Ko hono maʻu ʻe Siosefa Sāmita ʻa e Lakanga Taulaʻeiki Faka-Melekisētekí

Ko Hono Toe Fakafoki Mai ʻo e Ongoongoleleí, tā ʻa Liz Lemon Swindle.

26 Siulai–1 ʻAokosi

Tokāteline mo e Ngaahi Fuakava 84

“Ko e Mālohi ʻo e Anga Faka-ʻOtuá”

Ko e hā te ke fai ke fakaafeʻi e kau mēmipa ʻo e kalasí ke nau vahevahe ʻa e meʻa ne nau ʻilo ʻi heʻenau ako ʻa e Tokāteline mo e Ngaahi Fuakava 84?

Lekooti Hoʻo Ngaahi Ongó

fakaʻilonga ʻo e feʻinasiʻakí

Fakaafeʻi e Feʻinasiʻakí

Fakaafeʻi ʻa e kau mēmipa ʻo e kalasí ke nau vahevahe mo ha mēmipa kehe ʻo e kalasí ha foʻi moʻoni ne nau maʻu ʻi he vahe 84 naʻá ne ueʻi fakalaumālie pe tokoniʻi kinautolu ke mahino ange ʻa e lakanga fakataulaʻeiki ʻo e ʻOtuá. Hili ia pea fakaafeʻi ha niʻihi tokosiʻi ke nau vahevahe ia mo e kalasí.

fakaʻilonga ʻo e akoʻí

Akoʻi ʻa e Tokāteliné

Tokateline mo e Ngaahi Fuakava 84:1–5, 17–28, 31–42

ʻOku tau ʻatā kotoa ki he mālohi mo e ngaahi tāpuaki ʻo e lakanga fakataulaʻeiki ʻo e ʻOtuá.

• ʻOku kamata ʻe he ʻEikí ʻa e “fakahā [ko ʻení] ʻi he lakanga fakataulaʻeikí” (Tokāteline mo e Ngaahi Fuakava 84, ʻuluʻi fakamatala ʻo e vahé) ʻaki hano akoʻi ʻe langa ha temipale ʻi Saione (vakai, veesi 1–5). Te ke tokoniʻi fēfē ke mahino ki he kau mēmipa ʻo e kalasí ʻa e fekauʻaki ʻo e ngaahi taumuʻa toputapu ʻo e temipalé mo e lakanga fakataulaʻeikí? Te ke lava ʻo kamata ʻaki haʻo hiki ha fehuʻi ʻi he palakipoé, hangē ko ʻení Ko e hā e ngaahi taumuʻa ʻo e lakanga fakataulaʻeikí? pea toki fakaafeʻi leva e kau mēmipa ʻo e kalasí ke nau kumi e ngaahi talí ʻi he Tokāteline mo e Ngaahi Fuakava 84:17–28, 31–42. ʻOku tokoni fēfē ʻa e ngaahi temipalé mo e ngaahi ouau fakatemipalé ki hono fakahoko ʻo e ngaahi taumuʻa ko ʻení?

• Ke tokoni ke mahino ki he kau mēmipa ʻo e kalasí ʻa e mālohi ʻe lava ke maʻu ʻe he lakanga fakataulaʻeikí ʻi heʻenau moʻuí, te ke lava ʻo fakaafeʻi kinautolu ke nau lau ʻa e Tokāteline mo e Ngaahi Fuakava 84:17–28 pea fakakaukau ki he founga ne mei kehe ai ʻenau moʻuí ka ne taʻeʻoua e lakanga fakataulaʻeiki ʻo e ʻOtuá. Poupouʻi kinautolu ke nau vahevahe ʻa e ʻuhinga ʻoku nau houngaʻia ai ʻi he lakanga fakataulaʻeikí, fakataha mo ʻenau ngaahi aʻusia ki he mālohi ʻo e lakanga fakataulaʻeikí—ʻi honau ngaahi fāmilí, ngaahi uiuiʻí, pe moʻui fakatāutahá. ʻOku tau maʻu fēfē ʻa e mālohi ʻo e lakanga fakataulaʻeikí?

