻi ʻa e vaivaí, hiki hake ʻa e ngaahi nima ʻoku tautau ki laló, pea fakamālohi ʻa e ngaahi tui ʻoku vaivaí’ [Tokāteline mo e Ngaahi Fuakava 81:5; ko e toki tānaki atu e fakamamafaʻí].

“Ko e ngāue ʻeni ke fai ʻe he Siasí! Ko e lotu haohaoá ʻeni! Ko e ongoongoleleí ʻeni ʻi hono tuʻunga moʻoní, ʻi heʻetau tokoniʻi, hiki hake, pea mo fakamālohia kinautolu ʻoku masiva fakalaumālie mo fakatuʻasinó! Ko hono fakahoko iá, ʻoku fie maʻu ai kitautolu ke tau ʻaʻahi mo tokoniʻi kinautolu [vakai, Sēmisi 1:27], ke tōkakano ʻenau fakamoʻoní ʻi he tui ki he Tamai Hēvaní mo Sīsū Kalaisi pea mo ʻEne Fakaleleí ʻi honau lotó” (“Ngaahi Meʻaʻofa Mahuʻinga mei he ʻOtuá,” Ensign pe Liahona, Mē 2018, 11).

ʻOku tāpuekina kitautolu ʻe he ʻEikí ʻi Heʻene ngaahi founga fakaofo pē ʻAʻana.

Naʻe fakamatala ʻA Sisitā Veisinia H. Piesi, ko ha mēmipa mālōlō ʻo e Kau Palesitenisī Lahi ʻo e Kau Finemuí, kau ki ha fefine naʻe hohaʻa ki heʻene fānau kuo ʻalu heé. Naʻá ne fokotuʻu ha taumuʻa fisifisimuʻa ke fakalahi ʻene ʻalu ki he temipalé mo ongoʻi fakapapau ʻe tali ʻe he ʻEikí ʻa e feilaulau mahuʻingá ni ʻaki Haʻane liliu e ʻulungaanga ʻo ʻene fānaú. Naʻe pehē ʻe he fefiné:

“Hili ha taʻu ʻe hongofulu ʻo e fakalahi ʻeku ʻalu ki he temipalé mo e lotu maʻu peé, ʻoku ou fakameʻapangoʻia ke u talaatu kuo teʻeki liliu e ngaahi fili ʻa ʻeku fānaú. …

“Ka kuó u liliu au. Ko ha fefine foʻou au. … Kuó u tukuange ʻeku ngaahi fakangatangatá pea kuo lava ʻeni ke u ʻamanaki lelei ki he ʻEikí. … Kuo liliu ʻeku ngaahi fakaʻamú. Kuo ʻikai ke u toe nofo ʻo ʻamanaki ʻe liliu ʻeku fānaú, ka ʻoku ou fakatuʻamelie ki he ngaahi ʻaloʻofa ongongofuá ni pea ʻoku ou fonu ʻi he loto-houngaʻia koeʻuhí ko kinautolu. … ʻOku ngāue ʻa e ʻEikí ʻi ha ngaahi founga fakaofo, pea ʻoku fakafonu moʻoni ʻaki au e nonga ʻoku mahulu hake ʻi he mahino kotoa pē” (ʻi he “Prayer: A Small and Simple Thing,” At Pulpit [2017], 288–89).

Fakatupulaki ʻo ʻEtau Founga Akoʻí

Fakaafeʻi ʻa e toʻu tupú ke nau kau atu ki hoʻo lēsoní. ʻOange ha faingamālie ki he toʻu tupú ke nau feakoʻiʻaki ai. ʻE lava ke hoko ʻenau fanongo ki heʻenau fefakamoʻoniʻakí pe ngaahi aʻusiá ko ha ivi tākiekina mālohi ia. Tokoni ki he toʻu tupú ke nau teuteu ke faiako, pea fakahinohino ange ʻa e ʻuhinga ke faiako ʻi he founga ʻa e Fakamoʻuí, ʻo ka fie maʻu (vakai, Ko e Faiako ʻi he Founga ʻa e Fakamoʻuí, 27–28).