• Ko e fakapapau mo e fuakava ʻo e lakanga fakataulaʻeikí (vakai, Tokāteline mo e Ngaahi Fuakava 84:31–42) ʻoku ʻi ai hano fakaʻaongaʻi makehe kiate kinautolu ʻoku fakanofo ki ha tuʻunga ʻo e lakanga fakataulaʻeikí. Ka ko ha konga lahi ʻo e ngaahi tāpuaki ne talaʻofa he kamataʻanga ʻo e ngaahi vēsí ni ʻoku ʻatā ia ki he taha kotoa. Ke tokoni ke ʻiloʻi ʻe he kau mēmipa ʻo e kalasí e kaunga ʻo e ngaahi talaʻofa ko ʻení kiate kinautolú, te ke lava ʻo fakaafeʻi ke nau lau ʻa e veesi 33–42 pea talanoa ki ha ngaahi founga te tau lava ai ʻo “maʻu” ʻa e lakanga fakataulaʻeikí (veesi 35), kau tamaioʻeiki ʻa e ʻEikí, mo e ʻEikí. Te nau lava foki ʻo lau e ngaahi fakamatala ʻi he “Ngaahi Maʻuʻanga Tokoni Kehé” ke ʻiloʻi e meʻa ʻoku fie maʻu ke tau fakahoko ke maʻu ai ʻa e ngaahi tāpuaki ʻo e lakanga fakataulaʻeikí. ʻE lava ke ke tokoni ki he kau mēmipa ʻo e kalasí ke nau fakakaukau ki he meʻa ʻe ala fakakau ʻi he “meʻa kotoa pē ʻoku maʻu ʻe [he] Tamaí” (veesi 38), hangē ko Hono ngaahi ʻulungāngá mo e faʻahinga moʻui ʻokú Ne hōifua ki aí. Ko e hā mo ha toe meʻa ʻoku tau mahuʻingaʻia ai fekauʻaki mo e ngaahi veesi mo e fakamatala ko ʻení?

  ko e maʻu ʻe ha fefine ʻa e sākalamēnití

  ʻOku faitāpuekina ʻe he ngaahi ouau ʻo e lakanga fakataulaʻeikí ʻa e fānau kotoa pē ʻa e ʻOtuá.

Tokāteline mo e Ngaahi Fuakava 84:61–88

ʻE poupouʻi ʻe he ʻEikí ʻa kinautolu ʻoku tauhi kiate Iá.

• Neongo ʻoku fakataumuʻa ʻa e ngaahi vēsí ni kiate kinautolu “ʻe ʻalu ʻo malanga ʻaki ʻa e ongoongoleleí ni ʻo e puleʻangá” (veesi 80), ka ko e lahi ʻo e ngaahi tefitoʻi moʻoni ʻoku ʻi aí ʻe lava ke fakaʻaongaʻi ai ki ha taha pē ʻoku tauhi ki he ʻOtuá. Te ke lava ʻo tufa ki he mēmipa takitaha ʻo e kalasí ha konga ʻo e Tokāteline mo e Ngaahi Fuakava 84:61–88 ke nau lau, pea kole ange ke nau vahevahe mo ha mēmipa kehe ʻo e kalasí ʻa e meʻa ne nau akó ʻa ia ʻe lava ʻo ʻaonga ki ha taha pē ʻoku tauhi ki he ʻEikí. ʻE lava ke fili ʻe he kau mēmipa ʻo e kalasí ha foʻi veesi pe ngaahi veesi ʻoku nau manako taha aí ke ako maʻuloto pe fokotuʻu ʻi ha feituʻu te nau lava ʻo sio ki ai he ʻaho kotoa pē. Ko e hā e ngaahi talaʻofa ʻoku nau vēkeveke taha ki aí? Ko e hā te tau vahevahe mei he ngaahi veesi ko ʻení ke ueʻi fakalaumālie e kau faifekau taimi-kakato lolotongá pe ko kinautolu ʻoku teuteu ke ngāué?

fakaʻilonga ʻo e ngaahi maʻuʻanga tokoni kehé

Ngaahi Maʻuʻanga Tokoni Kehé

ʻE lava ke maʻu ʻe he taha kotoa ʻa e meʻa kotoa ʻoku maʻu ʻe he Tamaí.

Naʻe akoʻi ʻe Palesiteni M. Lāsolo Pālati: “ʻE lava ke maʻu ʻe kinautolu kotoa kuo nau fai e fuakava toputapu mo e ʻEikí pea fakaʻapaʻapaʻi e ngaahi fuakava ko iá ha fakahā fakatāutaha, ke faitāpuekina ʻi he tauhi mai ʻa e kau ʻāngeló, ke fefolofolai mo e ʻOtuá, ke maʻu ʻa e kakato ʻo e ongoongoleleí, pea ko hono tumutumú, ke hoko ko e kau ʻea-hoko fakataha mo Sīsū Kalaisi, ki he meʻa kotoa ʻoku ʻa ʻetau Tamaí” (Kakai Tangata mo Fafine mo e Mālohi ʻo e Lakanga Fakataulaʻeikí,” Liahona, Sept. 2014, 32).

Naʻe tohi ʻe he fuofua kau palesitenisī ʻo e Fineʻofa ʻo e Siteiki Sōlekí ʻi he 1878: “ʻOku tau ongoʻi houngaʻia moʻoni ʻi he ngaahi tāpuaki ʻa ʻetau Tamai Hēvaní, ʻoku ui kitautolu, ko ʻEne kau kaunangá, ke hoko ko e kaungā-ngāue mo hotau houʻeiki tangatá ʻi hono langa hake ʻa e puleʻanga ʻo e ʻOtuá he funga ʻo e māmaní, ʻi he tokoni ki hono langa ʻo e ngaahi Temipalé, ʻa ia te tau lava ai ʻo maʻu e ngaahi tāpuakí ki taimi mo ʻitānití. ʻI he ngaahi ouau kotoa ʻoku maʻu ʻi he Fale ʻo e ʻEikí, ʻoku tuʻu ʻa e fefiné ʻi he tafaʻaki ʻo e tangatá, maʻá e moʻuí mo e pekiá fakatouʻosi, ʻo fakahaaʻi ʻoku ʻikai ʻi ai ʻa e tangatá kae ʻi he fefiné pe ʻoku ʻikai ʻi ai ʻa e fefiné kae ʻi he tangatá ʻi he ʻEikí” (Mary Isabella Horne, Elmina S. Taylor, and Serepta M. Heywood, “To the Presidents and Members of the Relief Society of Salt Lake Stake of Zion, Greeting!” Womanʻs Exponent, Jan. 15, 1878, 123).

Fakatupulaki ʻEtau Founga Akoʻí

Fakatefito hoʻo akoʻí ʻi he tokāteliné. Fakapapauʻi ʻoku nofotaha e ngaahi fealēleaʻaki ʻa hoʻo kalasí ʻi he ngaahi fakavaʻe fakatokāteline ʻi he folofolá. Te ke lava ʻo fai ʻeni ʻaki haʻo kole ki he kau mēmipa ʻo e kalasí ke nau lau e folofolá pea vahevahe ʻa e ngaahi moʻoni naʻa nau maʻú, kae pehē ki heʻenau ngaahi aʻusia ʻi hono moʻui ʻaki e ngaahi moʻoni ko iá. (Vakai, Ko e Faiako ‘i he Founga ‘a e Fakamo‘uí, 20–21.)